Sabiduría 14
14
1Janhasti máteru
enkaksï japuntani chérheni
chkárini ma kómu arhik'a
imani enka sánteru no uinhapeka
eska ima enkaksï jatani jámka.
2Tumina antanhchani únhasti ima tepari
imani teparini nema ústi
enka jurhenakuka teparichani úani.
3Enka úka, t'úrisï urhekupak'a Táte,
jimpokari t'úsï xanhari jatsirak'a
ka enkari jimesï pák'a
enkaksï jenkueraticha no uekamaaka,
4ka ísïri xarhatasïnka
eskari úsïnka kéntitatspeni
ampe uék'i nósesi úkorhenchakua,
ka ísï jámani úsïnti
ima jamperi inchameni
enka no jurhenakuka
k'éri japuntarhu jámani.
5Nóri uékasïnka
eska no marhuauaka
ima ampe enka t'u kueraaka,
jimposï janhati
enkaksï mintsikak'a
imeni járhati teparichani
enka chkári jimpo úkateka,
enkaksï úk'a k'éri japuntani parhimeni
ka nómpema úkorhenchanhani.
6Méntkueni eska ióntki,
enkaksï acheticha iót'arhakua jimpo
sési xékorhepka ka enkaksï uarhipka
jimak'antu teparirhu ma jatanhaspti
ka enka t'u urhekupani jápka
ka enka jimpo úpka pakantenhani
ka ménteru uéntani uánenhantani.
7¡Sésisti ima chkári
enka sési úranhak'a!
8¡Ka ikichakuesti ima chkári
enka diósï eratakata úranhak'a!
Ikichanhe ima enka úk'a
ka ima enka diósï eratakateka
ima enka, imani jimpo enka úka
ka chkári, jimpoka diósï eratanhaska
na uék'i ima ísku tereni
ka jimpoka diósï eratanhaska.
9Diósï ikichasïnti
imani enka nósesi ampe úk'a
ka imeri nósesi niátakuani,
10jimpoksïsï tsimarheni maiampetaranhaati
nósesi niátakuani
ka imani enka nósesi ampe úk'a.
11Jimposï Diósï xereantauati
no jakak'uticheri diósï eratakatechani,
jimpoka na uék'i enka Diósï kuerauaka
nósesi jásï ampeksï únhantasti
enka k'uiripuni kánekua nósesi úkuk'a,
ka enka kuáskutarak'a
imechani enkaksï no jinkuntku jámka.
Néna enka uénakorheka diósï eratakatechani k'éri arhiani
12Imani jurhia
enkaksï diósï eratakatecha únhaka
imani jurhia uénasti nósesi ampe únhani
imani jimposï k'amantskap'enhapti.
13Uénani jámaniksï
no jarhaspti diósï eratakatecha
ka nót'uksï méntkisï jauati.
14Parhakpeni anapuecheri
chéta jimpoksï jurhasti,
jimposï Diósï uantati
eskaksï sóntku k'amantskanhaaka.
15Ísïsti eska nema
enka charhakuni ma uarhinhak'a
ka xáni jirinhantani chkáriri ma úrkorheni
sapini jásï ma
ka ima enka uarhiri mépka
diósïni kámani jarhania k'éri ampe arhini
ka ísku úntani márkuechani arhiani
eskaksï uantatsekorhekuaka
ka eskaksï tsïtsïki ampe jatsikukuaka.
16Ka no ióntasïnti ísï p'intenhani
ka ísï p'intekua pakatanhani.
17Méntkueniksï juramuspti
jurammuticha
eskaksï diósï eratakatecha
k'éri ampe arhinhaaka.
Ka jimpoka ima enkaksï iauani jámani jaka
no uémpka k'éri ampe arhini
úkorheastiksï máteru
enka méntkueni jáxeka
imani irechani jinkuni
enkaksï uékempka k'éri ampe arhini
ka jimpokaksï tsípekua jinkuni
k'éri ampe arhinhchaxapka
ka jimpokaksï imanterku exexapka
ka jimpokaksï imani jima jatsikorhespka.
18Tátsekua ísï exeparini
ka imeri káneranhchakua jimpo
enka úk'ukorheani jápka
irecheni járhatichani
k'éri ampe arhinhchatarpesti,
19ka jimpoka uéksïrempka
irechani jinkuni sési pakarani
kánekua sánteru sési ják'uspti
irecheni jásï úk'ukatani.
20Ka ísï jámani
k'uiripu kánekua xénhchani úk'ukatani
k'éri ampe arhikua úntasti
imani úk'ukatani
imani enka urhetku
k'uiripuenik'u janhanharhimpka.
21I ampe nósesi úkusti k'uiripuni
jimpokaksï ima k'uiripu jántspirispka
ka jimpokaksï kómu nitamakorhesïrempka
imaksï tsakapuni ka chkárini
ísï jakankurhitarasti
enka Diósïk'u nitatarheka
imani jakankurhikua p'irani.
Ampe enka úk'a diósï eratakatechani k'éri ampe arhiani
22Ka ísï Diósïni no míteparini
kánekua atap'erapariniksï irekaxati
enka imani jimpo úkorhek'a
jimpoka Diósï no mítenhaska,
ka sési jakuaksï uantaparini uarhiperasïnti.
23P'intekuaksï kámasïnti
ka imani p'intekuecharhuksï
sapichani ataasïnti uántikuani
tánkorhentasïntiksï sïpatekuarhku ampe úni
ka ikichakueni járhati k'uínchekuaksï úsïnti,
24nóksï janhanharhisïnti tsípekuani
ka temunkurhikuaniksï no janhanharhisïnti
nóksï míatarampesïnti atap'erani uántikperani
ka máteru nemani uantanheatani
tempa jnkuni ísku ampe úni.
25Iámu ampe no jánhaskorhesti
atap'eranhani uántikperanhani
sïpatsperanhani, tantoch'peranhani,
maiamperakua jimpo nósesi ampe únhani
ísku jánti úkorhenhani
ikichakua ampe niátanhani
ka k'érati ampe chkuántiranhani,
26nóteru mítenhani kaxumpenhani
nósesi kámperanhani,
álma nósesi ják'utsperanhani
iámentuecha p'árhperanhani
temunkurhikua xeretsperanhani
ísku jánti úkorhenhani
ka ikichakua ampe únhani.
27Imechani k'éri ampe arhiani
enkaksï diósï eratakateka
ka enkaksï nómpemeka,
ísï uénasïnti ka imani jimposï
xáni uáni ampe nósesi úkorhet'i:
28Ima enkaksï k'éri ampe arhiak'a
k'uínchekuaksï úasïnti
ka sésiksï tsînchekorhentasïnti,
ka ísku ampeksï úts'ïkorhesïnti eska úkorheaka
ka nóksï jurhimpekuarhu irekasïnti
ka nóksï na xésïnti chkuántirani.
29Imani jimpo
enkaksï diósï eratakatani jakak'uk'a
enka no kámka tsípekua
ísïksï eratsesïnti eska chkuántirani
nómpema nósesi juátspesïnka.
30Enka úka,
tsimani ampe jimpoksï
maiampetaranhaati:
Jimpokaksï Diósïni,
diósï eratakata jinkuni terukutaxaka
ka jimpokaksï
jima ménterueni uantaxaka
enka no ísïka
ka enka no kaxumpekueka,
ka jimpokaksï ísï jámani
no xénhchaxaka
imani ampe enka pímpinhaxeka.
31Ka no jimpokaksï
diósï eratakatecha uinhapekua jatsika,
sánteru sániksï maiampetaranhaati,
jimpoka méntkisï maiampetaranhasïnka
ne enka nósesi ampe niátak'a.
Currently Selected:
Sabiduría 14: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.