2 Reyes 9
9
Jehú tsaot yu'un ya x'och ta muc' ajwalil yu'un Israel
1Te j'alwanej yu'un Dios Eliseo la yic' tel jtul te jchajp j'alwanejetique, jich la yalbey:
—Chajbana aba, yu'un ya me xbaat. Ila, ich'a bael jun frasco aceite, baan ta lum Ramot-yu'un-Galaad. 2C'alal ya xc'oat tey a, ya me ale te Jehú snich'an Josafat, smam Nimsi. Ochan bael tey ta banti ay, ic'a loq'uel ta yolil te yantic sjo'taque, ic'a bael ta yan cuarto. 3Tsaca te aceite ay ta frasco, malbeya ta sjol, soc jich ya awalbey: “Jich ya yal te Cajwaltique: ‘Jo'on ya jtsaat yu'un muc' ajwalil ya me xc'oat ta Israel’, xi'”, uta me. Jama ta ora te ti'naile, loc'an ta anel, ma me xatejc'an aba —xi' sc'oplal.
4Te querem j'alwanej yu'un Dios bajt' ta lum Ramot-yu'un-Galaad, jich te bit'il pasot ta mandale. 5C'alal c'ot tey a, stsoboj sbaic a c'o sta te capitanetic yu'un soldadoetic, jich la yal:
—Ay bi ya calbat —xi'.
La sjojc'obey te Jehú:
—¿Mach'a ta jpisiltic? —xi'.
—Ja'at —xi' ta sjaq'uel te j'alwaneje.
6Ora jajch' te Jehú, och bael ta yut na. Jich te j'alwanej yu'un Dios la smalbey te aceite ta sjole, soc jich la yalbey:
—Te Cajwaltic te Dios yu'un Israel jich ya yalbat: “Jo'on ya jtsaat yu'un muc' ajwalil ya xc'oat yu'un Israel, ja' te lum cu'une.#1 R 19.16. 7Ja'at me ya alajinbey te sts'umbal Acab, te awajwale. Jich me ya asutbey spacol a te xch'ich'el te j'alwanejetic cu'un soc ta spisil te abatetic cu'un te la smalbey Jezabel. 8Ta spisil te mach'atic ay yu'un te Acab, ya me xlaj spisilic. Ya me jlajinbey spisil te queremetic yu'un ta Israel, ma'yuc jtuluc cuxul ya xjil. 9Jich ya jpasbey te sts'umbal Acab te bit'il la jpasbey te sts'umbal Jeroboam snich'an Nabat, soc nix te sts'umbal Baasa snich'an Ahías. 10Jich nix te Jezabel ya me xti'ot ta ts'i' ta muc'ul spamlej yu'un Jezreel,#1 R 21.23. ma'yuc mach'a ya xmucot yu'un”, xi' te Cajwaltic —xi'.
C'alal laj yo'tan ta yalel te j'alwanej yu'un Dios, la sjam te ti'naile, loc' ta anel ta ora. 11Te Jehú c'alal ba stsob xan sba soc te yantic capitán-soldadoetic yu'un te yajwalique, jich jojc'obot yu'unic:
—¿Bi yac ta c'oel ta pasel? ¿Bi yu'un tal yilat te mach'a jsoquem-jole? —xiic.
La sjac' te Jehú:
—Ja'ex nix ana'beyejic sba, soc ana'ojic te bit'il ya xc'opoje —xi'.
12—Ma xalo'layotic, ala caiytic spisil —xiic.
Jich c'opoj te Jehú.
—Jich la yalbon: “Jich yaloj te Cajwaltique: ‘Jo'on la jtsaatix yu'un ya x'ochat ta muc' ajwalil yu'un Israel’, xi'”, la yuton —xi' te Jehú.
13Ora la stsac te snajt'il c'u' ta juju-jtul, la slimbeyic ta cajalcaj moel ta stojol Jehú, soc ora la yoq'uesinic xulub chij, soc awunic:
—¡Ja' muc' ajwalil te Jehú! —xiic ta aw.
Jehú la smil Joram, muc' ajwalil yu'un Israel
14Te Jehú snich'an Josafat, smam Nimsi, la xchap sjo'tac ta scontroinel te Joram. Te Joram la sjoin spisil te talemic ta Israel te la scoltayic te Ramot-yu'un-Galaad, te c'alal ac'bot guerra yu'un Hazael, ja' te muc' ajwalil yu'un Siria. 15Jich te Joram sujt'em bael ta Jezreel ta xpoxtayel te yejch'en ac'bot yu'un siriaetic ta guerra soc Hazael. Te Jehú la yalbey te sjo'taque, teme mero melel te ya sc'anic te ja' muc' ajwalil ya xc'ot yu'unique, chican ma'yuc mach'a ya yaq'uic loq'uel ta lum te ya xbajt' ta Jezreel ta yalele. 16Ora mo ta scarreta yu'un guerra, bajt' ta Jezreel te banti ay ta wayibal te Joram. Ja' nix jich te Ocozías, te muc' ajwalil yu'un Judá, baem ta yula'tayel te Joram. 17C'alal te j'il-q'uinal moem ta ba toyol ts'ajc' ta Jezreel la yil te jchajp swinictac Jehú, awun:
—¡Tal winiquetic! —xi'.
Jich yu'un te Joram la yal mandal:
—Ticunaic ta tael yu'un jtul winic ta caballo, swenta yu'un ya me sjojc'obeyic teme ta swenta lamal q'uinal yacal ta talele —xi'.
18Te mach'a ya sna' moel ta caballo bajt' ta stael te Jehú, jich la yalbey:
—Te muc' ajwalil la sticunon ta sjojc'oyel, teme swenta lamal q'uinal te yacalex ta talele —la yut.
La sjac' te Jehú:
—Ma awentauc te ja'ate. La', joinawon bael —xi'.
Te j'il-q'uinale jich la yalbey te Joram:
—Te abate c'otix ta stojolic, pero ma ba chican ya sujt' tel —xi'.
19Te muc' ajwalil ora la xcha'ticun yan winic te ya sna' moel ta caballo, cha'c'ot xan ta stojolic, jich la yal:
—Te muc' ajwalil la sticunon ta sjojc'oyel, teme swenta lamal q'uinal te yacalex ta talele —xi'.
La sjac' te Jehú:
—Ma awentauc. La', joinawon bael —xi'.
20Te j'il-q'uinal la yal xan ta stojol Joram:
—Te yane c'otix xan ta stojolic, pero ma ba chican ya sujt' tel. Te mach'a yac ta yiq'uel tel te carreta, ja' yilel te Jehú, te smam Nimsi, melel jich yac ic'wanej bit'il mach'a soquem sjole, melel jich nix te stalele —xi'.
21Te Joram la yal mandal:
—Ac'beya scaballoil te jcarreta yu'un guerra —xi'.
La yac'beyic scaballoil te scarreta. Te Joram, muc' ajwalil yu'un Israel, soc Ocozías, muc' ajwalil yu'un Judá, loq'uic bael ta scarretaic ta juju-jtul, ba staic te Jehú. La staic ta sq'uinal Nabot ta Jezreel. 22C'alal te Joram la yil te Jehú, jich la sjojc'obey:
—¿Swenta bal lamal q'uinal te talate, Jehú? —la yut.
La sjac' te Jehú, jich la yal:
—¿Bit'il ay lamal q'uinal te yac'oj puersa te ame' Jezabel ta swenta xch'uunel lotil diosetic soc te ay bila ya sna' spasel ta swenta te pucuje? —xi'.
23Te Joram la yac' buelta bajt' ta anel; soc la yawtay te Ocozías, jich la yalbey:
—¡Ocozías, la sutix sba ta jtojoltic! —xi'.
24Pero te Jehú la spaman jajch'el te st'imalte', la yac'bey bael jun tiro te yat'ejibal st'imalte' te Joram. Te st'imalte' och ta spat, c'ax ta yo'tan te Joram, jich yal ta sba scarreta. Jich laj te Joram. 25Te Jehú la yalbey mandal te Bidcar, te yac ta stijel scarreta:
—Loq'uesa bael tey a, ac'a bael ta sq'uinal Nabot ta Jezreel. Melel ya to jna' te c'alal jo'otic yacalotic ta sbeentesel te carretaetic yu'un Acab a te stat Joram, te Cajwaltic la yalbey tulan sc'oplal te bila ya xc'ot ta swenta. 26Jich la yal: “Jich bit'il te wojey la quilbey te xch'ich'el Nabot soc te snich'nabe, jich ni me ya cac'bat atoj uuc li' ta q'uinal in to.#1 R 21.19. Jo'on Ajwalilon te la cal in to”, te xi' te Cajwaltique. Ja' yu'un tsaca, ac'a bael ta sq'uinal Nabot, jich nix te bit'il yaloj te Cajwaltique —xi' te Jehú.
Jehú la smil Ocozías
(2 Cr 22.7-9)
27C'alal la yil te Ocozías muc' ajwalil ta Judá te bi yac ta c'oel ta pasele, bajt' ta anel ta stojol Bet-hagan. Pero nutsot yu'un te Jehú, te la yal mandal:
—¡Milaic! —xi'.
La yejch'entesic ta scarreta ta moel yu'un Gur, te nopol ay soc Ibleam. Pero bajt' to ta anel c'alal ta Meguido, tey c'ot ta lajel a. 28Patil te abatetic yu'un la yich'beyic bael sbaq'uetal ta carreta ta Jerusalén, tey la smuquic ta smuquenal sme'-stat ta Lum-yu'un-David.
29Te Ocozías ja' och ta muc' ajwalil ta Judá a te c'alal ay bulucheb ja'wil yochel ta muc' ajwalil ta Israel a te Joram te snich'an Acab.
Laj Jezabel
30Te Jehú bajt' ta Jezreel. C'alal la yaiy te Jezabel, la sbon ta ch'alel ta ijc'al tinta sjoyobal te jujun site, soc la xch'al te sjole. Patil la sjelan loq'uel sjol ta ventana. 31C'alal c'ot ta yochibal te lum te Jehú, jich albot yu'un te Jezabel:
—¿Bi awilel ja'at te pajalat soc Zimri? Melel la amilix te awajwale#1 R 21.23. —xi'.
32Te Jehú la yil moel te ventana, jich la yal:
—¿Mach'atic a te jun yo'tanic ta jtojole? —xi'.
Ay che'oxeb jwentainwanejetic ta sna ajwalil, la yac' coel sitic ta yilel. 33Pasotic ta mandal yu'un Jehú:
—¡Ch'ojaic coel tel te antse! —xi' sc'oplalic yu'un.
Jich la xch'ojic coel c'alal ta lum. Wil moel ta pajc' te xch'ich'ele, soc ta bay caballoetic. Te caballoetic la spech'anic ta teq'uel te Jezabel. 34Te Jehú bajt' ta we'el-uch'el. Patil xan la yal mandal te Jehú:
—Baan ila awilic te bol antse, mucaic, melel te antse yantsil-nich'an muc' ajwalil —xi'.
35Pero c'alal c'o yilic yu'un ya smuquic, ja' xanix c'o stabeyic te sbaquel sjol soc te sbaquel yacan soc te sc'abe. 36Jich sujt'ic ta yalbeyel yaiy te Jehú. Te Jehú la sna' ta yo'tan te bi la yal te Cajwaltique:
—Te Cajwaltic yaloj nix a, ja' yaloj ta swenta te yabat Elías te talem ta Tisbe: “Te ts'i'etic ya xti'bot yu'un te sbaq'uetal Jezabel ta sq'uinal Jezreel.#Os 1.4. 37Soc ta scojt'ol ya me yich' puquel jichuc tsa' ta sq'uinal Jezreel, ja' to teme ma spasix ta na'el a teme ja' sts'ubil te Jezabel”, te xie —xi' te Jehú.
Currently Selected:
2 Reyes 9: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.