মার্ক 5
5
ভুদে পেইয়্যে মানুচ্চো
(মথি ৮:২৮-৩৪; লূক ৮:২৬-৩৯)
1সে পরেদি যীশু আর তা শিচ্চ্যগুনে গালীল সাগরান্ পার্ ওইনে গেরাসেনীগুনোর চাগালাত্ গেলাক্। 2যীশু নৌকোত্তুন্ লামানার লগে লগে ভান্ন্যেই আত্মায় পেইয়্যে এক্কো মানুচ্ কবরত্তুন্ নিগিলিনে তা মুজুঙোত্ এলঅ। 3মানুচ্চো কবর জাগাত্ থেদঅ আর শিগোল্লোইয়ো কনজনে আর্ তারে বানি রাগেই ন-পারিদাক্। 4তার আঢ্-টেঙানি পেরাই শিগোল্লোই বান্যে থেদঅ, মাত্তর্ তে শিগোলান্ ছিনি ফেলেদ আর টেঙত্ ভেরেয়্যেগান্ ভাঙি ফেলেদ। কনজনে তারে সামেলেই ন-পারিদাক্। 5তে দিনরেত্ কবরত্ আর মুড়োই মুড়োই রঅ ছাড়ি ছাড়ি বেড়েদ আর পাত্তর্লোই নিজে নিজোর্ কিয়্যেগান্ কাবিদো।
6-7যীশুরে দূরোত্তুন্ দেগিনে তে দাবা এইনে তারে সালাম্ গুরিলো, আর তে রঅ ছাড়িনে কলঅ, “দাঙর্ গোজেনর্ পুয়ো যীশু, মঅ লগে তর্ কি দরকার? গোজেনর্ নাঙে কঙর্, তুই মরে যন্ত্রণা ন-দিচ্।” 8তে এ কধাগান্ কলঅ কিয়া যীশু তারে কোইয়্যেদে, “ভান্ন্যেই আত্মা, এ মানুচ্চো ভিদিরেত্তুন্ নিগিলি যাহ্।”
9যীশু তারে পুযোর্ গুরিলো, “তঅ নাঙান্ কি?”
তে কলঅ, “মঅ নাঙান্ বাহিনী, কিয়া আমি ভালোক্কুন্ আগিই।” 10তে যীশুরে বার্বার্ কোজোলী গুরিনে কলঅ যেন তে সেই চাগালাত্তুন্ তারারে নিগিলেই ন-দে।
11সে অক্তত্ সে জাগান ইধু মুড়োবোত্ দাঙর্ এক্পাল শুগোড়্ চড়দন্। 12আত্মাগুনে যীশুরে কোজোলী গুরি কলাক্, “সেই শূগোড় পাল ভিদিরে আমারে পাধেই দে; সিগুনো সংমোধ্যে আমারে সোমেবাত্তে দে।”
13যীশু অনুমতি দেনার্ পরেদি সেই ভান্ন্যেই আত্মাগুনে নিগিলিনে শূগোরুনো ভিদিরে গেলাক্। সেক্কে বেক্ শূগোরুনে লেদান্যেগান্ পার্ ওইনে জুরে ধাবা গেলাক্ আর সাগর সংমোধ্যে পড়িনে ডুবিনে মুরিলাক্। সে পাল ভিদিরে পেরায় দ্বি আজার্ শূগোর্ এলাক্।
14যিগুনে শূগোর্ চরাদন্ তারা সেক্কে ধেই যেইনে আদামত্ আর সিয়েনর্ কায়কুরে বেক্ জাগানিত্ এ হবরান্ দিলাক্। সেক্কে মানুচ্চুনে কি ওইয়্যে চেবাত্তে এলাক্। 15তারা যীশু ইধু এইনে দেগিলাক্, যিবেরে ভালোক্কুন্ ভান্ন্যেই আত্মায় পেইয়্যে সে মানুচ্চো কাবড়-চুগোড়্ উরিনে গম্ মনে বুয়োই আঘে। ইয়েন্ দেগিনে মানুচ্চুনে দোরেলাক্। 16এ ঘটনাগান্ যিগুনে দেখ্যন্ তারা সেই ভান্ন্যেই আত্মায় পেইয়্যে মানুচ্চো পৌইদ্যেনে আর শূগরুনো পৌইদ্যেনে মানুচ্চুনোরে জানেলাক্। 17ইয়েন্দোই মানুচ্চুনে যীশুরে কোজোলী গরা ধুরিলাক্ যেন তে তারার্ চাগালাগান্ ছাড়ি যায়।
18যীশু যেক্কে নৌকোত্ উঠ্যে সেক্কে যিবেরে ভান্ন্যেই আত্মায় পেইয়্যে সে মানুচ্চো তা সমারে যেবাত্তে কোজোলী গরা ধুরিলো। 19মাত্তর্ যীশু তারে ইয়েন কোইনে বিদেয় দিলো, “তুই তঅ ঘরত্ ফিরি যাহ্ আর প্রভু তত্তে কত্তমান্ দাঙর্ কাম্ গোজ্যে আর তঅ উগুরে কত্তমান্ দোয়্যে দেগেয়্যে সিয়েন যেইনে তঅ ঘর মানুচ্চুনোরে কঅ।”
20মানুচ্চো যেক্কে গেলঅ আর যীশু তাত্তে কত্তমান্ দাঙর্ কাম্ গোজ্যে সিয়েন দিকাপলি চাগালাত্ কোই কোই বেড়া ধুরিলো। সেক্কে বেক্কুনে আমক্ অলাক্।
এক্কো মরা চিগোন মিলে আর এক্কো পীড়েল্যে মিলে
(মথি ৯:১৮-২৬; লূক ৮:৪০-৫৬)
21যীশু যেক্কে নৌকোত্ গুরিনে আরঅ সাগরর্ অন্য পারত্ গেলঅ সেক্কে তা চেরোকিত্তে বোউত্ মানুচ্ এইনে ঘেজাঘেস্যে গুরিলাক্। তে সেক্কেয়ো সাগর পারত্ এলঅ। 22সে অক্তত্ যায়ীর নাঙে যিহূদী সমাজ-ঘরর্ এক্কো নেতা সিয়েনত্ এলঅ আর যীশুরে দেগিনে তা টেঙ উগুরে মাঢা নিগিরি পড়িলো। 23তে যীশুরে কোজোলী গুরি কলঅ, “মঅ ঝিবো মুরি যেবার্ অক্ত ওইয়্যে। তুই এইনে তা উগুরে তঅ আঢ্তান রাগা; সেক্কে তে গম্ ওই উদিবো।”
24সেক্কে যীশু তা সমারে গেলঅ। বোউত্ মানুচ্ যীশুর্ লগে লগে যাদন্ আর তা চেরোকিত্তে ঠেলাঠিলি গত্তন্। 25সেই ভিড়ো ভিদিরে এক্কো মিলে এলঅ যে বার বজর্ ধুরিনে মিলেপীড়েত্ ভুগের্। 26ভালোক্কুন্ ডাক্তর আঢত্ তে বোউত্ দুঘ্ পেইয়্যে, আর তার যিগুন্ এলঅ বেক্কুন্ তে খরচ্ গোজ্যে, মাত্তর্ গম্ অবার্ বদলে দিন দিন তা অবস্থা খারাব্ অর্। 27যীশু পৌইদ্যেনে শুনিনে তে ভিড়ো ভিদিরে যীশুর ঠিগ্ পিজেদি এইনে তা কাবড়ান্ ধুরিলো, 28কিয়া তে মনে গোজ্যেদে যুনি বানা তা কাবড়ান্ তে ধুরি পারে সালে তে গম্ ওই যেবঅ। 29যীশুর কাবড়ান্ ধরানার্ লগে লগে তার মাসিক্ অনাগান্ বন্ধ অলঅ আর তে তার নিজো কিয়্যেগান ভিদিরে বুঝিলো তা অসুগ্কান গম্ ওই যেইয়্যে।
30যীশু সেক্কে বুঝিলো তা ভিদিরেত্তুন্ খেমতাগান্ নিগিলি যেইয়্যে। সেনত্তে তে ভিড়োর্ চেরোকিত্তে রিনি চেইনে পুযোর্ গুরিলো, “কন্না মঅ কাবড়ান্ ধুরিলো?”
31তা শিচ্চ্যগুনে কলাক্, “তুই দঅ দেখ্যচ্ মান্জ্যে তঅ চেরোকিত্তে ঠেলাঠিলি গত্তন্, আর তো তুই কত্তে, কন্না তরে ধুরিলো?”
32এ কামান্ কন্না গোজ্যে সিয়েন্ চেবাত্তে তো যীশু চেরোকিত্তে রিনি চাহ্ ধুরিলো। 33সে মিলেবোর্ যিয়েন্ ওইয়্যে সিয়েন্ বুঝিনে তে গির্গিরেদে গির্গিরেদে এইনে যীশুর্ টেঙত্ পড়িলো আর বেক্কানি জানেল। 34যীশু তারে কলঅ, “মা, তুই বিশ্বেজ্ গোজ্যস্ বিলি গম্ ওইয়োচ্। সুগে-শান্দিয়্যে যাহ্, তর্ আর এ দুঘ্কান ন-ওক্।”
35যীশু সেক্কেয়ো কধা কর্, এমন্ সময়োত্ সেই সমাজ-ঘরর্ নেতাবো যায়ীর ঘরত্তুন্ কয়েক্কো মানুচ্ এইনে যায়ীররে কলাক্, “তঅ ঝিবো মুরি যেইয়্যে; প্রভুরে আর দুঘ্ ন-দিচ্।”
36সে মানুচ্চুনোর্ কধা শুনিনে যীশু যায়ীররে কলঅ, “ন-দোরেচ্, বানা বিশ্বেজ্ গর্।”
37যীশু বানা পিতর, যাকোব আর যাকোবর ভেই যোহনরে তা সমারে নেযেল। 38পরেদি যায়ীর ঘরত্ এইনে তে দেগিলোদে অমকদ কোল্-কোজ্যে অর্। মানুচ্চুনে রঅ ছাড়ি ছাড়ি কানাকুদি গত্তন্। 39যীশু ভিদিরে যেইনে মানুচ্চুনোরে কলঅ, “তুমি কিত্তে কোল্-কোজ্যে আর কানাকুদি গরর্? মিলেবো ন-মরে, ঘুম্ যাত্তে।”
40এ কধাগান শুনিনে মানুচ্চুনে আযাআযি গরা ধুরিলাক্। সেক্কে যীশু তারারে বেক্কুনোরে ঘরত্তুন্ বারেদি যেবাত্তে কলঅ। সে পরেদি তে মিলেবোর্ মা-বাবরে আর তা সমারে শিচ্চ্যগুনোরে নিইনে মিলেবো যে ঘরানত্ এলঅ সেই ঘরানত্ সোমেল। 41-42মিলেবোর্ বয়চ এলঅ বার বজর্। যীশু মিলেবো আঢ্তান ধুরিনে কলঅ, “টালিথা কুম্,” অত্তাৎ “চিজি, তরে কঙত্তে, উঠ্।” আর সেক্কেনে মিলেবো উদিনে আঢি বেড়া ধুরিলো। সেক্কে তারা অমকদ আমক্ ওই গেলাক্। 43এ ঘটনাগানর্ কধা কাররে ন-কবাত্তে যীশু কড়া উগুম্ দিলো আর মিলেবোরে কিজু হানা দিবাত্তে কলঅ।
Currently Selected:
মার্ক 5: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society