Maalʉko 2
2
ɄYeesu ali ni‑ikhone ɨlya‑akhobhoshele ɨmbiibhi
(Mataayo 9:1-8; Luuka 5:17-26)
1ɄYeesu ahabhala nantele hu Kapelenawumu. Ɨnsiku nyishe lwene lwa zyashila, abhantu bhahʉmvwa huje, ali pa khaaya paala. 2Ɨpo abhantu abhinji haani bhahabigɨɨne mu nyumba muula, saga pahali na pa‑ashile pa lyango. ɄYeesu ahabhalʉmbɨlɨlaga abhantu izwi lyɨ wumwɨnɨ ʉwa Ngʉlʉbhɨ. 3Lwa‑alʉmbɨɨlɨla, bhahamʼmwɨnzɨla abhantu bhanɨ bha bhahanʼnyemuuye ʉmuntu wa‑ahafwiye hundwɨmo mu shɨlɨlɨ. 4Bhahapootwa hunʼtʉʉsye pa‑ahali ʉYeesu, pɨpo hwahali nɨ mpʉga ɨngoosi ɨya bhantu. Bhahazʉbha pa mwanya pa nyumba, bhahadobhola igʉlʉ,#2:4 igʉlʉ Mu nsiku ziila, ɨnyumba zya Bhayahuudi zyahali na magʉlʉ amanzaale. Bhahazengaga hwʉnzɨ ɨntandalilo ɨzya‑azʉbhɨle pa mwanya. bhahamʼmwisya ʉmʼminu mu shɨlɨlɨ paala pa‑ahali ʉYeesu. 5ɄYeesu lwa waalola zya bhabhomba abhantu bhaala, ahamanya huje, bhali nʉ lwɨtɨho. Ahamʼmʉʉzya ʉmʼminu ʉla huje, “Mwana waanɨ, ɨmbiibhi zyaho zikhobhosheliilwe.”
6Leelo, abhamanyizyi bhamo abhɨ ndajizyo zya Moose bha bhahakhɨɨye paala, bhahasɨɨbhaga mu mooyo gaabho huje, 7“Ʉmuntu ʉnʉ ayanga bhʉlɨ bhʉlɨ ɨsho? Ahunʼniga yʉ Ngʉlʉbhɨ, nʉʉmo ʉmuntu wa‑agabhakhobhoshela abhantu ɨmbiibhi, lyoli yʉ Ngʉlʉbhɨ mwene.” 8ɄYeesu ahamanya lwene zya bhasɨɨbha, ahabhabhʉʉzya huje, “Yeenu mu mooyo geenyu musɨɨbha ɨsho? 9Ɨshi, lilihu lya lili lipʉpʉʉsu tee, humʼmʉʉzye ʉmuntu ʉnʉ wa‑ahafwiye hundwɨmo huje, ‘Ɨmbiibhi zyaho zikhobhosheliilwe,’ awe humʼmʉʉzye huje, ‘Ɨmɨɨlɨla, ega ɨshɨlɨlɨ shaaho, bhalaga’?#Bhaazya Yoohani 9:1-7. 10Ɨshi leelo, ɨmbalanje huje, lyoli anɨ nɨMwana wa Muntu#2:10 nɨMwana wa Muntu Ɨli litaawa lya Yeesu ɨlyɨ mfiso. Bhaazya izwi Mwana wa Muntu hu Ngalulanyo ɨyɨ Mazwi aMajenu hu malishilo wɨ shitaabu ɨshi. ɨndi ni‑ikhone ɨlya hubhakhobhoshele ɨmbiibhi abhantu mu nsi.” Ɨpo ʉYeesu ahamʼmʉʉzya ʉmuntu ʉla wa‑ahafwiye hundwɨmo huje, 11“Ɨhubhʉʉzya ɨnjiga, ɨmɨɨlɨla, ega ɨshɨlɨlɨ shaaho, bhalaga hu khaaya!” 12Papaala, bhonti bhahamʼmwenya ʉmuntu ʉla, ahɨmɨɨlɨla, aheega ɨshɨlɨlɨ shaakwe, ahafuma hwʉnzɨ. Abhantu bhonti bhahaswiga na humʼmwamishe ʉNgʉlʉbhɨ, bhahaga, “Saga tipɨɨte hugalole amayele#2:12 amayele Bhaazya izwi Mayele hu Ngalulanyo ɨyɨ Mazwi aMajenu hu malishilo wɨ shitaabu ɨshi. nanshi ɨgo ga gafumila sanyʉʉnʉ!”
ɄYeesu ayɨnzɨle hubhafyʉle abhabhomba mbiibhi
(Mataayo 9:9-13; Luuka 5:27-32)
13ɄYeesu ahafuma, ahabhala nantele hunshɨnjɨ yɨ nsʉmbi ɨyɨ Galilaaya. Abhantu abhinji bhahamʼmɨnjɨlɨzyaga huhuula, wope ahabhamanyizyaga.
14Pilongolela ʉYeesu lwa‑ashizanya munshɨnjɨ yɨ nsʉmbi, ahanʼnola ʉmuntu ʉmo wa bhahagaga Laawi,#2:14 Laawi Ɨli litaawa lyɨnjɨ ɨlya Mataayo. ʉmwana wa Alufaayo, asomvya ɨsonko pa bhasomvezya ɨsonko. ɄYeesu ahamʼmʉʉzya huje, “Ɨnzaga, ʉmbɨnjɨlɨzyaje anɨ, ʉbhe nʼsundwe waanɨ.” ɄLaawi ahɨmɨɨlɨla, ahanda humʼmɨnjɨɨlɨle.
15Pamandɨ ʉYeesu na bhasundwe bhaakwe bhahabhala alye ɨshalye hwa Laawi. Abhasomvya sonko#2:15 Abhasomvya sonko Bhaazya izwi Bhasomvya sonko hu Ngalulanyo ɨyɨ Mazwi aMajenu hu malishilo wɨ shitaabu ɨshi. na bhabhomba mbiibhi#2:15 ABhafalisaayo bhahazikhɨɨte haani ɨndajizyo zya Moose. Bhaala bha saga bhahazikhataga ɨndajizyo na miiho gaabho ga bhonjezɨɨzye, bhahabhakwizyaga bhabhomba mbiibhi. Bhaazya izwi Bhafalisaayo ni‑izwi Bhabhomba mbiibhi hu Ngalulanyo ɨyɨ Mazwi aMajenu hu malishilo wɨ shitaabu ɨshi. abhanjɨ abhinji bha bhahamʼmɨnjɨlɨlaga, bhahalyanga ɨshalye peeka nabho. 16Ɨshi, abhamanyizyi abhɨ ndajizyo zya Moose bhamo bha bhahali Bhafalisaayo, lwa bhanʼnola ʉYeesu alya peeka na bhasomvya sonko na bhabhomba mbiibhi abhanjɨ, bhahabhabhʉzɨɨlɨzya abhasundwe bhaakwe bhahaga, “Yeenu leelo asangaana na‑alye peeka na bhasomvya sonko na bhabhomba mbiibhi?” 17ɄYeesu lwa wʉmvwa, ahabhabhʉʉzya huje, “Abhantu bha saga bhabhinile lwonti, saga bhahumʼmwanza ʉnʼganga, lyoli abhabhinu bha bhahumʼmwanza ʉnʼganga. Anɨ saga ɨnɨnzɨle hubhakwizye bha bhahwilola huje bhagolosu, ndaadi! Ɨnɨnzɨle hubhakwizye abhabhomba mbiibhi.”
ɄYeesu alɨngaanisya ɨmanyizyo ɨnkʉʉlʉ nɨ njenu
(Mataayo 9:14-17; Luuka 5:33-39)
18Mu habhaazyo hamo, abhasundwe bha Yoohani ʉMwozi na bhasundwe bha Bhafalisaayo bhahahwiyiimaga alye. Isiku limo abhantu bhamo bhahabhala hwa Yeesu, bhahamʼmʉzɨɨlɨzya bhahaga, “Pa nsiku ɨzya‑apuute, abhasundwe bha Yoohani ʉMwozi na bhasundwe bha Bhafalisaayo saga bhalya. Yeenu aawe, abhasundwe bhaaho pa nsiku ɨzya‑apuute saga bhahwiyiima alye?” 19ɄYeesu ahabhaamula ahaga, “Bha bhaniilwe nʉ mweji bhabhajiiye wɨlɨ ahwiyiime alye, lwa bhali peeka nʉ mweji pa weeji? Mu habhaazyo honti lwa bhali peeka nawo saga bhagahwiyiima alye lwonti! 20Leelo hu nsiku zya zihwɨnza, abhalʉgʉ bhaakwe lwa bhahayihumʼmwefwa ʉmweji paahati pa bhaanwa bhaakwe, ɨpo pa pɨɨpo abhaanwa bhahayihwiyiima alye.
21Hwope asangaanye ɨmanyizyo zyanɨ zya zili njenu na miiho geenyu hulɨngaana lwene nanshi apatishe ɨshipatiho ɨshɨ mwenda ʉmʼpya mu mwenda ʉnʼkʉʉlʉ. Ɨshipatiho shiila ɨshipya shibhala huguzembule ʉmwenda ʉgwo na hwonjeezye azembushe. 22Nantele, asangaanye ɨmanyizyo zyanɨ zya zili njenu na miiho geenyu hulɨngaana lwene nanshi asulule ɨdivaayi#2:22 Ɨdivaayi shimwelo sha bhalɨngaanya afume mu zabiibu, nantele shahamanyiishe hwa Bhayahuudi. Ɨdivaayi lwa yaalʉla, ɨbha nanshi ɨhombwa shɨ‑ɨli. Bhaazya izwi Divaayi hu Ngalulanyo ɨyɨ Mazwi aMajenu hu malishilo wɨ shitaabu ɨshi. ya saga ndozu mu nyambɨ#2:22 nyambɨ ABhaizilaeeli bhahabhɨɨhaga ɨdivaayi mu nyambɨ. Ɨnyambɨ ɨzyo bhahazigombaga afumilane nɨ nkwembe ɨzyɨ mbuzi. Ɨnkwembe ɨnkʉʉlʉ zyahapwaguhaga zyene, pɨpo zyahapotwaga abʉʉse tee ɨdivaayi yɨ‑ɨli ʉmwo lwɨ‑ɨlʉla. Leelo ɨnyambɨ ɨmpya saga zyahapwaguhaga, pɨpo ɨzyene zyahabʉʉsaga tee. ɨnkʉʉlʉ, pɨpo lwɨ‑ɨlʉla na‑atutubhe, ɨnyambɨ ɨbhala‑akunwe abʉʉse, lyoli ɨnza‑apwagushe. Ɨdivaayi yope ɨnza hwitishe. Ɨdivaayi ya saga ndozu ɨhwanziwa abhɨɨhwe mu nyambɨ ɨmpya.”
ɄYeesu yʉ Mwɨnɨ wi‑isiku ɨlyɨ Sabaato
(Mataayo 12:1-8; Luuka 6:1-5)
23Isiku limo ɨlyɨ Sabaato, ʉYeesu peeka na bhasundwe bhaakwe bhahashizanyaaga mu magʉnda agɨ ngano. Abhasundwe bhaakwe bhahanda anyuntule amatwe gɨ ngano na‑alye.#2:23 anyuntule amatwe gɨ ngano na‑alye Ɨndajizyo zya Bhayahuudi zyahabhɨtɨshɨlaga abhantu anyuntule na‑alye amantongooni afume mu magʉnda ga bhantu abhanjɨ lwa bhashila hu magʉnda gaabho. Bhaazya ɨNyiizuho 23:25. ABhafalisaayo bhahaswigaga hu nongwa ya‑aje, abhasundwe bha Yeesu bhahabhombile ɨmbombo ɨyo pi‑isiku ɨlyɨ Sabaato. Bhaazya Afume 20:8-11; 34:21; ɨNyiizuho 5:12-15. 24Ɨpo aBhafalisaayo bhahamʼmʉzɨɨlɨzya ʉYeesu bhahaga, “Enya, yeenu abhasundwe bhaaho bhabhomba ɨmbombo pi‑isiku ɨlyɨ Sabaato ɨzyo ɨndajizyo zya Moose zikhaana?” 25ɄYeesu ahaamula huje, “Bhʉlɨ, saga mubhaziizye mu Nsimbo ɨMfinjile, ʉmwɨnɨ ʉDaudi#2:25 ʉDaudi Bhaazya izwi Daudi hu Ngalulanyo ɨyɨ Mazwi aMajenu hu malishilo wɨ shitaabu ɨshi. sha‑ahabhombile, ɨnzala lwa yanʼnuma ʉmwene na bhamwabho? 26Ɨmandɨ luula ʉAbiyasali lwa‑ali nʼsayi nʼgoosi wa Ngʉlʉbhɨ, ʉDaudi ahatʉʉha mwi‑isebhele ifinjile lya Ngʉlʉbhɨ,#2:26 mwi‑isebhele ifinjile lya Ngʉlʉbhɨ ABhayahuudi sha bhasɨɨle azenje ɨnyumba ɨmfinjile ɨya Ngʉlʉbhɨ, bhahagombile isebhele ɨlya‑apuutile. Ʉmwo mwa muula ʉNgʉlʉbhɨ ahakhalaga peeka na bhantu bhaakwe lwa bhahashʉʉlaga. Bhaazya izwi Nyumba ɨmfinjile ɨya Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. ahalya ɨntogito ɨmfinjile ɨzya pa shipuuto. Alɨngaane nɨ ndajizyo zya Moose, bhasayi bha Ngʉlʉbhɨ bheene bha bhahɨtɨshɨlɨɨlwe alye ɨntogito ɨzyo,#Bhaazya ɨMbombo ɨzya Bhalaawi 24:5-9. leelo ʉDaudi ahalya zyɨnɨɨzyo, nantele ahabhapeela na bhamwabho, bhope bhahalya. Wope ʉNgʉlʉbhɨ ahabhɨtɨshɨɨye.” 27Ɨpo ʉYeesu ahabhabhʉʉzya huje, “Abhantu saga bhahapeliilwe huje, bhazitinihaje ɨndajizyo ɨzyɨ Sabaato, lyoli isiku ɨlyɨ Sabaato lyahabhɨhwɨlwe nʉ Ngʉlʉbhɨ huje, libhavwaje abhantu. 28Nantele, mumanye huje, anɨ nɨMwana wa Muntu ɨndi Mwɨnɨ wɨ Sabaato.”
Currently Selected:
Maalʉko 2: SBK
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.