Efesios 5
5
Neby je̱'e̱ Dios y'Ung mu̶baad chu̶naaygyu̶xyu̶ñ
1Miich ajku̶xy, je̱' ko je̱'e̱ Dios miich xy'ung'ajtku̶xp, je̱'e̱ mu̶dyiibu̶ xychojkku̶xp xyjyu̶wu̶u̶ygyu̶xpu̶ñ, paady jatytimyñaychojk jatytimyñayjyu̶wu̶u̶yu̶gu̶x du'un neby je̱'e̱yu̶ñ. 2Naychojku̶gu̶x nayjyu̶wu̶u̶yu̶gu̶x du'un neby je̱'e̱ Cristo xychojky xyjyu̶wu̶u̶y ajtu̶m ajku̶xyu̶ñ y ñayye̱jku̶ ma je̱'e̱ o'ku̶ñ ke̱e̱ku̶ñ mu̶u̶d u̶u̶ch kyu̶xpu̶ ajtu̶m ajku̶xy, du'un neby je̱'e̱ yojxu̶ñ y je̱'e̱ windzu̶gu̶'u̶ñdyu̶ñ, je̱'e̱ mu̶dyiibu̶ je̱'e̱ Dios kyu'umaayu̶ñ.
3Miich ajku̶xy, je̱'e̱ mu̶dyiibu̶ je̱'e̱ Dios xyjya'ay'ajtku̶xpu̶ñ, ka'p mu̶baad m'oknigapx m'oknimu̶dyaakku̶xnu̶ je̱'e̱ to'oxyu̶jk mu̶dtuundu̶goyu̶u̶, y ni mu̶dyiibu̶ ju̶bu̶kpu̶ o je̱'e̱ meeñ adzojknajxu̶ñ. 4Ka'p je̱'e̱ ayuuk mgápxku̶xy mmu̶dyaakku̶xy je̱'e̱ mu̶dyiibu̶ yajtzo'oydyuumbu̶ñ, ni je̱'e̱ nigoobu̶ kyapxy'aty myu̶dya'agy'áty, ni je̱'e̱ mu̶dyiibu̶ nigoo oynejpy yajxiikp yaj'yaaxpu̶ñ. Je̱' ko ka'p je̱'e̱ du'umbu̶ ayuuk mu̶baad mgápxku̶x mmu̶dyaakku̶xnu̶; y ni'igyu̶ je̱'e̱ Dios mu̶yaax o'owu̶dajtku̶xnu̶. 5Miich mnejwu̶u̶ygyu̶xypy ko pu̶n je̱'e̱ wiingpu̶ to'oxyu̶jk mu̶dtuundu̶gooby, o pu̶n je̱'e̱ ju̶bu̶kpu̶ tuumb, o meeñ adzojknajxp (je̱'e̱ mu̶dyiibu̶ du'un ni'ipaatpu̶ñ neby je̱'e̱ tzaadzéch kepychech du'un y'o'owu̶dajtypyu̶ñ), ka'p je̱'e̱ du'umbu̶ ja'ay pyaadyii jiiby tyu̶gu̶'u̶wu̶ch ma je̱'e̱ Cristo y je̱'e̱ Dios y'ane'emyu̶ñ. 6Ka'p myajwin'u̶u̶ngu̶xu̶ch mu̶u̶d je̱'e̱ ayuuk ka'pu̶ chobaady; je̱' ko je̱'e̱ ja'ay du'un jya'ay'ajtku̶xy, paady je̱'e̱ Dios je̱'e̱ mu̶jtzaachpyu̶ ke̱xa'añ ma je̱'e̱ ja'ay ajku̶xyu̶ñ je̱'e̱ mu̶dyiibu̶ ka'p kyapxymyu̶doowu̶u̶gu̶xyu̶ñ. 7Ka'p je̱'e̱ du'umbu̶ ja'ay mbudu̶gu̶u̶ygyu̶xu̶ch.
8Miich ajku̶xy jékyu̶p ko najty je̱'e̱ Jesucristo y'ayuuk tyu̶y'ajt mga'amu̶bu̶jkku̶xyñu̶, du'un najty myajpaatku̶xy neby nu̶wu̶'u̶y agoodztuumbu̶ m'ijtku̶xyu̶ñ, peru̶ jada'achám ko tu'ugyu̶ myajpaatku̶xnu̶ mu̶u̶d je̱'e̱ Windzú̶n Jesucristo, mnejwu̶u̶ygyu̶xnu̶py je̱'e̱ y'ayuuk tyu̶y'ajt, y du'un cham myajpaatku̶xnu̶ neby nu̶wu̶'u̶y mdzu̶naaygyu̶xyu̶ñ ma je̱'e̱ tu̶kxu̶ñ jaju̶ñ yajpaadyu̶ñ. Paadyu̶tz oy yajxón ja'ay'ajtku̶x, du'un neby je̱'e̱ mu̶dyiibu̶ yajpaatku̶xpu̶ñ ma je̱'e̱ tu̶y'ajtu̶ñ, 9y ko je̱'e̱ tu̶y'ajt nguydyuunu̶mu̶ch ajku̶xy, chi je̱'e̱ oyjya'ay'adyiibyu̶ nduunu̶mu̶ch ajku̶xy je̱'e̱ tu'uda'agy'ajtu̶ñ y je̱'e̱ tu̶y'ajtu̶ñ. 10Jatytimykyuydyuungu̶x je̱'e̱ tu̶y'ajt mu̶dyiibu̶ je̱'e̱ Windzú̶n Dios kyu'umaaybyu̶ñ. 11Ka'p myajkápx myajxiigu̶u̶ygyu̶xy je̱'e̱ ka'pu̶ chobaady, je̱'e̱ mu̶dyiibu̶ je̱'e̱ ja'ay tyuungu̶xypyu̶ñ, je̱'e̱ mu̶dyiibu̶ agoodztuumb yajpaatku̶xpu̶ñ; ni'igu̶ miich je̱'e̱ u̶u̶wij kapxwijku̶x, wan agoodztuum pyu̶dzu̶u̶mgu̶xu̶ch. 12U̶xtu̶ oycho'oydyuunu̶ je̱'e̱ du'un ko ngapx nmu̶dyaaku̶mu̶ch ajku̶xy je̱'e̱ mu̶dyiibu̶ je̱'e̱ ayu'uch amechu̶ tyuungu̶xypyu̶ñ. 13Peru̶ ko ku̶xyu̶ tii du'umbu̶ yajpu̶da'agy neby ñi'igu̶xu̶'u̶gu̶chu̶ñ mu̶u̶d je̱'e̱ tu̶y'ajt, yajmu̶doy'ajtp je̱'e̱ du'unu̶ñ. 14Je̱' ko je̱'e̱ tu̶y'ajt je̱'e̱ du'un ku̶xyu̶ yajni'igu̶xu̶'kp. Paady je̱'e̱ Dios ñaky du'un myu̶na'añ:
“Ma'aywyijku̶x, miich mu̶dyiibu̶ mmaagu̶xpu̶ñ;
juugypyu̶jkku̶x, miich mu̶dyiibu̶ tu̶ m'o'kku̶xyu̶ñ,
y je̱'e̱ Cristo xykyudu̶kx xykyujajku̶xu̶p.”
15Paady naygyweentu̶'ajtu̶gu̶x neby mu̶baad mja'ay'ajtku̶xyu̶ñ. Ka'p du'un mdzu̶naay mjuugy'ajtku̶xy neby je̱'e̱ tzuudu̶jk ajku̶xyu̶ñ, du'un tzu̶naay jugy'ajtku̶x mu̶u̶d je̱'e̱ wij'ajt ke̱j'ajtu̶ñ. 16Ka'p je̱'e̱ mxu̶u̶ mtiempo nigoo myajtu̶gooygyu̶xy, tuungu̶x je̱'e̱ oybyu̶ tuung, je̱' ko amaay je̱'e̱ xu̶u̶ tiempo chamu̶ñ. 17Ka'p nigoo tii oynejpy mduundu̶gu̶u̶ygyu̶x kojy, jatytimyñejwu̶u̶ygyu̶x tii je̱'e̱ Windzú̶n Jesucristo chojkypyu̶ñ mduungu̶xu̶ch. 18Ka'p muuku̶gu̶xy, je̱' ko yajtu̶gooby je̱'e̱ joknu̶u̶; je̱'e̱ Espíritu Santo ni'igyu̶ mu̶dajtku̶x ma je̱'e̱ mjoot mwinma'añ ajku̶xyu̶ñ. 19Naymyu̶gápxu̶gu̶x amíñ u̶xyu̶py mu̶u̶d je̱'e̱ Salmo ayuuk, mu̶u̶d je̱'e̱ u̶y y mu̶u̶d je̱'e̱ Dios y'u̶y, y win'u̶u̶gu̶x winyaaxku̶x y ja'aymye̱jtzku̶x o'owu̶dajtku̶x je̱'e̱ Windzú̶n Jesucristo tu'ug'aa tu'ugjoot. 20Ye̱jkku̶x je̱'e̱ Dioskujuuyu̶p jaboom jaboom ma je̱'e̱ Dios Teedyu̶ñ y ma je̱'e̱ nWindzú̶n Jesucristo xyu̶u̶ ajtu̶m ajku̶xyu̶ñ mu̶u̶d je̱'e̱ kyuwaan kyunukxu̶ñ ku̶xyu̶.
Neby je̱'e̱ taj teedy y je̱'e̱ ung ana'k mu̶baad chu̶naaygyu̶xy jyugy'ajtku̶xyu̶ñ je̱'e̱ mu̶dyiibu̶ je̱'e̱ Dios mmu̶duungu̶xpu̶ñ
21Naygyapxymyu̶doowu̶gu̶x amíñ u̶xyu̶py, je̱' ko je̱'e̱ Cristo#5.21 Nije̱' wiingpu̶ versión myu̶na'añ: je̱'e̱ Dios. mwindzu̶gu̶u̶ygyu̶xy.
22Miich to'oxyu̶jktu̶jk ajku̶xy, u̶u̶mu̶doogu̶x kapxymyu̶doogu̶x je̱'e̱ mniya'aydyu̶jk ajku̶xy, du'un neby je̱'e̱ Windzú̶n m'u̶u̶mu̶doogu̶xy mgapxymyu̶doogu̶xyu̶ñ. 23Je̱' ko je̱'e̱ ya'aydyu̶jk je̱' je̱'e̱ tyo'oxyu̶jk nigu'ubajk'ajtp, neby je̱'e̱ Cristo je̱'e̱ mu̶bu̶jkpu̶du̶jk nigu'ubajk'átyu̶ñ. Je̱'e̱ Cristo je̱' je̱'e̱ nandu'un je̱'e̱ mu̶bu̶jkpu̶du̶jk ñiwaambu̶ yajtzookpu̶, je̱'e̱ mu̶dyiibu̶ du'un neby je̱'e̱ ñi'kxu̶ñ, 24y du'un neby je̱'e̱ mu̶bu̶jkpu̶du̶jk je̱'e̱ Cristo u̶u̶mu̶doogu̶xy kapxymyu̶doogu̶xyu̶ñ, nandu'un je̱'e̱ to'oxyu̶jktu̶jk je̱'e̱ ñiya'aydyu̶jk wan ku̶xyu̶ u̶u̶mu̶doogu̶xy kapxymyu̶doogu̶xy.
25Miich ya'aydyu̶jktu̶jk ajku̶xy, tzojkku̶x ju̶wu̶u̶ygyu̶x je̱'e̱ mdo'oxyu̶jk ajku̶xy, du'un neby je̱'e̱ Cristo je̱'e̱ mu̶bu̶jkpu̶du̶jk tzojky ju̶wu̶u̶yu̶ñ ajku̶xy y yejky je̱'e̱ jyugy'ajtu̶ñ mu̶u̶d je̱' gyu̶xpu̶ ajku̶xy. 26Paady je̱'e̱ du'un tuuñ neby je̱'e̱ mu̶bu̶jkpu̶du̶jk mu̶baad abu̶ky y'ijtku̶xyu̶ñ, yajwaatzu̶ je̱'e̱ chu̶naay jyugy'ajtu̶ñ ajku̶xy ko je̱'e̱ ayuuk tu̶y'ajt mmu̶bu̶jky ajku̶xy y nan ko ñu̶u̶bejty ajku̶xy mu̶u̶d je̱'e̱ nu̶u̶, 27neby mu̶baad ku̶'u̶m oy yajxón wyinguwa'agu̶u̶yu̶gu̶xyu̶ñ, oy wa'adz naty je̱'e̱ jyoot wyinma'añ ajku̶xyu̶ñ, ka'p naty maa y'axu̶u̶gu̶ch, ka'p naty maa ñoodu̶ch y ka'p y'oyñejpyu̶ch, abu̶ky natyu̶ñ y oy wa'adz naty ajku̶xyu̶ñ. 28Du'un neby je̱'e̱ ya'aydyu̶jk je̱'e̱ kyu̶'u̶mni'kx tzoky ju̶wu̶'u̶yu̶ñ, du'un je̱'e̱ tyo'oxyu̶jk mu̶baad nandu'un tzoky ju̶wu̶'u̶y. Je̱'e̱ mu̶dyiibu̶ je̱'e̱ tyo'oxyu̶jk tzojkp ju̶wu̶u̶ybyu̶ñ, nandu'un je̱'e̱ ku̶'u̶m ñaychoky ñayjyu̶wu̶'u̶yii. 29Je̱' ko ka'p je̱'e̱ kyu̶'u̶m ni'kx pu̶n mu̶dzip'aty, ni'igyu̶ je̱'e̱ ixy kweentu̶'áty y yajkáy yaj'u'ugy, du'un neby je̱'e̱ Cristo je̱'e̱ mu̶bu̶jkpu̶du̶jk ixy kweentu̶'átyu̶ñ, 30je̱' ko je̱' je̱'e̱ ñi'kx'ajtypy,#5.30 Nije̱' wiingpu̶ versión myu̶na'añ: y wyaay'ajtypy pyajk'ajtypy. y u̶u̶ch tu'ugyu̶ du'un nyajpaatu̶m ajku̶xy mu̶u̶d je̱' ñi'kx. 31“Paady je̱'e̱ ya'aydyu̶jk je̱'e̱ tyaj tyeedy u̶xmádzu̶ch y pudu̶gu̶'u̶wu̶ch je̱'e̱ tyo'oxyu̶jk, y je̱'e̱ nime̱tzkpu̶ ajku̶xy du'un naty je̱'e̱ ajku̶xyu̶ñ neby tu'ugpu̶ ja'ayu̶ñ.” 32Adaa tu̶y'ajt je̱' adaa je̱'e̱ tu̶y'ajt mu̶jpu̶ yu'uchpyu̶; peru̶ je̱' u̶u̶ch du'un ndijpy je̱'e̱ Cristo y je̱'e̱ mu̶bu̶jkpu̶du̶jk ajku̶xy. 33Y du'unu̶tz miich nidu'ug nidu'ug ya'aydyu̶jktu̶jk ajku̶xy, tzojkku̶x ju̶wu̶u̶ygyu̶x je̱'e̱ mdo'oxyu̶jktu̶jk ajku̶xy du'un neby ku̶'u̶m mnaychojk mnayjyu̶wu̶u̶yu̶gu̶xyu̶ñ, y wan je̱'e̱ to'oxyu̶jktu̶jk je̱'e̱ ñiya'aydyu̶jktu̶jk windzu̶gu̶u̶ygyu̶xy.
Currently Selected:
Efesios 5: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005