Matius 10
10
Yesus kasi kuasa par Antua pung murid sapulu dua orang
10:1-5
(Markus 3:13-19; Lukas 6:12-16)
1Satu kali bagini, Yesus panggel Antua pung murid sapulu dua orang la kasi kuasa par dong par user setang-setang, kasi bae orang-orang dari sagala macang panyaki, deng kasi bae orang-orang cacat. 2Antua pung sapulu dua utusang tu nama: Partama, Simon yang Antua panggel par Petrus, abis itu Simon pung sudara Andarias. Tarus, Yakobis deng Yohanis. Dong dua ni Sebedeus pung anana. 3Tarus, Filipus, Bartolomeus, Tomas, Matius tukang tagi pajak, Yakobis yang pung bapa par Alpeus, Tadeus, 4Simon dari kalompok Selot,#10:4 Kalompok Selot tu satu kalompok orang Yahudi yang usaha par kasi bebas bangsa Yahudi dari pemerinta Roma. deng Yudas Iskariot#10:4 Yudas Iskariot tu pung arti, ‘Yudas dari kampong Kariot’. yang jual Antua.
Yesus utus Antua pung murid-murid
10:5-15
(Markus 6:6b-13; Lukas 9:1-6)
5Yesus utus Antua pung murid sapulu dua orang tu par pi kasi tau Kabar Bae. Antua kasi pasáng par dong kata, “Jang kamong pi par bangsa laeng ka maso di orang Samaria pung kota-kota. 6Mar, pi par orang Israel yang su bale balakang dari Allah. Dong tu macang deng domba yang ilang jalang. 7Pi la kasi tau par dong, ‘Seng lama lai Allah pegang parenta jadi Raja.’ 8Kasi bae orang-orang saki, kasi hidop orang-orang mati, kasi bae orang-orang lepra, deng user setang-setang. Kamong su tarima kuasa dari Allah deng cuma-cuma par biking itu, jadi pake akang deng cuma-cuma lai par tolong orang laeng.
9Jang bawa kepeng mas ka, perak ka, tambaga ka dalang kamong pung tali kaeng. 10Jang bawa tas, baju ganti, deng sandal ka tongka lai, tagal orang yang karja par Tuhan tu pantas par dapa apa yang dia parlu dari orang yang tarima dia.
11Kalo kamong maso ka kota ka kampong satu, cari orang yang mau tarima kamong manumpang di dia pung ruma la tinggal deng dia sampe kamong kaluar dari tampa tu. 12Waktu kamong maso ka orang pung ruma, minta biar Allah kasi dame par dong. 13Kalo dong tarima kamong deng bae, berkat tu akang turung par dong. Mar kalo dong seng tarima kamong, berkat tu akang bale par kamong sandiri. 14Kalo kamong sampe di tampa satu la ada orang yang seng mau tarima kamong ka dengar kamong pung ajarang, pi kasi tinggal dong pung ruma ka kota tu la kabas abu dari kamong pung kaki par jadi tanda par dong kalo Allah nanti seng tarima dong.#Utusang pung Carita 13:51 15Dengar bae-bae tagal apa yang Beta bilang ni batul! Nanti waktu Allah putus manusia di dunya pung parkara, kota tu pung hukumang labe barát lai dari kota Sodom deng Gomora pung hukumang.”#Lukas 10:4-12#Carita Mula-Mula 19:24-28; Matius 11:24
Yesus kasi tau Antua pung murid-murid kalo dong nanti susa deng sangsara
10:16-25
(Markus 13:9-13; Lukas 21:12-19)
16Yesus bilang lai par dong, “Dengar! Beta utus kamong pi ka tenga-tenga orang jahat, macang deng domba pi ka tenga-tenga anjing utang. Tagal itu, kamong pung akal musti panjang macang deng ular deng pung hati barsi macang deng burung pombo.#Lukas 10:3
17Jadi ati-ati tagal nanti ada orang yang bawa kamong ka muka orang Yahudi pung Pamimping-pamimping Sidang la kamong nanti dapa cambok di dong pung tampa-tampa sombayang. 18La tagal kamong iko Beta, kamong nanti dapa bawa ka muka gubernur-gubernur deng raja-raja. Mar, itu tu waktu yang bae par kamong par kasi tau Kabar Bae soal Beta par dong deng orang-orang bukang Yahudi. 19Waktu kamong dapa tahang par dapa sidang, jang balisa soal bagemana deng apa yang kamong musti bilang. Oras itu jua, kamong nanti dapa kata-kata yang kamong musti bilang, 20tagal bukang kamong sandiri yang bicara, mar kamong pung Bapa pung Roh yang bicara lewat kamong.
21Nanti ada orang kasi dia pung sudara par dapa bunu. Bagitu jua bapa-bapa par dong pung ana. Anana jua nanti malawang dong pung orang tatua deng kasi dong par dapa bunu. 22Samua orang nanti binci kamong tagal kamong iko Beta. Mar, sapa yang sampe mati batahang tarus par parcaya Beta, dia nanti salamat.#Matius 24:9, 13 23Kalo kamong dapa siksa di kota satu, lari ka kota laeng. Dengar bae-bae tagal apa yang Beta bilang ni batul! Kamong balong abis pi ka samua kota di Israel lai, Beta Ana Manusia ni su bale ka dunya kombali.
24Ana murid seng bisa labe basar dari dia pung guru, ka jongos seng bisa labe basar dari dia pung bos.#Lukas 6:40; Yohanis 13:16, 15:20 25Su bae jua kalo murid dapa apa yang sama macang deng dia pung guru deng jongos dapa apa yang sama macang deng dia pung bos. Beta ni macang deng kapala kaluarga la kamong tu macang deng Beta pung anana. Jadi kalo Beta su dapa panggel par Beelsebul, apalai kamong?”#Matius 9:34, 12:24; Markus 3:22; Lukas 11:15
Jang taku orang-orang yang biking susa kamong
10:26-33
(Lukas 12:2-9)
26“Jadi, jang kamong taku orang-orang yang nanti siksa kamong. Barang, seng ada apapa satu yang tatutu mati yang nanti seng bisa dapa lia, deng seng ada apapa satu yang tasambunyi yang nanti seng bisa dapa tau.#Markus 4:22; Lukas 8:17 27Apa yang Beta bilang sambunyi-sambunyi par kamong, pi kasi tau akang tarang-tarang par orang-orang. La apa yang Beta bisi-bisi par kamong, pi tabaos akang biar samua orang dengar. 28Jang taku deng orang-orang yang bisa bunu kamong pung badang, mar seng bisa kasi binasa kamong pung nyawa. Mar kamong musti taku Antua yang bisa kasi binasa kamong pung badang deng nyawa dalang naraka. 29Kamong tau kalo burung cui pung harga paleng mura paskali to? Dua ekor cuma satu kepeng gobang sa. Mar biar kata bagitu, seng ada satu ekor lai yang bisa mati kalo itu bukang kamong pung Bapa pung mau. 30Bagitu lai deng kamong. Antua tau kamong luar-dalang. Kamong pung rambu di kapala jua Antua tau akang ada barapa banya. 31Jadi jang taku, tagal par Antua, kamong tu labe panting dari burung-burung cui tu.
32Sapa yang mangaku di muka manusia kalo dia parcaya Beta, Beta jua nanti mangaku di muka Beta pung Bapa yang ada di sorga kalo dia tu Beta pung orang. 33Mar sapa yang manyangkal di muka manusia kalo dia seng parcaya Beta, Beta jua nanti manyangkal di muka Beta pung Bapa di sorga kalo dia tu bukang Beta pung orang.”#2 Timotius 2:12
Yesus pung ajarang biking orang baku malawang
10:34-39
(Lukas 12:51-53, 14:26-27)
34Yesus bilang lai par Antua pung murid-murid kata, “Jang sangka kata Beta datang par bawa dame di dunya ni. Beta datang bukang par bawa dame, mar par biking kaco basar. 35Barang, Beta datang par biking ana laki-laki malawang dia pung bapa, ana parampuang malawang dia pung mama, deng ana mantu parampuang malawang dia pung mama mantu. 36La nanti yang jadi orang pung musu tu, orang-orang yang ada dalang dia pung kaluarga sandiri.#Mika 7:6; Lukas 12:51-53
37Sapa yang sayang dia pung mama ka papa labe dari Beta, dia seng pantas par iko Beta. Deng sapa yang sayang dia pung ana laki-laki ka parampuang labe dari Beta, dia seng pantas par iko Beta. 38Sapa yang seng mau tanggong susa deng sangsara, mala seng siap mati tagal iko Beta, dia seng pantas par iko Beta. Itu sama deng dia seng mau pikol dia pung salib.#Lukas 14:26-27 39Sapa yang usaha par kasi salamat dia pung diri, dia nanti seng bisa hidop tarus-tarus deng Allah. Mar sapa yang siap mati tagal iko Beta, dia nanti hidop tarus-tarus deng Allah.”#Matius 16:24-25; Markus 8:34-35; Lukas 9:23-24#Lukas 17:33; Yohanis 12:25
Allah nanti balas sapa yang tarima orang yang karja par Antua
10:40—11:1
(Markus 9:41)
40Yesus bilang lai, “Sapa yang tarima kamong, itu dia su tarima Beta. La sapa yang tarima Beta, itu dia su tarima Allah yang utus Beta.#Markus 9:37; Lukas 9:48, 10:16; Yohanis 13:20 41Sapa yang tarima Allah pung juru bicara tagal dia tau kalo itu Allah pung juru bicara, dia nanti tarima bagiang yang sama macang deng bagiang yang Allah kasi par Antua pung juru bicara. Deng sapa yang tarima orang yang hidop batul di muka Allah tagal dia tau kalo itu orang yang hidop batul di muka Allah, dia nanti tarima bagiang yang sama macang deng bagiang yang Allah kasi par orang yang hidop batul di muka Antua. 42Dengar bae-bae tagal apa yang Beta bilang ni batul! Sapa yang tolong orang yang seng pung arti apapa yang iko Beta, biar kata cuma kasi aer puti satu galas sa, Allah pasti nanti balas dia pung bae tu.”#Markus 9:41
Currently Selected:
Matius 10: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku