মার্ক 6
6
নাসরদত্ প্রভু যীশুর অসর্মান
(মথি ১৩:৫৩-৫৮; লূক ৪:১৬-৩০)
1ইয়েনর্ পরেদি যীশু সে জাগায়ান্ ফেলেইনে নিজো আদামত্ গেলঅ, 2আর তা শিচ্চ্যগুনেয়ো তা সমারে গেলাক্। জিরেবার্ দিনোত্ তে সমাজ-ঘরত্ যেইনে শিক্ষ্যে দিয়্যে ধুরিলো। বোউত্ মানুচ্ তা কধা শুনিনে আমক্ ওইনে কুয়ো ধুরিলাক্, “এ মানুচ্চো কুত্তুন্ ইয়েনি পেলঅ? এই যে জ্ঞানান্ তারে দিয়্যে ওইয়্যে, ইয়েনই বা কি? আরঅ তে আমক্ আমক্ কাম্অ গরের্। 3ইবে কি সেই গাজ মিস্ত্রি নয়? ইবে কি মরিয়ম পুয়োবো নয়? যাকোব, যোষেফ, যিহূদা আর শিমোনর ভেই নয়? তা বোনুন্ কি আমা ইধু নেই?” এবাবোত্যেগুরি যীশুরে নিইনে মানুচ্চুনো মনত্ সন্দেহ এজা ধুরিলো।
4সেক্কে যীশু তারারে কলঅ, “নিজো আদামত্, নিজো ইত্তো-কুদুম্মো ইধু আর নিজো ঘর্ বাদে বেক্ জাগানিত্ ভাববাদীগুনে সর্মান পান্।” 5সে পরেদি তে কয়েক্কো পীড়েল্যে মান্জ্য উগুরে আঢ্ বাজেইনে তারারে গম্ গুরিলো, মাত্তর্ সিয়েনত্ আর কনঅ আমক্ কাম্ গরানা সম্ভব ন-অলঅ। 6মানুচ্চুনে তারে বিশ্বেজ্ ন-গুরিলাক্ দেগিনে তে খুব আমক্ অলঅ।
শিচ্চ্যগুনোর্ প্রচারত্-যানা
(মথি ১০:১,৫-১৫; লূক ৯:১-৬)
ইয়েনর্ পরেদি যীশু আদামে আদামে যেইনে মানুচ্চুনোরে শিক্ষ্যে দিয়্যে ধুরিলো। 7যেরেদি তে তার্ সেই বারজন শিচ্চ্যরে নিজো ইধু ডাগিলো আর প্রচার গুরিবাত্তে দ্বিজন দ্বিজন গুরি পাধেই দিলো। তে ভান্ন্যেই আত্মাগুনো উগুরে তারারে খেমতা দিলো। 8যেবার্ পধত্তে এক্কো লুদিক্ বাদে আর কিচ্চু তে শিচ্চ্যগুনোরে নিবাত্তে ন-দিলো। রুটি, থৈল্যে, কমরত্ গুরি তামা পোইজ্যেয়ো নিবাত্তে তে তারারে মানা গুরিলো। 9তে তারারে সেন্ডেল্ পিনিবাত্তে কলঅ ঠিগ্, মাত্তর্ এক্কোত্তুন্ বেশ্ সিলুম উরিবাত্তে মানা গুরিলো। 10তে তারারে আরঅ কলঅ, “তুমি যে ঘরত্ সোমেবা সে জাগায়ান্ ফেলেই ন-যানা সং সে ঘরানত্ থেয়ো। 11কনঅ জাগার্ মানুচ্ যুনি তমারে মানি ন-লন্ বা তমা কধা ন-শুনোন্, সালে সে জাগায়ান্ ফেলে যেবার অক্তত্ তমা টেঙর্ ধূল্যেগানি ঝাড়ি ফেলেয়ো যেন সিয়েনই তারা বিরুদ্ধে সাক্ষি অয়।”
12সেক্কে শিচ্চ্যগুনে যেইনে প্রচার গরা ধুরিলাক্ যেন মানুচ্চুনে পাপত্তুন্ মনানি ফিরান্। 13তারা বোউত্ ভান্ন্যেই আত্মা ধাবেলাক্ আর বোউত্ পীড়েল্যে মান্জ্যর্ মাঢাত্ তেল্ দিইনে তারারে গম্ গোরেলাক্।
বাপ্তিস্মদিয়্যে যোহনর মরাণা
(মথি ১৮:১-১২; লূক ৯:৭-৯)
14যীশুর সুনাঙ্ চেরোকিত্তে ছিদি পড়িলো বিলিনে রাজা হেরোদে যীশুর কধা শুনিলো। কয়েক্কো মান্জ্যে কোইয়োন, “বাপ্তিস্মদিয়্যে যোহনে মরণত্তুন্ জেই ওই উঠ্যে, সেনত্যে আমক্ অবার্ কামানি গরের্।”
15কেঅ কেঅ কোইয়োন, “তে এলিয়”; আরঅ কেঅ কেঅ কোইয়োন, “ভালোক্ দিন আগঅ ভাববাদীগুনো ধোক্ক্যেন্ তেয়ো এক্কো ভাববাদী।”
16এই বেক্ কধানি শুনিনে হেরোদে কলঅ, “তে সালে যোহন, যিবের্ মাঢাবো কাবি ফেলেবার্ উগুম্ মুই দুয়োং। আরঅ তে জেদা ওই উঠ্যে।”
17-18হেরোদে নিজে যোহনরে বন্দী গুরিবাত্যে উগুম দিলো আর তারে বানিনে জেলোত্ রাগেল। হেরোদে তার্ ভেই ফিলিপ মোক্কো হেরোদিয়াত্তে ইয়েন্ গোজ্যে। হেরোদ হেরোদিয়ারে লোইয়্যে বিলি যোহনে বার্বার্ হেরোদরে কদঅ, “তর্ ভেইয়ো মোক্কোরে লনা তর্ উচিত্ ন-অয়।” 19ইয়েনত্তে যোহন উগুরে হেরোদিয়ার্ খুব্ রাগ্ এলঅ। তে যোহনরে মারে ফেলেবাত্তে চেইয়্যে, 20মাত্তর্ হেরোদে যোহনরে দোরেদ বিলি তে সিয়েন গুরি ন-পারে। যোহনে যে এক্কো গোজেন্ভক্ত আর পবিত্র মানুচ্ হেরোদে সিয়েন হবর্ পেদঅ, সেনত্তে তে যোহনরে দযাত্তুন্ রোক্ষ্যে গুরিদো। যোহনর্ কধা শুনিবার সলাত্ মনত্ খুব দুঘ্ পেলেয়ো হেরোদে তা কধানি শুনিবাত্তে গম্ পেদঅ।
21শেজদি হেরোদিয়া সুযোগ্কো পেলঅ। ইবে অলদে এক্কো হেরোদর জর্মদিন, যেক্কেনে তে রেজ্যর্ উগুরে কত্তাগুন, সেনাপতি আর গালীল রেজ্যর্ আজল্ নেতাগুনোত্তে এক্কো হানা দিলো। 22হেরোদিয়ার ঝিবো সেই হানা সভাবোত্ নাচ্ দেগেইনে হেরোদরে আর হানাত্ ভাত্যেয়্যে গর্বাগুনোরে হুজি গুরিলো।
সেক্কে রাজা ঝিবোরে কলঅ, “তুই যিয়েন চাজ্ মুই তরে সিয়েনই দিম্।” 23হেরোদে ঝিবোরে শমক্ হেইনে কলঅ, “তুই যিয়েন চাজ্ মুই সিয়েনই তরে দিম্। এমন্ কি, মঅ রেজ্যর্ অদ্দেক্অ দিম্।”
24ঝিবো বারেদি যেইনে তা মারে পুযোর্ গুরিলো, “মুই কি চেম্?”
তা মা কলঅ, “বাপ্তিস্মদিয়্যে যোহনর্ মাঢাবো।”
25ঝিবো সেক্কে যাদিমাদি ফিরি যেইনে রাজা ইধু চেলঅ, “এক্কো থালত্ গুরি মুই ইক্কিনে বাপ্তিস্মদিয়্যে যোহনর্ মাঢাবো চাং।”
26এ কধাগান শুনিনে রাজা হেরোদে অমকদ মনত্ দুঘ্ পেলঅ, মাত্তর্ হানাত্ ভাত্যেয়্যে গর্বাগুনো মুজুঙোত্ শমক্ হেইয়্যে বিলিনে ঝিবোরে ফিরেই দিবাত্তে ন-চেলঅ। 27-28তে সেক্কেনে যোহন মাঢাবো কাবি আনিবাত্তে এক্কো জল্লাদরে যাদিমাদি উগুম্ দিলো। সেই জল্লাদ্তো জেল্খানাত্ যেইনে যোহন মাঢাবো কাবিনে এক্কো থালত্ গুরি সিবে আনিলো। রাজা সিবে ঝিবোরে দেনার্ পরেদি তে সিবে নেযেইনে তা মারে দিলো। 29যেক্কেনে যোহন শিচ্চ্যগুনে এ হবরান পেলাক্, তারা এইনে তা কিয়্যেগান্ নেযেইনে কবর্ দিলাক্।
পাচ্ আজার্ মান্জ্যরে হাবানা
(মথি ১৮:১৩-২১; লূক ৯:১০-১৭; যোহন ৬:১-১৪)
30যীশু যে বারজন শিচ্চ্যরে পাদেয়্যে তারা ফিরি এলাক্ আর যিয়েনি যিয়েনি গোজ্যন্ আহ্ শিক্ষ্যে দুয়োন বেক্কানি তারে জানেলাক্। 31সে অক্তত্ বোউত্ মানুচ্ সিয়েনত্ যানা-এযানা গত্তন্ বিলি শিচ্চ্যগুনে কিজু হেবার সুযোগ্অ ন-পেলাক্। সেনত্তে যীশু তারারে কলঅ, “তুমি মঅ সমারে কনঅ এক্কান নিরিবিলি জাগাত্ এইনে কানক্কন্ জিরো।”
32তারা নৌকোত্ গুরিনে এক্কান মানুচ্ নেইয়্যে জাগাত্ গেলাক্। 33তারারে যাদে দেগিনে ভালোক্কুন্ মান্জ্যে তারারে চিনি পারিলাক্ আর কায়কুরে আদামত্তুন্ দাবা যেইনে তারার্ আগেদি সিয়েনত্ লুমিলাক্। 34যীশু নৌকোত্তুন্ লামিনে সয়-সাগোজ্যে মানুচ্ দেগিলো। এ মানুচ্চুনোত্তে যীশুর ভারী মেয়্যে অলঅ কিয়া ইগুনোর দশাগান গরক্ নেইয়্যে ভেড়া ধোক্ক্যেন এলঅ। যীশু তারারে ভালোক্কানি পৌইদ্যেনে শিক্ষ্যে দিয়্যে ধুরিলো।
35যেক্কে দিন্নো থুম্ ওই এলঅ সেক্কে শিচ্চ্যগুনে এইনে যীশুরে কলাক্, “জাগায়ান্ নিরিবিলি, বেলান্ পেরায় ডুপ্পেগোই। 36মানুচ্চুনোরে পাধেই দে যেন তারা কায়কুরে আদামত্ আর খামার ঘরত্ যেইনে নিজোত্তে কিজু হানা কিনি পারন্।”
37যীশু কলঅ, “তুমি তারারে কিজু হেবাত্তে দুয়ো।”
শিচ্চ্যগুনে তারে কলাক্, “আমি যেইনে দ্বিশত্ দীনারর্ রুটি কিনি আনিনে কি তারারে হেবাত্তে দিবোং?”
38যীশু কলঅ, “তমা ইধু কয়ান্ রুটি আঘে যেইনে চঅ।”
শিচ্চ্যগুনে চেই এইনে তারে কলাক্, “পাচ্চান্ রুটি আর দ্বিবে মাছ আঘে।”
39সেক্কে যীশু শিচ্চ্যগুনোরে কলঅ যেন তারা য়্যেল্ ঘাস উগুরে দলে দলে ভাগ গুরিনে মানুচ্চুনোরে বোজেই দুয়োন্। 40সেক্কে মানুচ্চুনে একশ জন্যে দলত্, পঞ্চাশ জন্যে দলত্ গুরি সুরে সুরে বৈই গেলাক্। 41যীশু সেই পাচ্চান্ রুটি আর দ্বিবে মাছ লোইনে স্বর্গ ইন্দি রিনি চেইনে গোজেনরে ভালেদি জানেল, আর মানুচ্চুনোরে দিবাত্তে রুটি ভাঙিনে শিচ্চ্যগুনো আঢত্ দিলো। এবাবোত্যেগুরি তে বেক্কুনোরে মাছ্অ ভাগ্ গুরি দিলো। 42তারা বেক্কুনে পেট ভরে সং হেলাক্। 43সে পরেদি শিচ্চ্যগুনে বাদ্বাগি রুটি আর মাছ কট্টানি তুলিনে বারবো লেই ভোরেলাক্। 44যিগুনে হেইয়োন্ তারা ভিদিরে মরদ্ মানুচ্ জনেদি পাচ্ আজার্ এলাক্।
পানি উগুরে আঢি বেড়ানা
(মথি ১৪:২২-৩৬; যোহন ৬:১৫-২১)
45যীশু ইয়েনর্ পরেদি তা শিচ্চ্যগুনোরে উগুম্ দিলো যেন তারা নৌকোত্ উদিনে তা আগে আগে সাগরর্ অন্য পারত্ বৈৎসৈদা আদামত্ যান্, আর ইন্দি তে মানুচ্চুনোরে পাধেই দিয়্যে ধুরিলো। 46মানুচ্চুনোরে বিদেই দিইনে পরেদি তে তবনা গুরিবাত্তে মুড়ো উগুরে উদি গেলঅ। 47যেক্কে সাজোন্যে অলঅ সেক্কে শিচ্চ্যগুনোর নৌকোগান্ সাগর সংমোধ্যে এলঅ আর যেক্কেনে যীশু গায় গায় কুলত্ এলঅ। 48যীশু দেগিলো শিচ্চ্যগুনে খুব্ দুগে পাঙেই টানদন্, কিয়া বৌইয়্যেরান্ তারার্ উল্লো মোক্ক্যে এলঅ। পেরায় শেজ্ রেদো ইন্দি যীশু সাগর উগুরেদি আঢিনে শিচ্চ্যগুনো ইধু এলঅ আর তারারে ফেলেইনে উজেই যার্। 49মাত্তর্ শিচ্চ্যগুনে তারে সাগর উগুরেদি আঢি যাদে দেগিনে ভূত্ মনে গুরিনে রঅ ছাড়ি উদিলাক্, 50কিয়া তারে দেগিনে বেক্কুনে দোরেয়োন্।
যীশু সেক্কেনে শিচ্চ্যগুনো সমারে কধা কলঅ। তে তারারে কলঅ, “ইবে দঅ মুই; ন-দোরেয়ো, সাহচ্ গরঅ।”
51যীশু শিচ্চ্যগুনোর নৌকোগানত্ উদোনার্ পরেদি বৌইয়্যেরান্ থামেল। ইয়েন্দোই শিচ্চ্যগুনে অমকদ আমক্ ওই গেলাক্, 52কিয়া ইয়েনর্ আগেদি রুটি হাবানার্ বেপারান তারা বুঝি ন-পারিলাক্; তারা মনান্ দরমর ওই রলঅ।
53যীশু আর তা শিচ্চ্যগুনে সাগরান্ পার্ ওইনে গিনেষরৎ চাগালাত্ লুমিনে নৌকোগান্ বানিলাক্। 54-55তারা নৌকোগানত্তুন্ লামানার্ লগে লগে মানুচ্চুনে যীশুরে চিনি পারিনে সেই বেক্ চাগালাগানি ইধু ধাবাদেদি গত্তন্। সে পরেদি তে কুধু আঘে সিয়েন হবর্ লোইনে তারা পাঢি উগুরে গুরি পীড়েল্যেগুনোরে তাইধু বুয়োই আনিলাক্।
56শঅরত্, আদামত্ বা পাড়াত্, যিয়েনত্ তে যেদঅ সিদুগো মানুচ্চুনে পীড়েল্যেগুনোরে আনিনে বাজার সংমোধ্যে থুবেদাক্। তারা যীশুরে কোজোলী গুরিদাক্ যেন পীড়েল্যেগুনে তা কাবড়র কণাবো বানা ধুরি পারন্, আর যিগুনে তারে ধুরিদাক্ তারা গম্ অদাক্।
Currently Selected:
মার্ক 6: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society