Deuteronomio 5
5
Lajuneb mandaliletic
(Ex 20.1-17)
1Te Moisés la stsob spisil te lum Israel, jich la yalbey:
—Aiya awaiyic, israeletic, te mandaliletic soc te bila chapal ya calbeyex awaiyic yo'tic, nopaic ta lec, soc jich me xapasic bael ta spisil ora.
2“Te Cajwaltic te Dios cu'untic la spas trato ta jtojoltic ta wits Horeb. 3Ma ja'uc nax la spas trato soc te antiguo jme'-jtatique, jo'otic nix jc'oplaltic ta jpisiltic te jtsoboj jbajtique. 4Te Cajwaltic la sc'oponex ta wits Horeb, ta ye nix la sc'oponex loq'uel ta yolil te c'ajq'ue. 5Te jo'on ayon ta olil ta stojol Cajwaltic soc ta atojolic, swenta yu'un ya calbeyex te bila la yal te Cajwaltique, melel te ja'exe la axi'ic te c'ajq'ue, jich ma ba moex bael ta wits. Jich la yal te Cajwaltique:
6“Jo'on Ajwalilon te Dioson awu'une te la jloq'uesat tel ta Egipto ta banti ayat ta mozoile.
7“Ma me ayuc yan diosetic awu'un, melel jo'on nax me jtuquel te Dioson awu'une.
8“Ma me xapas awajcanan. Ma me xapasbey sloc'ombail bitic ayic ta stoyolil ch'ulchan, soc bitic ayic ta lumq'uinal, soc bitic ayic ta mar ta ye'tal te lumq'uinale. 9Ma me xaquejan aba ta stojolic, ma me xach'uunic.#Lv 26.1; Dt 4.15-18; 27.15. Melel jo'on Ajwalilon, Dioson awu'une. Jo'on Dioson te jc'axel ma jmulan teme ya ale yantic diosetic awu'un. Ya cac'bey castigo yu'un smulic te me'il-tatiletic ya yilayonique, soc te snich'nabic ta yoxcajal soc ta xchancajal. 10Yan te mach'atic c'uxon ta yo'tanic te ya xch'uunbonic te jmandale, ya jc'uxtay mil ta caj soc yal-snich'anic stuquelic.#Ex 34.6-7; Nm 14.18; Dt 7.8-9.
11“Ma me xatojoltabon ta alel jbiil te Ajwalilon te Dioson awu'une,#Lv 19.12. melel te mach'a ya stojoltabon ta alel jbiil te Diosone, ya me cac'bey castigo yu'un.
12“Na'a me te bi c'aalil yu'un cux-o'tan, te ja' swenta ch'ultesel ta jtojol te Ajwalilone, jich nix te bit'il la calbat mandal te Ajwalilon te Dioson awu'une.#Ex 16.23-30; 31.12-14. 13Waqueb nax me c'aal ya x'at'ejat, ja' me ya apas spisil a te awat'el te pasel ya sc'an awu'une. 14Yan te sjuquebal c'aal ja' me yu'un cux-o'tan stuquel, ch'ultesbil me ta jtojol te Ajwalilon te Dioson awu'une. Ma me x'at'ejat a,#Ex 23.12; 31.15; 34.21; 35.2; Lv 23.3. ni ja'uc aquerem-nich'an, awantsil-nich'an, awabat, acriada, awacax, aburro, ni biluc chambalamil awu'un, ni ja'uc te jyanlum nainem ta alumale, swenta yu'un pajal me ya acux awo'tan soc awabat soc acriada. 15Na'a me te ja' nix jich c'axat ta mozoil ta Egipto, te tey la jloq'uesat tel a te Ajwalilon te Dioson awu'un ta swenta smuc'ul yip cu'el. Ja' yu'un te Ajwalilon te Dioson awu'une ya jpasat ta mandal te ya acanantay te sc'aalelal cux-o'tane.
16“Ich'a ta muc' te ame'-atate,#Dt 27.16; Mt 15.4; 19.19; Mr 7.10; 10.19; Lc 18.20; Ef 6.2. jich me xach'uun spasel te bit'il la yalbat apas te Awajwal te Dios awu'une, swenta yu'un najt' me ya xcuxinat, soc jich me buen lec awo'tan ya x'ainat tey ta aq'uinal te ya yac'bat te Awajwal te Dios awu'une.#Ef 6.3.
17“Ma me x'awaiy milaw.#Gn 9.6; Lv 24.17; Mt 5.21; 19.18; Mr 10.19; Lc 18.20; Ro 13.9; Stg 2.11.
18“Ma me x'awaiy mulwej.#Lv 20.10; Mt 5.27; 19.18; Mr 10.19; Lc 18.20; Ro 13.9; Stg 2.11.
19“Ma me x'awaiy elec'.#Lv 19.11; Mt 19.18; Mr 10.19; Lc 18.20; Ro 13.9.
20“Ma me x'ochat ta lotil testigo ta stojol apat-axujc'.#Ex 23.1; Mt 19.18; Mr 10.19; Lc 18.20.
21“Ma me xbic'taj awo'tan yu'un yinam apat-axujc'. Ma me xbic'taj awo'tan#Ro 7.7; 13.9. yu'un sna apat-axujc', ni sq'uinal, yabat, scriada, swacax, sburro, ni ma me xbic'taj awo'tan yu'un ta spisil te bitic ay yu'un”, xi' te Cajwaltique.
Xiw yo'tan lum Israel
(Ex 20.18-26)
22“Ja' te c'opetic la yal ta tulan te Cajwaltic te c'alal c'opoj ta yolil c'ajc' soc ta yolil pimil tocal. Ja' te c'alal stsoboj sbaic spisilic ta ye'tal te witse. Te c'alal laj yo'tan ta c'ope, tey ma'yuquix bila yan la yal a. Te c'opetic la sts'ibuy ta cha'pejch' tonetic. C'alal ju' yu'un, la yac'bon ta jc'ab. 23Yan te c'alal la awaiyic te c'op yac ta loq'uel tel ta yijc'al q'uinal ta wits soc te la awilic te potsbil ta c'ajq'ue, ta apisilic te ja'exe, te jwentainwanejex yu'un te chajbalchajp jts'umbaltique soc te mamaletic yich'oj yat'elic, tal ac'opononic, 24jich la awalbonic: “Ta mero melel te Cajwaltic te Dios cu'untic la yaq'uix quiltic te yu'el soc te yutsilale. La caiybeytiquix te sc'op te loc' tel ta yolil c'ajc'. Yo'tic la jch'uuntiquix ta lec te ma ba ya xlajotic yu'un te ya sc'oponotic te Diose. 25Pero, ¿bi yu'un ya cac' slajinotic te c'ajc' mero xiweltic sbae? Teme ya caiybeytic xan sc'op Cajwaltic te Dios cu'untique, ya me xlajotic yu'un. 26Melel ¿ay bal mach'a ya yaiy yac ta c'op ta yolil c'ajc' te cuxul Diose, jich te bit'il la caiytiquix te jo'otique, te ma ba ya xlaj yu'une?#Heb 12.18-19. 27Ja' lec teme ya xnoptsajat bael te ja'ate, aiya awaiy ta lec te bila ya yal Cajwaltic te Dios cu'untique, patil ya me awal caiytic, swenta yu'un ya me jpastic spisil te bitic ya sc'an yo'tan ya jpastique”,#Ex 19.8; 24.3. xaex.
28“Te c'alal jich yacalex ta yalel a, te Cajwaltic la yaiy te bitic la awalbonique. Ja' yu'un jich la yalbon: “La caiyix te bila la yal te lume, mero lec ya caiy te bila ya yalique. 29¡Bayal me yutsil teme spisil ora jich ay te yo'tanique, te yacuc yich'onic ta muc' soc te yacuc spasic spisil ora te bila ya yal te mandaliletic cu'une, swenta yu'un bin nax me yo'tanic ya x'ainic soc yal-snich'nab ta spisil ora! 30Baan albeya, ac'a sujt'icuc bael ta snailpaq'uic. 31Yan te ja'ate ya me xjilotic li'to, ya me calbat awaiy spisil ta jchajp te mandaliletic cu'un soc te bitic chapale, swenta yu'un ya me awac'bey snopic, soc ya me spasic bael spisil ora ta lumq'uinal te ya cac'bey yu'uninique”, xi' te Cajwaltique. 32Ja' yu'un ch'uunaic spasel spisil ora te smandal Cajwaltic te Dios cu'untique, ma me xjowejex ta spasel ni jxujt'uc. 33Ja' me xat'unic te be la yac'beyex awilic Cajwaltic te Dios cu'untique, swenta yu'un jich me lec ya x'ainex a, soc jich me ya xnainex bayal ja'wil ta lumq'uinal te ya yac'beyex awu'uninique.
Currently Selected:
Deuteronomio 5: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.