Ruta 2
2
Ruta, Boasa ve koni oru ureve koni hae ikaeape
1Naomi ve apavara aea, areve vila ve apavara, erohoho haela, Elimeleka ve lalava haela ae, rare Boasa. 2Moaba uamari Ruta Naomi maeape, “Ara va barley oru leia araeakive, heroe, ehovea araro ikivere leikive la haela airekai ai barley hae ikaeakive.”
Are arero maeape, “Aula, arave mari e.”
3Laelave are oru araeai barley hae haerapaki haela airekai aupe, kai elare barley hae kepea ikaeape; are araeape ita va Elimeleka ve lalava haela, Boasa, ve oru ita. 4Iapai, Boasa Betelehema ve leia ve kihoaupe; are hae hovare haerapaki haela maeaeape, “Iehova e i hareho aeaki!”
Ere arero kai kavale maeape, “Iehova aro lei morapaeaki!”
5La hoa Boasa hae haerapaki haela ve kiva horova leiki haela maeape, “Maia leita ve mari?”
6Hae haerapaki haela ve kiva horova haela maeape, “La va Moaba ita ve Naomi koarai kihoaupe la Moaba mari. 7Are lakimaeaila, ‘Ikiheroe hela, ara va hae haerapaki haela aire ai elare hae ikaeakive, heroe ha?’ Laelave, are kihoai hare heaikiapo, mea opaki hoa ikiki ma hoa, are horova lei lei iki au paraeaila.”
8La hoa Boasa Ruta maeape, “A iapaki, arave mari e, oru aea ikaeakive araea v'arekaea, aeka ma oru hakurepa va ka, aka arave horova marita i hareho aukive. 9Ere hae ikaeaki ureve la oru a ovohae eavaki, kai erero airekai aukive. Ara harokou haela o aheke au maeaeaila ha, ere aro ka hararuarue? A ma karave koa la hoa, a va hoai ma hahu ve leia harokou haela hivape la ma uku larive.”
10La hoa Ruta oropape mea ve ekaopi arero mari maeape, “Ehovealeve ara ave oropa ve lei veveke laleila ha, laelave a araro iki la kekelaila, ehovea ara va ita lahua mari ha?”
11Aka Boasa arero kavale maeape, “Ave vila apape la hoa ikiki ma hoa, a ave vila ve lou hukapape eharu oaria, ere araro kileape, aeka a ave oa i lou i elare ita ila haitapape, kai a overa ore au leila haela ve ita ekepe. 12Iehova a leivahaeape horova oaria kavale leikilai, o iele kavale hovea hovea, Iehova, Iseraela ve Aualari avarakilai, a areve maho ureve kavu veveke avakive ekepe la Aualari!”
13La hoa are maeape; “A araro ikiheroe eapapo laleila, arave amua e, ehovea a araro la hakakaeaila, kai a va ave horova mari oharo veveke lamaeaila, ehovea o iele ara ave horova mari aea hovea hiki.”
14Eapai hoa Boasa arero maeape, “Maia ve ekela, pai uku larive, kai ave la pai hakaea uaina ureve paraeakive.”
Laelave are hae haerapaki haela i hareho haiavape, kai are arero a aroaupe barley hai uku aiarape; are la eapai lala eharau le huharape, kai barley hae kepea le apeape. 15Ruta urai barley hai ikaeakive ipopeavape la hoa, Boasa harokou haela maria maeape, “Are au hahaeape barley hahauka ve aru ve ikaeakive, heroe; heroe; arero ka hereavalue. 16Are v'ila hae uku kara hahauka ve leia hareavi naoae haitapakive ehovea are ikaeakive; arero ererea va arekaea.”
17Laelave, are hae ikaeape aiai hailaea hoa; la hoa are ikaeape la hae are au lalaeapai au le koape, are va barley efa haroapo hovea leipe. 18Are arero kaivi karikara ureve araeape; are areve vila ve lou are ikaeape la barley hae aioeape, 19Areve vila ve lou arero maeape, “A mahau hare barley hae lahoa lei kaeaila ha? A horova lahoa laleila ha? Aro auhohi laleila la haela lei morapaeaki.”
Laelave are areve horova leipe la haela ve rare areve vila ve lou kileape maria, “Ara mahau horova i hareho laleila la haela ve rare va Boasa.”
20Naomi areve evera maeape, “Iehova arero lei morapaeaki, ehovea areve ikiheroe ovakake i apihaeape haela ila hahaure au leivahaeaila!” Naomi aeka arero maeape, “La haela va elalilave apavara, elalilave lalava haela ae.”
21Naomi uamari Ruta maeape, “Are aeka araro maeape, ‘A va arave horova marita i hareho aukive, aiai arave hae hovare hoa karia leilai.’ ”.
22Naomi kai areve evera Ruta maeape, “Veveke, arave mari e, a va horova marita i hareho aukilai, oru ae ureve haela aro hararuaki ave.” 23Lealave are Boasa ve horova marita i hareho hae ikaeape, aiai barley i wheat ila ve hae hovare hoa karia leilai; are areve vila ve lou i hareho aeaveape.
Currently Selected:
Ruta 2: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972