ᤗᤢᤁᤠ 23
23
ᤐᤡᤗᤠᤋᤛᤖᤧ ᤕᤧᤛᤢᤴ ᤂᤠᤛᤧᤴ ᤗᤥ᤺ᤴᤍᤢ᤹
(ᤔᤳᤋᤡ ᥈᥍:᥇᥇-᥈᥌; ᤔᤷᤁᤢ ᥇᥋:᥇-᥇᥋; ᤕᤢᤜᤢ ᥇᥎:᥈᥎-᥊᥆)
1ᤕᤧᤈᤢᤶᤓᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ ᤕᤧᤛᤢᤴ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤥ ᤔᤧᤍᤠᤖᤢᤀᤠᤱ 2ᤑᤥᤋᤩᤠ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. “ᤀᤠᤏᤡᤃᤣ ᤁᤴ ᤔᤏᤠ᤺ᤸᤗᤧ ᤁᤴ ᤛᤢᤘᤠᤱᤜᤠ᤹ ᤀᤡᤱᤃᤠ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤜᤠᤱᤀᤠ ᤔᤧᤳᤋᤢᤛᤡᤖ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤐᤡᤔᤠ ᤔᤣ᤺ᤴ ᤑᤠ᤹ᤀᤠᤱ ᤜᤢᤛᤢᤛᤡᤒᤠ ᤋᤢᤔᤢᤶᤒᤧᤖᤥ॥” 3ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤕᤧᤛᤢᤴ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅”
ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤱᤃ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢᤖ ᤁᤧᤒᤳᤗᤥ॥”
4ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤂᤧᤴ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤁᤴ ᤔᤏᤠ᤺ᤸᤗᤧ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤆᤥᤃᤢᤒᤠ ᤔᤧᤱᤄᤥᤒᤠᤴᤗᤥ॥”
5ᤁᤖ ᤂᤧᤱᤜᤠ᤹ᤖᤧ ᤕᤠᤶᤔᤥ ᤕᤧᤛᤢᤴ ᤀᤰᤂᤣ ᤔᤧᤔᤧᤳᤋᤢᤖ ᤀᤠᤵᤋᤡᤰ ᤔᤧᤃᤢ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤁᤢᤏᤡᤛᤠᤶᤔᤡᤸᤗᤧ ᤁᤴ ᤁᤧᤖᤧᤰ ᤔᤏᤠᤜᤠ᤹ ᤁᤧᤖᤧᤰ ᤕᤜᤢᤍᤡᤕᤠ ᤏᤢ ᤃᤠᤗᤡᤗᤗᤠᤶ ᤁᤵᤔᤥ ᤌᤠᤖᤡᤰ ᤜᤠᤱᤒᤡᤑᤩᤢᤱ ᤆᤥ᤺ᤰᤔᤠ ᤜᤢᤛᤢᤛᤡᤖ ᤘᤠ᤹ᤖᤥ॥”
ᤕᤧᤛᤢᤴ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤍᤃᤡ
6ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤂᤧᤴ ᤂᤧᤵᤛᤢᤀᤠᤱ “ᤁᤴ ᤔᤏᤠᤴ ᤃᤠᤗᤡᤗᤛᤔᤠᤒᤡ᥅” ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥ 7ᤐᤡᤗᤠᤋᤛᤖᤧ ᤁᤴ ᤐᤠ᤺ᤴᤏᤡᤴ ᤜᤧᤖᤥᤍ ᤜᤠᤱᤅᤡᤸᤗᤧ#᥈᥉:᥍ ᤜᤧᤖᤥᤍ ᤜᤠᤱ—ᤂᤢᤏᤧ᤹ ᤁᤢᤔᤡᤱ ᤜᤧᤖᤥᤍ ᤀᤣᤴᤋᤡᤐᤠᤛ ᤘᤕᤧ॥ ᤂᤢᤏᤧ᤹ ᤐᤕᤶ ᤕᤶᤒᤠ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤘᤕᤧ॥ ᤁᤢᤗᤠᤈᤣ᤹ᤀᤥᤒᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤕᤧᤛᤢᤴ ᤜᤧᤖᤥᤍ ᤜᤠᤱᤅᤡᤸᤗᤥᤀᤣ ᤐᤠᤱᤄᤢᤍᤣᤛᤢᤖᤥ॥ ᤂᤧᤴ ᤕᤧᤶᤔᤥ ᤜᤧᤖᤥᤍᤧᤏ ᤕᤖᤢᤛᤗᤧᤶᤔᤥ ᤘᤕᤧᤖᤥ॥ 8ᤜᤧᤖᤥᤍᤖᤧ ᤕᤧᤛᤢᤴ ᤏᤡᤛᤢᤀᤠᤱ ᤛᤠ᤹ᤖᤡᤰ ᤛ᤺ᤳᤋᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤋᤃᤡᤀᤠᤱᤎᤥ ᤋᤢᤶᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ॥ ᤀᤠᤸᤗ ᤂᤢᤏᤧ᤹ ᤁᤢᤍᤃᤡ ᤕᤧᤛᤢᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤠ ᤀᤥᤔᤧᤵᤔᤠ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧᤖᤥ॥ 9ᤜᤧᤖᤥᤍᤖᤧ ᤂᤢᤏᤧ᤹ ᤕᤖᤡᤰ ᤐᤠ᤺ᤴᤜᤠ᤹ ᤛᤣ᤺ᤴᤍᤥᤛᤢ. ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴᤗᤥ॥ 10ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤒᤥᤃᤧᤀᤠᤱ ᤂᤢᤏᤧ᤹ ᤕᤧᤰᤁᤵ ᤑᤥᤋᤩᤠ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ॥ 11ᤜᤧᤖᤥᤍᤧᤏ ᤏᤢ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤧᤛᤢᤴ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤁᤢᤈᤠ᤺ᤳᤌᤡ ᤔᤧᤍᤣᤛᤢ. ᤜᤧᤰᤁᤩᤠᤱ ᤐᤖᤠᤴᤗᤠ ᤜᤠᤱᤋᤣᤳᤋᤡᤴ ᤔᤧᤈᤠᤰᤋᤢ ᤔᤧᤒᤡᤖᤢᤀᤠᤱ ᤕᤠᤱᤏᤠ ᤐᤡᤗᤠᤋᤛᤖᤥ ᤔᤧᤒᤠᤱᤄᤢ ᤔᤧᤍᤣᤛᤢᤖᤥ॥ 12ᤒᤠ ᤂᤧᤴ ᤕᤧᤴᤏᤠᤱᤎᤥ ᤜᤧᤖᤥᤍ ᤜᤠᤱᤅᤡᤴ ᤏᤢ ᤐᤡᤗᤠᤋᤛᤧᤴ ᤕᤠᤶᤔᤥ ᤋᤅᤧᤳᤇᤡᤖᤥ॥ ᤂᤧᤴᤏᤢ᤺ᤸᤗᤧ ᤋᤃᤡ ᤂᤢᤴᤇᤡ᤹ ᤏᤧᤵᤔᤠᤱ ᤏᤡᤱᤔᤡ ᤘᤕᤧᤳᤇᤡᤖᤥ॥
ᤕᤧᤛᤢᤖᤧ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤂᤥᤛᤢ᤹
13ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤏᤢ ᤔᤏᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ 14ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤴ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤑᤠ᤹ᤀᤠᤱ ᤑᤥᤋᤩᤠ ᤁᤧᤃᤢ᤺ᤳᤋᤢᤶᤔᤠᤱ ᤁᤧᤍᤠᤖᤢᤶᤒᤠ ᤔᤏᤠᤴ ᤂᤡᤏᤡ᤹ ᤋᤃᤡᤀᤣ ᤀᤡᤱᤃᤠ᤹ ᤕᤖᤡᤰ ᤐᤠᤴ ᤛᤣ᤺ᤴᤍᤥᤛᤢᤱ. ᤁᤖ ᤀᤡᤱᤃᤠ᤹ ᤌᤣᤀᤠᤱ ᤕᤠ᤺ᤶᤒᤰ ᤑᤣ᤺ᤴᤍᤢᤒᤠ ᤔᤧᤱᤄᤥᤒᤠᤴᤗᤥ॥ 15ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧᤀᤠᤱ ᤌᤣᤀᤠᤱ ᤔᤧᤄᤥᤛᤢᤴᤏᤠᤱ ᤕᤠᤱᤏᤠ ᤀᤡᤱᤃᤠ᤹ᤀᤥ ᤏᤢ᤺ᤰᤋᤢ ᤑᤧᤴᤇᤢᤀᤠᤱ ᤘᤠ᤹ᤖᤥ॥ ᤀᤥᤔᤧᤳᤋᤧᤶᤔᤧ᤹. ᤁᤸᤗᤧ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤌᤧᤔᤠᤀᤠᤱ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥ 16ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤢᤏᤧ᤹ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤱᤛᤡᤱᤅᤠᤱ ᤗᤧᤖᤢᤱᤍᤣᤛᤢᤱᤗᤥ॥” 17(ᤀᤠᤸᤗ ᤋᤱᤏᤠᤶᤔᤥ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠ᤺ᤒᤠᤎᤡᤰ ᤗᤧᤵᤔᤠ ᤌᤡᤶ ᤘᤕᤧᤖᤥ॥) 18ᤁᤖ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤀ᤺ᤰᤋᤧ. “ᤁᤴ ᤔᤏᤠᤴ ᤂᤢᤶᤍᤡᤱ ᤐᤡᤖᤧ᤹ᤀᤠᤱ ᤀᤠᤏᤡᤃᤣ ᤗᤠᤃᤡ ᤒᤖᤒ᤻ᤒᤠᤛᤧᤴ ᤗᤧᤖᤧ ᤀᤠᤒᤡᤖᤧ᤹᥄” 19(ᤂᤧᤴ ᤔᤏᤠᤴ ᤕᤧᤰᤕᤰᤁᤥ ᤜᤠᤱᤒᤡᤑᤩᤢᤱ ᤆᤥᤃᤢᤒᤠ ᤏᤢ ᤔᤏᤠ ᤛᤧᤖᤢᤛᤡᤒᤠ ᤀᤠᤵᤋᤡᤰᤁᤥ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤧᤀᤠᤱ ᤕᤠᤃᤧᤖᤥ॥)
20ᤐᤡᤗᤠᤋᤛᤖᤧ ᤕᤧᤛᤢᤴ ᤗᤧᤵᤔᤠ ᤏᤡᤱᤘᤠ᤹ ᤆᤥᤃᤢᤖ ᤂᤧᤱᤜᤠ᤹ ᤕᤠᤶᤔᤥ ᤋᤠ᤹ᤈᤧᤰᤋᤢᤛᤡ. 21ᤁᤖ ᤂᤧᤱᤜᤠ᤹ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄”
22ᤜᤧᤰᤁᤩᤠᤱ ᤛᤢᤶᤗᤧᤱᤅᤥ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤌᤣᤀᤠᤱᤒᤣ᥅ ᤂᤧᤸᤗᤧ ᤌᤣ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤠ᤹ᤒᤣ᥅ ᤂᤢᤏᤧ᤹ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠ ᤕᤠ᤺ᤶᤒᤰ ᤆᤥᤃᤢᤒᤠ ᤀᤡᤱᤃᤠ᤹ ᤔᤧᤱᤄᤥᤒᤠᤴᤗᤥ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤱᤛᤡᤱᤅᤠᤱ ᤗᤧᤖᤢᤱᤍᤣᤛᤢᤱᤗᤥ॥”
23ᤁᤖ ᤂᤧᤱᤜᤠ᤹ ᤀᤕᤠᤰ ᤔᤧᤸᤗ᤹ᤀᤣ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹॥” ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤛᤠ᤹ᤖᤡᤰ ᤔᤧᤀ᤺ᤰᤋᤧᤒᤠᤸᤗᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤁᤧᤖᤧᤖᤥ॥ 24ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤀᤡᤛᤡᤰ ᤐᤡᤗᤠᤋᤛᤖᤧ ᤂᤢᤶᤍᤡᤱ ᤐᤡᤖᤢᤖᤥ॥ 25ᤂᤢᤏᤧ᤹ ᤂᤧᤴ ᤕᤧᤰᤕᤰᤁᤥ ᤜᤠᤱᤒᤡᤑᤩᤢᤱ ᤆᤥ᤺ᤰᤔᤠ ᤏᤢ ᤔᤏᤠᤛᤧᤵᤔᤠ ᤀᤠᤵᤋᤡᤰᤁᤥ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤧᤴ ᤗᤧᤵᤔᤠ ᤐᤠᤱᤄᤢᤛᤡ. ᤁᤖ ᤕᤧᤛᤢᤴ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤜᤧᤰᤁᤣ ᤔᤧᤈᤥᤃᤢᤖ ᤑᤠ᤹ᤀᤠᤱ ᤗᤧᤖᤢ ᤐᤡᤖᤢᤛᤡᤖᤥ॥
ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ᤹
(ᤔᤳᤋᤡ ᥈᥍:᥉᥈-᥊᥊; ᤔᤷᤁᤢ ᥇᥋:᥈᥇-᥉᥈; ᤕᤢᤜᤢ ᥇᥏:᥇᥍-᥈᥍)
26ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤀᤠᤱ ᤂᤧᤱᤜᤠ᤹ᤖᤧ ᤐᤠᤱᤓᤣ᤹ᤀᤥᤏᤢ ᤁᤧᤓᤧᤶᤒᤠᤖ ᤁᤧᤒᤵᤐᤠ ᤛᤡᤔᤥᤏ ᤔᤧᤵᤔᤏᤠᤒᤠ ᤛᤠᤀᤡᤖᤣᤏᤡ ᤕᤧᤰᤕᤰᤁᤥ ᤁᤧᤕᤢᤱᤒᤧᤴ ᤔᤧᤍᤧᤶᤛᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤐᤱᤔᤠᤀᤠᤱ ᤕᤧᤛᤢᤴ ᤋᤡᤶᤔᤠ ᤔᤧᤒᤠᤱᤄᤢᤖᤥ॥
27ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ ᤂᤧᤵᤔᤥ ᤁᤧᤜᤠ᤺ᤵᤔᤠᤖ ᤔᤧᤖᤡᤱ ᤁᤧᤎᤰᤔᤠ ᤔᤧᤴᤇᤢᤔᤠᤜᤠ᤹ᤀᤠᤱ ᤔᤧᤘᤕᤧᤖᤥ॥ 28ᤁᤖ ᤕᤧᤛᤢᤖᤧ ᤂᤡᤖᤡ ᤜᤡᤛᤡᤱᤅᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤖᤢᤛᤗᤧᤶᤔᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤛᤣ. ᤂᤡᤏᤡ᤹ ᤀᤠᤗᤠᤃᤡ ᤔᤧᤜᤠᤒᤧᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤏᤢ ᤂᤡᤏᤡ᤹ ᤛᤠᤜᤠ᤹ᤖᤧ ᤗᤠᤃᤡ ᤜᤠᤒᤧᤶᤔᤧ᤹ᤀᤥ. 29ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤛᤠᤔᤧᤱᤃᤵᤔᤏᤠᤔᤠᤜᤠ᤹ ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤏᤢᤔᤧᤴᤎᤢᤰᤏᤠᤔᤠᤜᤠ᤹ ᤔᤢᤀᤡ᤹ᤛᤠᤔᤠᤛᤡᤖᤥ ᤗ᤹ᤖᤡᤰ ᤐᤠ᤺ᤵᤔᤠ ᤕᤧᤶ ᤋᤠᤖ ᤐᤳᤗᤥ॥ 30ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ ᤏᤠᤱᤈᤱᤜᤠ᤹ ᤀᤠᤏᤡᤃᤣ ᤛᤶᤍᤠᤱ ᤔᤰᤌᤩᤧ᤹ᤀᤥ᥄ ᤜᤧᤰᤁᤩᤠᤱ ᤁᤥ᤺ᤰᤔᤠᤜᤠ᤹ ᤕᤠᤵᤔᤡ ᤀᤠᤗᤢᤵᤋᤧᤀᤥ᥄ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥ 31ᤌᤣᤀᤠᤱᤓᤧᤸᤗᤧ ᤛᤖᤡᤳᤁᤩᤠ᤺ᤵᤐᤠ ᤁᤢᤜᤡᤱᤘᤧᤳ ᤛᤡᤱᤅᤡᤴᤏᤣ ᤀᤰᤂᤣ ᤔᤧᤔᤧᤳᤋᤢᤸᤗᤧ. ᤁᤧᤜᤣᤒᤠ ᤛᤡᤱᤅᤡᤱᤃ ᤀᤠᤰᤂᤣ ᤔᤧᤔᤧᤳᤋᤢᤀᤡᤖᤥ᥅”
32ᤂᤢᤏᤧ᤹ᤏᤢᤀᤣ ᤏᤧᤵᤑᤢ ᤁᤢᤓᤠᤱ ᤁᤧᤓᤣ᤺ᤶᤒᤠᤜᤠ᤹ᤀᤠᤱ ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤔᤧᤍᤣ᤹ᤖᤢᤛᤡ॥ 33ᤂᤧᤱᤜᤠ᤹ ᤔᤡᤰᤂᤥ᤺ᤰᤐᤠ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥ ᤔᤧᤃᤧᤖᤧᤀᤠᤱ ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖᤥ॥ ᤂᤧᤴ ᤏᤧᤵᤑᤢ ᤁᤢᤓᤠᤱ ᤁᤧᤓᤣ᤺ᤶᤒᤠᤜᤠ᤹ ᤕᤧᤛᤢᤖᤧ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤔᤧᤓᤥ᤺ᤴᤍᤢᤛᤡᤖᤥ॥ 34ᤜᤧᤰᤁᤩᤠᤱ ᤕᤧᤛᤢᤖᤧ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤦ. ᤁᤱᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧ ᤌᤧᤔᤠ ᤔᤧᤈᤥᤃᤢᤖ ᤔᤧᤒᤳ ᤌᤣᤀᤠᤱ ᤔᤧᤴᤏᤡᤛᤢᤴᤗᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤍᤣ᤺ᤳᤜᤠ᤹ ᤜᤠ᤺ᤳᤇᤡᤱᤔᤠ ᤑᤠ᤹ᤀᤠᤱ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤖᤥ॥
35ᤔᤠ᤺ᤱᤄᤠᤗᤠᤶ ᤔᤏᤠᤜᤠ᤹ ᤀᤥᤔᤧᤔᤕᤧᤖ ᤔᤧᤕᤧᤒᤧ. ᤁᤖ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤀᤰᤂᤣ ᤔᤧᤔᤧᤳᤋᤢ. “ᤂᤧᤸᤗᤧ ᤘᤣ᤹ ᤔᤏᤠᤜᤠ᤹ᤃ ᤛᤧ᤺ᤵᤋᤢᤛᤡ. ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ ᤀᤠᤒᤠᤅᤣ ᤛᤧ᤺ᤵᤛᤡᤱᤗ᥄”
36ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤖᤧ ᤔᤧᤎᤠᤅᤧᤀᤠᤱ ᤁᤡᤏᤠ᤺ᤴᤍᤡ ᤔᤧᤒᤡᤖᤢ ᤜᤧᤰᤁᤩᤠᤱ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤎᤢᤱᤄᤢᤖ 37ᤔᤧᤔᤧᤳᤋᤢ. “ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧ ᤏᤧ ᤑᤠ᤹ᤃᤪ ᤀᤠᤒᤠᤅᤣ ᤛᤧ᤺ᤵᤛᤡᤱᤅᤧ᤹ᤀᤥ॥”
38ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤧᤃᤣᤰ ᤛᤶᤍᤠᤱ ᤁᤱᤃ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤗᤥ ᤗ᤹ᤖᤡᤰ ᤀᤠᤵᤋᤡᤰ ᤛᤰᤁᤡᤴ ᤔᤧᤛᤠᤵᤋᤢᤀᤠᤱ ᤔᤧᤓᤳᤇᤢ॥
39ᤂᤧᤵᤔᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤁᤢᤓᤠᤱ ᤁᤧᤓᤣ᤺ᤶᤒᤠᤎᤡᤰᤗᤧ ᤂᤢᤏᤧ᤹ ᤐᤠ᤺ᤴᤏᤡᤸᤗᤧ ᤗᤰᤋᤢᤖ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤔᤣ᤺ᤶᤒᤡ᥅ ᤂᤧᤏᤧ᤹ ᤛᤧ᤺ᤵᤛᤡᤱᤅᤧ᤹ᤀᤠᤱ ᤀᤠᤴᤇᤡᤃᤧᤀᤠᤱ ᤕᤠᤵᤔᤡ ᤀᤠᤛᤧ᤺ᤵᤋᤧ᤹॥” 40ᤁᤖ ᤘᤣ᤹ᤛᤔᤠ ᤁᤢᤓᤠᤱ ᤁᤧᤓᤣ᤺ᤶᤒᤠᤸᤗᤧ ᤂᤧᤴ ᤑᤧ᤺ᤰᤋᤢᤖ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤱᤃᤡᤖᤢᤴᤒᤡ᥅ ᤀᤠᤏᤡ᤹ ᤛᤢᤶᤒᤪᤠᤱᤅᤧ ᤗᤳᤇᤠ ᤐᤖᤡᤰᤐᤠ ᤂᤢᤶᤍᤡᤱᤅᤥ ᤀᤠᤎᤩᤧᤀᤠᤱ ᤀᤠᤘᤠ᤹. 41ᤆᤩᤠᤛᤠᤱ ᤀᤠᤴᤇᤡ᤹ᤃ ᤀᤠᤈᤥᤃᤧᤳᤇᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤛᤡᤔᤧᤸᤗᤧ ᤂᤢᤶᤍᤡᤱ ᤀᤠᤄᤥᤛᤧᤳᤇᤢᤒᤠᤖᤥ. ᤁᤖ ᤂᤢᤏᤧ᤹ᤃ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥” 42ᤜᤧᤰᤁᤩᤠᤱ ᤂᤢᤏᤧ᤹ ᤕᤧᤛᤢᤴ ᤔᤧᤳᤋᤢ. “ᤕᤧᤛᤢᤀᤣ. ᤂᤧᤏᤧ᤹ ᤁᤧᤜᤠᤱᤈᤢᤶᤔᤥ ᤁᤧᤕᤢ᤺ᤸᤗᤧ ᤀᤡᤱᤃᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤥ॥”
43ᤕᤧᤛᤢᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤡᤱᤃᤠ᤹ ᤂᤧᤏᤧ᤹ ᤔᤧᤳᤏᤧ᤹. ᤛᤧᤰᤂᤠᤀᤣ ᤂᤧᤏᤧ᤹ ᤀᤠᤀᤡᤴᤇᤠ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤘᤠ᤹ᤖᤥ॥”
ᤕᤧᤛᤢᤖᤧ ᤁᤢᤛᤡᤔᤧᤴ
(ᤔᤳᤋᤡ ᥈᥍:᥊᥋-᥋᥌; ᤔᤷᤁᤢ ᥇᥋:᥉᥉-᥊᥇; ᤕᤢᤜᤢ ᥇᥏:᥈᥎-᥉᥆)
44-45ᤀᤠᤸᤗ ᤁᤢᤔᤢᤰ ᤌᤡᤰᤏᤧᤳ (᥇᥈) ᤂᤡᤖᤡ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧ ᤏᤠᤶᤔᤡᤴ ᤔᤧᤀᤥ᤺ᤳᤋᤧᤴᤏᤠᤱ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤂᤠᤍᤠᤶᤔᤠᤸᤗᤧ ᤂᤧᤴ ᤗᤠᤈᤣ᤹ᤀᤡᤴ ᤛᤡᤍᤧᤵ ᤋᤧᤵᤋᤢᤖᤥ॥ ᤜᤧᤰᤁᤩᤠᤱ ᤔᤠᤱᤜᤡᤶᤔᤥ ᤑᤥ᤺ᤶᤔᤏᤠᤒᤠ ᤑᤥ᤺ᤴᤍᤠᤴ ᤌᤥ ᤏᤢ ᤕᤥ ᤌᤠᤖᤡᤰ ᤁᤢᤗᤢᤶᤔᤥ ᤋᤧᤖᤧ᤹ ᤋᤧ᤺ᤰᤂᤧᤖᤥ॥ 46ᤕᤧᤛᤢᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤜᤢᤰᤛᤢᤵᤏᤧ᤹ᤖᤥ॥” ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤰᤔᤠ ᤐᤣᤖᤥ॥
47ᤜᤧᤰᤁᤩᤠᤱ ᤂᤧᤵᤔᤥ ᤁᤧᤕᤧᤵᤐᤠ ᤖᤥᤔᤡ ᤌᤰᤋᤢᤶᤒᤠᤸᤗᤧ ᤁᤴ ᤜᤡᤴᤍᤥᤰᤜᤠ᤹ ᤏᤡᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤖ ᤀᤰᤂᤣ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠᤴ ᤛᤠᤶᤕᤥᤒᤠ ᤘᤕᤧᤖᤥ॥”
48ᤜᤧᤰᤁᤩᤠᤱ ᤂᤧᤵᤔᤥ ᤁᤴ ᤜᤡᤴᤍᤥᤰ ᤀᤥᤔᤧᤳᤇᤧ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ᤖᤧ ᤁᤴ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤛᤱᤒᤣᤴ ᤔᤧᤜᤡᤵᤋᤢᤖ ᤔᤧᤖᤡᤱ ᤌᤰᤏᤢ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥ 49ᤜᤧᤰᤁᤩᤠᤱ ᤕᤧᤛᤢᤖᤧ ᤁᤠᤰ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ ᤏᤢ ᤂᤢᤏᤧ᤹ ᤃᤠᤗᤡᤗᤗᤠᤶ ᤁᤧᤍᤡᤶᤔᤠᤖ ᤁᤧᤍᤠᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤔᤠ᤺ᤱᤄᤠᤗᤠᤶ ᤁᤴ ᤜᤡᤴᤍᤥᤰᤁᤡᤴ ᤀᤥᤔᤧᤔᤧᤳᤋᤢᤖ ᤔᤧᤕᤧᤒᤧᤖᤥ॥
ᤕᤧᤛᤢᤴ ᤀᤡ᤺ᤵᤐᤢᤱᤅᤥ ᤔᤧᤏᤧᤛ᤻ᤛᤢ᤹
(ᤔᤳᤋᤡ ᥈᥍:᥋᥍-᥌᥇; ᤔᤷᤁᤢ ᥇᥋:᥊᥈-᥊᥍; ᤕᤢᤜᤢ ᥇᥏:᥉᥎-᥊᥈)
50-51ᤀᤠᤸᤗ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑ ᤔᤧᤵᤔᤏᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤕᤜᤢᤍᤡ ᤕᤧᤈᤢᤶᤓᤥᤒᤠ ᤐᤠᤛᤡᤱᤐᤠᤍᤠᤱᤗᤠᤀᤠᤱ ᤘᤕᤧᤖᤥ॥ ᤂᤢᤏᤧ᤹ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤁᤧᤜᤠᤱᤒᤠ ᤏᤢᤒᤠ ᤏᤢ ᤛᤠᤶᤕᤥᤒᤠ ᤔᤏᤠ ᤆᤥᤃᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤁᤴ ᤕᤠ᤺ᤶᤒᤰᤁᤥ ᤌᤣᤀᤠᤱ ᤋᤧᤴᤍᤡᤱ ᤔᤧᤶᤒᤡᤀᤣ ᤘᤕᤧᤖᤥ॥ 52ᤂᤢᤏᤧ᤹ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ॥ 53ᤜᤧᤰᤁᤩᤠᤱ ᤂᤢᤏᤧ᤹ ᤕᤧᤛᤢᤖᤧ ᤁᤢᤎᤰᤁᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤗᤠᤶ ᤌᤠᤛᤢᤀᤠᤱ ᤏᤢᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤢᤀᤠᤱ ᤂᤥ᤺ᤶᤔᤏᤠᤒᤠ ᤗᤢᤱ ᤀᤡ᤺ᤵᤐᤢᤱᤅᤥ ᤏᤧᤛ᤻ᤛᤢᤖᤥ॥ ᤂᤧᤴ ᤀᤡ᤺ᤵᤐᤢᤱᤅᤥ ᤋᤃᤡ ᤀᤠᤳᤋᤡᤴᤏᤠᤱ ᤔᤧᤴᤏᤧᤀᤣ ᤘᤕᤧᤖᤥ॥ 54ᤀᤠᤸᤗ ᤁᤴ ᤏᤠ᤺ᤶᤛᤡᤱ ᤕᤧᤴ ᤕᤠᤖᤡᤵ ᤆᤥ᤺ᤰᤔᤠ ᤕᤧᤴ ᤘᤕᤧ ᤜᤧᤰᤁᤩᤠᤱ ᤏᤠ᤺ᤶᤛᤡᤱ ᤕᤧᤴ ᤋᤠᤔᤠ ᤀᤡ᤺ᤳᤋᤧᤀᤠᤱ ᤘᤕᤧ॥ 55ᤜᤧᤰᤁᤩᤠᤱ ᤃᤠᤗᤡᤗᤗᤠᤶ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤍᤠᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤕᤢᤛᤢᤑᤧᤴ ᤔᤧᤍᤡᤶᤍᤢᤖ ᤕᤧᤛᤢᤖᤧ ᤁᤢᤎᤰᤁᤡᤴ ᤔᤧᤏᤧᤛ᤻ᤛᤢᤒᤠ ᤀᤡ᤺ᤵᤐᤢᤱᤅᤡᤴ ᤔᤧᤏᤡᤛᤢᤀᤠᤱ 56ᤂᤧᤱᤜᤠ᤹ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤥ ᤜᤢ᤺ᤵᤔᤠ ᤑᤠ᤹ᤀᤠᤱ ᤔᤠᤖᤢᤰ ᤏᤢ ᤛᤡᤍᤠ᤹ᤜᤠ᤹ ᤕᤠᤖᤡᤵ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤁᤢᤀᤡᤛᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤱᤜᤠ᤹ ᤔᤧᤏᤠ᤺ᤶᤛᤡᤱᤗᤥ॥
Currently Selected:
ᤗᤢᤁᤠ 23: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.