MATEO CALLARI YUYAI
CALLARI YUYAI
Quishpirinamanda Ali Villaita tucui villajcunami, Jesusmanda ashtahuan ali ricuchingapa munashpa, asha shican yuyaihuan quilcanajushca. Ali villaita villashpa, punda quilcashcapica, Apunchi Jesustaca Quishpichij Mesías cajta ricuchishpami villajun. Paita cachamushpami Taita Diosca, Ñaupa Testamentopi agllashcacunaman carashapacha nishcataca pactachishca.
Cai quilcashcapica, imashna cashcata catishpami pundaca, ñaupa taitacunapaj shuticunata, chaipaj catica Jesús huacharishcata villajun. Chai jipaca, quimsa chunga huata canatashna imatallapash na villashpami, Jesusta ñaupashpa villaj, Bautizaj Juan Diospajta rurajushcata villashpa callarin. Chaitaca, callari capitulomanda 3:12 camanmi villajun.
Tucuicunapash ricujta Apunchi Jesús, Diospajta rurai callaringapaca, pai bautizarishcata, na ali yuyaicunata diablo cujushcatami ricunchi. Chaitaca, capítulo 3:13 manda 4:11 camanmi villajun.
Cai quilcashcapica Jesusca, Diospajta Galilea llactapi rurajushcata, chaipica ali villaita villashpa, yachachishpa, huañujujcunatapash alichishpa purijushcatami villajun. Chaitaca, 4:12 manda 18:35 camanmi villajun.
Chai jipa ña huañungapa Jerusalenman rishcamandami, capítulo 19manda 20caman villajun.
Paita huañuchina pascua semanapi imalla tucushcatapash, huañushpa quimsa punllapi causarishcatapash, causarishca jipa taucacunaman ricurishcatapash, jahua pachaman rishcatapash, capítulo 21manda 28camanmi villajun.
Quishpirinamanda ali villaita villaj Mateo quilcashcaca: “Ñucapaj yachajujcuna tucuchunmi, cai pachapi causanajuj tucuilla gentecunapajman rishpa villana canguichi” nishpa, Jesús paipaj yachajujcunata mandashcahuanmi tucurin.
Ali villaita villajuj cai quilcashcapica, Jesusca alipacha yachachij cajta, Taita Dios mandashca shimicuna ima cajta ninan ushaihuan villajushcata, pai mandajunamandapash yachachijushcatami ricuchijun. Jesús shina alipacha yachachishcacunaca, picha yachachijcunapi shicanyachishcami tiyajun.
Punda callari yachachishcapica, urcupi yachachishcata crijcuna imashna canata, imatalla ruranata, imatalla japigrinata, jahua pachapi Taita Dios mandajuj llactaman yaicujcunaca, ima tucunatami yachachishca. Chaitaca, capítulo 5manda 7camanmi villajun.
Cati yachachishcapica, chunga ishcai paipaj yachajujcuna ali villaita villagrichun yachachishcatami ricuchijun. Chaitaca, capítulo 10 pimi villajun.
Ishcaipaj cati yachachishcapica, jahua pachapi Dios mandajujta imahuambash chimbapurashpa yachachishcatami ricunchi. Chaitaca, capítulo 13 pimi villajun.
Quimsapaj cati yachachishcapica Jesusca, Paita crishpa yachajujcunapajca, ima cashcatami yachachishca. Chaitaca, capítulo 18 pimi villajun.
Chuscupaj cati yachachishcapica, cai pacha tucurinamandapash, Taita Dios mandangapa chayamunamandapashmi yachachishca. Chaitaca, capítulo 24manda 25camanmi villajun.
Currently Selected:
MATEO CALLARI YUYAI: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.