MALAQUÍAS 2
2
Israelcuna na cazushcamandami rimashca
1Sacerdotecuna, cunanga cai mandashcacunaca cangunapajmi. 2Tucuita Mandaj Diosca, cashnami nin: “Ñuca mandashcata na uyashpa, tucui shunguhuan Ñuca shutita alicachina yuyaita na japijpica, ninan llaquitami cachamusha. Canguna bendiciai tucushcataca, ninan llaquimanmi tigrachisha. Tucui shunguhuan Ñucata cazuna yuyaita na japishcamandaca, cangunataca ñami ninan llaquipi churarcani.
3Ñucaca cangunapaj cati miraicunatapashmi llaquichisha. Ñucaman carashpa huañuchishca animalcunapaj huanucunatapash, cangunapaj ñavipimi shitasha. Cangunataca, chai animalcunapaj huanucunandimi tandachishpa shitasha. 4Chashna rurajpimi Levipaj miraicunahuan, Ñucahuan ari nishcata pactachingapa cai mandashcata cushcata yachanguichi. Tucuita Mandaj Dios Ñucami chashna nini.
5Causaitapash charishpa, tucuipi alipacha causachun carangapami, Ñucaca paicunahuan ari nijurcani. Chaicunataca, Ñucata manllashpa causachunmi curcani. Chaimandami paicunaca, Ñuca ñaupajpipash, Ñuca shutita manllashpa, na jariyashpa causanajurca. 6Levitacunaca, Ñuca na llullashpa mandashcatami yachachinajurca. Paicunapica, ima na ali shimicunata rimashcapash na ricurircachu. Ñucahuan na fiñanajushpa, alitalla rurashpami causanajurca. Na alita rurashpa causanajujtapash, taucacunatami saquichinajurca. 7Sacerdotepaj shimihuanga, ali yachajunatami yachachinga. Pai villajpimi gentecunaca, mandashcata yachangapa munanajunga. Paica, tucuita Mandaj Diosmanda villaj runami.
8Ashtahuangarin cangunaca, ali ñanmandami anchurircanguichi. Ñuca mandashcata panda yachachishpami, nitijachijshna taucacunata pandachircanguichi. Chashna rurashpami, levitacunahuan ari ninajushcataca huaglichircanguichi. Tucuita Mandaj Dios Ñucami chashna nini. 9Imashnami cangunapash Ñuca yachachishcata na cazushpa, Ñuca mandashcatapash ñavita ricushpalla yachachircanguichi, chashnallatami cangunatapash, tucuicuna na alicachishca, yangapi churai tucushca causachun churarcani” ninmi.
10¿Nachu tucuicunallata, shujlla taitata charinchi? ¿Nachu chai Taita Diosllata rurashcacuna canchi? Shina cashpaca, ¿imashpata ñucanchi ñaupa taitacunahuan ari ninajushcataca yangapi churashpa, caishuj chaishuj na cazurinajunchi? 11Judá llactapipash, Israel llactapipash, Jerusalenbipash, yachashpata na cazushpami, millanayaicunata ruranajurca. Judá llactapi causajcunaca, Mandaj Dios juyashca huasigutapash yangapi churashpami, na rijsishca diosta mañaj huarmicunahuan cazaranajurca. 12Mandaj Diosca chashnata ruraj runatapash, ofrendata apamuj runatapash, maijan cachumbash, tucuita Mandaj Diosman imatalla cungapa shamujtapashmi, Jacobpaj carpacunamanda anchuchinga.
13Cutinllatami Mandaj Diospaj altartaca, ninanda caparishpa huacashca viquihuan jundachinguichi. Ñucaca, canguna Ñucaman imatalla caranacunata carashcataca, ricuitallapash na ricushachu. Cangunapaj maquimandaca, napacha chasquishachu. 14Ashtahuangarin cangunaca: “¿Imashpata na chasquin?” ninajunguichimi. Canllatami, chairalla viñai cashpa cazarashca cambaj huarmita jichurcangui. Chaitaca, Mandaj Diosca ricujurcami. Chai huarmica, canhuan cazarashca, canhuan ari nishcami carca. 15¿Nachu Taita Diosca, Espíritu junda cashpa, cangunataca shujllatashna rurarca? ¿Imapata chashna rurashcanga? Paica, cangunapaj miraicunapash, Paipajlla cachun munashpami, chashna rurarca. Shina cashcamanda, ali yuyaihuanmi causana canguichi. pactarallapash chairalla viñai cashpa cazarashca cangunapaj huarmitara jichunguichiman. 16Israelcunata Mandaj Taita Diosca, cashnami nin: “Huarmita jichuj runataca fiñanimi. Chai na alita rurashcahuan paipaj churajunata quilpajshna causajtaca fiñanimi. Shina cashcamanda, ali yuyaihuanmi causana canguichi. Cangunapaj huarmitaca napacha llullanachu canguichi” nishpami, tucuita Mandaj Diosca villajun.
Dios llaquichina punllami chayamujun
17Canguna rimarishcahuanmi, Mandaj Diostaca shaijuchircanguichi. Shina cashpapash cangunaca: “¿Imapita Paitaca shaijuchishcanchi?” ninguichimi. “Maijan cashpapash na alita rurashpami, Mandaj Diostaca cushichinchi, paicunahuanmi Paipash cushijun, na cashpaca alitalla ruraj Taita Diosca ¿maipita canga?” ninajushpami shaijuchinguichi.
Currently Selected:
MALAQUÍAS 2: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.