1 Samuel 6
6
Te filisteohetic la sutic bahel te scaxahul chapbil-c'op
1Huqueb u halaj ta sq'uinal filisteohetic te scaxahul te chapbil-c'op yu'un Jehová. 2Te filisteohetic la stsobic te sacerdotehetic soc te jna'ojeletic, hich la sjoc'obeyic: ¿Bin ya jpascotic soc te scaxahul te chapbil-c'op yu'un Jehová? Halbotcotic bin ut'il ya jsutcotic bahel ta lugar yu'un, xchihic.
3Hich la yalic: Teme yac asutic bahel te scaxahul te chapbil-c'op yu'un te Dios yu'un Israel, ma me jocholuc yac aticonic suhtel, ya me awa'beyic mahtanil yu'un stahel falta; hich ya xlecubex soc tey yac ana'ic a te bin scuentahil ma ba loq'uem ta atojolic te sc'ab te Diose, xchihic.
4¿Bin mahtanil yu'un stahel falta ya ca'becotic? xchihic.
Hich la sjaq'uic: Ho'eb sloc'omba siht'el pasbil ta oro soc ho'eb sloc'omba ch'o pasbil ta oro, hich yipal te jaytuhl príncipaletic yu'un te filisteohetic, como junax te chamel awich'ojic ta apisilic soc te príncipaletic awu'unique. 5Pasahic sloc'ombahil te siht'el awu'unic soc te ch'ohetic yac sjimbelic te q'uinale, soc halbeyahic yutsilal te Dios yu'un Israel; ya wan sloq'ues sc'ab ta atojolic, ta stojol te diosetic awu'unic soc ta stojol te aq'uinalique. 6¿Bin yu'un yac atonobtes awo'tanic hich te bin ut'il la stonobtes yo'tanic te egipciohetic soc te faraón? Ta patil te ac'ticlambot swocolic yu'un, ¿ma bal la sticonlanic bahel te israeletic, hich bahtic? 7Ha yu'un pasahic yach'il carreta, soc ic'ahic tal cha'coht me' wacaxetic te ay yalic, te ma to ayuc chucbil yugo ta snuq'uic, a'beyahic sjoch te carreta, pero ic'ahic suhtel ta na te yalatac. 8Tsacahic te scaxahul te chapbil-c'op yu'un Jehová, mohtesahic ta carreta, soc ya me awotsesic ta caja ta sts'ehl te bintic pasbil ta oro te ya xtuhun awu'unic scuenta mahtanil yu'un stahel falta; hich yac acoltayic bahel. 9Soc ya me awilic bahel; teme ya xmo bahel ta sbehlal te sq'uinal ta Bet-semes, yu'un ha nix la ya'botic te bayel jwocoltic ini; yan teme ma teyuc ya xbaht a, hich ya jna'tic a te ma ha'uc te sc'ab Dios te la ya'botic jwocoltic, yu'unix hich nax talem a, xchihic.
10Hich la spasic te winiquetique. La stsaquic cha'coht me' wacax, la schucbeyic carreta soc la yotsesbeyic ta sna wacax te yalatac. 11Patil la smohtesic ta carreta te scaxahul te chapbil-c'op yu'un Jehová soc te caja te banti ay te ch'ohetic pasbil ta oro soc te loc'ombahetic yu'un colel siht'el. 12Toj behenic bahel te me' wacaxetic ta sbehlal Bet-semes, yacalic ta oq'uel bahel, ma ba loq'uic bahel ta wa'el o ta q'uexam ta be. Te príncipaletic yu'un te filisteohetic la st'unic bahel ta spat c'alal ta sti'il te Bet-semes.
13Te mach'atic ayic ta Bet-semes yacalic ta sbojel trigo ta spamlej a. C'alal la shach sitic la yilic te scaxahul te chapbil-c'op, mero tse'el yo'tanic yu'un c'alal la yilic. 14C'oht ta sq'uinal Josué ta Bet-semes te carreta, quehchaj ta behel ta banti ay muc'ul ton. La sch'uyic te ste'el te carreta soc la yaq'uic scuenta scohtol chic'bil mahtanil yu'un Jehová te wacaxetique. 15Te levitahetic la scohtesic te scaxahul te chapbil-c'op yu'un Jehová soc te caja te ay ta sts'ehl, te banti ayic te bintic pasbilic ta oro, la scajanic ta sba te muc'ul ton. Te winiquetic yu'un Bet-semes la ya'beyic scohtol chic'bil mahtaniletic soc yan milbil mahtaniletic te Jehová ta hich ora. 16C'alal hich la yilic te ho'eb príncipaletic yu'un te filisteohetic, ha nix yorahil a suhtic bahel ta Ecrón.
17Ha'ic ini te ho'eb colel siht'el pasbilic ta oro te la ya'beyic Jehová te filisteohetic scuenta mahtanil yu'un stahel falta: jujun yu'unic te Asdod, Gaza, Ascalón, Gad soc Ecrón. 18Soc hich yipal ch'ohetic pasbilic ta oro te bin ut'il jayeb pueblohetic yu'un te ho'tuhl príncipaletic yu'un te filisteohetic, ha te pueblohetic te ay sts'ahcul soc te tut pueblohetic te mayuc sts'ahcule. Te muc'ul ton te banti la scajanic te scaxahul te chapbil-c'op yu'un Jehová ay ta sq'uinal Josué ta Bet-semes c'alal ora.
19Te Jehová la smil te winiquetic yu'un Bet-semes ta scaj te la yilic ta yutil te scaxahul te chapbil-c'op yu'un Jehová. La smil lajuneb schanwinic (70) ta tuhl.#6.19 (70) ta tuhl; ay yantic antiguo hunetic te ya yal 50,070 ta tuhl. Oc' te pueblo yu'un te bayel milotic yu'un te Jehová. 20Hich la yalic te mach'atic ayic ta Bet-semes: ¿Mach'a ya xhu' ya stehc'an sba ta stojol te Jehová, te ch'ul Diose? ¿Mach'a ya yich'botic loq'uel ta jtojoltic te scaxahul te chapbil-c'op? xchihic. 21Ha yu'un la sticonic bahel c'op ta stojol te mach'atic nahinemic ta Quiriat-jearim, hich la yalbeyic: Te filisteohetic la sticonic suhtel tal te scaxahul te chapbil-c'op yu'un Jehová; la', ich'ahic bahel, xchihic.
Currently Selected:
1 Samuel 6: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.