Mataibo 11
11
Go Juan otoi kïkïïrhi sai mïï tïkakana ïgai go Suxi sa bhai ïgai ïr go otosadï Diuxi ix makïdï nïnïrakatadai go judidiu
1Ga mamaakaitadai Suxi aatagi go bhaibuxtama dan goka mamaatïrdamigadï aidï. Dai kugaitu ïgai go aatagi dai jii abhiadïrï dai maigobai aipakoga gatïtïïgiditadai ïgai aatagi xako kaburhi guka kiiki ami Galilea munisipiïrï.
2Dai aidï kaxi gï maixatutadai go Juan ix makïdï bapakonadami aagaiña odami. Dai tomaxi maixakaruana dakatadai ïgai bïïxkïrï biakatadai ïgai mamaatïrdamigadï ix makïdï kaïkana aatagidï. Dai ami maixakaruana dakatai Juan kajioma ïgai ixtuma ibuadana go otosadï Diuxi ix makïdï go judidiu nïnïrakatadai.
Daidi báí go Juan chïki mamaatïrdamigadï 3dai aagidi sai mïï tïkakana ïgai Suxi sa bhai ïgai ïr otosadï Diuxi. Sa bhai ïgai ïr ix makïdï nïnïraka go judidiu tudu xiïpï ix bia xi nïnïrakagi ïmai kia. Daidi iji go mamaatïrdamigadï Juan dai mïï ayi xako dakatadai Suxi daidi potïtïdai,
—Go Juan ix makïdï bapakonai odami gïr otoi bhaigobai sai gï tïkakana aatïmï sa bhai aapi ïr go gïï gabhaitïkïakami ix makïdï nïnïraka aatïmï ïki abhiadïrï. Sa bhai aapi ïr go otosadï Diuxi tudu. Xiïpï xi gï agai xi nïnïrakagi aatïmï ïmai kia— itïtïdai.
4Daidi potïtïdai Suxi go ojotosadï Juan,
—Mïïka abïr aagida go Juan ix tumaxi nïidi aapimï. Aagidabïrai ix tuma buayi aanï tudu. Podukai maatïkamu ïgai sai gia ïr otosadï aanï Diuxi ix makïdï nïnïraka aapimï— itïtïdai. 5—Aagidabïrai tudu sai aanï ka duduadi odami ix makïdï mai nïayitadai dai xibi ka kïïga nïayi. Dai ix makïdï gogobikïitadai ka kïïga aimïrai. Dai ix makïdï biakatadai lepra ka kïïga duayi ïpï. Dai ix makïdï mai bhaigakana ix kaïkagi ka kïïga kaï ïpï. Dai aagidabïrai ïpï sai ka duduakaturhi aanï koidadï. Dai sai aanï aiturhiña go bhai ïrhiaragai aatagi go soititigami. Podukai maatïkamu go Juan xorai aanï— itïtïdai. 6—Dai aagidabïrai ïpï saidi kïïga bhai gïn ïrhiadamu bïïxkatai go odami ix makïdï mai ugutai gin buaboitudagi— itïtïdai.
Suxi aagidi go odami saidi Juan ïr ïmo gïdukami ñokituldiadamigadï Diuxi
7Dai bhodïrï ka ijitadai go ojotosadï Juan abhiadïrï daidi Suxi aagidi go odami ïmo ñoki aagaitai go Juan daidi potïtïdai,
—Kïï maatï aanï sai muidutai ajiopaiña aapimï oidigana nïida ïrhiditai aapimï go Juan amïka. ¿Dai ix tuigakami ïrhidi aapimï go Juan dai mïï nïida ïrhiditadai aapimï tudu? ¿Pobïn ïrhiditadai mïxi sai ïgai mai xïï kïï maatï ix tuma buaboitudagi dai sai dudatai ïmapïbuayi ñokidï ïpïan dukami ïmo basoi ix makïdï aipakoga oiñïi ïbïrhikïdï? ¿Po tuigakami kïïrhi mïx nïida ïrhiditadai? Cho ¿aba? 8¿Mïx nïida ïrhiditadai ïmo kïïrhi ix makïdï gï aadatika yukuxi kïï namïakami? Cho ïpï. Daiñi, odami biakami yukuxi kïï namïakami mosïkaxi xigiamaaxkami bhaabhakiana óídaga dai asta kiidïrï ïmo Rey. Mai xu xi oidigana óídaga ïgai xako ajiopatadai aapimï. 9¿Mïx tuma nïida ïrhiditadai ami oidigana tudu? ¿Mos nïida ïrhiatugai aapimï ïmo ñokituldiadamigadï Diuxi dai gamo iji? Ïjï tudu. Nïidi aapimï go Juan dai ïgai mai xu xi mosïkaxi ïr ñokituldiadamigadï Diuxi tudu— itïtïdai.
10Diuxi ñokidïrï ojixi ïmo ñoki aagaitai go Juan tudu. Ami ojixi sai Diuxi ikaiti,
Otosamu aanï ïmo kïïrhi gï bhaitïki aapi gin Maara baidi ïgai aagidamu go odami sai ka karhioga dibiagai aapi. Bai podukai kaxi bhai gïn dukagi odami pïx xuduku aiyagi, podukai ojixi Diuxi ñokidïrï aagaitai go Juan.
—Dai go Juan tudu ïr go otoxikami ix makïdï aagai ami Diuxi ñokidïrï— itïtïdai. 11—Kaxkïdï aanï aagai sai ïïki abhiadïrï mai tipukana xorai bamioma namïakagi xi bhai go Juan ix makïdï bapakonadami aagaiña odami. Mai tipu óídakami saagida xorai bamioma namïakagi xi ïgai tudu. Dïï gia tomax xïïxi namïakagi go Juan bïïxkïrï oidaga xorai bamioma namïga xi ïgai Diuxi bïïtarï gatïanïitai ïgai. Diuxi bïïtarï asta go otïrhioma namïakïdï oidakami bïïxkïrï bamioma namïga xi bhai go Juan tudu— itïtïdai.
12—Daiñi, aidï abhiadïrï xi gï aga gamamaakaitai go Juan aatagi aidï abhiadïrï ka muidukana go óídakami ix makïdï bhai ïrhiarakïdï ïïgidiña Diuxi. Gïn daadagitoiña ïgai sai gïn tïanïdagi Diuxi tudu. Dai mai bhaigakana jaa xi sobhidagi sai Diuxi tïanïdagi ïgai. Dïï gia oidaga oomarhigami ix makïdï gubuakïdï gatïanïda ïrhidi dai mai dagito ïrhidi ïgai xi Diuxi tïanïdagi óídakami. Pomaaxkana aidï abhiadïrï xi dibia go Juan tudu— itïtïdai.
13—Ïkiomai, mai kia dibiakai go Juan, aidï bïïxi go ojadami go sïïrhikami ïmadï go ñiñokituldiadamigadï Diuxi nïnïrakatadai ix dibiagi go Juan. 14Dai xibi gï agai sai buaboitudagi aapimï ixtumaxi gïn aagidamu aanï. Daiñi, aanï aagai sai go Juan ïr go Eliaskaru gï dukami ibuadatai ïgai go Elias aaduindadï. Go Juan ïr go ñokituldiadamigadï Diuxi ix makïdï gï agaitadai sai dibiagi tudu. Dibia ïgai bhai buada agaitai iibhïadï óídakami saidi gin buaboitudaiña ïgai. Saidi gin buaboitudaiña ïgai aanï ix makïdï ïr Diuxi otosadï dai ïr gatïanïdami tudu. 15Kïïga abïr gïn tïgito kaïka ixtumaxi gïn aagidi aanï tudu— itïtïdai Suxi go odami.
16Dai bhodïrï oi Suxi aatagidï daidi potïtïdai ïgai go odami,
—Aapimï ix makïdï óídaga xibi nïidiña ixtumaxi ibuadana aanï dai Juan dai soi dukai gïr nïidi aapimï. Gïn aagidamu aanï ix maaxi ibuayi aapimï tudu. Daiñi, ïpïan buayi aapimï aarhi ix makïdï no xibhïkai plasana darakana tudu. Dai jaa aarhi gatïtïbïiña ami dai gïn bapaidiña saidi gatïtïbïiña aapimï ïmadï dai aapimï maiti ipïrhi. 17Pokaitiña go gaa gïn bapaiditai sai,
—Ga ibai aatïmï ibaragai ix makïdï kïïga bagian kaiti dïï aapimï mai bhai gïn ïjïrhi dai maiti ipïrhi aapimï xi gïr ïmadï gatutudiagi. Dai gokiïrï gaiiba aatïmï soi ïrhiaragai ibaragai ïpï dai bïïxi mai soi gïn ïjïrhi aapimï ïpï— ikaitiña go gaa aarhi gabapaiditai.
18—Dai pomaaxi aapimï ïpï gïr nïiditai aapimï aanï ïmadï go Juan— itïtïdai. —Tomax dukatai ibuadagi aatïmï tomax dukai soi dukai gïr nïidiña aapimï tudu. Daiñi, go Juan dibia dai mai kuadana kuadagai ix makïdï kuayiña jaa. Ïma maaxi gakuadana ïgai. Dai mai yïïdana ïgai idagai nabaamudakami ïpï. Dai nïidiña aapimï ixtumaxi kuadana dai yïïdana ïgai dai pokaitiña aapimï sai bia ïmo diabora tïañikarudï— itïtïdai.
19—Dai aanï ix makïdï ïr otosadï Diuxi dai ïmo kïïrhi busai gia kïïga gakuadana dai gayïdana. Dai nïidiña aapimï ixtumaxi ibuadana aanï dai soi dukai gin nïidiña ïpï. Pokaitiña aapimï sai aanï bhaibitukami gakuadana dai sai iitoraga aanï dai sai urapïkïiña aanï naana maaxi soimaaxi ibuadami. Saidi asta urapïkïiña aanï taanïdami kuota tudu. Po kaitiña aapimï soi dukai gin nïiditai. Dïï gia tomaxi soi dukai gïr nïidi aapimï aanï ïmadï Juan bïïxkïrï kïïga ïr soiñi gïr tïgibudaga. Xorai oijadagi gïr tïgibudaga kïïga maaxitudamu saidi ïr soiñi gobai tudu— itïtïdai Suxi go odami.
Suxi pokaiti sai go óídakami ix makïdï mai buaboitudagi kabami biaka agai gïgïbidaragai
20Dai bhodïrï aagai Suxi ïmo ñoki aagaitai go kiiki xako bamioma muidu iduitadai ïgai maaxidaragai. Maiti ipïrhi ïgai xi ïma dukai gïn tïtïgitoagi tudu tomaxi nïiditadai ïgai mui maaxidaragai. Daidi ikaiti Suxi aagaitai ïgai ix makïdï mai ïma dukai gïn tïtïgito,
21—Sogigi aapimï Korasinïrï óídakami dai aapimï Betsaidïrï óídakami ïpï. Naana maaxi maaxidaragai idui aanï gïn saagida tudu saidi nïijada aapimï xïï gubuka Diuxi. Dïï modukai maiti ipïrhi aapimï xi ïma dukai gïn tïtïgitoagi— ikaiti ïgai.
—Daiñi— ikaiti. —Xi iduñimudai aanï pokaxi maaxidaragai ïïki Tiroïrï ïmadï Sidonïrï ami óídakami gia otomioma ïma dukai gïn tïtïgitomudai xi aapimï. Poduñimudai ïgai tomaxi kabami ïr soimaaxi ibuadamikatadai ïgai. Asta gïn aadamudai ïgai sïïxidakami yukuxi dai gïn komaibadamudai mataikïdï ïpï soi gïn ïrhiditai. Podukai maaxitudamudai ïgai ix ka ïmadukai gïn tïtïgito ïgai— itïtïdai. —Dïï gia aapimï Korasinïrï dai Betsaidïrï óídakami mai pobuayi. Maiti ipïrhidi aapimï xi ïmadukai gïn tïtïgitoagi tudu— itïtïdai. 22—Kaxkïdï xïxkadï aiyagi ixtuigako Diuxi aagada agai xorai kïïga idui dai xorai mai kïïga idui sai aidïpïrï bamioma biakamu aapimï gïgïbidaragai xi bhai go Tiroïrï dai Sidonïrï óídakami. Maiti ipïrhi aapimï xi ïmadukai gïn tïtïgitoagi kaxkïdï— itïtïdai.
23—Dai bia aanï ïmo ñoki aapimï Kapernaumïrï óídakami gïn bïïtarï ïpï. Aapimï pobïnïrhidi sai tïtïidi agai tïbagiamu dïï aanï agai sai bhaiyoma surhigimu aapimï go gïï tukabakami dïgakïrï. Ami surhigimu aapimï xako Hades tïgidu ami xako maamaixapi koidadï tudu— itïtïdai Suxi.
—Daiñi— itïtïdai. —Kïï maatï aapimï sai Diuxi bïï naato koi go Sodomïrï óídakami ïïki dai xia dodai kiikidї kabami soimaaxi ibuadamikatai ïgai. Dïï gia aanï aagai sai ix nïijadamudai ïgai bïïxi go naana maaxi maaxidaragai ix makïdï idui aanï aapimï gïn buitapi aidï gia kïïga ïmadukai gïn tïtïgitokamudai ïgai ïïki. Kia no gukakamudai kiikidї tudu. Dai aapimï gia nïidi bïïxi go naana maaxi maaxidaragai ix makïdï ibuadana aanï dai modukai mai ïma dukai gïn tïtïgito aapimï. 24Kaxkïdï aanï aagai sai bamioma biakamu aapimï gïgïbidaragai xi bhai go Sodomana óídakami. Aapimï Kapernaumïrï óídakami bamioma biakamu gïgïbidaragai xïxkadï aagadagi Diuxi xorai kïïga idui dai xorai mai kïïga idui tudu— itïtïdai.
25Dai bhodïrï Suxi aagidi ïmo ñoki Diuxi dai potïtïdai,
—Aapi gin Oga, aapi bïïxi ïr Tïanïdami tïbagiana dai tami oidigi daama ïpï. Aa gia bhai gin ïrhidi aanï aapikïdï— itïtïdai. —Bhai gin ïrhidi maatïkatai sai tïtïgidi aapi gï tïgibudaga odami ix makïdï ïr aarhi dukai dai mai xii naana maaxi maatï. Ïxto aapi gï tïgibudaga sai mai maatïkana go odami ix makïdï gia poïrhidi ix ka kïïga maatï ixtumaxi tudu. 26Podukai bhai ïrhidi aapi gin Oga kaxkïdï— itïtïdai.
27Daidi bhodïrï potïtïdai Suxi go odami,
—Diuxi gin Oga kaxi in maa bïïxi aïkatai ixtumaxi oidaga. Dai mosïkaxi Diuxi ïgai dai kïïgakïrï gin maatï xorai aanï. Mai tipu ïmai xorai gin maatïkagi podukai. Dai aanï kïïga maatï Diuxi ïpï. Mosïkaxi aanï ïmadï go odami ix makïdï tïtïgiadagi aanï ïr ix makïdï kïïga maatï Diuxi dai jaa gia cho— itïtïdai.
28Daidi potïtïdai ïgai ïpï,
—Gimibïrai dai gin uraba bïïxkatai aapimï ix makïdï ka ibhiokoñi, aapimï ix makïdï kabami gïn aajagïi ïïgida ïrhiditai go naana maaxi sïïrhikami ix makïdï oidaga tudu. Gimibïrai aapimï ix makïdï ïmo bïïtïkami kusubi dukai taata gobai. Aanï gia kïïga gïn iibhïxtudamu gïn iibhïdaga— itïtïdai. 29—Bhïibïrai go tïgibudagai ix makïdï gïn tïtïïgidamu aanï saidi podukai ïr gin mamaatïrdamigakagi aapimï. Aanï mai gïdukïdï gin ïrhidi buidïrï jaa dai kïï tuiga aanï tudu. 30Dai gï agai xi maatïkagi aapimï sai mai xijaiga ix makïdï gïn tïanïiña aanï. Mai bïïtïkan taadaga gobai tudu— itïtïdai.
Currently Selected:
Mataibo 11: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida