MALAQUÍAS 1
1
Mandaj Diosca, Jacobtami juyashca
1Israelcunata llaquichinata Mandaj Dios villashca shimicunatami, Malaquiasca villashca.
2Mandaj Diosca: “Cangunatami Ñucaca juyarcani” nircami. Ashtahuangarin cangunaca: “¿Imashnata ñucanchitaca juyarcanguiyari?” nircanguichimi. “Esaú runaca, ¿nachu Jacobpaj huauqui carca? Shina cajpipash, Jacobtami juyarcani” ninmi Mandaj Diosca. 3Shinallata: “Esaú runataca na juyashpami, pai causana urcucunataca, jichushca pambata saquircani. Paipaj alpacunapica, chacal animalcuna causachunmi saquircani” ninmi.
4Edom llactapi causajcunaca, cashnami ninajunga: “Ñucanchica, imagupash illajmari canchi. Shina cashpapash, tucuilla urmachi tucushcataca, cutinmi shayachishun” ninajungami. Shinamandami tucuita Mandaj Diosca cashna nin: “Paicuna shina ninajujpica, paicuna cutin shayachijpipash, Ñucami cutin urmachisha. Shina urmachijpimi, cashna ninajunga: ‘Diosta na manllaj llactami. Causaita causaicaman, Mandaj Dios fiñashca gentecunami’ ninajungami. 5Chashna rurajtaca, cangunapaj ñavihuambacha ricushpami cashna ninguichi: ‘Mandaj Diostaca, Israel llacta mujungunata yalishpa causajcunapash jatunyachinajuchun’ ninguichimi” ninmi.
Mandaj Diosca, sacerdotecunata jarcashpa rimashcamanda
6Sacerdotecuna, tucuita Mandaj Diosca, cangunatami cashna nin: “Huahuaca, paipaj taitata alicachinmi. Shinallata, gañan runapash, paita mandaj runata manllanmi. Shina cashpaca, Ñuca cangunapaj taita cajpica, ¿imashpata na alicachihuanguichi? Ñuca cangunata mandaj cajpica, ¿imashpata na manllahuanguichi? Cangunaca, Ñuca shutita yangapi churashpa rimashpapash: ‘¿Imashnata cambaj shutitaca, yangapi churanchiyari?’ ninguichimi. 7Cangunaca, mapa tandacunata apamushpa, Ñuca altar jahuapi rupachishpapash: ‘¿Ñucanchica, candaca imapita na cazunchiyari?’ ninguichimi. Cangunaca, Ñuca mezatapash, yangapi churanallami yanguichimi. 8Ñausa animalta Ñucaman carashpa huañuchinajuchun cushcapash, ¿cangunapica alichu? Shinallata jangata cashpa, ungushcata cashpa Ñucaman carashcapash, ¿cangunapica alichu? Ali cajpica, chashna animalcunata cangunata mandajman caragrichilla. Shina carajpica, ¿candaca alicachingachu, na cashpaca, chai carashcataca chasquingachu? Tucuita Mandaj Dios Ñucami, chashna nini.
9Cunanga: ‘Taita Dios ñucanchiman alita rurachun, ñucanchita llaquichun mañapaichiyari’ ninimi. Ashtahuangarin chashna na alicunatalla ruranajushpaca, ¿imashnashi cushichihuanguichi? ninimi. Tucuita Mandaj Dios Ñucami chashna nini. 10Ñuca altar jahuapi ama yanga rupachij shamuchunga, cangunapuramanda Ñuca huasi punguta vichajcunaca, ¿pita tiyanguichiyari? Ñucaca, cangunapica napacha cushijuita charinichu. Canguna imata caranatallata carajpipash, napacha chasquishachu. Tucuita Mandaj Dios Ñucami, chashna nini. 11Ñuca shutica, llactapurapica indi llujshimujmanda, indi huashajuncamanmi jatumbacha. Chaimandami maipi cashpapash, inciensota, mapa illaj ashtahuan imatalla caranacunataca, Ñuca shutipi caranajun. Ñuca shutica, tucui llactapurapica jatumbachami. Tucuita Mandaj Dios Ñucami, chashna nini. 12Cangunaca: ‘Mandaj Diospaj mezapash mapami, paipaj micunapash na munanayaimi’ nishpami, yangapi churarcanguichi. 13Cashnatapashmi nircanguichi: ‘¡Mandaj Diosman imata carajushpapash, ñami shaijunchi!’ nishpami, Ñucata yangapi churarcanguichi. Tucuita Mandaj Dios Ñucami, chashna nini. Cangunaca shuhuashcata, suchuta, ungushca animalcunata apamushpami, Ñucaman cararcanguichi. ¿Chaitaca, cangunapaj maquimanda chasquinallachu cani? Mandaj Dios Ñucami chashna nini. 14Ashtaca llamacunamanda agllashpa, shuj jari llamata carasha nishpapash, llullashpami shuj huagli llamatara Mandaj Dios Ñucaman apamurcanguichi. Chaimandami cangunaca ninanda na alicachi tucushca canguichi. Ñucaca, jatun mandajcunatapash yali Jatun Mandajmi cani. Ñuca shutica, tucui llactacunapi causajcuna manllana shutimi” ninmi tucuita Mandaj Diosca.
Currently Selected:
MALAQUÍAS 1: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.