Efesios 4
4
Tu'ugyu̶ n'ijtu̶m ajku̶xy mu̶u̶d je̱'e̱ Espíritu Santo kyu̶xpu̶
1Paady u̶u̶ch, u̶u̶ch mu̶dyiibu̶ pujxtu̶jk'u̶ñaabyu̶ñ, je̱' gyu̶xpu̶ ko u̶u̶ch je̱'e̱ Windzú̶n Jesús y'ayuuk tyu̶y'ajt ngapxwa'kxu̶, cham nmu̶nukxtaakku̶xy ko oy yajxón mja'ay'ajtku̶xu̶ch du'un neby je̱'e̱ ja'ay mu̶baad jya'ay'ajtku̶xyu̶ñ je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xyu̶ñ, du'un neby miich tu̶ myajwin'ijxku̶xyu̶ñ. 2Yuung naaxypy ja'ay'ajtku̶x y oy ja'ay'ajtku̶x; mmu̶dajtku̶x je̱'e̱ me̱kxtujku̶ñ y naymyu̶me̱kxtujku̶gu̶x amíñ u̶xyu̶py mu̶u̶d je̱'e̱ tzojku̶ñ ju̶wu̶u̶yu̶ñ. 3Jatytim'ijtku̶x tu'ugyu̶ mu̶u̶d je̱'e̱ Espíritu Santo pyube̱jtu̶ñ y mu̶u̶d mu̶dyiibu̶ je̱'e̱ tzip ma'ad yajku̶jxp yajnajxpu̶ñ je̱'e̱ mu̶dyiibu̶ xyajtu'ugu̶u̶ybyu̶ñ ajku̶xy. 4Tu'ugyu̶ nigu̶xyu̶ nyajpaatu̶m ajku̶xy neby je̱'e̱ tu'ugpu̶ ni'kxu̶ñ y tu'ug je̱'e̱ Espíritu je'eyu̶, du'un neby je̱'e̱ Dios miich tu'ugyu̶ tu̶ xywyin'ijxku̶xyu̶ñ ma je̱'e̱ tu'ugpu̶ oybyu̶ it je̱'e̱ mu̶dyiibu̶ mju̶jp'ijxypy ajku̶xyu̶ñ ko xymyo'owaangu̶xy. 5Tu'kpajk je̱'e̱ Windzú̶n Jesucristo je'eyu̶, tu'kpajk je̱'e̱ mu̶bu̶jku̶ñ je'eyu̶ y tu'kpajk je̱'e̱ nu̶u̶be̱jtu̶ñ je'eyu̶, 6tu'kpajk je̱'e̱ Dios je'eyu̶ y je̱'e̱ mu̶dyiibu̶ nigu̶xyu̶ nDeedy'ajtypy ajtu̶m ajku̶xy, je̱'e̱ mu̶dyiibu̶ nigu̶xyu̶ xy'ane̱'e̱mb ajtu̶m ajku̶xy, je̱'e̱ mu̶dyiibu̶ tuumb ma u̶u̶ch nigu̶xyu̶ ajtu̶m ajku̶xy y y'ity majaty je̱'e̱ jya'ay ku̶xyu̶ yajpaadyu̶ñ.
7Peru̶ ku̶j je̱' je̱'e̱ mu̶k'ajt u̶u̶ch tu̶ nyajmooyu̶m ajku̶xy, je̱'e̱ mu̶dyiibu̶ je̱'e̱ Cristo tu̶ xyajnibu̶daagu̶u̶yu̶m ajku̶xy ko je̱'e̱ mu̶k'ajt xymyo'owaanu̶m ajku̶xy, neby je̱'e̱ tuung mu̶baad nidu'ug nidu'ug yajtúñu̶ñ. 8Paady je̱'e̱ Dios ñaky du'un myu̶na'añ:
“Pa'ttu̶gu̶u̶y je̱'e̱ Cristo tzajpjooty; myu̶dpa'ttu̶gu̶u̶y je̱'e̱ tzumyjya'ay may,
y myooy je̱'e̱ ja'ay mu̶k'ajt ajku̶xy.”
9¿Y ti je̱'e̱ Dios y'ayuuk ko du'un myu̶na'añ ko je̱'e̱ Cristo tzajpjooty “pya'ttu̶gu̶u̶y”? Paady je̱'e̱ du'un myu̶na'añ ko jayu̶jp kyu̶daaky ma adayaaba naaxwiiñu̶ñ.#4.9 Ma adayaaba naaxwiiñu̶ñ: nije̱' wiingpu̶ versión myu̶na'añ: u̶xtu̶ naaxpa'tku̶'u̶pytyu̶góy. 10Y je̱'e̱ mu̶dyiibu̶ ku̶daaku̶ñ, nan je̱' je̱'e̱ nandu'un je̱'e̱ mu̶dyiibu̶ jiiby tzajpjooty pa'ttu̶gu̶u̶yu̶ñ, neby mu̶jwindzú̶n y'ídu̶chu̶ñ wan je̱'e̱ myu̶k'ajtu̶ñ jiiby tzajpjooty du'un ñi'igu̶xu̶'u̶gu̶ch. 11Y je̱' je̱'e̱ ja'ay ku̶'u̶m nidu'ug nidu'ug mooy neby tyuungu̶xu̶chu̶ñ, nije̱' mooy neby apóstol tyuungu̶xu̶chu̶ñ y nije̱' ayuuknajtzkapxu̶u̶ybyu̶, nije̱' ayuuk tu̶y'ajt kapxwa'kxpu̶, nije̱' mu̶dyiibu̶ je̱'e̱ mu̶bu̶jkpu̶du̶jk kweentu̶'ajtku̶xu̶bu̶ñ y nije̱' mu̶dyiibu̶ yaj'u̶xpu̶jkku̶xu̶bu̶ñ. 12Y du'un je̱'e̱ ja'ay tuungmooy wan je̱'e̱ tuung du'un yajtu'uyo'oygyu̶xu̶ch, wan je̱'e̱ Cristo jya'ay je̱'e̱ myu̶bu̶jku̶ñ wyimbe̱jtku̶xu̶ch, 13u̶xtu̶ koonu̶ nigu̶xyu̶ ndu'ugyu̶ju̶u̶yu̶mu̶ch ajku̶xy ma je̱'e̱ nmu̶bu̶jku̶ñ ajtu̶m ajku̶xyu̶ñ, y n'ijx nejwu̶u̶yu̶mu̶ch ajku̶xy oy yajxón je̱'e̱ Dios y'Ung y'ayuuk tyu̶y'ajt. Y du'un du'un najtzpadu̶u̶yu̶mu̶ch ajku̶xy je̱'e̱ ka'pxypyu̶ joot winma'añ y najtzpadu̶u̶yu̶mu̶ch je̱'e̱ joot winma'añ ajku̶xy du'un neby je̱'e̱ Cristo joot winma'añ mu̶dajtyu̶ñ. 14Y ka'p du'un nja'ay'ajtu̶nu̶ch ajku̶xy neby je̱'e̱ pi'k'ana'ktu̶jk ajku̶xyu̶ñ, je̱'e̱ mu̶dyiibu̶ je̱'e̱ wyinma'añ ja'anaam ja'atzojk yajtu̶gajtzku̶xpu̶ñ y pe̱kyu̶ je̱'e̱ yajwin'u̶u̶ngu̶xy mu̶u̶d je̱'e̱ oymyu̶dyiibu̶ jembyu̶ u̶xpu̶jku̶ñ, u̶xtu̶ koonu̶ je̱'e̱ tu̶goybyu̶ ja'ay wyin'u̶u̶nu̶gu̶xyu̶ je̱'e̱ mu̶dyiibu̶ je̱'e̱ tu̶y'ajt ka'p panú̶kxku̶xyu̶ñ. 15Tzu̶k je̱'e̱ tu̶y'ajt kapxu̶m mu̶dyaaku̶m ajku̶xy mu̶u̶d je̱'e̱ tzojku̶ñ ju̶wu̶u̶yu̶ñ, y du'un je̱'e̱ nmu̶bu̶jku̶ñ ku̶xyu̶ jyakyé̱ku̶mu̶ch ajku̶xy ma je̱'e̱ Crístoju̶ñ, je̱'e̱ mu̶dyiibu̶ je̱'e̱ mu̶bu̶jkpu̶du̶jk nigu'ubajk'ajtpu̶ñ.
16Y je̱'e̱ Cristo je̱'e̱ mu̶dyiibu̶ je̱'e̱ mu̶bu̶jkpu̶du̶jk nigu'ubajk'ajtpu̶ñ. Je̱' je̱'e̱ ni'kx kopt ku̶xyu̶ xymyajtz'ijtaayu̶py ajtu̶m ajku̶xy, y du'un je̱'e̱ nni'kx ngopt nidu'ug nidu'ug mu̶k'ajt xymyooyu̶ ajtu̶m neby je̱'e̱ tuung mu̶baad nidu'ug nidu'ug yajtúñu̶ñ, je̱'e̱ mu̶dyiibu̶ tu̶ xymyooyu̶mu̶ñ ajku̶xy, y neby je̱'e̱ ni'kx kopt mu̶baad ku̶xyu̶ oy mu̶k y'ityu̶ñ y neby ni'igyu̶ nnaychojk nnayju̶wu̶u̶yu̶mu̶chu̶ñ ajku̶xy.
Je̱'e̱ jembyu̶ jugy'ajtu̶ñ mu̶dyiibu̶ yajpaatp ma je̱'e̱ Crístoju̶ñ
17Adayaaba nyajnu̶maaygyu̶xypy y nyajni'ipu̶jkku̶xypy mu̶u̶d je̱'e̱ Windzú̶n Jesucristo y'ane̱'e̱mu̶ñ: ko ka'p du'un m'oktzu̶naay m'okjugy'ajtku̶xnu̶ch neby je̱'e̱ ja'ay mu̶dyiibu̶ je̱'e̱ Windzú̶n Jesucristo y'ayuuk tyu̶y'ajt ka'p mu̶jpu̶daakku̶xyu̶ñ, je̱'e̱ mu̶dyiibu̶ du'un tzu̶naaygyu̶xpu̶ñ mu̶u̶d je̱'e̱ winma'añ ka'pu̶ chobaady, 18y agoodztuuby je̱'e̱ jyoot wyinma'añ mu̶dajtku̶xy. Je̱' ka'p je̱'e̱ jugy'ajtu̶ñ mu̶dajtku̶xy je̱'e̱ mu̶dyiibu̶ je̱'e̱ Dios yejkypyu̶ñ, je̱' ko chuujátyu̶ch ajku̶xy y ko je̱'e̱ y'aa jyoot jyuuñu̶ch ajku̶xy. 19Tu̶ jyoot wyinma'añ je̱'e̱ jyuungu̶xnu̶ y tu̶ ñaygyu̶'u̶ye̱jku̶gu̶xnu̶ ma je̱'e̱ ju̶bú̶kpu̶ju̶ñ, tuungu̶xy je̱'e̱ ju̶bu̶kpu̶ ku̶xyu̶ y ka'p pu̶n yajkápxku̶xy. 20Peru̶ miich ajku̶xy ka'p miich je̱'e̱ Cristo du'un tu̶ xyaj'u̶xpu̶jkku̶xy ko du'un mdzu̶naay mjugy'ajtku̶xu̶ch. 21Pu̶nu̶ jaanch je̱'e̱ y'ayuuk tu̶ mmu̶doowu̶ ajku̶xy y tu̶ myajwu̶'u̶mu̶ ajku̶xy du'un neby je̱'e̱ tu̶y'ajt y'ane'emyu̶ñ je̱'e̱ mu̶dyiibu̶ yajpaatp ma je̱'e̱ Crístoju̶ñ. 22Najtz'ixu̶u̶ygyu̶xnu̶ je̱'e̱ jekywyinma'añ ma je̱'e̱ Dios najty ka'p mmu̶bu̶jkku̶xyñu̶ju̶ñ, du'un neby najty jékyu̶p mdzu̶naaygyu̶xy mjuugy'ajtku̶xyu̶ñ, tu̶goydyuum najty myajpaatku̶xy, xywyin'u̶u̶ngu̶xy je̱'e̱ mju̶bu̶k'adzojku̶ñ najty ajku̶xy. 23Myajwinje̱e̱mgu̶xu̶py je̱'e̱ m'aa mjoot y je̱'e̱ mjoot mwinma'añ ajku̶xy, 24y mmu̶dajtku̶xnu̶ch je̱'e̱ jembyu̶ joot je̱'e̱ jembyu̶ winma'añ ko je̱'e̱ Dios mmu̶bu̶jkku̶xnu̶, du'un neby je̱'e̱ Dios tu̶ xyajmu̶dzojkku̶xyu̶ñ y wan du'un ñi'igu̶xu̶'u̶gu̶ch ko je̱'e̱ Dios mmu̶duungu̶xy mu̶u̶d je̱'e̱ tu'uda'agypyu̶ y wa'adzpu̶ jugy'ajtu̶ñ mu̶dyiibu̶ yajpaatp ma je̱'e̱ tu̶y'ajtu̶ñ.
25Y ka'p m'anu̶u̶'ajtku̶xnu̶ch, tu̶y'ajt kápxku̶x mu̶dyaakku̶xnu̶ nidu'ug nidu'ug mu̶u̶d je̱'e̱ mmu̶gu'ugtu̶jk ajku̶xy, je̱' ko tu'ugyu̶ du'un nigu̶xyu̶ nyajpaatu̶nu̶ ajtu̶m ajku̶xy.
26Pu̶nu̶ mjootma'tku̶xp, ka'p mduundu̶gooygyu̶xu̶ch, y ka'p je̱'e̱ jootma'adu̶u̶ tu'kxu̶u̶du̶góy myajje̱jku̶xu̶ch. 27Ka'p je̱'e̱ mu̶jku'u tu̶gu̶u̶ydyaakt mooygyu̶xu̶ch.
28Je̱'e̱ mu̶dyiibu̶ ijty me̱e̱tzpu̶ñ, wan je̱'e̱ me̱dzu̶u̶ u̶xmajtznu̶ y wan tuunu̶ch je̱'e̱ oybyu̶ tuung mu̶u̶d je̱'e̱ kyu̶'u̶mgu̶'u̶ kyu̶'u̶mdéky neby mu̶baad jinjaty we̱njaty pubetyu̶ñ pu̶n ku̶xyu̶ tijaty yajmayjyajtku̶xpu̶ñ.
29Ka'p ju̶bu̶kjaty axu̶u̶gjáty mgápxku̶x mmu̶dyaakku̶xu̶ch, je̱'e̱ oybyu̶ ayuuk mgápxku̶x mmu̶dyaakku̶xu̶py, wan je̱'e̱ myu̶bu̶jku̶ñ du'un jakpaatku̶xu̶ch y je̱'e̱ oy'ajtu̶ñ pu̶n naty je̱'e̱ ayuuk amdo'ijtku̶xpu̶ñ. 30Ka'p je̱'e̱ Dios y'Espíritu Santo myajjootmaydyu̶gu̶u̶yu̶ ajku̶xy, je̱'e̱ mu̶dyiibu̶ miich xyñidu̶y'ajt'ajtku̶xpu̶ñ neby du'un ñi'igu̶xu̶'u̶gu̶chu̶ñ ko je̱'e̱ Dios xyjya'ay'ajtku̶xy, je̱'e̱ mu̶'it xu̶u̶ ko naty je̱'e̱ Dios tu'kku̶'u̶yu̶ xyñiwa'an xyajtzo'ogaangu̶xy.
31U̶xmajtzku̶x je̱'e̱ mu̶dyiibu̶ ka'p ni tii xyaj'oy'íxyu̶ñ ajku̶xy: je̱'e̱ jootma'adu̶u̶, je̱'e̱ joot'ambu̶gu̶u̶, je̱'e̱ naymyu̶ya'ax naymyu̶jogu̶u̶, je̱'e̱ nay'oj nayya'axu̶u̶ y ku̶xyu̶ je̱'e̱ ju̶bu̶kpu̶. 32Oy yajxón mja'ay'ajtku̶xu̶ch y naybya'a''ayoowu̶gu̶x amíñ u̶xyu̶py, y naymyu̶me̱kxtujku̶gu̶x amíñ u̶xyu̶py, du'un neby je̱'e̱ Dios miich tu̶ xywyinmé̱kxku̶xyu̶ñ ko je̱'e̱ Cristo tu̶ mmu̶bu̶jkku̶xy.
Currently Selected:
Efesios 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005