Maleakhi Uram 4
4
Er Iya Erebdobnyi yuryankwande uki berekwande tum aryi kunubkwande uram deyok
4:1-6
1Er Imtamnyi bira imtam yin doun nang sienyi biryi ato ebmou, “Ninyi wenen uki tum berekwande ara diba ati, uk buk lengkerengnande to kubkwande uki tum berekwande. A uki tum ara sun alyi kanya bona kum nang nirya ab, malyi dinyi akwe kuramingnyi nang ab nirya ara uk yaliboka yibkwande. Ara, ina ulungka yalibde yirande to kuboka yaliboka yibkwande. A uki tum aryi uk yalibde yirande to kubci ba, sun deyok sasa ababyi ton tanglona kum kubkwande. Ani, te kusakdoba ababyi ton tanglona kum kubkwande. 2Bok, sunci Ni si asi ilil teneranurum nang ara sunti dib berengna milil urukwansir. Ani, Ni taruk ara sun u yiransica kweten dinyi kibkwansir. Ba, sunci anaboka baitam yibimunci, sun kanya karyi aryi merebkwandum. Ara, bisam si sapi mi asi ai umbura aryi bublan kukeibingnyi ba, baitam im sung-im sung eboka mererorande to kubkwandum. 3Ba, Niryi kiknibdeibkwan uki tum aryi sunci sun yu dinyi akwe kuramingnyi nang asi yan yanisitabkwandum. Ba, a nang ara sun yan tang amwetam asi sici borbosa dumnande ato kubdeibkwandum,” ebmou. 4Ura, ton ato ebmou, “Nira Imtamnyi biryi minob mutuk si Horeb aryi, ‘Ato kubdarur, ato kuna mem,’ en uram kareansise asi sunci diboka kunubde bindarur. Niryi sun Israel nang nirya ati, Ni wa irmiliranounyi Musa deici aryi wenen uram ab arungna uram ab ebdeianse dinyi asi kanya teneibdenkwandarur. 5Sun dibde bukdarur. Niryi Ni uram ermururamunyi nabi Elia bitonyi bokdonoknyi ba, sun dam yankwande. Ara, Ni Iya Erebdobnyi biryi weik wenen dinyi weneryankwan uki tum, ara ilil weik tenen uki tum kum berekde bok, Niryi Elia bitonyi sundam bokdonokwan.#Mat. 11:14; 17:10-13; Mrk. 9:11-13; Luk. 1:17; Yoh. 1:21 6Ba, erci yandoka antanibdeibci ba, sun nai yabwe ab, sun mabwe ab aryi yu uram tuba kum ebdankwaming. Eda, sun ninyi wise nang ara sun mabwe nermabwe asi boukwe kiboka sun kanya deibkwaming. Ba, sun mabwe aryi sun nai yabwe asi kanya deibkwaming. Ati, Israel nang sunda Ni uram diboka kekebdarur. Kum kekebmunyi asi, Nira Imtamnyi yandoka Israel mutuk kundarur nang nirya obkiribsinyi ba, kum dansekmunyei,” eboka Er Imtamnyi biryi ebmou.
Currently Selected:
Maleakhi Uram 4: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)