Matius 15
15
Manusia langgar Allah pung parenta biar bisa iko atorang-atorang adat
15:1-20
(Markus 7:1-23)
1Satu kali bagini, satu dua orang Farisi deng guru Torat datang dari Yerusalem par Yesus la bilang kata, 2“He, mangapa kong Ale pung murid-murid langgar katong pung moyang-moyang pung atorang adat? Dong seng basu tangang do baru makang.”
3Mar Antua jawab dong kata, “La mangapa kong kamong langgar Allah pung parenta biar kamong bisa iko kamong pung atorang-atorang adat? 4Barang dalang Kitab Torat, Allah su bilang, ‘Musti taru hormat par kamong pung mama-papa.’ Deng jua, ‘Sapa yang maki dia pung mama-papa, dia musti dapa hukum mati.’#Kaluar dari Mesir 20:12, 21:17; Imam-Imam pung Atorang 20:9; Carita Ulang 5:16; Markus 7:10 5Mar kamong ni, kamong ajar laeng. Kamong bilang kata seng sala kalo satu orang bilang par dia pung mama ka papa kata, ‘Apa yang beta mau kasi par mama deng papa pung hidop tu, beta su kasi akang par jadi korbang par Allah.’ 6Jadi, kamong su ajar orang par seng taru hormat par dong pung mama-papa. Deng bagitu, kamong anggap Allah pung parenta tu seng pung arti apapa, biar kamong bisa iko kamong pung atorang adat. 7Hoe orang-orang munafik! Memang batul apa yang Allah pung Juru Bicara Yesaya su bilang soal kamong kata,
8‘Orang-orang ni, dong puji-puji Beta cuma di mulu sa,
mar dong pung hati jau dari Beta.
9Parcuma sa dong somba Beta,
tagal dong seng ajar orang par iko Beta pung atorang mar iko manusia pung atorang.’ ”#Yesaya 29:13; Markus 7:6-7
10Tarus, Yesus panggel orang banya datang la bilang par dong kata, 11“Dengar la mangarti apa yang Beta mau bilang ni! Apa yang maso ka dalang orang pung mulu, itu seng biking dia kotor. Mar, apa yang kaluar dari dia pung mulu, itu yang biking dia kotor.”
12Tarus, Antua pung murid-murid datang par Antua la tanya kata, “Tuang Guru tau ka seng kalo apa yang Tuang Guru bilang tu su biking orang Farisi hati saki?”
13La Antua jawab dong kata, “Tanamang apa sa yang Beta pung Bapa di sorga seng tanang nanti dapa cabu lapis deng akang pung akar-akar samua. 14Jang pastiu deng dong itu. Dong macang deng orang buta yang hentar orang buta. Kalo orang buta hentar orang buta, dua-dua nanti jatu dalang kolang.”#Lukas 6:39
15Tarus, Petrus bilang par Antua kata, “Tuang Guru, tolong kasi tau ande-ande tu pung arti par katong jua.”
16La Antua bilang par Antua pung murid-murid kata, “Kamong masi balong mangarti akang lai? 17Kamong seng mangarti ka kalo apa sa yang orang makang, akang maso dalang poro la dia nanti pi buang akang di kakus? 18Mar apa yang kaluar dari orang pung mulu, akang asal dari hati. Itu yang biking orang kotor.#Matius 12:34; Lukas 6:45 19Barang dari hati muncul sagala macang pikirang jahat. Itu yang biking orang bunu orang, maeng serong, tidor deng orang yang bukang dia pung laki ka bini, pancuri, jadi saksi parlente, deng hojat orang. 20Samua tu biking orang kotor. Mar kalo makang deng tangang yang balong basu, itu seng biking orang kotor.”
Parampuang Kanaan satu yang parcaya Yesus
15:21-28
(Markus 7:24-30)
21Abis dari tampa tu, Yesus pi ka daera dekat kota Tirus deng kota Sidon. 22Tarus, ada parampuang Kanaan satu dari daera situ datang bataria par Yesus kata, “Sio Bapa, Raja Daud pung Turunang e, kasi unju Bapa pung hati bae par beta jua! Beta pung ana parampuang ada takanal deng paleng sangsara.”
23Mar Yesus seng jawab apapa. Tarus, Antua pung murid-murid datang par Antua la bilang kata, “Tuang Guru e, suru dia pi jua, tagal dia tinggal kong iko katong bataria-bataria.”
24La Antua bilang kata, “Beta dapa utus cuma par orang Israel yang su bale balakang dari Allah. Dong tu sama deng domba yang ilang jalang.”
25Mar parampuang tu datang tikang lutu di muka Antua la bilang kata, “Sio Bapa e, tolong beta jua!”
26Mar Antua bilang par dia kata, “Seng pantas ambe anana pung makanang la lempar akang par anjing.”
27Dia bilang par Antua, “Batul Bapa. Mar anjing-anjing di bawa meja jua makang ampas-ampas makanang yang jatu dari akang pung tuang pung meja.”
28La Antua bilang par dia kata, “Mama e, mama paleng parcaya Beta. Tagal itu, apa yang mama minta tu su jadi.” Oras itu jua, dia pung ana tu bae.
Yesus kasi bae orang-orang saki
15:29-31
29Abis itu, Yesus pi dari daera tu la bajalang iko pinggir dano Galilea la nai gunung satu la dudu di situ. 30Tarus, orang banya kawang-kawang datang par Antua bawa orang lumpu, orang tempang, orang buta, orang bisu, deng orang-orang yang saki laeng lai. Dong taru orang-orang saki tu di muka Antua la Antua kasi bae dong. 31Waktu orang banya tu lia orang bisu bisa bicara, orang tempang bae, orang lumpu bisa bajalang, deng orang buta dapa lia, dong taherang-herang paskali la puji-puji Allah yang dong orang Israel somba.
Yesus kasi makang labe dari ampa ribu orang
15:32-39
(Markus 8:1-10)
32Tarus, Yesus panggel Antua pung murid-murid la bilang par dong kata, “Beta rasa kasiang lia orang banya ni. Dong su iko Beta tiga hari sepe-sepe baru dong jua seng ada pung makanang lai. Beta seng mau suru dong pulang lapar-lapar, nanti saparu smaput di jalang.”
33La Antua pung murid-murid tanya Antua kata, “Tuang Guru e, tampa ni jau dari kampong, jadi katong mau dapa roti banya par kasi makang orang banya kawang-kawang ni dari mana?”
34Antua bale tanya dong kata, “Kamong pung roti ada barapa?”
La dong jawab Antua kata, “Ada tuju bua deng ikang kacil babarapa ekor lai Tuang Guru.”
35La Antua suru orang banya tu dudu di tana. 36Abis itu, Antua ambe roti tuju bua deng ikang-ikang tu la sombayang minta dangke dari Allah. Tarus, Antua pata-pata akang la kasi akang par Antua pung murid-murid la dong bage akang par orang banya tu makang. 37Samua orang makang sampe kanyang. Abis itu, Antua pung murid-murid kumpul panggal-panggal roti deng ikang sisa. Samua ada tuju bakol pono-pono. 38Orang banya yang makang tu, kalo rekeng laki-laki sa, ada ampa ribu orang. Itu jua balong rekeng parampuang deng anana.
39Abis makang, Antua suru dong samua pi dari situ. La Antua deng Antua pung murid-murid nai parau la balayar ka daera Magadan.
Currently Selected:
Matius 15: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku