ᤗᤢᤁᤠ 22
22
ᤕᤧᤛᤢᤴ ᤛᤧᤵᤔᤠ ᤏᤡᤱᤛᤣᤰ
(ᤔᤳᤋᤡ ᥈᥌:᥇᥊-᥇᥌; ᤔᤷᤁᤢ ᥇᥊:᥇᥆-᥇᥇; ᤕᤢᤜᤢ ᥇᥎:᥇᥏-᥈᥊)
1ᤀᤠᤸᤗ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱᤅᤡᤸᤗᤧ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖ ᤐᤳᤇᤧ॥ ᤂᤧᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤠᤱ ᤔᤧᤔᤧᤳᤋᤢ᤹॥ 2ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤛᤧᤵᤔᤠ ᤛᤢᤕᤧᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧ. ᤁᤖ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ ᤑᤠ᤹ᤀᤠᤱ ᤔᤧᤃᤡᤛᤧᤒᤠᤸᤗᤧ ᤆᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ॥ 3ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤠᤸᤗᤧ ᤁᤢᤏᤡᤱᤘᤠ᤹ᤀᤥ ᤗᤠᤛᤧ॥ 4ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ᤖᤥ ᤐᤣᤀᤠᤱ ᤕᤧᤛᤢᤴ ᤂᤡᤏᤡ᤹ ᤜᤢᤰᤁᤥ ᤌᤠᤔᤠ ᤛᤢᤰᤋᤢᤱ ᤑᤠ᤹ᤀᤠᤱ ᤆᤧᤰᤋᤢᤛᤡ॥ 5ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤕᤠᤱ ᤐᤡᤀᤠᤛᤡᤃᤧ᤹ᤖᤥ ᤗ᤹ᤖᤡᤰ ᤔᤧᤔᤧᤳᤋᤢᤖᤥ॥ 6ᤂᤢᤏᤧ᤹ᤀᤠᤱ ᤂᤧᤴ ᤐᤠ᤺ᤴᤏᤥ ᤋᤧᤴᤍᤧᤀᤠᤱ ᤔᤏᤠᤜᤠ᤹ ᤔᤧᤜᤥ᤺ᤵᤐᤡᤸᤗᤧ ᤀᤡᤱᤗᤧᤰᤔᤠᤀᤠᤱ ᤋᤧᤶᤔᤠ ᤐᤠᤱᤔᤠᤛᤡ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥
ᤍᤠᤱᤒᤠᤸᤗᤧ ᤁᤢᤛᤠᤓᤠᤱᤈᤠ
(ᤔᤳᤋᤡ ᥈᥌:᥈᥌-᥉᥆; ᤔᤷᤁᤢ ᥇᥊:᥈᥈-᥈᥌)
7ᤜᤧᤰᤁᤩᤠᤱ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤔᤧᤸᤗᤢᤰᤛᤠᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤌᤡᤶ ᤘᤕᤧ॥ 8ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤴ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ. “ᤂᤡᤴᤇᤡ᤹ ᤐᤣᤃᤧᤳᤇᤧ᤹ᤀᤠᤱ ᤀᤠᤏᤡ᤹ ᤗᤠᤃᤡ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤛᤥᤖᤡᤰ ᤆᤠᤶᤗᤥ॥”
9ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤣ᤺ᤴᤍᤥᤛᤧᤳᤇᤢ. “ᤜᤧᤰᤁᤣ᤺ᤸᤗᤧ ᤀᤠᤳᤋᤠᤴ ᤐᤣ᤺ᤰᤔᤠᤀᤠᤱ ᤕᤠᤖᤡᤵ ᤆᤥ᤺ᤰᤔᤠᤒᤣ᥅”
10ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗ ᤀᤥᤔᤧᤳᤋᤧᤳᤇᤧ᤹ᤀᤥ. ᤂᤡᤴᤇᤡ᤹ ᤕᤧᤰᤕᤰᤁᤥ ᤁᤧᤗᤠ᤺ᤳᤇᤡᤖ ᤁᤧᤒᤳᤇᤡᤸᤗᤧ ᤆᤫᤠ᤺ᤳ ᤁᤢ᤺ᤴᤍᤠ ᤁᤧᤒᤱᤒᤠ ᤔᤏᤠᤎᤡᤰᤗᤧ ᤁᤧᤍᤢᤶᤛᤡ᤹॥ ᤂᤧᤴ ᤗᤠ᤺ᤵᤐᤠ ᤜᤡᤶᤔᤥ ᤌᤠᤖᤡᤰ ᤋᤡᤶᤍᤧᤳᤇᤧ᤹॥” 11ᤜᤧᤰᤁᤩᤠᤱ ᤜᤡᤶᤍᤠᤱᤒᤠᤴ ᤔᤧᤳᤋᤧᤇᤧ᤹. “ᤀᤠᤏᤡᤃᤣ ᤛᤡᤰᤛᤠᤶᤒᤠᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤧᤀᤠᤱ ᤁᤧᤘᤠ᤹ᤖᤥ. ‘ᤋᤖᤣ ᤕᤢᤱᤔᤠ ᤕᤠᤰᤑᤠᤱᤅᤡᤴ ᤀᤠᤳᤋᤥ ᤏᤧᤒᤣ᥅ ᤂᤧᤵᤔᤥ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤆᤠᤱᤗᤥ॥’ 12ᤜᤧᤰᤁᤩᤠᤱ ᤂᤧᤸᤗᤧ ᤂᤡᤴᤇᤡ᤹ ᤌᤥᤛᤔᤠ ᤂᤠᤶᤗᤥᤀᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤗᤳᤇᤠ ᤕᤶᤒᤠ ᤕᤠᤰᤑᤠᤱᤅᤡᤴ ᤀᤥᤛᤣ᤺ᤴᤃᤧᤎᤠᤰᤛᤡ᤹॥ ᤂᤧᤵᤔᤥᤀᤣ ᤀᤠᤏᤡ᤹ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥”
13ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤧᤳᤇᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤋᤢᤔᤧᤳᤇᤢᤀᤠᤱ ᤂᤧᤱᤜᤠ᤹ᤖᤧ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤢ॥
14ᤀᤠᤸᤗ ᤆᤠᤈᤠᤔᤠ ᤕᤧᤶ ᤐᤥ᤺ᤰᤂᤧᤀᤠᤱ ᤕᤧᤛᤢᤴ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤆᤠᤔᤠ ᤋᤧᤴᤏᤥ ᤕᤢᤱᤛᤡᤱ॥ 15ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤋᤢᤰᤂᤣ ᤆᤠᤔᤠᤏᤢ᤺ᤸᤗᤧ ᤋᤃᤡ ᤁᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤠᤓ᤺ᤱᤈᤠᤴ ᤂᤡᤏᤡ᤹ᤏᤢ ᤛᤥᤖᤡᤰ ᤆᤠᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤠᤱ. 16ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤴ ᤀᤠᤈᤠᤶᤗ ᤀᤠᤒᤵᤐᤠ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤠᤓᤠᤱᤈᤠ᤺ᤸᤗᤧ ᤁᤢᤒᤣᤴ ᤔᤧᤱᤃᤧᤳᤋᤣ ᤌᤠᤖᤡᤰ ᤀᤡᤱᤃᤠ᤹ ᤕᤠᤶᤔᤥ ᤔᤧᤈᤠᤀᤠᤴᤗᤥ॥”
17ᤜᤧᤰᤁᤩᤠᤱ ᤕᤧᤛᤢᤖᤧ ᤆᤸᤗᤱᤏᤠ ᤂᤥᤷᤕᤠᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤀᤰᤂᤣ ᤐᤠ᤺ᤳᤋᤢ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤠᤱ ᤂᤡᤏᤡ᤹ ᤗᤢᤶᤔᤥ ᤜᤠ᤺ᤳᤋᤠᤛᤡᤶᤔᤧᤖ ᤆᤧᤶᤔᤧ ᤌᤢᤅᤧᤶᤔᤧ᤹ᤀᤥ॥ 18ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤕᤠᤶᤔᤥ ᤔᤧᤴᤍᤠᤀᤣ ᤌᤠᤖᤡᤰ ᤆᤧᤸᤗᤧᤰᤛᤣ᤹ ᤌᤡᤴ ᤀᤡᤱᤃᤠ᤹ ᤕᤠᤶᤔᤥ ᤔᤧᤎᤢᤱᤅᤠᤴᤗᤥ॥”
19ᤜᤧᤰᤁᤩᤠᤱ ᤂᤢᤏᤧ᤹ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤐᤡᤖᤧᤒᤠ ᤀᤠᤎᤰᤗᤥ॥ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤛᤥᤀᤥ ᤀᤰᤂᤣ ᤆᤥᤃᤧᤶᤔᤧ᤹ᤀᤥ॥”
20ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤈ ᤔᤧᤛᤢᤖᤢᤀᤠᤱ ᤆᤸᤗᤱᤏᤠ ᤂᤥᤷᤕᤠᤴ ᤕᤧᤛᤢᤖᤧ ᤐᤰᤂᤢᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤀᤠᤔᤠᤰᤂᤡ᤹ᤀᤡᤴ ᤘᤍᤣ᤺ᤴᤍᤧᤀᤠᤱ ᤏᤡ᤺ᤴᤎᤥ ᤐᤥ᤺ᤰᤂᤧᤒᤠ ᤁᤢᤛᤱ ᤔᤠᤱᤜᤢᤵᤐᤡᤴᤗᤥ॥
21“ᤁᤖ ᤀᤥᤔᤧᤳᤋᤧᤶᤔᤧ᤹᥄ ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤠᤴ ᤒᤠ ᤁᤴ ᤆᤠᤔᤠ ᤋᤧᤴᤏᤥ ᤀᤡᤱᤃᤠ᤹ᤏᤢᤀᤣ ᤆᤖ ᤕᤢᤱᤗᤥ॥” 22ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤴᤇᤠᤶᤛᤠ᤺ᤱᤃ ᤛᤡᤔᤠᤀᤣ ᤐᤥᤱᤗᤥ. ᤁᤖ ᤂᤢᤏᤧ᤹ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧᤛᤩᤧᤖᤥ॥ 23ᤂᤧᤱᤜᤠ᤹ᤖᤧ ᤀᤠᤏᤡ᤹ ᤗᤢᤶᤔᤥ ᤀᤰᤋᤱᤒᤠ ᤕᤠ᤺ᤶᤒᤰ ᤜᤠ᤺ᤳᤗᤧ ᤆᤥᤃᤢ᤹ᤒᤡᤗᤠ ᤗ᤹ᤖᤡᤰ ᤛᤣ᤺ᤴᤍᤥᤛᤡᤱᤔᤠ ᤔᤧᤜᤣ᤺ᤰᤛᤡᤱᤗᤥ॥
24ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤜᤠ᤺ᤳᤏᤡᤒᤣ ᤑᤠ᤹ᤀᤠᤱ ᤐᤠ᤺ᤴᤎᤰᤔᤠ ᤔᤧᤜᤣ᤺ᤰᤋᤢᤖᤥ॥ 25ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤜᤠ᤹ᤖᤧ ᤔᤏᤠᤜᤠ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤢᤏᤡ᤹ ᤕᤢᤰᤛᤠᤒᤠᤜᤠ᤹ᤖᤧ ᤀᤠᤏᤡᤃᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤛᤡᤃᤧ ᤑᤠ᤹ᤀᤠᤱ ᤔᤧᤔᤧᤳᤇᤡᤱᤗᤥ॥ 26ᤁᤖ ᤂᤡᤏᤡ᤹ᤀᤥᤃ ᤀᤰᤂᤣ ᤔᤧᤒᤥᤱᤏᤧᤸᤗᤥ॥ ᤂᤡᤏᤡ᤹ᤀᤥᤃ ᤀᤠᤳᤋᤡᤴ ᤕᤶᤒᤠ ᤆᤥᤰ. ᤂᤧᤴ ᤆᤢᤰᤛᤠ ᤐᤥᤱᤔᤠ ᤐᤥᤱ ᤜᤧᤰᤁᤩᤠᤱ ᤗᤠᤶᤗᤥᤒᤠᤴ ᤛᤧᤘᤠᤖᤥᤒᤠᤴ ᤜᤧᤰᤁᤣ ᤐᤥᤱᤔᤠ ᤐᤥᤱᤗᤥ॥ 27ᤀᤠᤸᤗ ᤆᤠᤈᤠᤔᤠᤍᤧᤴᤏᤥ ᤁᤧᤕᤢᤱᤒᤧᤴ ᤏᤢ ᤛᤧᤘᤠ ᤁᤧᤈᤥᤰᤐᤧᤴ ᤀᤠᤳᤋᤡᤴ ᤕᤶᤒᤠᤒᤣ᥅ ᤂᤧᤴ ᤆᤠᤈᤠᤔᤠᤍᤧᤴᤏᤥ ᤁᤧᤕᤢᤱᤒᤧᤴ ᤕᤶᤒᤠ ᤔᤣ᤺ᤶᤒᤡ᥅ ᤁᤖ ᤂᤡᤏᤡ᤹ᤀᤥᤃ ᤀᤡᤱᤃᤠ᤹ ᤛᤧᤘᤠ ᤁᤧᤈᤥ᤺ᤰᤐᤠ ᤜᤧᤰᤁᤣ ᤘᤠ᤹ᤀᤠ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥ 28ᤂᤡᤏᤡ᤹ᤃ ᤆᤰᤔᤧᤸᤗ᤹ᤀᤣ ᤀᤡᤱᤃᤠ᤹ ᤀᤠᤍᤢᤰᤂᤣᤀᤥ ᤋᤣ᤺ᤱ ᤕᤠᤵᤔᤡ ᤁᤧᤔᤧᤳᤋᤡᤀᤠᤱ ᤁᤧᤘᤕᤡ᤹ᤖᤥ॥ 29ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤡᤱᤃᤠ᤹ ᤜᤠᤱᤆᤥ᤺ᤰᤔᤠ ᤕᤢᤰ ᤐᤡᤖᤠᤱᤒᤠ ᤜᤧᤰᤁᤣᤀᤣ ᤂᤡᤏᤡ᤹ᤀᤠᤱ ᤐᤡᤏᤡᤱᤗᤥ॥ 30ᤂᤡᤏᤡ᤹ ᤀᤠᤜᤠᤱᤈᤢᤶᤔᤥ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤁᤧᤕᤢᤅᤡ᤹ᤀᤠᤱ ᤁᤧᤈᤠᤶ ᤁᤧᤎᤢᤅᤢᤶᤗᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤅᤡᤀᤠᤱ ᤀᤡᤛᤪᤠᤀᤡᤗᤒᤠ ᤌᤡᤰᤏᤧᤳ ᤛᤢᤘᤠᤱᤜᤠ᤹ ᤛᤶᤍᤠᤱ ᤜᤠᤱ ᤁᤧᤈᤥᤃᤡ᤹ᤖᤥ॥”
31ᤕᤧᤛᤢᤖᤧ ᤔᤧᤳᤋᤢ. “ᤛᤡᤔᤥᤏᤣ. ᤛᤡᤔᤥᤏᤣ. ᤂᤧᤵᤛᤧ᤹ᤀᤥ᥄ ᤀᤡᤰᤔᤛᤠᤒᤠᤸᤗᤧ ᤆᤠ᤺ᤴᤏᤢ ᤁᤢᤜᤰᤁᤡᤴ ᤛᤧᤶᤔᤠᤖᤧ ᤗᤠᤃᤡ ᤀᤧᤵᤋᤢᤀᤠᤱ ᤛᤧᤴᤍᤢᤒᤠ ᤁᤢᤀᤡᤛᤡᤰ ᤔᤠᤑᤧᤴᤛᤠᤶᤔᤡᤸᤗᤧᤀᤠᤱ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤗᤧᤱᤔᤠ ᤑᤠ᤹ᤀᤠᤱ ᤀᤡᤱᤈᤠᤱ ᤏᤠ᤺ᤰᤋᤢᤀᤠᤱ ᤘᤠ᤹ᤖᤥ॥ 32ᤁᤖ ᤀᤡᤱᤃᤠ᤹ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤴ ᤔᤧᤗᤧᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤱ ᤐᤡᤏᤧᤀᤠᤱ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤕᤠᤶᤔᤥ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤀᤠᤱ ᤁᤧᤶᤓᤢ᤹ ᤁᤧᤴᤛᤠ᤹ᤛᤡᤀᤠᤱ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥᤃᤧᤛᤧ᤹ᤀᤥ॥”
33ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤐᤢᤱᤗᤠᤜᤡᤶᤔᤥ ᤌᤠᤖᤡᤰᤗᤰ ᤔᤣ᤺ᤴ. ᤁᤖ ᤛᤡᤔᤠ ᤐᤥᤱᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥”
34ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤋᤪᤢᤛᤣ. ᤀᤡᤱᤃᤠ᤹ ᤐᤠ᤺ᤴᤎᤡᤰ ᤔᤧᤳᤏᤧ᤹ᤖᤥ. ᤀᤠᤀᤡᤴ ᤛᤧᤴᤍᤡᤰ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”
35ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤡᤏᤡ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤛᤢᤰᤘᤠ. ᤛᤠᤒᤪᤡ ᤏᤢ ᤗᤠᤱᤛᤢᤵ ᤌᤣᤀᤠᤱ ᤔᤣ᤺ᤴᤏᤣ ᤐᤠᤱᤏᤡᤱᤅᤡᤸᤗᤧ ᤂᤡᤏᤡ᤹ ᤁᤧᤛᤠᤰᤐᤥ ᤁᤧᤎᤩᤧ᤹ᤀᤡᤒᤡ᥅”
ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤔᤧᤎᤩᤧ᤹ᤀᤡᤃᤧᤴᤗᤥ॥” 36ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤖ ᤀᤠᤸᤗᤥ ᤂᤡᤏᤡ᤹ ᤛᤢᤰᤘᤠ ᤛᤠᤒᤪᤡᤜᤠ᤹ ᤕᤠᤱᤛᤡᤱᤅᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤋᤠᤓᤣᤴ ᤔᤧᤱᤃᤵᤔᤏᤠᤒᤠᤸᤗᤧ ᤜᤠᤖᤠ᤹ ᤁᤢᤛᤢᤱᤄᤧ᤹ᤘᤠᤴ ᤛᤱᤄᤢᤀᤠᤱ ᤗᤳᤌᤡᤰ ᤋᤠᤓᤣᤎᤡᤰᤁᤠᤱ ᤀᤡᤅᤢᤖᤖᤥ॥ 37ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤂᤢᤏᤧ᤹ᤃ ᤜᤠᤱᤒᤡᤑᤩᤢᤱᤒᤠᤜᤠ᤹ᤏᤢ ᤔᤧᤍᤱᤄᤢᤖᤥ॥’ ᤁᤴ ᤐᤠ᤺ᤴᤏᤡᤴ ᤏᤢ ᤔᤠᤱᤏᤡᤱᤘᤠ᤹ᤐᤠᤴᤏᤥ ᤀᤡᤱᤃᤠ᤹ ᤀᤠᤔᤧᤴᤏᤥ ᤛᤠᤵᤋᤧᤀᤠᤱ ᤐᤵᤐᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤁᤧᤳᤗᤥ॥”
38ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤣ ᤏᤧᤳᤇᤡ ᤋᤠᤓᤣ ᤁᤳᤋᤢᤶᤒᤧᤖᤥ॥”
ᤕᤧᤛᤢᤖᤧ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤶᤔᤩᤠᤰᤁᤠᤱ ᤐᤥᤱᤗᤥ॥”
ᤕᤧᤛᤢᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤋᤢᤘᤠ ᤆᤥᤰ
(ᤔᤳᤋᤡ ᥈᥌:᥉᥌-᥊᥌; ᤔᤷᤁᤢ ᥇᥊:᥉᥈-᥊᥈)
39ᤜᤧᤰᤁᤩᤠᤱ ᤕᤧᤛᤢᤴ ᤌᤥᤛᤔᤠ ᤕᤠᤰᤑᤠᤱᤅᤥᤏᤢ ᤗ᤺ᤴᤍᤧᤀᤠᤱ ᤛᤍᤠᤍᤡᤱ ᤜᤧᤰᤁᤣ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤔᤧᤒᤣᤖᤥ॥ 40ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥” 41ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ. 42“ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣᤛᤧ᤹ᤀᤥ॥ ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤣ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥᤱᤗᤖᤥ॥” 43(ᤜᤧᤰᤁᤩᤠᤱ ᤂᤧᤵᤔᤥ ᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤌᤠ᤺ᤶᤛᤡᤱᤅᤠᤱ ᤂᤢᤏᤧ᤹ ᤁᤢᤓᤠ᤹ ᤐᤡᤖᤢᤖᤥ॥ 44ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤛᤠᤶᤃᤧᤴ ᤏᤡᤱᤘᤠ᤹ᤖᤧ ᤏᤠᤕᤥ ᤐᤥ᤺ᤰᤂᤧᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤖᤢᤀᤠᤱ ᤋᤢᤘᤠ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠ᤺ᤶᤒᤪᤡᤰᤘᤠᤴ ᤕᤶᤒᤕᤶᤒᤠ ᤔᤠᤰᤂᤡ᤹ ᤋᤧᤵᤐᤰᤘᤠ ᤁᤢᤀᤡᤛᤡᤰ ᤂᤠᤶᤔᤥ ᤔᤰᤌᤩᤧᤖᤥ॥)
45ᤕᤧᤛᤢᤴ ᤋᤢᤘᤠᤀᤥᤗᤠᤶ ᤐᤥᤃᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤕᤢᤅᤧᤒᤠ ᤋᤧᤴᤏᤥ ᤐᤣ॥ ᤂᤧᤱᤜᤠ᤹ ᤁᤧᤖᤧᤰ ᤔᤡᤱᤘᤠ᤺ᤸᤗᤧ ᤔᤧᤏᤠᤛᤧᤀᤠᤱ ᤔᤧᤀᤡᤵᤛᤧᤒᤠ ᤋᤢᤔᤢᤛᤡ॥ 46ᤂᤧᤱᤜᤠ᤹ ᤑᤥ᤺ᤰᤂᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤌᤣᤀᤠᤱ ᤁᤧᤀᤡᤵᤛᤡᤖ ᤁᤧᤏᤧᤛ᤻ᤛᤡᤒᤠᤒᤣ᥅ ᤐᤥᤃᤧᤶᤔᤧ᤹ᤀᤠᤱ ᤜᤱᤛᤠ᤹ᤔᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹॥”
ᤕᤧᤛᤢᤴ ᤔᤧᤍᤧᤶᤛᤢ᤹
(ᤔᤳᤋᤡ ᥈᥌:᥊᥍-᥋᥉; ᤔᤷᤁᤢ ᥇᥊:᥊᥉-᥋᥆; ᤕᤢᤜᤢ ᥇᥎:᥉-᥇᥇)
47ᤁᤖ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤖ ᤐᤳᤇᤧᤸᤗᤧᤛᤠ. ᤌᤡᤰᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤗᤳᤇᤠ ᤕᤜᤢᤍᤠ ᤔᤧᤵᤔᤏᤠᤒᤧᤸᤗᤧ ᤔᤏᤠᤜᤠ᤹ ᤗᤠᤶᤗᤥᤛᤢᤛᤡᤖ ᤂᤧᤵᤔᤥ ᤋᤠᤖᤢᤛᤡ॥ ᤜᤧᤰᤁᤩᤠᤱ ᤕᤧᤛᤢᤴ ᤆᤢᤵ ᤔᤧᤵᤔᤠᤀᤠᤱ ᤛᤧᤘᤠ ᤔᤧᤳᤇᤧ ᤁᤢᤒᤣᤛᤠᤱ ᤐᤣ॥ 48ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤕᤜᤢᤍᤠᤀᤣ. ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤆᤢᤵ ᤁᤧᤔᤧᤳᤋᤠᤀᤠᤱ ᤂᤧᤏᤧ᤹ ᤀᤡᤱᤃᤧᤗᤧᤰᤁᤠᤒᤠᤒᤡ᥅”
49ᤜᤧᤰᤁᤩᤠᤱ ᤀᤠᤸᤗ ᤂᤧᤵᤔᤥ ᤌᤣ ᤐᤥᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤸᤗᤥ ᤀᤠᤏᤡᤃᤣ ᤋᤠᤓᤣ᤺ᤸᤗᤧ ᤁᤱᤜᤠ᤹ ᤆᤧᤵᤋᤢᤶᤛᤡᤶᤒᤧᤒᤡ᥅” 50ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤌᤡᤰᤁᤡᤸᤗᤧᤃ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤧᤘᤠᤖᤥᤒᤧᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠᤛᤢᤖᤥ॥ 51ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤏᤠ᤹ᤖᤧᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤛᤢᤛᤢᤀᤠᤱ ᤏᤢᤛᤢᤖᤥ॥
52ᤜᤧᤰᤁᤩᤠᤱ ᤕᤧᤛᤢᤖᤧ ᤂᤢᤏᤧ᤹ ᤁᤢᤍᤧᤶᤛᤧ ᤁᤧᤍᤠᤒᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤔᤠᤱᤜᤡᤶ ᤁᤧᤃᤥᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣᤏᤢ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅ 53ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ. ᤁᤖ ᤂᤠᤍᤠᤶᤔᤠ ᤔᤢᤰᤛᤠᤶᤔᤡᤸᤗᤧ ᤕᤢᤰᤋᤢᤸᤗᤧᤀᤣ ᤂᤡᤏᤡ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤶ ᤐᤥᤱᤗᤥ॥”
ᤐᤋᤪᤢᤛᤖᤧ ᤕᤧᤛᤢᤴ ᤏᤠ᤹ᤖᤢ
(ᤔᤳᤋᤡ ᥈᥌:᥌᥏-᥍᥋; ᤔᤷᤁᤢ ᥇᥊:᥌᥌-᥍᥈; ᤕᤢᤜᤢ ᥇᥎:᥇᥋-᥇᥎)
54ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢ॥ ᤐᤋᤪᤢᤛᤧᤴᤏᤠᤱ ᤔᤠ᤺ᤱᤄᤠᤗᤠᤶ ᤂᤧᤱᤜᤠ᤹ ᤋᤡᤶᤍᤢᤛᤡᤖ ᤂᤧᤵᤔᤥ ᤋᤩᤧᤖᤥ॥ 55ᤂᤧᤱᤜᤠ᤹ᤖᤧ ᤗᤰᤂᤢᤶᤗᤢᤶᤔᤥ ᤔᤡᤔᤧᤍᤢᤵᤋᤢᤀᤠᤱ ᤔᤡᤈᤠ᤹ᤏᤢ ᤔᤧᤕᤢᤅᤧᤸᤗᤧ ᤐᤋᤪᤢᤛᤧᤴᤏᤠᤱ ᤂᤢᤏᤡ᤹ ᤗᤢᤶᤔᤥ ᤐᤣᤀᤠᤱ ᤕᤢᤱᤛᤡᤱ॥ 56ᤜᤧᤰᤁᤩᤠᤱ ᤂᤧᤵᤔᤥ ᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰᤗᤧ ᤂᤢᤏᤧ᤹ ᤂᤠᤃᤧᤀᤥ᤺ᤵᤐᤠᤀᤥ ᤕᤢᤅᤧᤸᤗᤧ ᤏᤢᤖᤡᤰ ᤀᤥᤔᤧᤳᤋᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤴ ᤔᤏᤠ᤺ᤴᤏᤠᤱ ᤕᤧᤛᤢ᤺ᤴᤏᤢᤀᤣ ᤘᤕᤧᤒᤠ ᤜᤧᤰᤁᤣ ᤗ᤹ᤖᤥ॥”
57ᤁᤖ ᤐᤋᤪᤢᤛᤖᤧ ᤂᤧᤴ ᤏᤠ᤹ᤖᤢᤖ ᤔᤧᤳᤋᤢ. “ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤌᤣ᤺ᤴᤏᤧ ᤐᤠ᤺ᤳᤋᤢᤒᤣ᥅ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ॥”
58ᤛᤵᤑᤠ ᤀᤣᤃᤠᤱ ᤘᤣ᤹ᤛᤔᤠ ᤌᤡᤰᤗᤧ ᤂᤢᤏᤧ᤹ ᤏᤡᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ᤃ ᤂᤧᤱᤜᤠ᤹ᤏᤢᤀᤣ ᤁᤧᤘᤕᤧᤖᤥ॥”
ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤣ᤺ᤴᤗᤥ. ᤀᤡᤱᤃᤠ᤹ᤃ ᤔᤧᤘᤕᤠᤱᤅᤡᤴᤗᤥ᥄”
59ᤕᤠᤱᤛᤡ ᤁᤢᤔᤢᤰ ᤌᤡᤰ ᤀᤣᤃᤠᤱ ᤁᤢᤓᤠᤎᤡᤰᤗᤧ ᤂᤢᤏᤧ᤹ ᤏᤡᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤂᤢᤏᤧ᤹ᤃ ᤕᤧᤛᤢ᤺ᤴᤏᤢᤀᤣ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤃᤠᤗᤡᤗᤗᤠᤶ ᤁᤧᤍᤠᤒᤠᤖᤥ॥”
60ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤧ᤺ᤶᤒᤧ ᤜᤦ᥄ ᤌᤧᤔᤠᤏᤡ ᤁᤧᤒᤠ᤺ᤳᤋᤢᤒᤣ᥅ ᤀᤡᤱᤃᤠ᤹ᤃ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤴᤗᤥ॥” ᤂᤡᤔᤥ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤀᤡᤱᤘᤠᤴ ᤁᤠᤛᤧ॥ 61ᤕᤧᤛᤢᤖᤧ ᤂᤡᤖᤡ ᤜᤡᤛᤡᤱᤅᤠᤱ ᤐᤋᤪᤢᤛᤧᤴ ᤀᤥᤔᤧᤳᤋᤢ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ. “ᤀᤠᤀᤡᤴ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ” ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤐᤋᤪᤢᤛᤖᤧ ᤁᤢᤏᤡᤱᤘᤠ᤹ ᤛᤢᤶᤗ᤹ᤖᤧ॥ 62ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤰᤂᤢᤶᤔᤥᤏᤢ ᤗ᤺ᤴᤍᤧᤐᤣᤀᤠᤱ ᤀᤢ᤺ᤰᤁᤠᤱ-ᤀᤢ᤺ᤰ ᤜᤠᤒᤧᤖᤥ॥
63ᤀᤠᤸᤗ ᤕᤧᤛᤢᤴ ᤁᤧᤃᤥᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤔᤠ ᤔᤧᤜᤣ᤺ᤰᤋᤢᤖ ᤔᤧᤜᤡᤵᤋᤢ॥ 64ᤁᤢᤔᤡᤰᤁᤡᤴ ᤋᤣ᤺ᤳᤋᤡᤸᤗᤧ ᤔᤧᤍᤧᤵᤋᤢᤖ ᤔᤧᤜᤡᤵᤋᤢᤀᤠᤱ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤜᤠ᤺ᤳᤗᤧ ᤁᤧᤜᤡᤵᤋᤧᤒᤣ᥅ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤧ᤹ᤀᤥ᥄” 65ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤘᤣ᤹ᤛᤔᤠ ᤕᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤖᤥ॥
ᤕᤧᤛᤢᤴ ᤕᤧᤈᤢᤶᤓᤥᤀᤥ ᤔᤧᤍᤣ᤹ᤖᤢ᤹
(ᤔᤳᤋᤡ ᥈᥌:᥋᥍-᥌᥎; ᤔᤷᤁᤢ ᥇᥊:᥋᥉-᥌᥋; ᤕᤢᤜᤢ ᥇᥎:᥇᥏-᥈᥊)
66ᤜᤧᤰᤁᤩᤠᤱ ᤂᤠᤀᤥ᤺ᤳᤋᤧᤀᤠᤱ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤈᤢᤵᤛᤧ॥ ᤜᤧᤰᤁᤩᤠᤱ ᤕᤧᤛᤢᤴ ᤕᤧᤈᤢᤶᤓᤥᤀᤥ ᤔᤧᤍᤣ᤹ᤖᤢᤀᤠᤱ 67ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧᤴᤒᤡ᥅ ᤕᤠᤵᤔᤡ ᤀᤠᤔᤧᤳᤋᤧ᤹॥”
ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤐᤠ᤺ᤳᤋᤢᤱᤛᤠᤱ ᤕᤠᤵᤔᤡ ᤏᤛᤠᤴ ᤁᤧᤴᤈᤥᤃᤡᤴᤗᤥ॥ 68ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣ᤺ᤴᤍᤥᤏᤡᤱᤛᤠᤱ ᤏᤥᤃᤵ ᤕᤠᤵᤔᤡ ᤁᤧᤶᤒᤡᤖᤡᤴ॥ 69ᤁᤖ ᤀᤠᤸᤗᤥᤀᤠᤱᤎᤥ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤅᤠ᤹ᤖᤥ॥”
70ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ᤀᤣ ᤏᤡᤱᤘᤠ᤹ᤑᤢᤛᤠᤏᤧᤒᤡ᥅”
ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠᤴ ᤛᤧᤰᤂᤠᤖᤥ॥”
71ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤸᤗ ᤀᤠᤏᤡ᤹ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤥ᤺ᤴᤍᤡ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅ ᤂᤢᤏᤧ᤹ ᤁᤢᤔᤢᤖᤠᤗᤠᤶᤒᤠᤀᤣ ᤀᤠᤏᤡ᤹ ᤂᤠ ᤀᤠᤄᤧᤵᤛᤢᤶᤗᤥ᥄”
Currently Selected:
ᤗᤢᤁᤠ 22: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.