Ruta 3
3
Ruta i Boasa koni au lalaeapaki uvi leia
1La hoa areve vila ve lou Naomi arero maeape, “Arave mari e, veveke maria, ara ave aeaki uvi ae haropakilai, ehovea aro o iele lei veveki leikive ha? 2Boasa elaila ve apavara ka ha? A areve horova marita koarai laila la haela? Eavaki, are ma oroa barley au lalaeapaki uvi leia, barley hae lalaeapakilai. 3A mi hukai muo veveke muramura maea haririkive, ave maea pura mekaka oreai koni lalaeapaki uvi leia hoaukive; aka areve eapai i ma ila larive la hoa, a areve oropa ve hihika lei va ka. 4Aka are uavaki la hoa hoai areve loa ve la pura helauka leia uavakive; ave leiki eharu ae are havahu aro maeakilai.”
5Are kavale maeape, “A lakimaeaila eharu oaria ara leivahaeakilai.”
6Laelave Ruta koni lalaeapaki uvi hoai areve vila ve lou arero maeape eharu oaria hovea hovea leivahaeape. 7Boasa eapai i ma ila lala ikiveveke leipe la hoa, are iki barley hae korukaiape ita maeamaea uavape. La hoa Ruta hahari hahari iki areve loa hahape la pura helauka leia uavape. 8Oroa a hihi la haela ovokake lei maea helari eavape, uamari ae areve loa ipi ve uavape! 9Are maeape, “A va leita ha?” Are kavale maeape, “Ara ave horova mari Ruta: ave hopa ve la pura ila ave horova mari ve akea ve kokaukakive, ehovea a arave apavara.”
10La haela maeape, “Iehova aro lei morapaeaki, arave mari e; ave oropa leipe ikiheroe veveke, aka ma hoa ave ikiheroe veveke iele, ehovea a va harokou haela, merava aka erohoho ila, ikivere au leivahaeaila. 11Ma hoa, arave mari e, a oaoka kalailue, a va ikivere eharu oaria ara leivahaeakilai, ehovea arave karikara haela oaria ore, a va uamari mekakure. 12O iele, ara ave lalava haela, aka ave lalava haela ae le aeave, ara areve aire ve. 13Ma oroa a v'aeaki, kai opoa vevelare, la haela ae aro apavara mai hovea leikive ikivere la laikilava, veveke, are laria leikilai, heroe; aka are aro apavara mai hovea leikive ikivere leiki aue la leikilava, la hoa, Iehova oropa ve, ara a v'ila apavara mai hovea leikilai. A uavakive aiai vevelare hoa.”
14Laelave are areve loa ipi ve uavape aiai vevelare hoa, aka are vevelare havahu elavelave uroupe, haela ae hihika eava va ka la hoa, haela ae arero eavi ore leiki ave; Boasa kai maeape, “Ma uamari koni lalaeapaki uvi leikila haela ore lei v'arekaea.” 15Boasa kai maeape, “A v'oreauki la maea pura avi hururukive.”
Laelave are arero hururukape kai Boasa barley hiru aukava ila ihova lei arero aiarape, la hoa uamari karikara araeape.
16Are areve vila ve lou leia hoaupe la hoa, la lou arero velavela leipe maria, “A va learia ha, arave mari e?”
La hoa are la haela are v'ila leivahaeape la mai oaria maeaeape, 17kai mariape, “Ma barley hiru aukava ila are araro aikiarape, ehovea are mariape, ‘A ave vila ve lou ve leia maea ka hoau v'arekaea.’ ”
18La lou kavale maeape, “Aupava, arave mari e, aiai a ma eharu learia lei ore leikilai, ehovea la haela iki paraea va ka, aka ma hare o iele leikilai.”
Currently Selected:
Ruta 3: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972