1 Samuel 5
5
Scaxahul chapbil-c'op ta sq'uinal filisteohetic
1Te filisteohetic, c'alal la spojic te scaxahul te chapbil-c'op yu'un Dios, la yich'ic hahchel ta Eben-ezer, bahtic soc ta Asdod. 2La yotsesic te scaxahul te chapbil-c'op ta templo yu'un Dagón, la yaq'uic ta sts'ehl te Dagón. 3C'alal hahchic ta sab ta yan c'ahc'al te mach'atic ayic ta Asdod, pacal ta lum a te Dagón ta stojol te scaxahul te chapbil-c'op yu'un Jehová. La stamic hahchel te Dagón, la yaq'uic ta yawil. 4Pero c'alal hahchic ta sab ta yan c'ahc'al pacal ta lum yan buelta te Dagón ta stojol te scaxahul te chapbil-c'op yu'un Jehová, soc te sjol te Dagón soc schebal sc'ab waq'uemic ta smarcohil te puerta; ha xanix wolol hilel smuc'ul te Dagón. 5Ha scuentahil te sacerdotehetic yu'un Dagón soc spisil te mach'atic ya x'ochic bahel ta templo yu'un Dagón ta Asdod ma ba ya stec'beyic ye'tal te smarcohil c'alal ora.
6Tulan c'oht te sc'ab Jehová ta stojol te mach'atic ayic ta Asdod soc ta sjoyobal, la sjinticlan soc la yac'ticlambe coluc siht'el. 7C'alal hich la yilic, hich la yalic te mach'atic ayic ta Asdod: Ma me xhil ta cohliltic te scaxahul te chapbil-c'op yu'un te Dios yu'un Israel, yu'un tulan yac'oj tal sc'ab ta jtojoltic soc ta stojol te Dagón te dios cu'untique, xchihic.
8Ha yu'un la sticonic ta iq'uel tal spisil te príncipaletic yu'un te filisteohetic, hich la sjoc'obeyic: ¿Bin ya jpascotic soc te scaxahul te chapbil-c'op yu'un te Dios yu'un Israel? xchihic.
C'asesahic bahel ta Gat te scaxahul te chapbil-c'op yu'un te Dios yu'un Israel, xchihic. Hich la sc'asesic bahel tey a te scaxahul te chapbil-c'op yu'un te Dios yu'un Israel.
9Pero te c'alal la yich'ic bahel tey a, tulan la yac' tal sc'ab te Jehová ta scontrahinel te pueblo, la yac' buen xiwel; soc la ya'be swocolic te mach'atic ayic ta pueblo, muc' biq'uit hahch siht'el yu'unic. 10Ha yu'un la sticonic bahel ta Ecrón te scaxahul te chapbil-c'op yu'un Dios. Pero c'alal c'oht ta Ecrón, te mach'atic ayic ta Ecrón hich hahchic ta aw: La yich'botiquix tal te scaxahul te chapbil-c'op yu'un te Dios yu'un Israel scuenta yu'un ya smilotic soc te jlumaltic, xchihic ta xiwel.
11Ha yu'un la sticonic ta iq'uel te príncipaletic yu'un te filisteohetic, hich la yalbeyic: Ticonahic bahel te scaxahul te chapbil-c'op yu'un te Dios yu'un Israel, ac'a suhtuc bahel ta banti te lugar yu'un, scuenta yu'un ma ba ya smilotcotic soc te jlumalcotic, xchihic; como ay buen tulan xiwel scuenta lajel ta spisil te pueblo, como tulan yac'oj sc'ab Dios tey a.
12Te mach'atic ma ba chamic, a'botic siht'el; te aw yu'un te pueblo c'oht c'alal ta ch'ulchan.
Currently Selected:
1 Samuel 5: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.