Génesis 1
1
Co'na' qaỹo'uet ná'ogue nanchaqaina
1Co'na' ñaqai chita'gue ỹo'uet ná'ogue ñi qota'olec, ca 'au ỹo'uet na piguim chaqai na 'laua. 2Na 'laua ỹaatqajam sqaico' ca la'maqa' na'le; 'ec nodaachiguiñi na huaxaỹaq chaqai na napalaxa, ca' so ne'espíritu ñi qota'olec queeteguelec na huaxaỹaq.
3Co'na'le, ca 'naaco' ñi qota'olec: ¡Sahotaque quiyim re'qoochiguiñi!
Ca chaqa'ma' re'qoochiguiñi. 4Ca' ñi qota'olec co'na' iuana 'maxaraic quiyim re'qoochiguiñi, ca' ỹoỹoote'oga queso napalaxa. 5Ca na'xa'a leenaxat nqai'en só'maq re'qoochiguiñi, chaqai so napalaxa, ca' leenaxat nqai'en pe. Ca' chaqaido' dá'maq 'neeta na' ime so 'auaxaic na'xa'a.
6Co'na' ime, ca 'naaco' ñi qota'olec: 'Uo' ma'le ca lquepaxaset quiyim ỹoỹoota'chi na huaxaỹaq, qaiyi naua'maxare ỹoreta'chi.
Ca' chaqaida 'neeta. 7Ca' ñi qota'olec ỹo'uet so lquepaxaset, ca ỹoỹoota'chi na huaxaỹaq; 'uo' na lahi pa'aañi queso lquepaxaset, chaqai so liỹa lahi, ca' pa'aashiguim. 8Ca' so lquepaqataxanaxat leenaxato' nqai'en piguim. Ca' chaqaido' dá'maq 'neeto' na' ime so liỹa na'xa'a.
9Co'na'le, ca 'naaco' ñi qota'olec: Quiyim na huaxaỹaq pa'aatañi quena piguim 'oonoqui' ca lapooqo', qaiyi re'oq cá'maq rashivita.
Ca' chaqaida 'neeta. 10Ca ná'maq rashivita ñi qota'olec leenaxato' nqai'en 'laua, chaqai ná'maq lapooqo' na huaxaỹaq leenaxato' nqai'en huaaxai.
Co'na'le, ca' ñi qota'olec iuana quiyim ná'ogue ỹa'maqachiguiñi. 11Ca' 'naaco': Quiyim na 'laua ñaxat nqai'en ná'ogue ana ỹoreta'oguit ñaxashiguim: na 'uaqapi chaqai ana qo'paq 'ue ana la.
Ca' chaqaida 'neeta. 12Ca' na 'laua ñaxat nqai'en ná'ogue ana ỹoreta'oguit ñaxashiguim: na 'uaqapi chaqai ana qo'paq 'ue ana la. Ca' ñi qota'olec iuana quiyim ná'ogue ỹa'maqachiguiñi. 13Ca' chaqaido' dá'maq 'neeto' na'le co'na' ỹovirerec saua tres na'xata'.
14-15Co'na'le, ca 'naaco' ñi qota'olec: 'Uo' ma'le caua ỹavigouguilo quena piguim, ca' coỹarerelec na 'laua, ca ỹoỹootere'oga yi na'xa'a quiyi pe, chaqai ỹo'uet quiyim qaretane' naua na'xata', naua ñaxari, chaqai naua na'xata' napoxoqui'.
Ca' chaqaida 'neeto' na'le. 16Ca' ñi qota'olec ỹo'ueeto'o' saua dos ncoỹeraxanqate: só'maq paguec lecaic coỹarelec nqai'en yi na'xa'a, chaqai asó'maq paguec cocho'lli', ca' coỹarelec nqai'en yi pe. Chaqai qai'neeta ỹo'uet ana huaqajñi. 17Ca' ñi qota'olec ỹo'ueeto'o' naua lcoỹeraxanqate, ca ỹano'oto na piguim qaiyi coỹarerelec na 'laua 18quiyi na'xa'a chaqai quiyi pe, chaqai quiyim ỹoỹoote'oga yi re'qoochiguiñi quiyi napalaxa. Ca' iuana quiyim ná'ogue ỹa'maqachiguiñi. 19Ca' chaqaido' dá'maq 'neeto' na'le co'na' ỹovirerec saua cuatro na'xata'.
20Co'na' ime, ca 'naaco' ñi qota'olec: Quiyim na huaxaỹaq ñaxatec nqai'en ná'ogue nanchaqaina iseripi huaxaỹaqseripi, chaqai quiyim 'ue ana qo'o ỹootac quena 'laua.
Ca chaqaida 'neeta na'le. 21Ca' ñi qota'olec ỹo'uet ná'maq chalego lecaic huaxaỹaqseripi, chaqai ná'maq ỹoreta'oguit iseripi ñaxatougui hueetaugui na huaxaỹaq, chaqai ná'ogue na ỹoreta'oguit ỹoipi.
Ca co'na' ime, ca' ñi qota'olec iuana quiyim ná'ogue ỹa'maqachiguiñi. 22Ca' ỹaanec da no'uen la'qaatec quená'maq lo'ueenatec iseripi, 'naaco': Ỹaatqajam 'xoic ma'le ca llaalqaipi, no'qaachigui ma'le ana huaaxai; chaqai 'xoic ana ỹo ma'le quena 'laua.
23Ca' chaqaido' dá'maq 'neeto' na'le co'na' ỹovirerec saua cinco na'xata'.
24Co'na'le, ca 'naaco' ñi qota'olec: Na 'laua ñaxat nqai'en ná'ogue na ỹoreta'oguit iseripi: na neloipi, chaqai na neuec, chaqai ná'maq nqai'queetegueri' quena 'laua.
Ca' chaqaida 'neeta. 25Ñi qota'olec ỹo'ueeto' ná'ogue na iseripi. Ca' iuana quiyim ná'ogue ỹa'maqachiguiñi.
26Co'na' ime, ca 'naaco' ñi qota'olec: Nagui, ca' so'ueetqo' ca qom. 'Nejme' qomi', ca' ỹapacauec ca' ishit reloxoỹa'a na nalliñipi, chaqai na ỹoipi, chaqai na neloipi iseripi, chaqai na neuequipi, chaqai quená'maq nqai'queetegueri' quena 'laua.
27Co'na' ñi qota'olec ỹo'uet so qom,
nadenaxatalta', ca' chaqai 'nejem ñi'maxare da no'ueenataxac;
ỹale chaqai 'aalo saua ỹo'ueete'.
28Ca' ỹaanouguilo da no'uen la'qaatec, 'naaco':
'Xoic, ỹaatqajam 'xoic nqai'ñii ca qachaalguii;
no'xataxachijlec na 'laua chaqai 'viiquiñitac;
chaqai 'viiquiñitac na nalliñipi chaqai na ỹoipi,
chaqai ná'ogue na iseripi nqai'queetegueri'.
29Ime, ca 'naapegalo': Saanema qamiri ná'ogue aná'maq ñaxat quena 'laua chaqai ná'ogue ana qo'paq 'ue ana la. Ná'ogue ana'maxare chi noqohi ana la. 30Qam ná'maq neuec iseripi, chaqai ná'maq nqai'queetegueri' quena 'laua, chaqai na ỹoipi, saanem na 'uaqapi quiyim ỹa'ic.
Ca' chaqaida 'neeta. 31Ca' ñi qota'olec iuana quiyim sá'ogue so lo'ueenatec ỹa'maqachiguiñi. Ca' chaqaido' dá'maq 'neeto' na'le na' ỹovirerec saua seis na'xata'.
Currently Selected:
Génesis 1: MCV91
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.