MIKHA 4
4
Damugkin Geim" Re Asang Ngaui Pyo: Yaug Yo Za: Eib: Ra" Khyo
(Esaia 2.1-4)
1Joe" lo nae" ra" ayo, mae Caung:pa" Yham zhaug' to" ra" bam wa bug gaung gaje alhab' dao mae mug' nghoe' to" ra" myhao: thao" bam ngad nae".
Byumyu" myo: sho' mo, wa ai: khyo yan" lo: li" genae".
2Yao: bam: mang: byu qe wa- Asang nho: bug gaung khyo do, ye: gelang: Israel nho: Mao"So Caung:pa" Yham khyo do, ye: gelang:.
Yao: wa ngonhaung" re kad' nhao nug: ra" ru ngonhaung" re mho" byid: mung: ngonhaung" wa yao" yang khyin: to" ra" khyo mae su" bam nae" ngad:-
Pe"mung:ga"re Asang nho: mho" shid' dao: wa Yerusalem mae" joe" li" rumung: yao: wa yao" nho: byumyu" qere Ziun mae" jhau: ke' ra"- ga: ta" li" genae".
3Yao: wa byumyu" phaung mae jho" ngag: rure we' jhao" mae va: mae na ko" ra" kheim: so' qi" ra" mo, phaung mae jho" ngag: rure myo, byo, kao: byid' li" nae".
Yao: bam wa yao: bam: shae pyang: jham re yothaung: phaug' kheim be; pye' mung:- yao: bam: lhae tad' jham re shi: cu: shae nghoe: be; pye' li" genae".
Byumyu" cao jab jham wa khonhae" re: gyekhe' madam: ye: lo: genae" khonhae" re: mang: zin: nae" madam: seim" ca" genae".
4Yaug khao: ngo" wa yao: yao" sabyi khyae we' pho' ham" gae jham: khug mae ngaui pyo: yaug yo: ru we' qo" na: li" genae".
Khag' yang re: makyaug' nhin" genae".
Qam: so' qi" thao" ra" Asang wa ce: dao:so: re byid' to" ava".
5Byumyu" khao: ngo" wa yao: yao" so re caung:pa" mung: mho dao: gyo" na: ako". Ngadqere: ngonhaung" kam" wa ngonhaung' nho: Mao"So Asang re apyad ato mae caung:pa" mung: yao" mho dao: gyo" na: bam nae".
Israel Wa Taungbug: Mang: Mae Zaug Pyaung" Nha: To: Qhug' Rumae" Dam: Tug' Lo Genae"
6 Asang wa- ngoyang qobo dae byid' to" ra" nga" nho: byumyu" qere taung bug: mang: mae pyaung" nha: to: mung: qug: khai: dayin dayo: qhug' zo" na: ru mae" dam jhui" zhang: yu nae" ayo, joe" li" na va". 7Yao: bam wa khyid qeim mung: yham mug: mae" va" na gengadqere: na: dang mo, mae ngo yang asag' dam: qhid mung: yao: bam wa byumyu" qi" damyu" boe" li" genae". Ai: ayo, mae" thao phyao: apyad ato mae ngo wa yao: bam re Ziun bam mae" eib: na: nae"- ga: ta" ra".
8Aimung:- yao zaung" yaug: we' dakhyo:- yao" byumyu" re lhaug' na: ru we' dakhyo: Mao"So: yang yao" byumyu" qere lhaug' qu" na: ra" jo, qo Yerusalem we"- nao wa ni" kho:kham mung" boe" lai: lo: ra" mug: nho: vogaung: mo" dalhang: dam: qo" boe" nae". 9Nao wa pe" mung: yang: aiqhi" cab' gyi: ngug: ra" i? Pe" mung: yang: zo:khau: na: ra" myiqe: we' dakhyo: dayin dayo: no: na: i? Nao mae kho:kham maqo" mung: ni" pha,jhi" byid: nhag' bo qe shid: shao" yang: ngug: i? 10Yerusalem vobyu qe we"- zo:khau nae" seim" na: ra" myiqe: we' dakhyo: lao" nai mung: nokyang: kyang: ge,. Pe"mung:ga"re ana" naonhaung" wa vogaung: mo" mae" phao: thug' mung: pa: din" mae na ca" li" genae". Naonhaung" wa Babelon khyo ye ca" genae". Ngadqere: Asang wa ai: mae naonhaung" re naonhaung" nho: gyevo qe mae" khyad' yu: li" nae". 11Naonhaung" re khe' zin: nae" qhid' mae" byumyu" myo: sho' wa zang" ham: na: ako". Yao: bam wa- Yerusalem re phyo' qheim" pye' ca". Ngonhaung" wa ce: vogaung: mo" byo; qheim: jo; rure myao nae"- ga: ta" ako". 12Ngadqere: ce: byumyu" qe wa Asang: nho: aung: khug mae pe" myid: to" rure maba ngad: ako". Gaug re be; yu nae" qhid' mae" tai: lo: ru we' dakhyo: Asang: yang yao: bam re qobo dae byid: nae" qhid' mae" zhang" yu: rure ce: byumyu" qe mabeim: ngad: ako".
13 Asang wa- Yerusalem vobyu qe we"- naonhaung" nho: gyevo qere qobo dae ye: byid: ge,. Ngo wa naonhaung" re jo, to' khyug we' gyid: khu sin: de; ra" nung: jaung lo: we' dakhyo: qam: bo nhao nae". Naonhaung" wa byumyu" myo: sho' mo, re khyoe' aung: pye' mung: aqan alan khyo" yao: bam qo" yu: to" ra" jo; nho" mug: myid geim" nho: Asang ngo re qhaug' byid' li" genae"- ga: ta" ra".
Currently Selected:
MIKHA 4: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009