2 Reyes 8
8
Te sunem-ants sujt' xan sbiluc
1Te Eliseo la yalbey te antse, ja' te la xcha'cuxesbey yale:#2 R 4.8-37.
—Baan ta nainel ta yan q'uinal soc spisil mach'atic ay awu'un, melel te Cajwaltic la yalix te ya xtal bayal wi'nal li' ta jq'uinaltic, te ya xjalaj juqueb ja'wile —la yut. 2Te ants la xchajban sba, jich la spas te bit'il albot yu'un te j'alwaneje. Bajt' soc te mach'atic ay yu'une, bajt'ic ta sq'uinal filisteoetic, jalajic ta nainel juqueb ja'wil tey a. 3Te bit'il c'axix te juqueb ja'wile, te ants loc' tel ta sq'uinal filisteoetic, ba yil te muc' ajwalil yu'un Israel. C'o sc'an te ya sujt' ta swenta te sna soc te sq'uinale. 4Te muc' ajwalil yac ta c'op soc a te Giezi, te yabat Eliseo te j'alwanej yu'un Dios, melel la sc'anbey te yacuc x'albot yaiy spisil te bitic bayal yutsil spasoj te Eliseo. 5Ja' ta yorail yac ta yalel yaiy a te muc' ajwalil te Giezi te bit'il la xcha'cuxesbey yal jtul ants te Eliseo, te c'ot te ants ta sc'anel ta stojol muc' ajwalil te ya sujt' xan ta swenta te sna soc te sq'uinale. Ja' yu'un te Giezi jich la yalbey te muc' ajwalile:
—Muc' ajwalil, ja' te ants la calbatix sc'oplal in to, soc ja' te yal cha'cuxesbot yu'un Eliseo —xi'.
6Ja' yu'un te muc' ajwalil la sjojc'obey xan te antse. Te antse la yalbey te bi c'oem ta pasel ta stojole. Patil te muc' ajwalil la spas ta mandal jtul abat yu'un te ya yil te ya sujt' ta swenta te ants spisil te bitic ay yu'une, soc spisil te bitic loc' tey ta sq'uinal te jayeb c'aal loq'uem bael, ja' to ta yorail te ya yich' xan ta swentae.
Hazael och ta muc' ajwalil yu'un Siria
7Patil te Eliseo bajt' ta Damasco, ja' ta yorail yac ta chamel a te Ben-adad te muc' ajwalil yu'un Siria. La yalbeyic te tey c'otix a te j'alwanej yu'un te Diose. 8Te muc' ajwalil jich la yalbey te Hazael:
—Ich'a bael jun majt'anil, baan c'opona te j'alwaneje. Albeya te yacuc sjojc'obey te Yajwal teme ya to xc'ax cu'un te chamel quich'oje —xi'.
9Te Hazael ba sc'opon te j'alwanej yu'un te Diose. La yich'bey bael buen lec smajt'an, ja' te bi mero lequic ya xloc' ta Damasco, cuchbil bael ta cha'winic (40) ta jcojt' camelloetic. C'alal c'ot ta stojol Eliseo, jich la yalbey:
—Te Ben-adad, muc' ajwalil yu'un Siria, te jichat ta yo'tan te bit'il state, la sticun ta jojc'oyel ta atojol teme ya to xc'ax yu'un te chamel yich'oje —xi' c'oel.
10Jich jac'bot yu'un te Eliseo:
—Baan albeya te ya to xc'ax yu'un te chamele. Ja'uc me to la yac'bonix jna' te Cajwaltic te puersa ya xlaje —xi'.
11Te Eliseo ora la sc'abubey sit ta stojol Hazael. Te Hazael ma ba lec c'ot ta yo'tan. Te j'alwanej yu'un Dios jajch' ta oq'uel. 12Te Hazael jich la sjojc'obey:
—¿Bi yu'un ya x'oc'at, cajwal? —xi'.
La sjac' te Eliseo:
—Melel ya jna' te ya awac'bey swocol te israeletic, melel ya awac'bey sc'aal te anjibaletic yu'unic, ya amil ta puñal te querem-ach'ixetic, ya amaj ta lum te alaletic yu'unique, soc ya ajambey xch'ujt'ic te antsetic yic'oj yalique —xi'.
13Jich la sjac' te Hazael:
—Pero jichon ya caiy te bit'il ts'i'e. ¿Bit'il ya xju' cu'un spasel te bila ya awale? —xi'.
Jich c'opoj te Eliseo:
—Te Cajwaltic la yac'bonix jna' te ja'at ya x'ochat ta muc' ajwalil yu'un Siria#1 R 19.15. —xi'.
14Hazael la sc'opon jilel te Eliseo, bajt' ta stojol te yajwale. Te yajwale jich jojc'obot yu'un:
—¿Bi la yalbat te Eliseo? —xi'.
Jich la sjac' te Hazael:
—La yalbon te ya to xc'ax awu'un te achamele —xi'.
15Pero ta xchebal c'aal te Hazael bajt' ta stojol, la stsac jun tsots, la yajts'es ta ja', la yac'bey ta sni' te muc' ajwalil, jich laj. Ja' och sjelolin ta muc' ajwalil te Hazael.
Yat'el Joram, muc' ajwalil yu'un Judá
(2 Cr 21.1-20)
16Ta yo'ebal ja'wil yochel ta muc' ajwalil yu'un Israel a te Joram snich'an Acab, Joram snich'an Josafat la yich' yat'el ta muc' ajwalil yu'un Judá. 17Ay lajchayeb xcha'winic (32) ya'wilal a te och ta muc' ajwalile. Waxaqueb ja'wil jalaj ta muc' ajwalil ta Jerusalén. 18Pero ja' nix la st'unbey sbe te muc' ajwaliletic ta Israel soc te patil alnich'anetic yu'un Acab, melel te yiname sts'umbal Acab. Ja' yu'un te yat'ele amen ta sit te Cajwaltique. 19Pero te Cajwaltic ma ba la sc'an la slajin te Judá ta scaj xc'uxul ta yo'tan te David te yabate. Jc'axel la yalbey te ay me sts'umbal, yac ta tilel jichuc c'ajc' c'oem spisil ora.#1 R 11.36.
20Te c'alal ay ta ajwalil ta Judá a te Joram, te Edom la stoy sba ta stojol Judá#Gn 27.40. te wentainbil yu'une. La yaq'uic ochel muc' ajwalil yu'unic stuquel. 21Ja' yu'un te Joram bajt' ta Zair ta spisil soc te carretaetic yu'une. Ta ajc'ubal jajch' bael soc te jwentainwanej-carretaetic yu'une, la yac'beyic guerra te edometique, pero ja' joytayotic yu'un. Jich loq'uic ta anel. 22Jich te Edom puersa ju' yu'un te la scoltay sba ta sc'ab te Judá c'alal ora. Soc ja' nix ta yorail a la yac' sba ta libre uuc te lum Libna.
23Te jayeb xan sc'oplal te Joram soc ta spisil te bi la spase, ts'ibubil ta libro yu'un yat'el muc' ajwaliletic ta Judá. 24C'alal laj te Joram, la smuquic ta banti mucul te stat ta Lum-yu'un-David. Patil ja' och jilel ta sjelol te snich'ane, te Ocozías sbiile.
Yat'el Ocozías, muc' ajwalil yu'un Judá
(2 Cr 22.1-6)
25Ta slajchayebal ja'wil yat'el ta muc' ajwalil yu'un Israel a te Joram snich'an Acab, och ta muc' ajwalil ta Judá te Ocozías snich'an te muc' ajwalil Joram, te lajemix stuquele. 26Ay cheb xcha'winic (22) ya'wilal a te och ta muc' ajwalil te Ocozías, jun nax ja'wil ay ta muc' ajwalil ta Jerusalén. Te sme'e Atalía sbiil te ja' sts'umbal Omri, te muc' ajwalil yu'un Israel te namey lajixe. 27Te Ocozías ja' nix la st'unbey sbe Acab soc te sts'umbale. Ta scaj te jun sts'umbal sba soc te mach'atic ay yu'un te Acab, ja' yu'un la snopbey te yat'ele. Jich amen c'ot yat'el ta sit te Cajwaltique.
28Te Ocozías la syom sbaic soc Joram snich'an Acab, yu'un bajt'ic ta guerra ta Ramot ay ta sq'uinal Galaad. Ja' ba yac'beyic guerra te Hazael muc' ajwalil yu'un Siria. Pero te siriaetic la yejch'entesic te Joram, ja' te muc' ajwalil yu'un Israel. 29Te Joram sujt' bael ta lum Jezreel ta xpoxtayel te yejch'en ac'bot yu'un siriaetic ta Ramot, te c'alal la yac'beyic guerra te Hazael, te muc' ajwalil yu'un Siria. Te bit'il yaquix ta chamel a te Joram, te Ocozías ba yula'tay ta lum Jezreel.
Currently Selected:
2 Reyes 8: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.