Mataibo 12
12
Tami aagai ix tuma idui Suxi Kristo ïmo ibhïxtaragai tasïrï
1Dai bhodïrï ïmo imidagai tïrhigi saagida imïitadai go mamaatïrdami ïmadï Suxi. Ibhïxtaragai tasïrïtadai aidï. Daidi Suxi mamaatïrdamigadï bhiugikoñitugai aidï dai gabainkumaimi tïrhigi mumurdadï daidi kumimi.
2Daidi go fariseos tïï daidi potïtïdai ïgai go Suxi,
—¿Tuixidï gobai ix makïdï gï urabaka ibuayi aaduindagai ix makïdï gïr daidi go Moises xi ibuadagi aatïmï go ibhïxtaragai tasïrï?— itïtïdai go fariseos.
3Daidi Suxi potïtïdai,
—¿Maiti mïx kia nïidi tomarhi ïmo imidagai go ojai xakopïrï aagai ixtumaxi idui go Dabid ïïki? Ami ojiïrï ikaiti sai no imïitadai Dabid ïmadï aaduñdï dai kabami bhiugikoñitugai. 4Daidi bakian dui go Dabid go ikuxi kiupiana xako aajïi Diuxi dai bhïiyi pan Diuxi daxdaradï. Go pan gobai mosïkaxi go dadaxdadami biakana oigaragai xi ugiagi tudu. Dai go Dabid ïmadï aaduñdï uu gobai tomaxi maiti ïr dadaxdadamikatadai ïgai tudu. Podui ïgai dai maiti ïr soimaaxkami gobai— itïtïdai Suxi.
5—¿Dai maiti mïx nïidi ïpï go Moises sïïrhikamigadïrï xako ikaiti sai, go dadaxdadami ibuayi aaduindagai go kiupiana go ibhïxtaragai tasïrï? Dai maiti ïr soimaaxi ibuadami ïgai pobuadatai. 6Daiñi, gaatabuadatai ïgai ami go ibhïxtaragai tasïrï bamioma xadutudai ïgai go gïï kiupai dai go ibhïxtaragai tasai otïrhioma xadutudai ïgai. Maaxiturhi ïgai tudu sai bamioma namïga go gïï kiupai xi bhai go ibhïxtaragai tasai. Dai aanï aagai sai aanï bamioma namïga xi bhai asta go gïï kiupai— itïtïdai Suxi. —Aanï gatïanïi ami tudu dai aagai ixtumaxi gï ibuadagi ami. Kaxkïdï gï maatï sai bamioma namïga aanï xi bhai go ibhïxtaragai tasai ïpï dai aagai aanï ixtumaxi gï ibuadagi ibhïxtaragai tasïrï. Kaxkïdï bia aanï oigaragai xi aatabuadagi go ibhïxtaragai tasïrï tudu— itïtïdai.
7—Daiñi— itïtïdai. —Diuxi ojadïrï ikaiti sai Diuxi ño daidi ikaiti,
—Kïïga ibuayi aapimï xïïxkadï gin mïituldagi aapimï buxtaki ix dukai gatïjai aanï. Ïmo bhai ïrhiaragai gobai gin bïïtarï tudu. Dïï gia aanï aagai sai gïïpi bamioma ïr ïmo bhai ïrhiaragai gin bïïtarï xïïxkadï soi gïn ïrhiadagi aapimï jaa bïïtarï— ikaiti Diuxi ojadïrï.
—Dïï aapimï mai xii kïïga maatï ixtumaxi bhai ïrhidi Diuxi. Ix maatïkamudai aapimï aidï gia soi gïn ïlda nïijadamudai aapimï gin mamaatïrdamiga aidï gia mai bui ñokadamudai aapimï gin gakïrhibakai ïgai lïïchi tïrhigi xibi go ibhïxtaragai tasïrï. 8Aanï ïr otosadï Diuxi ix makïdï ïmo kïïrhi busai dai bia aanï sïïrhikami xi aagadagi ixtumaxi ibuadagi óídakami go ibhïxtaragai tasai. Aanï ïr Tïanïdamigadï go ibhïxtaragai tasai tudu— itïtïdai Suxi go fariseos.
Suxi duadi ïmo kokoadï go ibhïxtaragai tasïrï
9Dai bhodïrï jii Suxi abhiadïrï xako ñokiditadai ïgai go fariseos daidi baa ïgai ïmo kiupaigadïrï go judidiu. 10Dai ami dakatadai ïmo kïïrhi ix makïdï gakixapikatadai ïmo ïkadï. Dai jaa ix makïdï mai oigïdai go Suxi gatïkakai ïgai daidi potïtïdai,
—¿Kaiti go sïïrhikamigadï Moises?— ikaiti. —¿Oidaga xi oigaragai ix duadiagi ïmo kokoadï go ibhïxtaragai tasïrï?— itïtïdai.
Podukai aagidi ïgai sa bhai duadana Suxi go kïïrhi ami go ibhïxtaragai tasïrï bai podukai biakagi ïgai ixtukïdï gïpiïrï bupadagi.
11Daidi Suxi potïtïdai,
—Daiñi, ¿Ix soigakagi aapimï ïmo kañiru dai xi gïxiagi gobai ïmo dïgakami tukabakamiïrï, bhai ix mai busaidana aapimï tomaxi ïr ibhïxtaragai tasïrïkagi? Xadïrï mai busaidana aapimï— itïtïdai. —Kïïga oidaga oigaragai xi kïïgakïrï busaidagi ïmoko soigadï kañiru go ibhïxtaragai tasïrï tudu. 12Dai idi kïïrhi gïïpi bamioma namïga xi bhai ïmo kañiru ¿aba? Kaxkïdï maatiga maaxi sai kïïga oidaga oigaragai xi ibuadagi ixtumaxi ïr kïïga xibi ïpï tomaxi ïr ibhïxtaragai tasai xibi— itïtïdai.
13Daidi potïtïdai Suxi go kïïrhi ix makïdï gakixapikatadai ïkadï,
—Sïïrhiñañi gï ïka— itïtïdai.
Dai mos sïïrhiñdi ïgai ïkadï dai kïïga duayi dai ka ïpïan maaxi bii go gïmai ïkadï. 14Dïï gia go fariseos mai bhai ïrhi ïgaikïdï dai bubuakai abhai kiupiañdïrï dai otoma bhai dui aatagi ixdukatai muagi go Suxi.
15Dïï gia Suxi ka maatïkatadai sai mua ïrhiditadai go fariseos dai jii abhiadïrï. Dai mui óídakami oiditadai ïgai dai muidutai ïgai kookoñikatadai. Dai Suxi duduadi ïgai bïïxkatai 16dai daidi ïgai sai aagaiña xorai ïgai. 17Podui ïgai sai pogïduna ixdukatai oja go Isaiaskaru ïïki. Ïgai ïr ïmo ñokituldiadamigadїkatadai Diuxi dai podukai oja saidi Diuxi aagai ïmo ñoki aagaitai Suxi. Ami ojadïrï Diuxi ikaiti,
18 Idi ïr go kïïrhi ix makïdï ïko busaitu aanï saidi ïr gin Pioñigakana.
Kïïga oigïdai aanï gobai. Gin bhai ïrhiaraga gobai tudu.
Maakimu aanï gin Ibhïdaga saidi ïmadï dakana.
Dai aagidamu gobai go óídakami sai oidaga kïïgakïrï bubaidaragai asta go ix makïdï maiti ïr judidiu bïïtarï.
19 Mai ñokidaragaka agai ïgai.
Dai maiti gï kaidatudamu xi gïgïr iñakidagi ïgai tomarhi xi gïgïr ñokadagi nobai kaiyana ïpï.
20 Kïï tuigaka agai ïgai bïïtarï ix makïdï mai gupuka buaboidaradï dai soikïda agai ïgai óídakami ix makïdï mai biakana soiñi.
Kïïga sïïrhi aataduñimu ïgai bhai buadatai go kïïgakïrï bubaidaragai tudu dai podukai gamaitimu buidïrï go soimaaxkami.
21 Dai ïgai ïr go kïïgakïrï bubiadamika agai ix makïdï asta go óídakami ix makïdï maiti ïr judidiu kïïga buaboitudada agai, ikaiti Diuxi aagaitai go Suxi.
Ïïmo odami pokaitiña sai diabora gubukarhigadïkïdï aatabuadana go Suxi
22Ïmo imidagai go óídakami buapi Suxi ïmo kïïrhi biakami ïmo tïañikarudï go diabora ïrana. Go kïïrhi mai nïadatadai dai mai bhaigakatadai ñokadagi ïpï. Dai Suxi duadi ïgai dai kïïga ño ïpamu dai kïïga nïnïaba. 23Dai bïïxi go odami ami mai tïtïgaitadai ixtumaxi gïn tïtïgitoagi nïiditai. Daidi ikaitiña,
—¿Bhai ix go Suxi ïr go pipiixaradï go Rey Dabidkaru? ¿Ïgai ix ïr go otosadï Diuxi dai ix makïdï nïnïraka aatïmï ïïki abhiadïrï?— ikaitiña go odami.
24Dïï gia go fariseos kajioma ix kaititadai go óídakami daidi ikaitiña go fariseos,
—Cho— ikaitiña. —Maiti ïr otosadï gobai Diuxi. Gobai bhaiyoma go diabora gubukarhigadïkïdï aatabuayi. Beelsebú gubukarhigadïkïdï aatabuayi gobai tudu. Podukai bubaidi gobai tïtïañikarudï go diabora— ikaitiña.
25-26Dai kïïga maatïkatadai Suxi gïn tïtïitoi go fariseos daidi potïtïdai,
—Pokaiti aapimï sai go diabora gubukarhigadïkïdï bubaidiña aanï tïtïañikarudï. ¿Dïï gia dukai ïr buaboikana gobai? Daiñi, go diabora ïr ïmo gïï rey gï dukami go tïtïañikarudï bïïtarï. Dai xi ïïgi bubiadagi ïgai tïtïañikarudï odamiañdïrï gobai ïr ïpïan dukami xi ïmo Rey bui gïgïxiagi ïïgi tïtïañikarudï. Dai xi pobuadagi ïmo rey aidï gia mai tïbïpi gatïanïdamu ïgai. Gobai ïpïamaaxi xïïxkadï gïn bupui kokoadagi go óídakami ïmo kiiyïrï xiïpï ïmo gïï kiikiïrï ïpï, ka maiti ïr gïn aadunumï dukamikana ïgai pobuadatai. Ïïgi gïn bupui surhigïi ïgai kaxkïdï— itïtïdai. —Dai pomaaxi go diaborakïdï ïpï, ¿Xi go diabora bui gïxiagi aaduñdï dukatai tïbïpi gatïanïiña ïgai?— itïtïdai.
27—Daiñi— itïtïdai. —Aapimï fariseos bia ïïgi gïn mamaatïrdamiga. Dai ïgai as bubaidiña go diabora tïtïañikarudï odamiañdïrï ïpï. ¿Dai ix tuma gubukarhigaikïdï aatabuayi ïgai ix ïrhidi aapimï?— itïtïdai. —¿Mai ix gin ïpïan dukai ibuayi ïgai? Pokaiti aapimï sai aanï Beelsebú gubukarhigadïkïdï bubaidi tïtïañikarudï go diabora, sai ïïgi go diabora gubukarhigadïkïdï bubaidi aanï tudu. ¿Dai gobai ix tïiya ïrhidi sai gïn mamaatïrdamiga go diabora gubukarhigadïkïdï aatabuayi ïpï? Gin ïpïan dukai ibuayi ïgai di. Tïkakabïrai ïïgi gïn mamaatïrdamiga tudu. Ïgai gïn aagida antaada sai maiti ïr buaboi tudu sai go diabora gubukadadïkïdï bubaidi aanï tïtïañikarudï— itïtïdai.
28—Daiñi, kïïga gï maatï sai Diuxi gubukarhigadïkïdï bubaidiña aanï tïtïañikarudï go diabora tami gïn saagida tudu. Dai gobai itïiya ïrhidi sai kaxi ayi ixtuigako gatïanïda agai Diuxi tami gïn saagida— itïtïdai.
29—Gïn aagidamu aanï ïmo maaxidaragai aagaitai ixdukatai bubaidi aanï tïtïañikarudï go diabora. Daiñi, go óídakami ïr ïpïan dukami buxtuidadï go diabora, dai xadïrï mos adukai baakïna ïmoko xako gatïanïi go diabora dai gaïxidagi buxtuidadï. Gï agai xi burhixikami dukai biagi ïgai ïpïgioma tudu. Ïpïamaaxi gobai xi gaïxida agadagi ïmo odami go buxtuidadï ïmo kïïrhi kïïga gubuakami. Bia ïgai xi ïpïgioma burhiagi go kïïrhi ¿aba? Dai aidï gia bhaiga xi bakiagi kiidïrï dai gaïxidagi buxtuidadï. Podukai tudu ibuayi aanï bubaiditai tïtïañikarudï go diabora odamiañdïrï. Bupurakan dukai bia aanï go diabora tudu popoida iñagaitai buxtuidadï— itïtïdai.
30—Buidïrï kaatïkami aanï go diabora tudu. Dai bapaidimi aanï gin aaduñi saidi gin urabana. Dai aanï aagai sai xorai maiti gin urabakagi kaxi gin buidïrï bïïtïkami duu. Dai ïgai ix makïdï ïr gin buidïrï bïïtïkamiga ka mos sobhidadan buayi gin aaduindaga. Ïjïkobai bubaidi ïgai go odami ix makïdï aanï gabapaidimi saidi gin urabana tudu— itïtïdai Suxi go fariseos.
Suxi aagai ix tuma soimaaxkami oigïlda agai Diuxi dai ix tuma soimaaxkami mai oigïlda agai ïpï
31Daidi oi Suxi go aatagi daidi potïtïdai ïgai go fariseos,
—Aapimï fariseos gïpiïrï gin bupaimi, pokaiti aapimï sai go diabora gubukarhigadïkïdï aatabuayi aanï tudu. Daiñi, gï agai sai maatïka aapimï sai Diuxi oigïldamu odami asta xïxkadï galnaaxi ñoki surhigidagi ïgai Diuxi. 32Dai xi odami galnaaxi surhigidagi ñoki gin buidïrï aanï ix makïdï ïr otosadï Diuxi dai ïmo kïïrhi busai, gobai ïpï oigïldamu Diuxi. Dïï gia xi ïmo odami galnaaxi ñoki surhigidagi buidïrï Diuxi Ibhïadï gobai gia mai oigïldamu ïgai. Maita oigïldamu ïgai tomarhi ïmo imidagai tudu. Tomarhi tami oidigi daama tomarhi gïmai oidigïrï gokiïrioma ïpï. Daiñi, kïïga ïr buaboi sai oigïldamu Diuxi bïïxi soimaaxkamigadï odami, dïï gia ix surhigidagi odami galnaaxi ñoki buidïrï Diuxi ibhïadï, gobai gia mai oigïldamu ïgai— itïtïdai.
Suxi pokaiti sai gï maatï ix tuiga ïmo odami kaïkatai aatagidï
33—Daiñi— itïtïdai. —Bïïxi uxi gï maatï ix bhai kïïgadu nïiditai ibhiadï— itïtïdai Suxi. —Ix kïïgadukagi ïmo uxi kïïgadukami ibhiatai ïpï tudu. Dïï gia ix mai kïïgadukagi gobai mai kïïgadukami ibhiatai ïpï. 34Dai pomaaxi odami ïpï. Kïïga gï maatïkana ix tutuiga odami kaïkatai aatagidï. Dai aanï aagai sai kookoyi tutuiga aapimï fariseos. Kaxkïdï xadïrï kïïgadukana ixtumaxi aagadagi aapimï— itïtïdai. —Ixtumaxi bia aapimï gïn ibhïdagïrï gobai aagaiña aapimï tudu—.
35—Daiñi, ïmo odami kïï tuigakami naana maaxi bia kïkïïgadukami ibhïgadïrï dai kaxkïdï kïïga bhai maaxi kaitiña aatagidï. Dïï gia ïmo odami mai kïï tuigakami naana maaxi bia soimaaxkami ibhïgadïrï dai kaxkïdï soimaaxi ïgai aatagidï. 36Kaxkïdï aanï aagai sai gï agai sai kïïga gïn tïgitokagi odami ix tumaxi ñokadagi ïgai. Ayimu ixtugako odami ayimu mïï Diuxi buidïrï dai ami aagadamu odami ix tuma ñokaiña ïgai tami oidigi daama. Daidi aagamu Diuxi xorai kïï dui dai xorai mai kïï dui. 37Aidï bïïxi nïijadamu Diuxi ix tumaxi aagaiña odami. Nïidamu ïgai asta bïïxi ixtumaxi aagaiña ïgai mai kïïga gïn tïgitokatai. Dai amaxi aagadamu Diuxi ix bhai ïr gïpiïrï bïïtïkami ïgai ix cho ïpï— itïtïdai Suxi.
Suxi pokaiti sai gï muatuda agai dai sai baika tasaikïdï duakatuda agai ïpamu dai gobai ïr maaxidaragaika agai saidi ïgai ïr otosadï Diuxi
38Daidi ïmo imidagai ami dada chïki tïtïgiadami sïïrhikami ïmadï chïki fariseo daidi potïtïdai ïgai go Suxi,
—Aapi ïr ïmo tïtïgiadami ñoki dai ipïrhidi aatïmï saidi iduñagi aapi ïmo maaxidaragai ixtukïdï maatïkagi aatïmï ix bhai buaboikïdï ïr Diuxi otosadï aapi— itïtïdai.
39Daidi Suxi potïtïdai,
—Daiñi— itïtïdai. —Kaxi nïnïidi aapimï go naana maaxi maaxidaragai ix makïdï ibuadana aanï dai modukai mai kïïga xadutudai aapimï Diuxi dai bhaiyoma gin aagidiña aapimï saidi ibuada aanï ïpï jaa maaxidaragai sa bhai podukai gin buaboitudaiña aapimï. Agia ïr soimaaxi ibuadami aapimï. Aanï ïr go otosadï Diuxi aanï ix makïdï ïmo kïïrhi busai tudu. Dïï gia mosïkaxi ïmo maaxidaragai oidaka agai gïn bïïtarï saidi ïgaikïdï gin buaboitudaiña aapimï. 40Daiñi, kïïga maatï aapimï xoraitadai go Jonaskaru. Ïmo ñokituldiadamigadїkatadai ïgai Diuxi tudu. Dai kïï maatï aapimï ïpï saidi go Jonas baika tasai dai goka tukagi bii ïmo gïï batopa ïrana dai sai gokiïrï busai ïpamu abhiadïrï. Dai gobai ïr ïmo maaxidaragaikatadai go óídakami bïïtarï Ninibeïrï sai maatïkana ïgai sai go Jonas ïr otosadï Diuxi. Dai xibi aanï aagai sai iduñimu Diuxi ïmo maaxidaragai pomaaxkami aanïkïdï ïpï. Baika tasai dai baika tukagi bimu aanï dïbïrai uta dai bhodïrï ïpamu busaimu aanï sai gokïdï gin buaboitudana aapimï sai aanï ïr go otosadï Diuxi ix makïdï ïmo kïïrhi busai. Gobai ïr go maaxidaragaika agai aapimï gïn bïïtarï tudu dai mai tipukamu ïmai— itïtïdai.
41—Dai aanï aagai sai ayimu ixtuigako aagada agai Diuxi xorai kïïga idui dai xorai mai kïïga idui. Dai amaxi ami Diuxi buitapi gukakamu aapimï ix makïdï óídaga xibi ïmadï go ix makïdï Ninibeïrï óídakatadai ïïki ïpï. Dai aidï go Ninibeïrï óídakami gïpiïrï gïn bupadamu dai aagadamu sai aapimï kabami ïr soimaaxi ibuadami dai sai gïn ajïga gïgïbidaragai. Go Ninibeïrï óídakami gia ïma dukai gïn tïtïgito ïïki tudu dai aapimï gia cho. Ïgai gia otoma ïma dukai gïn tïtïgito mos kaïkai ñokidï go Jonas. Dai aapimï kaïkana aanï gin ñoki ix makïdï gïïpi bamioma namïga xi go Jonas. Dïï modukai aapimï maiti ipïrhi xi ïmadukai gïn tïtïgitokagi. Dai gokïdï gïpiïrï gïn bupadamu go Ninibeïrï óídakami— itïtïdai.
42—Dai go reina Sebañdïrï oidakami ami buitapi Diuxi baan kïkibamu ïpï dai ïgai ïpï maaxi aagamu xïï kabami ïr soimaaxi ibuadami aapimï. Kïïga maatïkatadai ïgai sai kïïga saitudaga tïgibudadï go Solomon ïïki dai kaxkïdï sïïrhikïdï mïkaxdïrï jii dai dibiji kaïka ïrhiditai aatagidï. Dai aanï tami gïn saagida daja. Mai bia aapimï xi mïkaxi iimiagi dai kaïkagi gin aatagi tudu. Dai gïïpi bamioma ïr namïakami aanï xi bhai go Solomon. Dïï bïïxkïrï maiti ipïrhidi aapimï xi kaïkagi gin ñoki. Kaxkïdï gïpiïrï gïn bupadamu go reina xïxkadï amïka Diuxi buitapi gukakagi aapimï— itïtïdai.
43—Gïn aagidamu xïï soi taatamu aapimï ix makïdï óídaga xibi— itïtïdai. —Ïpïan taadakamu aapimï ïmo odami ix makïdï gï busaitu ïmo tïañikarudï go diabora dai gokiïrï go tïañikarudï ïpamu baa dai bamioma soimaaxi taataturhi. Po kaxi soimaaxi taatama agai aapimï tudu. Daiñi, xïxkadï ïmo odamiañdïrï busiagi ïmo tïañikarudï go diabora aipakoga oidigana aimïraiña xako mai tipu sudagi. Aimïraiña ïgai gaagaitai xako biiyagi dai mai tïtïgaiña—.
44Daidi ikaitiña ïgai,
—Imimu aanï dai ïpamu amïka go odami ïrana oidakamu aanï— ikaitiña.
—Dai aïjïiña ïgai go odami xako ïrana oidakatadai ïgai dai nïidiña sai mai tipukana ïmai oidakami ami go odami ïrana. Nïidiña go odami ïrana sai ïpïamaaxi ïmo kii kïï boixikikami dai kïïga bhai duñixikami oidakaragai bïïtarï. 45Dai bhodïrï imïiña go diabora tïañikarudï dai gaagaiña ïpï jaa kubarakami diabora tïtïañikarudï ix makïdï bamioma ïr soimaaxi ibuadami xi ïgai. Dai bïïxkatai ïgai bapakïi ami go odami ïrana dai ami óídakana. Dai podukai bamioma soi buadana ïgai go kïïrhi xi bhai baasïkioma. Pomaaxi taadakamu aapimï xibi óídakami tudu mos ïï soimaaxi ibuadamikatai aapimï— itïtïdai.
46Kia gatïtïïgiditadai Suxi ñoki go mui óídakami ami bai ami ayi dïïdï ïmadï susukurhidï dai nïida ïrhiditadai. 47Dai ïmadutai ix makïdï ami dakatadai potïtïdai ïgai go Suxi,
—Gï daada ïmadï gï susukurhi kidigañdïrï guka dai gï nïida ïrhidi— itïtïdai.
48Daidi Suxi potïtïdai,
—Gïn aagidamu aanï xorai gin daada dai gin susukurhi dukai nïidi aanï— itïtïdai.
49Dai xixigidi ïgai go mamaatïrdamigadï ix makïdï ami darakatadai daidi potïtïdai,
—Aapimï ïr ix makïdï gin dïïdï dai gin susukurhi dukai nïidi aanï. 50Bïïxkatai ix makïdï ïïgiadagi gin Oga ix makïdï tïbagiana daja ïgai buaboikïdï ïr gin daada dai gin susukurhi tudu— itïtïdai.
Currently Selected:
Mataibo 12: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida