MATAYO Alki/ituú niiná daanduú kitaábuuwihe
Alki/ituú niiná daanduú kitaábuuwihe
Ya/abusmo Matayo an heé ya/abtoorí hho' gaa gooin. Umuuwós oo hatlá' a Laáwi. Qoomár kuwa ateetiiká nee Yesu gadiyér aa tleéhh a koódi gan ohaahín, koódirií ar waawutmoó Roma. Múk adoorí baraá xoorór Yahudiro kuna bartá tlakuuseérí harafaár. Ala Yesu Matayo guri ateét as nguwa eeharusmoowós tleehhi.
Matayo ya/abtór hho' ar Yesu gana gooín amór múk Yahudi. Inós muruú tsár daanduú Yesuwo guna gawdeés baraá gooirose, gár geera a tí: Yesu an waawutmoodá' hardáh, kudá' taa al'axweés oo ta baraá gixsár Betilehemúrí laqwaali (2:2-6). Waawutmoowí a garmoó Daudi, sleeme a garmoó Abrahamu (1:1). Ar loohír Yesuwo waawuti'iimár Mungú naa hardát (4:7). Sleeme baala ni xeér ar waawutmoowí niwa ki/i, iri iwiit gawaá kitaangós oo xirif, xoordu sleémeero giri dír geeraawósií burumbuur, giri sakwasleemuut ar qoomoó tlehhmi'ii'ín (25:31-46). Ala dír sakwasleemarí nira xeeriiká, ya/abtór hho' ar waawuti'iima kan ala alki/iit baraá xoordu sleémeero as kiwa eeharuuseerós tleehhi (24:14; 28:19).
Gár tsár ar Matayo aa gooín daanduú Yesuwo a tí: Yesu a garmoó Mungú. Ar loohír Yesuwo «Mungú i dinkwa nee atén.» /Aymuuwí káh «Mungú i dinkwa nee atén» kuna kitaábuuwír iimu/ún nee kuri kitaábuuwír alhhe'eés, qoomár Yesu iwa oó', «Ga/aawaak, aníng a dinkwa nee kuungá' ay alhhe'eesoó yaamu.» Qoomár Yesu kuwa baatimiisi, Mungú guna xu'utís tawa garmaawós, iwa kaahi, «Kwí an garmaaeé', sla'aarusmooeé' kudá' aníng iga qwal/atis.» (3:17). Aluuwo Neetlaangw Yesu guri iiaraa'ár ar umuuwí oo garmoó Mungú (4:1-11). Tam qoomár kuwa kikií' gawaá Msalaába, mukdá' gwaa kikii' guri niqín tawa kaahi, «Kuúng barqo garmoó Mungú, aweeráng gawaá Msalaábaro.» (27:40).
Tam adoorihe eeharuuseerós gwaa haratlintí' adór tar garmoó Mungú (14:33; 16:16). Slám askaáridá' gwaa xuun qoomár kuwa gaamisi, aluuwo guna haratlintí', iri ó', «Ar ló', heewí a tsuwá garmoó Mungú.» (27:54). Gawaá adoorihe Matayo baraá ya/abtór hhoe gaa gwa/atís adór Mungú ar loohír Yesuwo Kaniísarós ngira iimu/ún. Nee Kaniísarós an mukdá' inós gwaa haratlintii' (16:18; 18:17).
Digir wakeetíngw kitaábuuwí:
Tlahhoó Yesu Kristo nee xwaylarós. 1:1—2:23
Gadiyér Yohanedá' Baatimaamiís 3:1-12
Yesu kuwa baatiís nee kuwa iiaraa'ár 3:13—4:11
Yesu gadiyeé ngiwa baraá Galilayár wa tleéhh 4:12—18:35
Iimír Galiláyár wa tleemu ay Yerusalemu 19:1—20:34
Gadiyér aa tleéhh wiíkidár alhheesaywo baraá Yerusalemu nee inslaawaydae 21:1—25:46
Slahh'eemisuú Yesu nee gwa'araarose 26:1—27:66
Waasle/uú Yesu 28:1-20.
Currently Selected:
MATAYO Alki/ituú niiná daanduú kitaábuuwihe: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.