Lukas 17
17
Suxi maa aatagi mamaatïrdamigadï dai aagidi sai oigïldana xorai soi buidadagi
1Daidi ïmo imidagai Suxi potïtïdai mamaatïrdamigadï,
—Gin aaduñi— itïtïdai. —Kïïga gï maatï sai naana maaxi oidaka agai ixtukïdï ayimu tïgibudagai xi soimaaxi ibuadagi odami. Dïï gia sogigi toma xorai ix makïdï gïpiïrï daitudagi ïmai soimaaxi aiturhitai tïgibudagai. Kaxkïdï tudu kabami biakamu gïgïbidaragai xorai soimaaxi aiturhi tïgibudagai ïmai. 2Daiñi, xioma ïr kïïgaikamudai ïgai bïïtarï xi kuxibodïrï gï buratudamudai ïmo gïï mauturui dai go gïï sudagiïrï gï daitudamudai. Xioma ïr kïïgaikamudai xi podukai gï duiñtuldagi ïgai dai mai xu xi soimaaxi duiñtuldagi ïgai ïmadutai gin mamaatïrdamiga ix makïdï mai xii gubuka buaboidaradï— itïtïdai.
3—Kïïga abïr gïn tïgito nïida tudu ixtumaxi ibuadagi aapimï. Daiñi, xi soimaaxi gï buidadagi ïmai abïr maakada ñoki. Dai xi ïma dukai gï tïgitokagi ïgai abïr oigïlda. 4Xïïxkadï pobai gï tïdagi ïgai sai ka ïma dukai gï tïgito abïr oigïlda tomaxi muiyoko soi gï buidadagi ïgai. Tomaxi asta kubarakamioko soi gï buidadagi ïgai ïmo tasaikïdï dai kubarakamioko pokaitadagi sai kaxi ïma dukai gï tïgito, tomax pokaki imidagai pobuadagi ïgai abïr oigïlda— itïtïdai.
Suxi maa aatagi aagaitai buaboidaragai
5Dai go ojotosadï Suxi potïtïdai,
—Gïr soiñañi sai bamioma kïïga buaboitudana aatïmï— itïtïdai.
6Daidi Suxi potïtïdai,
—Daiñi— astïdai. —Tomaxi mosïkaxi ïpïan ïxi buaboitudagi aapimï ix xïiduru ïmo korabi kaidï. Tomaxi pokaxi buaboitu aapimï bhaigakamu aapimï xi potïdagi ïmo gïï uxi sai ïïgi gï takopigana dai go gïï sudagiïrï gïsïna bai go uxi gïn ïïgidamu— itïtïdai.
Suxi potïtïdai mamaatïrdamigadï saidi ïr pipioñi duu ïgai dai sai kaxkïdï mai pobïn ïrhiada sai jaa bia xi maakiagi ïmo Diuxi aatanamïidaragai tïdagi ïgai
7Dai Suxi potïtïdai ïpï sai,
—Xi ïmadutai aapimï biakagi ïmo pioñi bai ïgai gaxikuandagi dïjoana xiïpï nukadakagi buxtaki oidigana dai xudu dibia ïgai, ¿Bhai ix potïdana aapimï sai daibana dai ugana otoma mai kia ugakai aapi? 8Cho ïrhi aanï. Ïmo pioñi ïgai di. Mai potïda antaada aapimï ïrhi aanï. Bhaiyoma potïda antaada aapimï sai otoma aadana yukuxi mai tukurakami dai sai gï duiñdana kuadagai dai gï bhidana. Dai ka gaugakai aapi aidï gia aagida antaada aapi gï pioñi sai ugana. ¿Mai ix ïr buaboi? 9¿Dai bhai ix Diuxi atanamïidana tïdana aapimï gïn pioñiga ibuadatai ïgai mïx tumaxi gatïjai? Cho, ¿aba? Mos ibuayi ïgai ixtumaxi bia ïgai xi ibuadagi mos ïmo pioñikatai ïgai di. 10Dai podukai ïpï xïxkadï ibuadagi aapimï ixtumaxi gatïjai Diuxi abïr itïda sai aapimï mos ïr pipioñi duu dai sai mosïkaxi idui aapimï ixtumaxi biakatadai xi ibuadagi pipioñikatai aapimï. Podukai abïr itïda aapimï— itïtïdai.
Suxi duduadi bhaibuxtama kokokoñiadï ix makïdï biakatadai lepra
11Daidi kia ïr imïdamikatadai go Suxi bhaitïkioma Jerusalenamakoga. Dai imïitadai ïgai xako ïmo padïrï kaatï Samaria dai ïma padïrï kaatï Galilea. 12Ami aijimitadai Suxi ïmo arhi kiiki bai no mïkaxdïrï gukibatadai bhaibuxtama kokokoñiadï biakami go lepra tïgidukïdï kokodagai. Ïmo ogidïrï kokodagai gobai. 13Dai ijiña go kokokoñiadï daidi potïtïdai,
—Aapi Suxi, aapi ïr ïmo gïr bhaitï kïakamiga, soi gïïlda gïr nïida— itïtïdai.
14Dai gamo nïnïaba go Suxi daidi potïtïdai,
—Mïïka abïr nïida dadaxdadami Jerusalenïrï dai tïïgida ix maaxi gïn tukuga— itïtïdai.
Bai go kokokoñiadï ïïgidi dai imi agai Jerusalenamu. Dai kia boiyamu iimïi ïgai bai duduayi tukugadï. 15-16Dai ïmadutai ïgai ix makïdï ïr Samarhiïrï oidakami maatï tïï ix ka duayi dai aa gïi dai gïgïr ñokai dai aagai xïïxi ïr gïdukami Diuxi. Mïï ayi ïgai buidïrï go Suxi dai dïbïrapi kuiki ïïkasodï sonoana dai aagidi ïmo Diuxiatanamїidaragai.
17Dai Suxi potïtïdai,
—¿Mai ix bhaibuxtamadukatadai aapimï dai duduayi?— itïtïdai. —¿Taa dudui go gaa?— itïtïdai. 18—Mosïkaxi idi Samariañdïrï oidakami ïgai dai dibia dai kïïga ñoo Diuxi bïïtarï aagaitai xïïxi ïr gïdukami Diuxi di— itïtïdai.
19Daidi bhodïrï potïtïdai ïgai go ix makïdï duayitadai,
—Kïkibañi aapi kïïrhi dai imiñi xako imi agaitadai aapi. Ka buaboitu aapi di dai kaxkïdï ka duayi aapi— itïtïdai.
Suxi aagidi go fariseos sai Diuxi kaxi gatïanïi odami iibhïadïrï
20Dai ïmo imidagai go fariseos tïkakai go Suxi xïïxkadï ayi agai ix gatïanïdana Diuxi oidigi daama. Daidi Suxi potïtïdai,
—Odami bïïtarï mai maatiga maaxi xïxkadï gatïanïi Diuxi. 21Mai bhaigakamu odami xi pokaitadagi,
—Daiñi, tami gatïanïi Diuxi xiïpï mobai gatïanïi ïgai— tudu.
Mai maaxi gobai di. Kaxi gatïanïi ïgai gïn saagida tudu— itïtïdai.
Suxi potïtïdai mamaatïrdamigadï sai dibia agai ïpamu ka imïkai tïbagiamu
22Dai bhodïrï maa Suxi ïmo ñoki mamaatïrdamigadï daidi potïtïdai,
—Aanï ïr otosadï Diuxi ix makïdï ïmo kïïrhi busai. Dai aanï aagai sai imimu aanï idi oidigi daamaiñdïrï. Dai gokiïrï ayimu ixtuigako nïijada ïrhiadamu aapimï ix dibiagi aanï ïpamu. Dïï aapimï mai nïidamu ix dibiagi aanï. 23Jaa pobai gïn tïdamu sai gïn tïïgida agai xako daja aanï ix makïdï ïr Diuxi otosadï. Pokaitadamu ïgai sai,
—Tami daja— xiïpï —amïka daja—
Dïï gia maiti abïr ïïgiada ïgai tomarhi abïr mai oijada. 24Daiñi, mai mosïkaxi chïki óídakami nïijadamu xïxkadï dibiagi aanï ïpamu. Kïïga nïijada agai bïïxi óídakami bhaiyoma. Ix maaxi xïïxkadï bïpïdokïdagi oidigi dai mïkaxdïrï maaxi pomaaxkamu xïxkadï dibiagi aanï ïpï. Bïïxi óídakami nïidamu tudu. 25Dïï gia mai kia imïkai aanï gï agai xi kabami soimaaxi taatagi aanï dai sai gin kïïdadagi xibi óídakami kia— itïtïdai.
26—Kaxi gïn aagidi aanï sai aanï ïr Diuxi otosadï ix makïdï kïïrhi busai— itïtïdai. —Dai aanï aagai sai xïïxkadï ka dibia agadagi aanï ïpamu oidigi daama sai óídakami ïpïan ibuadamu ixdukai ibuadana aidïxi oidakatadai go Noékaru. 27Aidï mai buamï ïrhidiña óídakami ix dibiagi gïgïbidaragai dai mos gakuadana ix dukai ibuadana bïïx tasai dai gaïmadï bipiïyiña dai gamamaakaiña maamaradï oki sai gaïmadï bipiïyiña ïgai ïpï. Mai buamï ïrhidiña ïgai tudu asta aidïxi baa go Noé barko ïrana dai sudaïrï dupi go oidi dai bïïxi koi go óídakami. Pomaaxi óídakamu óídakami dibiakai aanï ïpamu ïpï— itïtïdai.
28—Pobai gï ibuadana aidïxi oidakatadai go Lot ïpï— itïtïdai. —Aidï go óídakami mai buamï gïn ïrhiditadai ïpï. Mos gakuadatadai ïgai ix dukai ïbuadana ïgai bïïx tasai dai gayïdana dai gasapïdaiña naana maaxi dai gaagaraiña naana maaxi ïpï. Mos gaïsïiña ïgai dai gatutusaiña ïgai bhaabhaki ïpï. Pobuadana ïgai mai buamï gïn ïrhiditai. 29Dïï gia aidïxi busai go Lot abhai Sodomañdïrï Diuxi surhi táí tïbagiañdïrï ïmadï asufre dai bïïxi naato koi óídakami. 30Dai pomaaxkamu ïpï xïïxkadï dibiagi aanï. Aidïpïrï maaxitudamu Diuxi xorai aanï dai ïr otosadï Diuxi dai ïmo kïïrhi busai. Aidï gia bïïxi óídakami gin nïijadamu xorai aanï—.
31—Xïxkadï dibiagi aanï ïpamu go odami gï agai xi otoma daibuna mïrhiagi. Xi portarhiïrï darakagi go óídakami aidï maiti gï agai xi bapakïdagi kiikidïrï dai buiyagi buxtuidadï tudu. Dai xi ïxikamiana gaatabuadagi ïmoko maiti gï agai xi aiyagi ïgai kiiyïrï. Gï agai xi abhaxi biagi buxtuidadï dai otoma daibuna mïrhiagi. 32Gïn tïgitobïrai tudu ix dukatai muu oñigadï Lot ïïki. Ïgai aa nïnïaba gï tïgitokatai oidakaradï ix makïdï biakatadai ïgai dai ïmo onai naato— itïtïdai.
33—Daiñi, xi mosïkaxi ïïgi gïn tïgito ajiopadagi aapimï gaagaitai ix dukatai mai xia gï buadagi gïn oidakaraga aidï gia tomax dukai xia gï buadamu gïn oidakaraga. Dïï gia xi bhai aagagi aapimï xi xia buadagi gïn oidakaraga aanï in bïïtarï aidï gia kïïgakïrï óídakamu aapimï— itïtïdai.
34—Dai xïxkadï dibiagi aanï ïpamu Diuxi baidakamu ïïmo odami dai jaa biamu. Aidïpïrï ïmo baakoxiana kokosokamu goka odami bai Diuxi baidakamu ïmoko dai go gïmai amaxi biamu. 35Dai goka oki gatuadamu no xibhïkai ïpï dai Diuxi baidakamu ïmoko dai go gïmai biamu. 36Dai dïjoana gaatabuadamu goka kïkïïrhi ïpï xi Diuxi baidakamu ïmoko dai go gïmai biamu ïgai ïpï— itïtïdai Suxi.
37Dai mamaatïrdamigadï potïtïdai,
—¿Bako po gï duña agai gobai ix makïdï gïr aagidi aapi?— itïtïdai.
Dai Suxi potïtïdai,
—Daiñi, xakoga gïn ïmpaidadagi mui nunui ka bïïxi odami maatïkana sai ami bïïtï koidadï. ¿Mai ix pomaaxi gobai? Dai aanï aagai sai pomaaxkamu xïïxkadï dibiagi aanï ïpï. Aidïpïrï maatiga maaxkamu naana maaxikïdï sai karhioga dibia iñagai— itïtïdai.
Currently Selected:
Lukas 17: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida