Éxodo 9
9
Qaỹa'uo' da le'ne' so neloipi
1Co'na'le, ca' ñi qara'gaxala' 'naaco' queso Moisés:
—Mo'e', quirepegue' ñi Faraón. Ca ma' vichita, ca 'ñiraco': Ñi qara'gaxala' ñí'maq qota'olec quena hebreoipi 'naac caqami': 'Xañirec na ỹalamqateripi, qaiyi nqouagaxainot aỹim. 2Ca no'm sqai 'xañirec, ta'ta'a quiyim ñaq nolli'sañi, 3ca' ñi qara'gaxala' nela' ma'le da lquesaxanaxa, taalec nqai'en na qalo'e'ipi hueetalec na no'ueenaxa. Ca' 'ue ma'le ca le'ne' 'xoic lecaic. Ca nilliviñi ma'le na shipiguiripi, 'ashinyipi, nauaanaxanaxa late'ellipi, huacallipi chaqai ana qagretaipi. 4Qam ñi qara'gaxala' ỹoỹooteta'oga ma'le na laloipi na Israel llaalqaipi quena laloipi na Egipto laseripi, qaiyi qaica ca ileu quena lalo na Israel llaalqaipi.
5Chaqai ñi qara'gaxala' ỹahote'e yi laloqojnec, ca 'naac:
—Ma' nete'e, ca' so'uet dajo.
6Ca' queso liỹa na'xa'a, ca' ñi qara'gaxala' ỹo'uet quiyim sá'ogue so laloipi so Egipto laseripi nilliviñi. Qam quena laloipi so Israel llaalqaipi qaica ca ileu. 7Ca' so Faraón relaataxan quiyim qara'ajnaxane'oga so laloipi so Israel llaalqaipi, qam qaica ca ileu. Qam qaiyiita so Faraón ỹa'ñaxat añi le'taxanata, ca sqai ỹaxanec quiyim eec so Israel llaalqaipi.
Qaro'goxona so nquenaxa
8Co'na'le, ca 'naaco' ñi qara'gaxala' queso Moisés chaqai queso Aarón:
—Coñiỹa ma'le ca lo, chigoxochiỹaugui ca nqatelaxanaxaqui. Ime, ca' da Moisés imiishiguim, ỹa'ajantac nqai'ñii so Faraón. 9Ca' cajo lo ñigui ma'le namoxoỹaxa, ca neuagaxajlec ma'le ná'ogue na 'laua, ca ỹa'ue ma'le na lquenaxa ná'ogue na qomyipi chaqai na iseripi quená'ogue na 'laua Egipto.
10Ca so Moisés chaqai so Aarón ỹaconta so lo quiñi nqatelaxanaxaqui, ca' querepegue' so Faraón. Ca' quiyi, ca' so Moisés imiishiguim so lo, ca' na qomyipi chaqai na iseripi quenaq ná'ogue na loshicmaxa. 11Ca' so 'viiquiaxairipi se ishit reloqoto'ot so Moisés, ma' saua'maxare chaqai sá'ogue so Egipto laseripi quenaq na loshicmaxa. 12Qam ñi qara'gaxala' ỹo'uet quiyim so Faraón ỹa'ñaxat añi le'taxanata, ca se na'xaỹaxanalo saua Moisés chaqai so Aarón. Ca' ipaquichigui dá'maq 'naaco' na'le ñi qara'gaxala' queso Moisés.
Qaro'goxona aso qalachi
13Co'na'le, ca 'naaco' ñi qara'gaxala' queso Moisés:
—No'chi'sashiguimo' nete'e ma' nete'etam, ca' quirepegue' ñi Faraón. Ca ma' vichita, ca 'ñiraco': Ñi qara'gaxala' ñí'maq qota'olec quena hebreo laseripi 'naac caqami': 'Xañirec na ỹalamaxareteripi, qaiyi nqouagaxainot aỹim. 14Ma' nagui sahotaque quiyim senaxalec qami' ná'ogue na ỹouaxanaxanqateripi, chaqai na rotaua'e'ipi, chaqai na qauochi' laseripi, qaiyi 'yiiñi' quiyim qaica ca 'nejem aỹim quená'ogue na 'laua. 15Ỹim seshit quet quiyim sachaxañiraxarom da iquesaxanaxa quiyim so'uet ca nouaxanaxashichi' senaqairaxalec, chaqai na qauochi' ca ne'ne', ca shi'gue quet palac aqami' quena 'laua. 16Qam ñca'laxachisauec, qaiyi huañita da iquesaxanaxa, ma' sahotaque qaỹa'den quená'ogue na 'laua. 17Qam qaiyiita quedá'ogue dajo, ñaq quepaqchisa'piguit na ỹalamaxareteripi, ca sqai 'xañirec quiyim eec. 18Vichiguiño' ma' nete'e ma' 'nejem nagui, ca' anac nqaishin aca qalachi late'ogue' se ỹauanapega 'ue aca liỹa 'nejem taalec na Egipto quesá'ogue so 'au ñaxaripi. 19Ca' vichiguiño' laataxañirelec quiyim qaỹa'maxajñi ca loma' na qalo'e'ipi chaqai ná'ogue na hueeta'oga na no'ueenaxa. Ma', ma' novi' aca qalachi, ca' nalauajñi ná'ogue na qomyipi chaqai na iseripi qaica ca ri'iito'ot lapooque'.
20Ca 'uo' na quena lotauaripi so Faraón no'cha'a dá'maq 'naac ñi qara'gaxala'. Ca' na lelaatqaipi chaqai na laloipi ỹa'ue na ỹano'ot lapooque' nqai'en. 21Qam 'uo' na liỹa sqailligueme' huelec da 'naac ñi qara'gaxala', ca ỹaxantac quiyim qaica ca ỹano'ot lapooque' na lelaatqaipi chaqai na laloipi, ca' hueetauec nqai'en. 22Co'na'le, ca' ñi qara'gaxala' 'naaco' queso Moisés:
—Chaxañirishiguim na rqai'laxachi' quena piguim, qaiyi nac ana qalachi, ca' taalec ná'ogue na qom chaqai na iseripi chaqai na nanecsec quena 'laua Egipto.
23Ca' so Moisés ỹachaxanshiguimo' da lqai'laxat quena piguim. Ca' ñi qara'gaxala' nela' ana soxonaxa, nqai'legaxa chaqai ana qalachi, taalec nqai'en yá'ogue yi 'laua Egipto. 24Ca' ana qalachi chaqai na nqai'legaxa ỹaatqajam se rachipi. Ca quedá'ogue dá'maq chicqochi'ño' na' 'ue yi Egipto se ỹauanapega quiyim 'ue quet aca qalachi late'ogue' 'nejem aso'maxare. 25Aso qalachi naqaguijñi ná'ogue ná'maq 'ue quiyi na'laua so Egipto laseripi, nalauajñi na qomyipi chaqai na iseripi, chaqai naqaguijñi ná'ogue ana nanecse quena no'ueenaxa, chaqai naqaguijñi ana lasote ná'ogue ana qo'paq quiyi 'laua Egipto. 26Qam quedá'ogue dajo quiyi 'laua Gosén qaca aca 'oonole qalachi taalec yí'maq neetalec so Israel llaalqaipi.
27Ca' so Faraón roỹaxane'ogalo' saua Moisés chaqai so Aarón. Ca 'naaco':
—Ñauatalta' quiyim 'ue da so'maqajantac, qam chi ỹasauaxaset chaqai na iuo' laseripi. Mesqaiñi ñi ra'gaxalari. 28Ma' mashic ỹapaguelec ana soxonaxa chaqai ana qalachi nela' ñi qota'olec. Ca' vichiguiño' nagui, ca' tot ñollirañi qamiri. Shiilaxañilgoto qomi' queca ra'gaxalari, ca' ỹim saxandec qamiri quiyim quiipegue' ca'maxare.
29Co'na'le, ca' so Moisés 'naaco':
—Ca' nagui ma' sovire'oguiyi quena na'a' lodegaxat, ca' ñanojshiguim na ỹaqai'laxat. Ca ñqouagaxainot ñi qara'gaxala', ca' ỹaxanegue ma'le ana qalachi chaqai qaca ma'le ana soxonaxa, qaiyi 'yiiñi' quiyim ñi qara'gaxala' loiquenatec na 'laua. 30Qam ỹim ỹaatqajam sa'deenta quiyim qami' chaqai na rotaua'e'ipi se no'cha'a ñi qota'olec ñí'maq qara'gaxala'.
31Ca' naua nanaxanqate' quena lino chaqai ana cebada, aso cebada mashic 'ue ana la chaqai so lino mashic 'ue ana lenoỹaxai na' qanopoxoỹaxajñi caso qalachi. 32Qam so trigo chaqai so centeno, ca' qaica ca 'negue, ma' liỹa 'uala na'le.
33Ca co'na' so Moisés inoxonec quiyi na'a' lodegaxat na' ime retaqata'pegue' so Faraón, ca' ỹachaxanshiguim da lqai'laxat, nqouagaxainot ñi qara'gaxala'. Ca chaqa'ma' ỹaxanegue aso qalachi chaqai so ỹaxat, chaqai tot qaca aca soxonaxa. 34Qam so Faraón co'na' ỹa'den quiyim ỹaxanegue so ỹaxat chaqai aso qalachi, ca lotqai 'ue da lasauaxaset. Ca' tot qaisoota se na'xaỹaxan, ma' qai'neeta sá'ogue so lotauaripi. 35Ca' so Faraón lotqai ỹa'ñaxat añi le'taxanata, ca lotqai se ỹasenec quiyim eec so Israel llaalqaipi. Ca' ipaquichigui dá'maq 'naaco' na'le ñi qara'gaxala' queso Moisés.
Currently Selected:
Éxodo 9: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.