Danyeli 10
10
Danyeli nɛ veera Tigirisi buga ni ne
1Bene delo wone Peresia teo pɛ Sarusi na di paare o ke bena yatɔ to, mo Danyeli déem nɛ veera yadwonna. Danyeli yere dedwoŋi maa ye Bɛletesaza. Veera yam bere taane delo na ye chega ye de vei tigura na tiini ka chana to seeni mo. Danyeli na nɛ veera yam konto to, o ma lɔre taane dem kuri lanyerane.
2Maŋa kam konto ni ne, amo Danyeli wo déem tiini ko chɔge mo. A ma kwei da finlei-dedoa a yɔɔre a ke ne nɔɔno na keeri lua tei to. 3Da yam konto maama wone, a yɔɔre a ve wodi-ywoŋo dim, de nɔna donem mo, ye a ta ve se a nyɔ sana. A wo mɛ nuga a kwɛ a ya-goa kam.
4Boboa chana kam da finlei-yana dɛ dem ne, a déem maa zege Tigirisi bu-fara kam bubɛ baŋa ne. 5Amo na kwoni a yuu se a nii to, mo a nɛ nɔɔno na zo gare-fefale, ye sabu-seŋa na ye chekke to kila vɔ o teiŋa ne. 6O yera yɔɔre ya nyeene mo, ne kandwa-nyenno na ye tei to. O yibia de maa pepela ne doa pepelem tei. Min-vogo de maa zege o yia ne de tɔrega. O je sem, de o nɛ sem nyeene dedɛ ne ba na jege channa ba titiga se ba kwɛ-ka tei to. O kwora de maa yɔɔre ka dɔna ne kɔ-fɔrɔ na jeeri daane ye sɔɔ ke tei to.
7Amo Danyeli yerane déem mo nɛ veera yam. Ko ná ye balo maama ya na zege amo tei ne to, ba wo nɛ kolokolo. Veera yam sisiri ma tiini ya pa foone zo-ba, ye ba duri ba seigi. 8Mo kokuri amo yerane daare a zege da a nii veera-kenkagela yam. A na nɛ-ya to, mo a dam maama ti, ye a yera yam de te. A yibia yɔɔre ya da ya leiri mo. 9Amo ma ni o kwora. A na nigi to mo a to tega ne, ye a yibia jeeri tega kam. Amo ma maŋe da a dɔ a beiri.
10Nɔɔno jeŋa ma dwei-ne. O ma gɔ-ne pa a zaŋe a nadwoona baŋa ne ye a jataala ja tega. A yera maama de maa sae vare-vare. 11O ma ta de amo o we, “Danyeli, nmo tiini n jege kuri Wɛ tei ne. Konto to, zaŋe wɛɛne, se n pore n zwa n fɔge n cheigi kolo maama a na wó ta a bere‑m to. Kokuri to, ba toŋe-ne mo nmo tei ne.” O taane dem konto ma pa a zaŋe wɛɛne, ye a yera ta sae.
12O daa maa we, “Danyeli, yé ta‑n kɔre foone. Nam lɔre we ko zege dɛ dem nmo na yɔɔre n ja boboŋa se n ni wonnu kuri, ye n tiini n gwooni n tete n Tu Wɛ yiga ne ko ŋwaane to, mo Wɛ maŋe o ni n wɛ-lworo kom. O nam toŋe amo mo se a ja leira yam a ba a pa‑m. 13Ko na ye tei to, da finlei-dedoa mo tento, ye maleka kalo na tei Peresia teo kom to che a chwoŋa se a yé yi n tei. Wɛ malese dedɛɛra bam dedoa yere na ye Mikayeli to mo laam tu o woli-ne, Peresia dedɛɛra bam na pɛ se a dáane to ŋwaane.#Judi 1:9; Gurim 12:7 14Amo nam tu se a pa n lɔre kolo na wó yi nmo nɔɔna bam jwa seeni to mo. Kokuri to, veera yam na wó ji chega maŋa kalo to ta wo yi.”
15Maleka kam na wora o ŋɔɔne de amo konto to, a yia wo tega ne mo. A ni de ma mɔɔre ye a ware kolokolo se a ta. 16Wolo na nye de nabiinu to laam ma dwei amo ni pa se de puri. A ma ta ded‑o a we, “Amo Tu, veera yam mo tiini ya pa foone zo-ne, ye a yera maama de te. 17A ye nmo tontoŋeno mo. A nam wó ke tetɛ mo se a wane a ŋɔɔne de nmo wolo na ye a teiru to? Nii amo dam dem maama na ti, ye a siu vaŋe ko kɔe tei!”
18Wolo na nye de nabiinu to daa ma dwei-ne pa se a jwoori a na dam. 19O laam ma ta de amo o we, “Yé ta‑n kɔre foone, n na tiini n jege kuri n pa Wɛ to ŋwaane. Yazura ta wo n tei ne! Ke n tete n ke daane se n na baare.”
O taane dem ma pa-ne dam, ye a ta ded‑o a we, “Amo tu, nam ta kolo na wora to, se n taane dem pɛ a dam jwoori.”
20O ma leiri o we, “Nmo laam lɔre kolo ŋwaane a na tu n tei ne to na? Ko ná ke fee, amo wó jwoori a vo a kwaare jara de Peresia teo dedɛɛro wom. A nam ná wane‑o a ti, Girisi teo dedɛɛro wom de wó nwoŋi o ba. 21Nam ta‑n ye konto chemm, se a ta kolo maama na popone ko tiŋi chega tɔnɔ kom wone to a bere‑m. Nam lɔre lanyerane we nɔɔn-nɔɔno tera se o woli-ne jara keim baŋa ne, ko ná dae Mikayeli yerane mo. Wonto nam mo ye maleka kalo na nii á nɔɔna bam baŋa ne to.
Currently Selected:
Danyeli 10: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)