Sabiduría 13
13
Jóskuechani ampe jakak'uni ka parhakpeni anapu uinhapekuani jakak'uni
1Nóksï míakua jukaristi
ima enkaksï ísku irekaka
Diósïni no míteparini,
jimpokaksï xáni uáni sési ampe exerini
nóksï mítentasti imani
enka sési jimpo jaka,
ka nóksï mítentasti
na uék'iksï exeka
enka ima xáni uánekua ampe úka.
2Ka imaniksï diósï eratasti
enkaksï parhakpenini juramukuk'a
chpírini ka nósesi jásï tarhiatani
tarhiata sapichuni ka jóskuechani,
enkaksï auantarhu jaka
ka itsïni enka iatsitakuarhu iurheni jaka
ka auantarhu anapu jóskuechani.
3Enkaksï imani ampe exerini
xáni jaiapanhentaaka ka xénhchaani
ka enkaksï jamperi diósï erataaka,
jánhaskapirintiksï
eska kánekua sánteru sésiska
ima iámentu imecheri ACHAeka
jimpoka imasï úka
iámentu imani ampe,
4Ekaksïni ísku pakataka ima ampe
enkaksï ima úk'a
jatsipirinkats'ï mítetini jarhani
eska ima sánteru uinhapitiska
enka imechani úaka,
5jimpoka uétarhesïnka urheta
imani jánhaskani na enka xáni k'érika
ka enka xáni sési jáxeka
ima ampe enka kueraakateka
ka ísï jámani míteni
imani enka imani ampe kueraaka.
6Enka úka, imechani
no úati iámu k'amanharhirantaani
jimpokaksï támisï jámeraka
xáni uékani Diósïni jirinhantani
ka xáni uékani xéntani.
7Eskaksï xáni irekorheaka
xániksï ióni jámasïnti nóna jánhaskani
ka jantiok'uksï tantosï úkorhesïnti
imani ampe jimpo
enka xáni sési jásï ampe exek'a.
8Enka úka nóksï ampema úati uantani
9jimpoka, ekaksï xáni uáni ampe míteka
enkaksï jamperi iámu auantani míteka
¿Antiksïsï no sóntku míte
iámentuecheri Achani?
Enka diósï eratakatani jakak'uaka
10Na enkaksï xáni nósesika
ima enkaksï diósï arhiak'a imani ampe
enka parhakpeni anapu úk'a
imani ampe enka tiámu mereari
ka tiámu tiripiti jimpo úk'ukatek'a
enkaksï manakorherini járhati únhak'a
ka ísku tsakapuni ampe
enka nómpema jukaparhakueka
enka nema ióntki úk'uka
jimpokaksï imani ampe jakak'usïnka
enka no tsípekua jukarika.
11Jútkiru je jánhaskani,
chkári ánchekorheri ma jinkuni terukutaparini:
Ima chkári p'ikusïnti
enka no chupek'a
ka sóntku p'ikuparhakusïnti
ka amparhesïnti
ka úk'usïnti ampema
enka úratarakek'a,
12ka enka jima pakarak'a chkári
imani kurhip'atarantasïnti
ka t'irekua úmatarantani.
13Ka tátsekua enka útasï pakarak'a
imani enka ísterku tsóptek'ia
enka nóteru ampema marhuak'a
imani uénasïnti p'ap'atani
ka amparhesïnti
enka nómpe úkua jatsiaka
ka nósani úkua jimpo úsïnti
ka parhakpeni anapu nemeni ják'usïnti
14ka máteru nósesi jásï manakorherini jásï ma jatsiirasïnti.
Atarhentasïnti
ka nóteru xarhararasïnti
eska ima nósesi jásï chkáriska,
15ka jimak'u sési jásï ma jatakua úkusïnti,
karhakua pérasïnti chánharhitani.
16Sési pérasïnti eska no uekorheaka
jimpoka míteska eska ima jantiok'u
no úaka p'ínkukorheni:
Jimpoka ima ísku úk'ukata méska
ka uétarhesïnti eska jarhuatanhaaka.
17Ka na uék'i ísï
imani kurhakusïnti
eska ima íntskuaka
ampe enka uétarhenchani jaka
ka imani arhisïnti eska exekuni jauaka
témpani ka uáp'echani,
no k'uratsesïnti imani uantaxekuni
isku ampemani enka no tsípitika
Ka imani kurhakusïnti
eska no p'amenchaaka
imani kurhakusïnti
enka no úk'a p'amenchani,
18Imani jámsïnti arhini
eska tsípekua íntskuaka
enka no kámka tsípekua
imani arhisïnti eska kuáp'eaka
enka no úaka kuáp'eni,
ka imani arhisïnti
eska urhekupaaka enka nani niuaka
enka nónani nirak'a,
19imani kurhakusïnti
eska sési ánchekorheni jauaka
ka eska iámu ampe sési uérani jauaka
imani arhisïnti
enka ják'i no manatak'a.
Currently Selected:
Sabiduría 13: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.