Maleakhi Uram 3
3
1Er Iya Erebdobnyi, imtam yin doun nang sienyi biryi ato ebmou, “Dirandarur. Nira Iya Erebdobnyi biryi ninyi tentok Ni uram eryuryangananyi si malaikat bisi bokeibnyi ba, Erci Ni urasin dam bisik u dikum yabdeibkwansir ba, ninyi ilinto aryi sun kanya dam aryi danguboka Nira Iya Erebdobnyi bisi kibdobkwaning. Ani, Sun Du Iya Erebdobnyi bira sun ingkiringdarurnyi bira lukdandoka Er Imtamnyi ai Er dama deirirban ai wengyankwande. Anyi bira Ni diboka kunubdeibkwan dinyi lak erbananyi bisi sunci dibde buramun ba, sun dam yankwansir.#Mat. 11:10; Mrk. 1:2; Luk. 1:76; 7:27 2Er a yankwande uki tum ara weik wenen uki tum kubkwande ati, ninyi nirya ara ilil weik dobkwaming. Unanyi-unaner aryi a wenena urasintam aryi darabdongoboka tikwande do? Ninyi tentok ababyi ilil kuna kum uca katabum eboka kum tikwande. Anyi bira malyi kun dinyi nirya wenebkwande ati ebman. Ara, anyi bira perak uk dabokabingiryi, bitaboka kikniraming nang atonyi kibkwande. Erci perak teleb dinyi bol deici asi malyi dinyi duanci ura, uk daboka perak teleb dinyi uk yibman kum dinyi asi wiboka doraming to kubkwande. Tonda, sabun aryi me ilingnaming atonyi kibdiryi, erci utotoa nining dinyi nirya asi kilibokabdiryi, bai donokwande.#Why. 6:17 3Er yankwande ara Lewi yala nang asi sun malyi deyok lilibdeibkwande ati yankwande. Erci bukoka sun malyi deyok lilibkwande ara sun dengna weik keil emas ab perak kiknin nang aryi uk daboka bitaraming to kubkwande ati yankwande. Erci Lewi yala nang asi sun kanyatam asi diboka diblilibdenkwande. Sirya diblilibdeci ura, wibokabdiryi Lewi yala nang malyi kanya bon nang deici ara bai donokwande. Ato kuboka Ni Iya Erebdobnyi biryi bokdonokwananyi biryi sun Lewi yala nang asi wibdeibkwande. Ba, sunci diboka telebto kuboka Er Iya Erebdobnyi biti dama deiboka uk dabkwaming nang kubkwaming. 4Ba, a talak ara Yehuda mutuk nang ab, Yerusalem atei nang ab aryi sun dama deirin dinyi ara tamuboka Er Iya Erebdobnyi kanya teleb kubdeibkwaming. Ara, minob mabisibde yaubwe uki ab, sirya minob kubde yaubwe kwalina aryi kuramnyi to tamuboka kubkwaming.
5Ni Iya Erebdobnyi sun dam yankwan ara Ni Imtamnyi bisi ilil kuna kum nang asi wenebkwansin ati yankwan. Ani, ola nun aryi, ninyi kir don nang ab, talyi yordan ner sal ab, tola ati tatab-tatab en uram en nang ab asi deyok liliboka bingnanyi kibkwan ati yankwan. Ani, sun wa irmilin nang asi sun wa iramingnyi to kikliman karena kum kuramingnyi nang ab, sulyi nerabwe ab, kwaknamna mabwe nermabwe asi mambul wa kareramingnyi nang ab, ninyi atei nang asi kisirdonongnamingnyi nang ab asi Niryi sun deyok liliboka wenenanyi kibkwan ati yankwan,” ato eboka Er Imtamnyi, imtam yin doun nang sienyi biryi ebmou.
“Er Imtamnyi biti kanya teneiboka yuma ko deirin dinyi ab, yuma yuboka don dinyi ab asi, Er ai wa ina ati kunusa dona kum uca karebdarur,” en uram deyok
3:6-12
6“Diba, Ni Iya Erebdobnyi Iya Kam Kununyi bira dangum ena kumnyi kunun. A deyok aryi sun Yakub biryi deibdoba nang ara kum danardeina kum kubde yangasunun. 7Minob sun abwe yabwe aryi kuramnyi to sunbabyi Niryi lilirdeirin uram ebdeianse asi talernuruna kum kundarurci dangbisindarur. Ati, tamuboka Nisi yandobdarur ba, Nibabyi tamuboka sunsi yankwan ati esunun. Bok, sunci ato endarur, ‘Kan dam tamuboka yangana ara una kuboka yankwanub do?’ enindarur. 8Sun ninyi aryi Ni Imtamnyi biti sun dama deibmanindate dinyi asi dobde yina ara kikiman do? Ara, ukubman kum. Asi, sunda Israel nang aryi Nisi karebmanumun cok, dobde yirandum. Ato kundarurcok, sunci ato endarur, ‘Nunci, Kan dinyi ara dantam dobde yikunub do?’ enindarur. Ara, Niryi, ‘Ukutotoa yongoboka kirdeirin dinyi asi ol takubaryi bokeiboka, sunci ol tentok asi doboka Nisi kareboka dama deibnindarur,’ eansise. Ato eansise bok, sunci kum karenindarur. Ara, sunci Ni dinyi asi ukula dobde yindarur ati ebman. Tonda, Niryi sunti, ‘Yuk dinyi-yuk dinyi dama deibnindarur,’ eansise bok, sunci Nisi dama kum deirinindarur ati ebmasin. 9Sun Israel mutuk kun nang nirya aryi Ni dinyi asi ukula dobde yindarur deyok aryi Nira Imtamnyi biryi sun nirya sumna dinyi karesunun. 10Sunci Nira Imtamnyi biti, ‘Nun Nai,’ tenen yuma yongoboka kibdeibmamunyi dinyi boboka Niti tenen deirin ai dam deiriryandarur. Ba, Ni ai dam ara yina dinyi ara tuba kuna teleb. Ura, sunci Nisi ukubdenindarur, Niryi im bublan kukeiboka sunsi kisal dangna dinyi langdiboka karebkwansin kum, kum karebkwansin kum? 11Sunci Niti, ‘Nun Nai,’ tenen dama teleb dinyi tamuboka deibmunyi ba, Niryi sun koubdoba yirande kwising ara yakdonokwan ba, sun koubdoba asi tuba kum yibkwande. Ani, sun co anggur ababyi diboka moubdeibkwansin. 12Ba, sunda teleb akwe kuboka sun mutuk kubkwandum. Ba, sun im dangna tukwe dangna mutuk atei nang aryi sunsi, ‘Er Imtamnyi biryi kisal dangdur atei nang,’ ebkwansing,” ato eboka Er Imtamnyi, imtam yin doun nang sienyi biryi ebmou.
Teleb kun nang ara Er Iya Erebdobnyi biryi boukwe kimdur uram deyok
3:13-18
13Er Iya Erebdobnyi biryi ato ebmou, “Se, Ni deyok ati uram enmamunyi ura, Ni si asi malyi kiminingnindarur cok, sunci ato endarur. ‘Kum, nun mamun uram erdanmabyi ara Kan deyok ara una eboka malyi uram ekunub do?’ enindarur. 14Sunda ton ato endarur, ‘Nun buluboka wengnub ai aryi Er Imtamnyi bisi si weik eboka molona ara talyitam molonub. Nunci Er Imtamnyi urasintam aryi Erci arungdeirisin uram kunubkwamatibyi ara unato ati kunubkwamatibyi da? Ani, Er urasin dam asi, “Nun malyi kuboubwe,” tenen aling kolo kalubkwamatibyi ara una kubkwamasute ati kubkwamatibyi do?’ endarur. 15Ato eabmuncok, sunci ton ato erandum, ‘Nunci diramiba ara, sun malyi kun dinyi ukuraming nang ara teleb akwe kuroraming asi eiriramib. Ani, sun yu dinyi ukuraming nang ara, ur mangkau akwe kum kuraming. Eda, sunci yu dinyi weik kubtabakoka Er Imtamnyi bisi dumdenung ababyi orminingna dinyi sun dam ton kum yangarur. Sun dam ara leimdoninto kurur asi eirinub,’ endarur,” eboka Er Imtamnyi biryi sun Israel yala nang asi wenebmou. 16Ura, sun Israel nang kankan aryi Er Iya Erebdobnyi bisi ilil teneramnyi nang ara Er Imtamnyi biryi wenena uram kekebmai. Ura, sun mamun tonyi biryi ton yuknyi bisi uram ebdanmai, “Nunda Er Imtamnyi uram diboka kekeboka kunubde binkwayeb,” ebdanmai. Ato ebdanmai ba, Er Iya Erebdobnyi bira sunsi dibniliboka sun molona kekebmou. Ani, Er Iya Erebdobnyi bisi ilil tenen nang ara Er Imtamnyi urasintam buluboka sun si yuk-yuk kerek sekoka tuba kanya teneirden kerek sengna umbura sekdongobdanmai. 17Sun a nang ara Er Imtamnyi bisi tanglona kum uca miliramnyi nang ati Er Iya Erebdobnyi biryi ato erur. “Niryi kiknibdeibse wenen uki tum berekci ura, Niryi sunda Ni mabwe nermabwe kibdeibkwan. Niryi sunsi boukwe kibkwan ara er mi aryi er nai uram kekeboka kunuranci mabwe asi sun nai yabwe aryi kanya deiriraming to, Nibabyi neiktoto sunsi kanya deibkwan. 18Ba, Er Imtamnyi biryi diba ati sun Er urasintam aryi teleb kun nang asi kisal dakwande ati sunci asing eibkwandum. Ani, Erci sun malyi kun nang asi diboka wenebkwande asi asing eibkwandum. Ara, Er Imtamnyi bisi si weik en nang doron dinyi yukto kurur. Ba, Er Imtamnyi bisi si weik eboka molona kum nang kamuk yukto kurur ara sunci tamuboka asing eibkwandum,” ebmou.
Currently Selected:
Maleakhi Uram 3: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)