Miqueas 2
2
Ay me swocolic mach'atic ya yuts'inic pobrehetic
1Ay me swocolic te mach'atic ay ta swayibic a
te ya snopic spasel bintic chopol,
te ya schapic bin chopol ya spasic,
c'alal ya sacub q'uinal ya sc'ohtesic ta pasel,
como ya xhu' yu'unic te ya spasique.
2Ya xbic'taj yo'tanic yu'un q'uinaletic,
hich ya spojic;
ya xbic'taj yo'tanic yu'un nahetic,
hich ya yich'ic;
ya stenic ta uts'inel te winic
soc te mach'atic ay yu'un,
ya stenic ta uts'inel te winic
soc te bintic ay yu'une.
3Ha yu'un hich yaloj te Jehová:
Chapalix cu'un te ya ca'be te bin chopol
ta stojol te ants-winiquetic ini
te ma xhu' yac acoltay abahic yu'une;
ma ba soc toybahil ya xbehenex,
como ha yorahil wocol.
4Ta hich ora ya shachic ta atojolic tsahbil c'op,
ya sc'ayojtayex ta c'ayoj yu'un mel-o'tan
te hich ya yalic:
Jpisiltic jc'axel la jquich'tic jinel;
te Jehová la sjelbe
te bintic ay yu'un te pueblo cu'une.
¡La sloq'uesbotic te jq'uinaltic,
la spucticlambe yantic! xchihic ta c'ayoj.
5Ha yu'un mayuc mach'a ta tsoblej yu'un Jehová
te ya spucticlan q'uinal
ta scuenta spasel seña ta na'el.
6Ma xawal sc'op-jalwanej,
xchihic te jalwanejetic yu'unic;
ma xawalbe sc'oblal ini,
como ma ba ya stahotic te q'uexlale, xchihic.
7Ha'at te hich yac awal, sna Jacob,
¿Yu'un bal lajemix yo'tan te Jehová?
¿Ha bal te a'teliletic yu'un ini?
¿Ma bal lecuc bin ya spas te jc'op
ta stojol te mach'a toj ya xbehen?
8Te mach'a pueblo cu'un wojey,
hahchemix hich te bin ut'il jcontra;
yac aloq'uesbeyic smuc'ul-c'u'
te mach'atic jun yo'tan ya xc'axic bahel,
te mach'atic ya suhtic tal ta guerra.
9Yac ach'ojic loq'uel te antsetic yu'un te pueblo cu'un
ta snahic te bayel mulambil yu'unic;
jc'axel yac aloq'ues bahel te halbeyel cutsilal
ta stojol te alaletic yu'unique.
10Hahchanic, behenanic,
como ma ha'uc lugar yu'un cux-o'tanil ini,
yu'un bohlobenix,
jc'axel jihnemix.
11Teme ay mach'a yac snopbel bin ma meleluc,
te hich ya yal ta lot:
Ya calbat sc'oblal vino soc tulan uch'balil, teme xchihe,
ha me jalwanej ya sc'an te pueblo ini.
12Ya jtsobex apisilic, Jacob,
ya jtsob te mach'atic hilemic yu'un Israel;
hich ya jtsob tal te bin ut'il tuminchijetic ta corral,
hich te bin ut'il jtsohb tuminchijetic ta aquiltic,
hich xjuyet ya xc'oht
te bin ut'il c'ax bayel ants-winiquetic.
13Te mach'a ya sjam te be
ya xnahilij bahel yu'unic;
ya sjamic bahel te be, ya xc'axic ta yochibal,
tey ya xloq'uic bahel a.
¡Ha ya xnahilij bahel te ajwalil yu'unic,
soc ha jolal yu'unic te Jehová!
Currently Selected:
Miqueas 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.