MATAYO 3
3
Alki/ituú Yohanedá' Baatimaamiís
(Marko 1:1-8; Luka 3:1-18; Yoh 1:19-28)
1De'emaadae Yohanedá' Baatimaamiís nina hardáh, axweesantá Mungú gana alki/iít baraá darmuú Yudeár wa ale, iwa kaahi, 2«Hhu'u'umé', asma waawuti'iimár Mungú naa naká/.» 3Asma Yohanewí an kudá' kangós taa axweés nee aarusmo Isaya iwa kaahi,
«Afór hee iiárií qaasaak
ar tseeamiim baraá darmuú wa ale, ar kah,
‹Loohír Aako amohhe'eesaak,
nee waarahhmawós gan'aasaak.› »
4Yohane tlawuú aa tsiít kuna tleéhh ar se'éngw angamía, nee afetloowós a himuú kaahari, nee muruú /aymaarós a ingigi nee danuú darma. 5Múk Yerusalemu nee yaamaá Yudea sleémeero nee yaamaá bihhér Yordani kuri i daqáy. 6Tlakweemaaín kiwa hhu'uu'ún, giri baatimiís baraá yaaér Yordanír wa ale.
7Múk yaariír oo Farisayo nee oo Sadukayo kuna i daqáy, as ngiwa baatimiisi. Ala Yohane ngiwa ár giri báy, «Kuungá' xwaylár dáyshe, heé kuungá' naa gurbuu' sakwasleemár hi'iit kawa ilagogoba'? 8Tlehhma'aá hhu'u'ungwhúng ngu laqaqamá' na tleehhaak. 9Slám ma baraá munerhúngií kaahara', ‹Abrahamu a baabuúrén.› Án a kah, Mungú ga aleesláy tlaa/eeká' ngiwa na/aá Abrahamu tleehhi. 10Hám tsawo kaa qaroó qaás baraá gam'ér xaai. Gawaá adoorihe umuúqo xa'anoó mamaá hho' gi laqwalimaaká, ku tsaat, kway kwaahh baraá asla. 11Ar ló', aníng gár kuungá' nur baatimiis a ma'aay as tawa hhu'u'uundé'. Ala kudá' aluueé' wa hardáh, inós i /uuruú kón ta aninge. Tam aníng a hariimaaká ya/ataawós ngiwa gagaar. Inós nun baatimiis ar Qeeruú hhoohhoó' oo Mungú nee ar asla. 12Iimpeerós ar haritleemis ga kón, nee dirós tidár haritleemis ga fiitsa hhe'ees, nee balaangw guri baraá kuuntír i qaas, ala muundáy gun daa/ ar asltá baloó gwaa'aaká.»
Yesu kuwa baatiís
(Marko 1:9-11; Luka 3:21-22)
13Qoomaadae Yesu nina tláy amór Galilayár wa aleeró ay amór Yordani, dír Yohane, as kuwa baatisi nee Yohane. 14Ala Yohane aa lak ya/aniká, iri oó', «Án gár ni slaa' bar án kuúng in baatís, adór kuúng nir amor'eéní hardat?»
15Yesu iri oó', «Adoorí na ya/aameek, asma gár atén tiwa hariím, tí an tleehhaán as gan'amuú Mungú kuwa boo/eesaan.» Yohane iri ya/án.
16Yesu baatisaro kuwa hhe'eés, hamtidár kilae iri baraá yaaér wa ti'iít. Doori nay gweeritiyé', Qeeruú Mungú guri ár iwa gawaawós i awdiiti adór hhookír wa ale. 17Afo nay gawaá doorí wa ilawáts iri ó', «Kwí a Garmaaeé', sla'aarusmooeé' oo aníng iga qwal/atis.»
Currently Selected:
MATAYO 3: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.