Miqueas 1
1
Mel-o'tan ta stojol Samaria soc Jerusalén
1Ha te sc'op Jehová te tal ta stojol Miqueas te talem ta Moreset, te bin la yil sc'oblal Samaria soc Jerusalén ta yorahil te Jotam, Acaz soc Ezequías, ajwaliletic yu'un Judá.
2A'iya awa'iyic apisilic, pueblohetic;
a'iya awa'iyic lumq'uinal
soc spisil mach'atic ayic tey a,
te Jehová te Ajwalil
ha testigo ta scontrahimbelex,
ha te Ajwalil c'alal ta sch'ul templo.
3Como te Jehová ya xloc' tal ta banti nahinem,
ya xco tal, ya xbehen ta toyol awilaletic ta q'uinal.
4Ya x'uhl cohel te witsiltic ta ye'tal yoc,
ya xjat cohel te spamlejetic
hich te bin ut'il chabec' ya x'uhl ta stojol te c'ahc',
hich te bin ut'il ya x'oquin cohel ha' ta cohel q'uinal.
5Ta spisil ini ha ta scaj stoybahil te Jacob,
ta scaj smul te sna Israel.
¿Bin a te stoybahil te Jacob?
¿Ma bal ha'uc te Samaria?
¿Bin a te toyol awilal yu'un Judá?
¿Ma bal ha'uc te Jerusalén?
6Ha yu'un ya cac' te busul ya xhil ta jinel te Samaria,
ha lumq'uinal ta banti ya yich' ts'unel ts'usubiletic.
Ya jbusq'uin cohel ta spamlej te tonetic yu'un
soc ya cac' te ya xchicnaj te yich'o-ip.
7Spisil te ch'ultesbil te'etic yu'un ya yich'ic wuyticlanel,
ya yich'ic chiq'uel spisil te mahtaniletic yu'un,
soc ya jinticlan spisil te loc'ombahetic yu'une,
como la stsobticlan ta scuenta stojol j'antsinel antsetic,
soc ha nix stojol j'antsinel antsetic
ya yich' tuhunel yan buelta.
8Ha yu'un te ya x'oc'on soc ya x'ahcanajon;
mayuc jtep soc watalon a ya xbehenon;
ya x'ahcanajon hich te bin ut'il ha'mal ts'i'
soc ya x'awonon hich te bin ut'il avestruz-mutetic.
9Como mayuc spoxil te yehchen,
c'ohtix c'alal ta Judá;
c'ohtix c'alal ta pueblo cu'un,
c'alal ta Jerusalén.
10Ma xawalic ta Gat,
soc ma x'oq'uex;
baletanic ta sts'ubil lum ta Bet-el-afra.
11¡C'axan bahel, ha'at te nahinemat ta Safir,
watalat soc q'uexlal!
¡Ma ba ya xloc' tal
te mach'a nahinem ta Zaanán!
¡Ay oq'uel ta Bet-esel!
Ya yich' loq'uesel te coltayel awu'unic.
12Como te mach'atic nahinemic ta Marot
wocol ya smahliyic te bin lec,
como te Jehová la yac' te ya xc'oht te bin chopol
ta yochibal te Jerusalén.
13Chucahic ta carreta te cawuhetic,
ha'ex te nahinemex ta Laquis.
Tey hahch a te smul te yantsil-nich'an Sión,
como chicnaj ta atojolic
te toybahiletic yu'un Israel.
14Ha yu'un yac awa'beyic mahtaniletic
te Moreset-gat yu'un te ya xbahexe;
te nahetic yu'un Aczib ha jlo'loywanejetic ya xc'ohtic
ta stojol te ajwaliletic yu'un Israel.
15Ya jticombeyex yan mach'a ya stsalex,
ha'ex te nahinemex ta Maresa,
te yutsilal te Israel
ya xc'oht ta Adulam.
16Bula loq'uel, quits'a stsotsel ajol,
yu'un te awal-anich'nab te c'ux ta awo'tane;
t'axana ajol hich te bin ut'il sjol te hos,
como namal ya xbahtic ta chuquel ta atojol.
Currently Selected:
Miqueas 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.