Lukas 16
16
Suxi aagai ïmo pioñi ix makïdï mai sïïrhi aatadui dai bïïxkïrï kïïga gï tïgito ix dukatai iduñagi dai kïïga oidakagi
1Dai Suxi aagidi ïmo maaxidaragai aatagi mamaatïrdamigadï daidi potïtïdai,
—Ïmo imidagai oidakatadai ïmo kïïrhi kïïga gï bidakami dai nukaturhi ïgai buxtuidadï ïmo pioñigadï. Dai gokiïrï jaa aagidi sai pioñigadï mos xia buayi buxtuidadï dai mai kïïga nukadai. 2Daidi go kïïrhi gï bidakïdï báí pioñigadï daidi potïtïdai,
—¿Buaboi xi sai mos xia buayi aapi gin buxtuidaga dai mai kïïga nukadai?— itïtïdai. —Ka maiti gï dagitomu aanï xi nukadakagi aapi gin buxtuidaga di. Gin tïïgidañi ïmo ojai xako ojixi ix tumaxiïrï xia dodai aapi tudu— itïtïdai.
3-4Daidi go pioñi pobïrhi aidï,
—¿Xibi gia dukatai iduñimu aanï?— as ïrhidi. —¿Dukatai oidakamu aanï gin aadaikai gin amu idi aaduindagaiñdïrï? Gï agai xi gaagagi aanï ixdukatai ibuadagi sai kïïgakïrï gin nïijadagi go óídakami. Podukai gia kïïga gin miadïgida antaada ïgai kiikidïrï dai biakamu aanï xakoga gin urhiñagi gin aadaikai gin amu— gï ïrhidi. —Mai bia aanï gubukarhigai xi gaatabuadagi bïïtïkamiïrï di. Dai xaïrai aanï xi tanïdagi soiñi oidakami— gï ïrhidi ïgai.
Daidi bhodïrï sai pobïrhi ïgai,
—Aa ka máí aanï ixdukatai iduñagi—.
5Daidi bapaidi ïgai go odami ix makïdï buaturhi amudï dai ïjïkobai aatagidi.
—¿Pïxi buaturhi aapi gin amu?— itïtïdai ïgai go ïpïgadï.
6Bai go makïdï gabuaturhi potïtïdai,
—Buaturhi aanï ïmo ciento tambo sudakami asaitigadï olibo— itïtïdai.
Daidi go pioñi potïtïdai,
—Tami daka go paperhi xako ojixi xïïxi buaturhi aapi. Bhïiñi otoma dai oja sai buaturhi aapi mos arhi tajukami ciento— itïtïdai.
7Dai bhodïrï báí ïgai ïmai daidi potïtïdai,
—¿Aapia, bïïxi buaturhi aapi gin amu?— itïtïdai.
—Ïmo ciento bhaimokoroi tïrhigi— itïtïdai go gïmai.
Daidi go pioñi potïtïdai,
—Tami daka go paperhi xako ojixi pïx xïïxi buaturhi. Bhïiñi otoma dai oja sai mos arhi maakokobhai buaturhi aapi— itïtïdai.
8Dai gokiïrï amudï go pioñi máí xïï kïïga gï tïgito nïiditadai ïgai gaagaitai ix dukatai duñagi sai kïïga ïldana oidakaradï. Dai amudï potïtïdai sai kïï iduitadai tomaxi mai sïïrhi ibuadamikatadai ïgai— itïtïdai Suxi.
—Podukai aatabuayi odami ix makïdï adaimïi tïgibudadï tami idi oidigi daama óídakami tudu. Dai aanï aagai sai ïgai kïïga gïn tïgito nïidiña ix dukatai ibuadagi ïïgi aaduñdï buidïrï ix makïdï óídaga tami idi oidigi daama. Kïïga gïn tïgito nïidiña ïgai ixdukatai ibuadagi sai kïïga ïldana oidakaradï tudu. Dïï gia Diuxi maamaradï mai pokaxi gïn tïgito nïidiña ix dukatai ibuadagi. 9Dai aanï aagai sai aapimï gï agai xi gïn tïgito nïijadagi ixdukatai ibuadagi ïpï. Gï agai tudu xi soikïdagi aapimï jaa gïn buxtuidagakïdï sai gïn oigïda ïrhidiña ïgai. Podukai gokiïrï xïïxkadï ka maiti ibuadagi soiñi gïn buxtuidaga ka iimïkai aapimï tami idi oidigi daamaiñdïrï aidï gia ix makïdï soi aapimï gïn miadïgidamu bhai ïrhiarakïdï gïn kiiyïrï tïbagiana. Ami gïn kii mai ugiti agai tomarhi ïmo imidagai tudu— itïtïdai Suxi mamaatïrdamigadï aagaitai ïmo maaxidaragai ñoki.
Suxi aagai ix dukatai gï agai xi ibuadagi mamaatïrdamigadï buxtuidadïkïdï
10—Daiñi— itïtïdai. —Ïïmo odami kïïga ibuayi xïïxkadï gïn nukatuldagi ïgai ixtumaxi. Bïïxkïrï kïïga ibuayi ïgai tomaxi gïn nukatuldagi ixtumaxi mai xii kabami namïakami tudu. Kïïga ibuayi ïgai nukadatai ixtumaxi mai xii namïakami xi kaxkïdï gï maatï ïpï sai kïïga ibuadamu ïgai ix gïn nukatuldagi ixtumaxi kabami namïakami ïpï. Dai podukai ïpï ix mai kïï ibuadagi ïgai nukadatai ixtumaxi mai xii namïakami gokïdï gï maatï ïpï sai mai kïï ibuada antaada ix gïn nukatuldagi ixtumaxi kabami namïakami ïpï. 11Kaxkïdï gï agai aapimï xi kïïga ibuadagi gïn buxtuidagakïdï ix makïdï bipiatu aapimï tami oidigi daama. Gobai ix makïdï oidaga tami oidigi daama mai xii ïr namïakami tudu. ¿Dïï gia xi mai kïïga ibuadagi aapimï gokïdï aidï gia dukatai gïn nukatuldana Diuxi ixtumaxi kïïgakïrï ïr namïakami ix makïdï gamamaakai ïgai tïbagiañdïrï?—
12—Daiñi, Diuxi ïgai dai gïn nukaturhi ixtuma bia aapimï. Ïgai tuidadï gobai. Tañubidikami bia aapimï gobai tudu. ¿Dai ix mai kïï ibuadagi aapimï gokïdï ix makïdï maiti ïr gïn tuidaga dukatai gïn óídana Diuxi ixtumaxi namïakami sai ïïgi gïn tuidagakagi?—
13—Daiñi, ïmo sosiaxikami dukai pioñi mai bhaiga xi biakagi goka amudï. Kaxkïdï tudu bamioma oigïdamu ïgai ïmoko dai go gïmai mai xu go kaxi. Ipïrhiadamu xi ïmadï dakagi ïmoko dai dagitomu ïgai go gïmai. Pomaaxi go sosiaxikami dukai pipioñi tudu. Dai podukai ïpï mai bhaiga aapimï xi adaimuagi go tuminxi dai oijadagi Diuxi ïpï. Mai bhaiga aapimï xi bïï gokatai bïïtarï óídakagi tudu— itïtïdai.
14Dai ami darakatadai chïki fariseo dai sïïrhikïdï ojoidi ïgai tuminxi xi kaxkïdï parunaitadai ïgai Suxi kaïkatai aatagidï.
15Daidi Suxi potïtïdai,
—Aapimï fariseos naana maaxi aaduindagai ibuadana ix makïdï buañixikami maaxi odami buitapi ipïrhiditai sai odami buañixikami ïrhiadagi gïn iibhïdaga gïn nïiditai. Dïï gia Diuxi kïïga nïidi ix maaxi gïn iibhïdaga dai mai xu xi mosïkaxi nïidi ïgai ixtuma buadagi aapimï. Kïïga gï maatï tudu sai Diuxi tukuragai dukai nïidi naana maaxi ixtumaxi ix makïdï odami buañixikami dai namïakami aagai— itïtïdai.
Suxi ikaiti sai mai ugida go sïïrhikamigadï Moises aidïxi dibia go bhai ïrhiaragai aatagi
16Dai Suxi oi aatagidï daidi potïtïdai go fariseos ïpï,
—Daiñi— itïtïdai. —Ka ïïki abhiadïrï biakana odami go sïïrhikamigadï Moiseskaru ïmadï ojadï go gaa ñiñokituldiadamigadï Diuxi. Gobai buaboitudaiña odami tudu. Dïï gia aidï abhiadïrï xi dibia Juan go bapakonadami, aidï abhiadïrï kaïkana odami aatagadami ix makïdï aagaiña go bhai ïrhiaragai aatagi. Dai go bhai ïrhiaragai aatagi aagai ix dukatai gatïanïi Diuxi dai ix dukatai bhaiga odami ix biakagi oigaragai sai Diuxi tïanïna. Mui odami buaboitudaimi dai bapakimi xako gatïanïi Diuxi tudu. Kabami gïn aajagïï ïgai bïïxkatai dai mai gïn daadagitoi ix tomarhi ïmo ixtumaxi sobhidagi ipïrhiditai ïgai xi Diuxi tïanïdagi tudu—.
17—Buaboitudai ïgai go bhai ïrhiaragai aatagi tudu dai biakana oigaragai xi Diuxi tïanïdagi. ¿Dai gobai ix tïiya ïrhidi sai ka maiti ïr soiñi go sïïrhikamigadï go Moises ïmadï go ojadï go gaa ñiñokituldiadamigadï Diuxi ix makïdï buaboitudaiña odami ïïki abhiadïrï? ¿Xibi ix bhai ka mai namïga gobai? Xadïrï. Xadïrï ugitïna gobai mos aagaitai aatïmï go bhai ïrhiaragai aatagi di— itïtïdai.
—Daiñi— itïtïdai. —Otomioma ugiti antaada go oidigi ïmadï tïbagi xi bhai go arhidukïdioma ñoki sïïrhikamigadïana Diuxi. 18Dukami sïïrhikamigadïrï Diuxi po kaiti sai kabami ïr soimaaxi xi ïmo kïïrhi dagitoagi oñigadï dai ïmadï biïyi ïmai. Dai podukai ïpï xorai ïmadï biyagi oñibarudï ïmai soimaaxi ibuayi ïpï. Gobai ïr ïmo sïïrhikamigadï Diuxi dai kia namïga xibi dai mai ugitimu gobai tomarhi ïmo imidagai— itïtïdai.
Suxi aagai ïmo aatagi aagaitai ïmo gï bidakami ïmadï ïmo soitigami Lasaro tïgidukami
19Dai Suxi aagidi go fariseos ïmo maaxidaragai aatagi daidi potïtïdai sai,
—Ïmo imidagai oidakatadai ïmo kïïrhi kïïga gï bidakami. Gï aadaiña ïgai yukuxi moraduakami kïï namïakami ïpïan dukai ïmo rey. Ïmo bagimiïrï dukai oidakana ïgai bïïx tasai kïï xioma oidakatai ami kiidïrï. 20Dai gïï kuraragatadai bakidï xikorhi dai kuuparadïana go kurarai kaatïkatadai ïmo kokoadï soitigami Lasaro tïgidukami. Iipoidagakatadai ïgai bïï sudakami tukugadï. 21Dai ipïrhiditadai go Lasaro xi ugiagi tomaxi lïïchi kuadagai surhibaru ix makïdï gïsïi go gï bidakïdï mesagadïañdïrï dai ami kuuparagana kaatïkana sa bhai bhidana go oidakami. Kabami soimaaxi taatakana go Lasaro tudu. Dai ïkobïrakoga daibuiña googoxi dai biñumidiña iipoidadï—.
22—Daidi muu go soitigami tai dada tïtïañikarudï Diuxi dai baidakai mïïka xako daka go Abraamkaru sai sonoana dakana ami. Dïï gia go gï bidakïdï aidïxi muu ïgai gï yaasatu tukugadï 23dai ibhïadï jii xako gïn maamaixatudai koidadï, xako hades tïgidu ïmo ïmapïkïrï tudu. Dai kabami soi taatamaiña ïgai ami dai táí nïnïaba dai tïï ïgai go Abraamkaru xi maigobai mïkaxi daka. Dai tïï ïgai go Lasaro ïpï xi sonoana daka go Abraamkaru—.
24Daidi gïgïr iñakidi go gï bidakïdï go Abraamkaru daidi potïtïdai,
—Aapi kïrhiodami Abraam, soi gïlda in nïida dai aagida go Lasaro sai sudaïrï badaidiña masabigadï dai sai bhaigobai dibiana dai ïbogidana gin nïïnï. Ka arhiï soi taatamaiña aanï tami idi taiyïrï— itïtïdai.
25Dïï gia go Abraamkaru potïtïdai,
—Aapi kïïrhi, gï tïgitoñi xïï xioma oidakatadai aapi oidigi daama. Aidï naana maaxi kïkïïgadukami biakatadai aapi dai go Lasaro naana dukai soimaaxi taatamaiña aidï. Dai xibi ka ayi go Lasaro ix bhai ïrhiadagi dai aapi gï ajïga xi soimaaxi taatagi. 26Dai tomax dukai mai bhaiga go Lasaro ix gamo imiagi taagiña kaatïkatai ïmo gïï koborhiki. Mai bhaiga daibuñagi tomarhi tabhaidïrï gamoko tomarhi mïkadïrï bhaigobai ïpï— itïtïdai.
27Dai go gï bidakïdï potïtïdai,
—Gï daanïi aanï tuduidï aapi kïrhiodami Abraam pai otosa go Lasaro sai imïna kiidïrï gin oga. 28Ami bia aanï gin susukurhi dai gin xixïgi. Taamadu ïgai. Otosañi go Lasaro tudu sai aagidana ix dukatai iduna ïgai sai xïxkadï koiyagi ïgai mai dadiagi ïpï tami xako mos ïï soimaaxi taatamai odami— itïtïdai.
29Dïï gia go Abraamkaru potïtïdai,
—Ka bia ïgai ojadï go Moiseskaru ïmadï go ñiñokituldiadamigadï Diuxi. Kïï bhaiga ïgai xi kaïkagi gobai dai ïïgiadagi ix ipïrhiadagi— itïtïdai.
30Daidi go gï bidakïdï potïtïdai aidï,
—Cho aapi kïrhiodami Abraam. Xadïrï ïïgiada ïgai go ojai— itïtïdai. —Dïï gia xi imiagi ïmo mukiadï dai aagidagi aidï gia ïma dukai gïn tïtïgito antaada ïgai— itïtïdai.
31Dïï mos go Abraamkaru potïtïdai,
—Ix mai ïïgiada ïgai ojadï go Moiseskaru ïmadï ojadï go ñiñokituldiadamigadï Diuxi aidï gia xadïrï ïïgidana ïgai ñokidï ïmoko ix makïdï gï duakatudagi koidadï saagidañdïrï ïpï— itïtïdai.
Potïtïdai Suxi go fariseos ïmo maaxidaragai aatagikïdï tudu.
Currently Selected:
Lukas 16: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida