Matius 14
14
Yohanis Tukang Baptis dapa bunu
14:1-12
(Markus 6:14-29; Lukas 9:7-9)
1Waktu itu, Herodes pegang parenta jadi gubernur di propinsi Galilea. Dia dengar barita soal Yesus, 2la bilang par dia pung pegawe-pegawe kata, “Beta pikir, Dia tu Yohanis Tukang Baptis yang su hidop kombali! Tagal itu kong Dia ada pung kuasa par biking tanda-tanda herang.”
3-4Herodes bilang bagitu tagal dia parna pung masala basar deng Yohanis. Akang pung carita bagini: Babarapa waktu lalu Herodes kaweng deng Herodias. Herodias tu dia pung sudara Filipus pung bini. La Yohanis tagor dia kata, “Ale su langgar atorang tagal ale kaweng deng ale pung konyadu.” Tagal itu, Herodes suru tantara pi tangkap Yohanis, ika dia, la kasi maso dia dalang bui.#Markus 6:17-18; Lukas 3:19-20; Imam-Imam pung Atorang 18:16, 20:21 5Herodes mau bunu Yohanis, mar dia taku orang banya, tagal dong parcaya kalo Yohanis tu Allah pung juru bicara.
6Mar waktu Herodes pung hari jadi, Herodias pung ana parampuang manari di muka Herodes deng dia pung tamu-tamu, la itu biking Herodes pung hati paleng sanang. 7Jadi, dia angka sumpa par kasi apa sa yang ana tu minta. 8La tagal ana tu su dapa bisi-bisi dari dia pung mama, dia bilang kata, “Papa, beta minta papa kasi Yohanis Tukang Baptis tu pung kapala di atas bake par beta sakarang ni.”
9Waktu Herodes dengar itu, dia pung hati susa paskali. Mar dia parenta par kasi apa yang ana parampuang tu minta, tagal dia su sumpa par biking akang, baru dia pung tamu-tamu jua su dengar akang lai. 10La Yohanis pung kapala dapa potong dalang bui. 11La Yohanis pung kapala tu dapa bawa di atas bake par ana parampuang tu, la dia pi kasi akang par dia pung mama. 12La Yohanis pung murid-murid pi ambe dia pung mayat la bakubur dia. Abis itu, dong pi kasi tau akang par Yesus.
Yesus kasi makang labe dari lima ribu orang
14:13-21
(Markus 6:30-44; Lukas 9:10-17; Yohanis 6:1-13)
13Waktu Yesus dengar barita soal Yohanis, Antua deng Antua pung murid-murid pi dari situ la nai parau par pi ka tampa sunyi biar dong bisa sandiri. Mar orang banya dengar soal itu, jadi dong bajalang kaki dari dong pung kota-kota par iko Antua. 14Waktu Yesus turung dari parau la lia orang paleng banya tu, Antua rasa kasiang deng dong la kasi bae orang-orang saki yang ada di tenga-tenga dong.
15Akang pung amper malang, Antua pung murid-murid datang par Antua la bilang kata, “Tuang Guru e, ini ni tampa sunyi deng su mulai galap. Suru orang banya ni pi jua biar dong bisa bali makanang di kampong-kampong.” 16Mar Antua bilang par dong, “Dong seng parlu pi lai. Kamong yang musti kasi makang dong.”
17La dong bilang par Antua kata, “Yang katong pung di sini cuma roti lima bua deng ikang dua ekor sa.”
18Antua bilang par dong, “Bawa akang kamari par Beta.” 19La Antua suru orang banya tu dudu di atas rumpu. Abis itu, Antua ambe roti lima bua deng ikang dua ekor tu, la angka muka ka langit, la sombayang minta dangke dari Allah par akang. Abis itu Antua pata-pata roti deng ikang tu, la kasi akang par Antua pung murid-murid, la dong bage-bage akang par orang banya tu. 20Dong samua makang sampe kanyang. Abis itu, Antua pung murid-murid bajalang kumpul panggal-panggal roti deng ikang-ikang sisa. Samua ada sapulu dua bakol pono-pono. 21Orang banya yang makang tu, kalo rekeng laki-laki sa, mangkali ada barang lima ribu orang. Itu jua balong rekeng parampuang deng anana.
Yesus bajalang di atas aer
14:22-33
(Markus 6:45-52; Yohanis 6:16-21)
22Abis itu, Yesus langsung suru Antua pung murid-murid nai parau la balayar kamuka Antua, ka dano pung sabala. Antua jua suru orang banya tu pi dari situ. 23Abis Antua suru orang banya tu pi, Antua nai ka gunung par sombayang sandiri. Waktu su malang, Antua di situ sandiri sa. 24Waktu itu, Antua pung murid-murid pung parau su sampe di tenga-tenga dano, baru omba basar sampe dong pung parau oleng tagal anging hantam dari muka. 25La pas amper siang, Antua bajalang di atas aer pi par dong. 26Waktu dong lia Antua bajalang di atas aer, dong takajo la bataria kata, “Setang!” Dong samua bataria-bataria tagal takotang.
27Mar Yesus langsung bilang par dong kata, “He tenang! Ini Beta ni. Jang taku!”
28La Petrus basaro par Antua kata, “Kalo Ale tu batul-batul Tuang Guru, suru beta bajalang iko Tuang Guru di atas aer.”
29La Antua bilang par dia kata, “Mari!” Jadi Petrus turung dari parau la bajalang di atas aer pi par Yesus. 30Mar, waktu dia rasa anging batiop, dia taku la mulai tinggalang, la bataria kata, “Tuang Guru tolong!”
31Tarus, Yesus langsung lunjur Antua pung tangang par pegang dia la bilang kata, “Hoe orang yang kurang parcaya! Mangapa kong ale bimbang?”
32La waktu dong nai ka parau, anging tado. 33La dong yang ada dalang parau tu somba Antua. Dong bilang kata, “Batul, Tuang Guru ni Allah pung Ana.”
Yesus kasi bae orang-orang saki di Genesaret
14:34-36
(Markus 6:53-56)
34La dong sampe di sabala dano tu, di daera Genesaret. 35Waktu orang-orang di sana kanal Yesus, dong kasi tau orang-orang di samua kampong di pinggir-pinggir situ kalo Yesus ada datang. La dong bawa samua orang saki par Antua. 36Dong minta deng sunggu-sunggu dari Antua par kasi ijin orang-orang saki sonto Antua pung baju panjang luar pung ujung biar dong bisa bae. La samua orang yang sonto akang jadi bae.
Currently Selected:
Matius 14: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku