MIKHA 3
3
Israel Au: Jhaung: Qere Mikha Qobo Zhaug' Ta" Phoe: Ru
1Israel zug: qe we"- tae" gyo: ge, naonhaung" wa tarha" din:man" ra" khyo re gaung yug ca" ako". 2Ngadqere: naonhaung" wa gai: rure nghang: mung: makhyang: mashab: rure jhid'de; ako". Naonhaung" wa nga" byumyu" qere adaui phe, phe, shoqid qhid' pye' byid: mung: shoqug: mae" sho: re phyo' shao: yu: ako". 3Naonhaung" wa nga" byumyu" qere zo" pye' ako". Naonhaung" wa yao: bam: shoqid re qid' pye' mung: shoqug: re khyug' pye' byid: ko" ru we' ug' mae yhaung" nae" ra" sho: we' dakhyo: je; pye' ako". 4Asang re naonhaung" hug' yao nae" ayo, wa joe" li" na va". Ngadqere: yao: wa naonhaung" re phaug' tau: byid: nae" mangad: naonhaung" wa makhyang: mashab: ru kad' vako" ru yang yao: wa naonhaung" nho: akyu" mho' thoe re tae" gyo: byid: nae" mangad:-
5Nga" byumyu" qe wa- ngaui byid' ra" mo, re yaug yo cae: tae" ru qo" nae"- ngaui mabyid: mo, re wa mang: zin" ru qhug' nae" ga: dao:so: byid' ko" ra" lapa jham: yang mhug' pyag' ru qhug' ako". Ai: lapa jham re Asang wa - 6Lapa qe we"- naonhaung" ba na wa alaug gan: lo" na va". Naonhaung" dao mae ba vao: lo" na: kaung: va". Naonhaung" wa nga" byumyu" qere khyo nghung: jhui" nghung: geyang: lapa we' sin" ra" qhu" lho jham re mathe' myao: lo: genae". Amung: naonhaung" wa pe" re: lapa maqo" pa: kyo: lo: genae"- ga: ta" ra". 7Joe" lo nae" ayo, qhid' mae" re: lapa pa: ra" mo, wa- yao: bam: lapa dao: madang yang: mang qeim: li" genae". Yao: bam re Mao"So: yang matau: byid: mung: yao: bam alhab' wa phoe: byaug: li" genae".
8Ngadqere: ngo kam" wa Asang wa yao" byo we' qam: so' ke' byid: mung: tarha" din man" rure ba nhao: ru we' Israel byumyu" qere yao: bam: qobo pe" ngad: rure ta" kyo: nae" qam: o: byid' ra". 9Din: man" rure nghang: mung: jo: rumae" shad' ra" khyo phaug' lo" ko" ra" Israel zug: qe naonhaung" we"- nga" dao: re tae" gyo: ge,. 10Naonhaung" wa Mao"So: vomo" Yerusalem re byu se' ru we' tarha" madin man" ra" dao mae te" na: ako". 11Vomo" zug: qe wa khug' vag: qhid' mae" eib: ako"- khinjaung qe wa aphug' qo" nae" qhid' mae" Tarha" re lajheim: phyid: kyo" ako". Lapa qe wa ngaui qhid' mae" yao: bam: qhu" lho re byid' ako". Aimung: yao: bam alhab' wa Asang wa yao: bam we' daga" na: ga: ta" ako". Ngonhaung" mae pe" qug: khai: re: majoe" nae". Asang wa ngonhaung" we' daga" ngad:- ga: ta" ako".
12Aimung: naonhaung" ra" mathao mae Ziun wa yothaung: we' dakhyo: phaug' pye' ru qhug' nae". Yerusalem wa byo; qeim: ra" basad bam boe" lo" nae". Caung:pa" Yham bug gaung: re: sag' mo" yo boe" lo" nae".
Currently Selected:
MIKHA 3: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009