Matius 11
11
1Abis Yesus ajar Antua pung murid sapulu dua orang tu, Antua pi dari situ ka kota-kota di propinsi Galilea par kasi balajar deng kasi tau Kabar Bae par orang-orang.
Yesus deng Yohanis Tukang Baptis tu sapa
11:2-19
(Lukas 7:18-35)
2Waktu itu, Yohanis Tukang Baptis ada dalang bui. Waktu dia dengar soal samua yang Kristus biking, 3dia suru dia pung murid-murid pi tanya Yesus kata, “Bapa ni Orang yang Allah su janji mau datang tu? Ka katong musti tunggu orang laeng lai?”
4La Yesus bilang par dong kata, “Pi la bilang par Yohanis soal samua hal yang kamong su lia deng dengar. 5Kamong su lia orang buta dapa lia, orang lumpu bajalang, orang lepra bae, orang tuli dengar, orang mati dapa kasi hidop kombali, deng orang-orang kasiang su dapa kasi tau Kabar Bae.#Yesaya 35:5-6, 61:1 6La sapa sa yang seng tola Beta, mar tetap parcaya Beta, dia tu paleng baruntung!”
7Waktu Yohanis pung murid-murid tu su pi, Yesus carita soal Yohanis par orang banya kata, “Kamong pi ka padang gurun par lia Yohanis tu par apa? Par lia orang yang macang deng rumpu yang anging tiop kasana-kamari? 8Ka kamong pi par apa? Par lia orang yang bapake bagus? Seng! Orang yang bapake bagus tu pung tampa dalang raja pung istana. 9Jadi kamong pi par apa? Par lia Allah pung juru bicara? Batul! Dengar Beta bilang par kamong, Yohanis tu labe basar lai dari Allah pung juru bicara yang laeng. 10Barang soal dia, Allah pung Tulisang ada bilang kata,
‘Lia! Beta nanti kiring Beta pung utusang datang kamuka Ale.
Dia nanti kasi siap jalang par Ale.’#Malaki 3:1
11Dengar bae-bae tagal apa yang Beta bilang ni batul! Dari samua orang yang parampuang kasi lahir di dunya ni, seng ada satu orang lai yang labe basar dari Yohanis Tukang Baptis tu. Mar sakarang waktu Allah pegang parenta jadi Raja, dari Antua pung orang-orang, orang yang seng pung arti apapa labe basar dari dia. 12Mulai dari Yohanis Tukang Baptis tu kasi tau soal Allah pegang parenta jadi Raja, sampe oras ni ada orang-orang yang usaha deng kakarasang par pele orang-orang par jang parcaya Allah. La dong yang usaha tu coba par pegang kuasa par orang-orang yang parcaya Allah. 13Mulai dari dolo sampe Yohanis datang, Allah pung juru-juru bicara pung tulisang deng Kitab Torat samua su bilang soal apa yang nanti jadi.#Lukas 16:16 14Akang bilang kalo Allah pung Juru Bicara Elia nanti datang kombali. Jadi biar kata kamong mau parcaya apa yang akang bilang ka seng, Yohanis tu Elia yang Allah janji tu.#Malaki 4:5; Matius 17:10-13; Markus 9:11-13 15Sapa ada pung talingang, dengar apa yang Beta bilang tu bae-bae!”
16La Yesus bale bilang lai kata, “Beta mau kasi sama orang-orang yang hidop jamang sakarang ni deng apa e? Dong macang deng anana yang dudu di pasar yang bilang par anana yang laeng kata,
17‘Katong su tiop suling par kamong,
mar kamong seng manari.
Katong su manyanyi lagu orang mati,
mar kamong seng marata.’
18Kamong macang deng anana tu, tagal kalo orang seng iko kamong pung mau, kamong mara. Barang, waktu Yohanis Tukang Baptis datang, dia seng makang roti deng seng minong anggor la orang-orang bilang kata, ‘Dia takanal.’ 19La sakarang, Ana Manusia ni su datang. Beta makang deng minong la orang-orang bilang kata, ‘Lia tu! Dia galojo deng pamabo. Dia batamang deng tukang tagi pajak deng orang bardosa laeng lai.’ Mar biar kata kamong seng tarima apa yang Beta deng Yohanis bilang, kamong nanti tau kalo apa yang katong ajar tu memang batul dari Allah. Kamong nanti tau itu dari orang-orang yang iko akang pung cara hidop.”
Yesus tagor orang-orang yang seng mau parcaya Antua
11:20-24
(Lukas 10:13-15)
20Tarus, Yesus tagor orang-orang di kota-kota yang Antua su biking tanda herang banya di situ, tagal dong seng mau kasi tinggal dong pung dosa-dosa. 21Antua bilang kata, “Cilaka kamong yang tinggal di kota Korasim deng Betsaida! Biar kata Beta su biking tanda-tanda herang par kamong, mar kamong seng kasi tinggal kamong pung dosa-dosa. Kalo dolo orang-orang di kota Sidon deng Tirus lia tanda-tanda herang tu, biar kata dong seng kanal Allah lai, dong pasti su salele kaeng busu-busu deng taru abu di kapala par jadi tanda kalo dong su kasi tinggal dong pung dosa-dosa.#Yesaya 23:1-18; Yeheskel 26:1—28:26; Yoel 3:4-8; Nasehat-Nasehat 1:9-10; Sakaria 9:2-4 22Mar dengar Beta bilang par kamong! Nanti waktu Allah putus manusia di dunya pung parkara, kamong pung hukumang labe barát lai dari kota Tirus deng Sidon pung hukumang.
23La kamong yang tinggal di kota Kapernaum! Kamong kira kamong nanti dapa angka tinggi-tinggi sampe ka langit? Seng! Kamong nanti dapa buang sampe ka orang mati pung tampa. Kalo dolo orang-orang yang tinggal di kota Sodom lia tanda-tanda herang yang Beta biking par kamong, dong pasti su kasi tinggal dong pung dosa-dosa la deng bagitu mangkali kota tu masi ada sampe sakarang ni.#Carita Mula-Mula 19:24-28; Yesaya 14:13-15 24Mar dengar Beta bilang par kamong! Nanti waktu Allah putus manusia di dunya pung parkara, kamong pung hukumang labe barát lai dari kota Sodom pung hukumang.”#Matius 10:15; Lukas 10:12
Datang par Yesus biar katong pung hati tenang
11:25-30
(Lukas 10:21-22)
25Oras itu jua Yesus bilang kata, “Bapa, Tuhan yang pung kuasa par samua yang ada di sorga deng di dunya. Beta minta dangke dari Bapa tagal Bapa tutu samua tu dari orang-orang yang pintar deng yang pung pikirang tajang, mar Bapa buka akang par orang-orang yang seng pung arti apapa macang deng ana kacil. 26Barang, itu biking Bapa pung hati sanang.”
27Abis sombayang, Yesus bilang par orang-orang di situ kata, “Beta pung Bapa su kasi samua-samua par Beta. Seng satu orang lai yang kanal Beta, Antua pung Ana ni, cuma Beta pung Bapa sa. Deng seng satu orang lai yang kanal Beta pung Bapa, cuma Beta deng orang-orang yang Beta pili par kasi kanal Antua.#Yohanis 1:18, 3:35, 10:15
28Mari datang par Beta, he kamong yang lala deng yang pikol susa barát, la Beta nanti biking kamong pung hati tenang. 29Iko Beta pung ajarang la balajar dari Beta, tagal Beta pung hati paleng bae deng randa hati, deng kalo kamong iko Beta, kamong pung hati jadi tenang.#Yeremia 6:16 30Barang, Beta pung ajarang tu seng susa, deng Beta pung parenta tu seng barát.”
Currently Selected:
Matius 11: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku