MATAYO 4
4
Yesu kuwa iiaraa'ár
(Marko 1:12-13; Luka 4:1-13)
1Yesu kuri huúw nee Qeeruú hhoohhoó' oo Mungú ay baraá darma, as kuwa iiaraa'ari nee Neetlaangw. 2Iri gwaawín deelo mibeeri tsiyáhh, tlaatla/aangw nee xweeraawo, iri qwariít. 3Neetlaangw guri i daqáy, guri báy, «Kuúng barqo Garmoó Mungú, tlaa/anoowí i ilawatseek i muruú /ayma tleehhiti.»
4Ala Yesu iri oó', «Kaa gooín, ‹Hee gár ir slafi a muruú /ayma kiloseeká, ala aqo har umuúqo axweesantá amór Mungú daahh.› »
5Yesu kuri huúw nee Neetlaangw ay baraá Gixsár Hhoohhoo' ar Yerusalemu, guri qaás gawaá tsintá Doó Mungú. 6Guri báy, «Kuúng barqo Garmoó Mungú, ti yaamií kwahh, asma kaa gooín,
‹Malaykeerós ngi amoorók i ya/aaw.›
Nee sleeme kaa gooín,
‹Kuúng u gagát ar dabaaín,
as yaaeerók tlaa/a mingiwa tunqalá/.› »
7Yesu guri báy, «Ala tí sleeme kaa gooín, ‹Aakoó Munguúwók mu iiaraa'araar.› »
8Neetlaangw Yesu guri malé gáwtí tsa/aás gawaá tloomár ló'wa tleer, guri waawuti'iimár yaamií laqán sleémeero, nee xirfuuwose, 9guri báy, «Muruuwí sleémeero aníng ngu kuúng i haniís, aníng bira i tumbararaa'át iri sluufmís.»
10Yesu iri oó', «Neétlaangw, quútl. Asma kaa gooín, ‹Aakoó Munguúwók na sluufmiseek, nee inós kilós ku sagadiyús.› »
11Aluuwo Neetlaangw iri quútl dír Yesuwo malayke nay hardát, Yesu guri sagadiyús.
Yesu gadiyeérós ngiwa iimu/ún baraá Galilayaro
(Marko 1:14-15; Luka 4:14-15)
12Yesu ngiwa axaás adór Yohane kura tseék, iri kií/ ay yaamaá Galilaya. 13Iri gixsár Nasaretír wa lóh iri hotángw áy gixsár Kapernaumu. Kapernaumu a gixsár afaá tlawtá Galilayár i dirii', baraá yaamaá Sebuluni nee Naftali. 14Adoorí ina tleehharút asma /aymuuwí aarusmo Isaya aa oó' iwa boo/i, kudá' iwa oó',
15«Yaamaá Sebuluni nee yaamaá Naftali,
yaamaá bihhaá tlawtí tseew,
gayuú Yordani,
Galilayár bartá xoordaá hatlá',
16mukdá' aa hoot baraá giwtír wa ale
gwa/aateemaá ur kaa ár.
Nee kudá' naa baraá yaamaá geehhaantamoó gwa'arár wa hootiye',
gwa/aateema ngaa i gwa/aatiyé'.»
17Iimír qoomaadá' wa tleemu Yesu axweesantá Mungú gari iimu/ún dahareemisuuwo, iri káh, «Hhu'u'umé' asma waawuti'iimár doori naa naká/.»
Yesu múk tsiyáhh oo siyoó ohahiím nguwa ateét
(Marko 1:16-20; Luka 5:1-11)
18Qoomár Yesu iwa afaá tlawtá Galilayár wa hi'iimiti, hha'aá tsár gina ár. Kooko a Simon, kudá' ta babay Petro, nee hhiyaawós Andrea, ta baratsufoó kwakwaahh baraá tlawi, asma tawa inooín a múk siyoó ohahiím. 19Yesu giri báy, «Qwalaasé', án eeharaaré', án kuungá' nu intsaahhatís adór muu ngur amor'eé' huwahuba'.» 20Siiwadár kilae baratsufay'ín nguri geexayé' Yesu kuri eehár.
21Yesu iwa geerií kumiít hha'aá tsár awa hatlá' giri ár. Inooín a Yakobo nee Yohane, daaqoó Sebedayo. Inooín ta baraá miringamooín i dirii' dinkwa nee baabuúín Sebedayo, ta baratsufay'ín amohhe'eemiis. Giri ateét. 22Hamtidár kilae miringamooín nee baabuúine kiri geexáy, Yesu kuri eehár.
Yesu boo/oó yaariír nguwa sagadiyuús
(Luka 6:17-19)
23Yesu ina hi'iimiít baraá yaamaá Galilaya sleémeero, iri baraá maraá saalíngw wa intsaahhatimís, nee Ya/abtór hho' ar waawuti'iimár Mungú gari alki/iít. Múk tiqtuuse guri hungu/uumiís nee kudá' slaqo tlakwen sleémeero. 24Kaangós iri tsiyaayaaxaát baraá yaamaá Shamu sleémeero. Múk tiqtír dimbadimbé kunguri huúw dirós i alé, nee kudá' slahh'amuú koomá', nee múk neetlaame aa eér, nee múk /araraám, nee múk tiqtír sol'omit, sleémeero giri hungu/umiís. 25Yesu kway eehár nee boo/oó yaariír oo amór Galilayár daáhh, nee yaamaá Dekapoli nee Yerusalemu, nee yaamaá Yudea nee gayuú Yordani.
Currently Selected:
MATAYO 4: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.