Sabiduría 8
8
1Jurhenkua uinhapekua jinkuni,
ma parhakpeni etsakurhisïnti,
ka iámentu ampe
sési juramukusïnti.
Jurhenkua jinkunisti iámentu jatsikorhekua
2Ji tumpirintkini jirinhantaska
xáni sési jáxekua jimpo p'interheska
ka jamperini ima jinkuni tempuchaska.
3Jurhenkua kánekua t'íntskarasïnti
jimpoka Diósï jinkuni jarhaska
ka jimpoka ima xénhchasïnka
enka iámentuecheri ACHAeka.
4Ima Diósïri ampe
iámu ampe mítesti,
ka imani ampe úsïnti
enka Diósï úk'a.
5Eka íni parhakpeni
xáni xénhchanhak'a jatsikorhekua,
¿Ne sánteru ampeski
eska jurhenkua?
Jimpoka jurhenkua
iámentu ampe úsïnka.
6Ka eka sési jásï eratsekua
úk'a iámentu ampe,
jurhenkua ústi iámu ampe
enka xáni jaka.
7Eka nema kaxumpenhchak'a
ima uánekua ampe sési úati.
Jimpoka jurhenkua arhistatspesïnka
kasïpitku jámani
ka jurhentpesïnti eratsentani,
kaxumpeni ka uinhapekorheni,
ka inte ampe sánteru marhuatspesïnti
eska ampe uék'i máteru ampe íni parhakpeni.
8Eka nema uék'a míakua jukarini
ima mítesïnti nénespki ióntki
ka úsïnti uantani
ampe enka úkorheaka ma jurhiani,
ka sóntku kurhankusïnti
ampe enka no jurhimpitku arhinhani janhaaka,
ka úsïnti mókuntani
ampe uék'i enka kurhamarhenhaaka
na uék'i xáni úkua jukani,
urheta uantasïnti
ampe enka sési ampe úkorheaka
ka méntkisï anapu
uantasïnti ampe enka úkorheaka.
9Jimposïni eratseka
eskani xáni ióni tsípekua kuánetanhaaka
xáni ióni no jurak'uaka,
jimpokani mítetixaka
eskarini ima no jurarkuaka
imani jurhia enkani sési jauaka
ka eskat'urini no jurarkuaka
enkani uantanheani jauaka
ka enkani mínkorheni jauaka.
10Ji eratseska
eskani imani jimpo mítekateuaka,
ka eskats'ïni k'ératicha janhanharhiaka
na uék'ini ji sapichku jaka,
11Jurhenkua úraaka kuák'utpeni jámani,
ka ísï jámanits'ïni juramuticha k'éri exeati.
12Ekani no uantani jauaka
erokorheni jauatiksï
eskani uantaaka,
ka ekani uantaaka
pínasku janhaati kurhanhani
ka ekani iósti ma uantaaka
sánteruts'ïni k'éri exeati.
13Imani jimpo enkani jurhenaka,
nómeni mirikurhinhaaka
na uék'ini uarhinia
ka ampema jurak'uaka
enkani jimpo méntkisï míanhaaka.
14Iretechani juramukuauaka
ka irechekuechani juramukuauaka,
15chérakorheatiksï ima
enkaksï nósesi kámpeni jauaka ánchetpeni
enkaksï jucheti ampe kurhauaka,
jucheti iretani jinkuni kaxumpeaka
ka uarhipetarhu uinhapekua xarhataaka.
16Enkani niántaaka jucheni
jurhenkua jinkuni mintsikorheaka
jimpoka ma no k'amek'amechantasïnka
eka ima jinkuni irekani jauaka,
ka nómpema p'amerasïnti
ima jinkuni japantiru,
ka jima ménterueni
tsípekorhesïnti ka sési p'ikuarherani.
17Enkani iámentu íni ampe eratsentaka,
kurhankuska eska uétarhesïnka
míakua jukarini enka uékaaka
eska nómeni mirikurhinhaaka
18ka eska jurhenkua jinkuni p'íchpirini
kánekua sési p'ikuarherakua juásïnka.
Kát'uni kurhankuska
eska imani ampe úparini
enka jurhenkua arhip'ek'a
eska jima jarhaska jatsikorhekua
enka nómeni k'amakurhik'a,
eska jima jarhaska míakua jukakua
enka úraaka márkuecha jinkuni,
ka eska mítenhasïnka
ne enka imani jinkuni uantaxeaka.
Jimposïni jámaka jirinhantani
uékani pákorheni.
19Ji sapiparini
nómpema k'amanharhintskua jukaraspka
ka ampakiti ma álma intsïnhaspka,
20sánteru jurhimpitku arhiparini
jinisïni kaxumpepka
ka ísï jámani
pímpinhasï anhanhatakuarhu ma incharheska.
21Ka exeska eskani no úpirinka
jurhenkua p'irani
ekarini no Diósï íntskupirinka,
ka t'uíni jurhenkuesïntia
míteni ne enka íntspek'a
xáni k'éri ampe intsïmperata.
Ka jimak'ani k'óruni
ACHAni uantap'aska
ka mintsita jinkuni kurhakuska:
Currently Selected:
Sabiduría 8: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.