Amosi 2
2
Moaba tiina taane
1 Baŋa Wɛ ni dem mo tento:
“Moaba teo kom nɔɔna yeini ba tiini ba ke wɛleera ba daŋe da-baŋa ne.
Konto ŋwaane amo wó yɔɔre a waare-ba.
Ba yaale Edom teo pɛ
de ba na puri o yibeeli dem,
ye ba ta zwɛ o kwi
pa se ji tentwarem to.
2Konto ŋwaane amo wó ke-ba tento:
Amo wó pa se mini ja
Moaba teo kom maama
ye de daare de zwɛ
Keriofa dam jei sem.
Jar-keira bam ta na wora
ba kaase tiguri-kaasa,
ye ba wu nabwanno to,
mo Moaba tiina bam wó te
jara wone.
3Amo wó ba a go Moaba tiina
pɛ wom
de ba teo kom dedɛɛra maama.”
Baŋa Wɛ mo tage konto.
Judah tiina taane
4 Baŋa Wɛ ni dem mo tento:
“Judah tiina bam tiini ba ke wɛleera ba daŋe da-baŋa ne.
Konto ŋwaane amo wó yɔɔre a waare-ba.
Ba gwooni amo Baŋa Wɛ berem dem
ye ba wo sɛ a nia yam.
Ba tɔge wa yalo ba nabaara
déem na tɔge to,
ye ya gane-ba pa se ba ywori
amo chwoŋa kam ne.
5Konto ŋwaane amo wó ke-ba tento:
Amo wó pa se mini ja
Judah teene dem
ye de zwɛ Jerusalem dam jei sem.”
Isarele tiina taane
6 Baŋa Wɛ ni dem mo tento:
“Se abam, Isarele tiina bam, á yeini á tiini á ke wɛleera á daŋe da-baŋa ne.
Konto ŋwaane amo wó yɔɔre a waare abam.
Jena ŋwaane mo Isarele tiina
jege nɔn-ŋona ba yeiga,
pa se ba ji kabɛ.
Ba ta ma yeigi nabwona balo
na ware ba naga natera jena
ba ŋwe to.
7Ba ta nii yiniga tiina mo
se ba taa ye kafɛ,
nenɛɛne nɔɔna na nɔne
tega kasolo baŋa ne tei to.
Ba maa yeini ba che nabwona chwoŋa
se ba yé na ba bora.
Nɔɔno de o kwo sɛ se ba peini
de kaba-kana dedoa,
ye ba yaale amo yere dem
na ye wose to.
8Nɔɔna maa fe nabwona
pa ba kwei ba gwaaro
ba ma tiŋi daare jena ŋwaane.
Ba maa tigi te baŋa ne jei selo
ba na zuli ba wɛ da to.
Ba wɛ dem sɔŋɔ kom ne mo
ba yeini ba nyɔ sana.
Ko maa ye sabu-jena yalo
ba na jwoŋi to mo
ba mae ba yeigi sana bam konto.
9Nii-na, Isarele tiina bam!
Abam ŋwaane mo amo déem zeili Amori tiina bam.
Banto ya ye nɔn-sawaara mo,
ye ba ta dana,
nenɛɛne tei-kamunnu na ye tei to. #Nia Gulim 3:8-11
A ma yɔɔre a chɔge-ba,
nenɛɛne nɔɔno na guri tio
de ko bonno maama tei to.
10Amo déem ya jaane abam
a nwoŋi Ejipti teo kom ne,
ye a kwei bena finna a to á yiga ne,
pa se dé vei kagoa kam wone.
A laam ma kwei Amori tiina
tega kanto a pa abam,
se ka taa ye á tete nyem.
11A ma daare a kuri
abam nɔn-donno tem wone
se ba badwonna taa ye sampwori
ba pa-ne,
se ba badaara de taa ye Naziri tiina na pɔɔre ba tete
amo ŋwaane to.#Jeelim 6:2-4
Isarele tiina bam, ko dae konto na?
Ko ye amo Baŋa Wɛ mo ŋɔɔna.
12Abam nam soge Naziri tiina bam
pa ba nyɔ sana.
Á ma kwori á fe amo sampwori sem se ba pu ba ni
de amo kwora kam.
13Konto ŋwaane amo nam wó ke abam tento:
Amo wó ba a nɔne abam
a ke a naga kuri ne,
ne toroko na zeŋe mena dedɛ
ye ko nɔne tega ko moore tei to.
14Balo na wae ba duri lela to bá lu.
Dedɛɛra dam wó jei.
Babɛ de bá wane ba vere ba tete
ba yage.
15Che-tara wó chichei ba ga.
Balo na wae ba duri chekke to
bá wane ba duri ba lu.
Nɔɔna balo na diini sisein-nɔɔna to de bá wane ba vere ba tete
ba yage.
16Dɛ dem konto ne, babɛ wó de
ba jara zela ba yage,
ye ba daare ba duri se ba lu.”
Baŋa Wɛ mo tage konto.
Currently Selected:
Amosi 2: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)