Sabiduría 7
7
1Jít'uni uarhisïnka
ka méntkueni eska iámentuecha,
jít'uni imeri sïrukueska
enka echeri jimpo úkateka.
Jucheti nánteri k'úparhatarhu
úkorhesti jucheti anhanhatakua,
2Témpeni kutsï jarhaska
imeri iurhiri jimpo úkorheska,
jimpokarini jucheti tate jima péraska
ka jimpoka tsípekorhenhaska
eskaksï márku k'uíni.
3Antap'enutintkuni úska jiret'ani
ka ixu parhakpeni péranhaska
enka iámentuechani jiókorheak'a,
ka ísï eska iámentuecha
antap'enutintkuni ueraska.
4P'amarhenhaska
ka sésits'ïni t'arhexerasti.
5Nóma irecha ménterueni kánhasti.
6Mák'uenichi antap'enusïnka iámentuecha,
ka mák'uenichi uép'entasïnka.
Jurhenkuani xénhchani
7Jimposïni Diósïni kómu arhika
eskarini jurhenkorhenhchapirinka,
ka íntskustirini eskani jurhenkorhenhchapirinka.
8Sánteru xénhchaska jurhenkuani
eska juramukuani
ka eska juramutarakua xénhchani,
ka ísï jámani jucheti jimpo
jatsikorhekua nómpemesti.
9Nóma tsakapu xáni sésisti
eska jurhenkua
iámu tsakapu tiripiti nómpemesti,
jurhenkua jinkuni xéntaparini.
Ka tiámu mereari
xántku ísïsti eska k'uerekua.
10Na uék'ini p'amenchani
ka na uék'ini nósesi jáxeni
jini enkani jurhenkorheaka,
sánteru xénhchaska
eska jurhiakuani
jimpoka imeri t'íntskua
nómeni pátakorhesïnka.
11Jurhenkua juáchesti
iámentu sési ampe,
ka jatsikorhekuarini juáchesti,
12imani jatsikorhekuani
tsípekua jinkuni úraska ka arhani
jimpoka jurhenkua
iámentu imani ampe juramukusïnka.
13Nómpema nósesi eratseparini jurhenkorheska,
ka tsípekua jinkuni jurhentpentaaka
ka no jantiok'uerakorheaka,
jimpoka kánekua sési ampeska.
14Jurhenkua k'éri ma jatsikorhekuesti
ne enka jurhenaka úrani
úsïnti Diósï jinkuni jámani jarhani,
jimpoka jurhenkua uantapekusïnka.
Míakua jukari arhisïnti Diósïni eska jarhuataaka
15Diósïrini jarhuate
eskani úaka sési uantarini
ka eskani úaka
sési jásï eratsekua kámani
eska ima na uék'a
jimpoka imasï íntspek'a jurhenkua
ka imasï jurhetichani urhekupaat'i.
16Imeri ják'i jimpochi jámaxaka
jucha ka juchari eratsekuecha,
ka imeri jimpochisï úk'a iámentu ampe.
17Imarinisï iámentu ampe jurhentati,
ka jánhastastirini parhakpeni
néna enka úkata jaka,
ka néna enka
iámu ampe manakorhek'a,
18mítetarastirini
nénespki uénani jámani,
nénexaki íni jurhiatekuechani
ka néna k'amarhua parhakpeni,
jurhentastirini antisï jurhiata antarak'i
ka antisï ementa janonkuak'i
ka antisï iauakua janonkuak'i,
19antisï méni aparhekorhek'i
ka méni iauani
ka antiksïsï jóskuecha
ísï jarhak'i eskaksï na jarhak'a,
20jurhentastirini antisï tsípekua xáxe
eska na jáxeka
ka antiksïsï manakorhericha
ísï jámki apep'entani,
antiksïsï espirituecha uinhape
ka néna enka eratsenhak'a,
jurhentastirini p'ukutamuechani
ka uitsakuechani erakuantaani
ka ampe marhuasïni imecheri sïrankua.
21Iámmu ampe jurhenkorheska
imani ampe enka xarharak'a
ka imani jamperi enka no xarharak'a
jimpokarini jurhenkua,
ima enka iámu ampe úka
imarini iámu ampe jurhentasti.
Juerhenkua k'éri ampesti
22Jurhenkueri espíritu míakua jukasti
ka kaxumpesti, mámaru jáxesti,
ts'irimpesti, manakorhesïnti,
tsántsïmasti, pímpinhaxesti,
ampakesti, nómpema útspesïnti
sési ampe xénhchasïnti, incharpesïnti,
23jánkorhesïnti, sési ampe úsïnti,
parhakpeni anapueri p'íchpiristi
uinhapesti, no tsimanitsimaneasïnti
no uantanheasïnti,
iámu ampe úsïnti úni
ka iámentu ampe exeni jarhasïnti,
jimposï espirituechani incharhet'i,
míakua jukarichani
pímpinharhatichani
ka na uék'iksï xáni sapirhani.
24Jurhenkua
sánteru sési manakorhesïnti
eska ampe uék'i máteru ampe
ka imeri pímpinhaxekua jimpo
iámentu ampeni út 'i parhiakuni
ka incharheni,
25jimpoka ísïska
eska Diósïri jiret'akua
ka iámu uinhapitiri t'intskuesti
ka imeri k'érikuani xarhatasïnti,
jimposï nómpema nósesi jásï
út'i imani incharheni.
26Ima xarhatasïnti
méntkisï anapu erak'utarakuani
Diósïri úkueri eratekorhekuesti
ka imeri p'amok'perata xarhatasïnti.
27Mák'uesti ka jini iámu ampe úsïnti,
ima nómpema p'irhikorhesïnti
ka iámu ampe ménteruenirantasïnti,
ka xáni ióni
álma kaxumpiticha jinkuni japantiru
Diósïni antarhetantaasïnti
ka imerin jimpo uantaraasïnti,
28jimpoka nómpema máteru ampe
xáni tsiperasïnka Diósïni
eska parhakpeni anapu
enka míakua jukariuaka.
29Jurhenkua sánteru uinhanharhisti
eska tata jurhiata
ka sánteru k'ésti
eska náki uék'i jóskua
ka tsánta jinkuni sánteru ampesti,
30jimpoka chúresïnka,
ka jurhenkuani
nósesi jásï no úsïnti táp'anharhikuni.
Currently Selected:
Sabiduría 7: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.