মার্ক 4
4
এক্কো চাষাবলার্ হিত্ত্য
(মথি ১৩:১-৯; লূক ৮:৪-৮)
1যীশু আরঅ গালীল সাগর পারত্ মানুচ্চুনোরে শিক্ষ্যে দিয়্যে ধুরিলো। তা চেরোকিত্তে বোউত্ মান্জ্যর্ ভিড়্ অলঅ; সেনত্তে তে সাগর সংমোধ্যে এক্কান্ নৌকোত্ উদিনে বুজিলো আর মানুচ্চুনে সাগর পারত্ থিয়্যেই রলাক্।
2তে হিত্ত্যলোই ভালোক্কানি পৌইদ্যেনে তারারে শিক্ষ্যে দিয়্যে ধুরিলো। সিয়েনি ভিদিরে তে কলঅ, 3“শুনো, এক্কো চাষাবলা বীজ্ ফেলেবাত্তে গেলঅ। 4বীজ্ ফেলেবার অক্তত্ কয়েক্কো বীজ্ পধ পাজারাত্ পড়িলাক্, আর পেগ্কুনে এইনে সিগুন হেই ফেলেলাক্। 5আরঅ কয়েক্কো বীজ্ সীল পাত্তর ভূইয়োত্ পড়িলাক্। সিয়েনত্ বেশ্ মাদি ন-এলঅ। মাদি বেশ্ ন-এলঅ বিলি যাদিমাদি চারাগুন্ গেজেই উদিলাক্। 6বেলান্ উদোনার পরেদি সিগুন্ পুড়ি গেলাক্ আর শিঙোরানি গমেডালে ন-বজে বিলি শুগেই গেলঅ। 7আর কয়েক্কো বীজ্ কাদাঝুবো ভিদিরে পড়িলাক্। কাদাঝুব্পুন বাড়ি উদিনে চারাগুনোরে চাপি রাগেলাক্, সেনত্তে ফল্ ন-ধুরিলাক্। 8মাত্তর্ আর কয়েক্কো বীজ্ গম্ ভূইয়োত্ পড়িলাক্ আর গাজ্ গেজেইনে বাড়ি উদিলাক্ আর ফল দিলাক্; কনবোত্ ত্রিশ গুন্, কনবোত্ ষায়েট্ গুন্, আরঅ কনবোত্ একশগুন্ ফসল জোর্মেল।”
9যেরেদি যীশু কলঅ, “যিবের্ শুনিবার কান্ আঘে, তে শুনোক্।”
হিত্ত্য কবার্ উদ্দেচ্চ্য
(মথি ১৩:১০-১৭; লূক ৮:৯,১০)
10যেক্কেনে যীশু গায় গায় এলঅ, কয়েক্কো মানুচ্ যিগুনে শুনিলাক্ আর তার বারজন শিচ্চ্য সেই হিত্ত্যবো পৌইদ্যেনে তারে পুযোর্ গুরিলাক্। 11যীশু তারারে কলঅ, “গোজেন রেজ্যর্ গুমুরো সত্যগান্ তমারে জানিবাত্তে দিয়্যে ওইয়্যে, মাত্তর্ অন্যগুন যিগুনে বারেত্তুন্, হিত্ত্যলোই বেক্ কধানি কুয়ো অয়, 12যেন তারা রিনি চান্ আর রিনি চান, যেদক্কন সং ন-দেগন; তারা শুনোদে থাদোক্ আর শুনোদোক্, যেদ্ক্কন ন-বুঝোন। সিয়েন ন-অলে তারা অয়ত গোজেন ইন্দি ফিরিবাক্ আর খেমা পেবাক্। ”
চাষাবলাবোর্ হিত্ত্যবোর্ অত্ত
(মথি ১৩:১৮-২৩; লূক ৮:১১-১৮)
13সে পরেদি যীশু তারারে কলঅ, “তুমি কি এ হিত্ত্যবোর্ অত্তগান্ ন-বুঝিলে? সালে কেধোক্ক্যেন্ গুরি অন্য হিত্ত্যবোর্ অত্তগান্ বুঝিবে? 14চাষাবলাবো যে বীজিগুন ফেল্যে সিগুন অলঅ গোজেনর্ কধা। 15পধ কুরে পোজ্যে বীজিগুনো মাধ্যমে তারা পৌইদ্যেনে কুয়ো ওইয়্যে যিগুনে সে কধানি শুনোন্, মাত্তর্ শদানে সেক্কে এইনে তারা মনত্ যে কধানি জমা ওইয়্যে সিয়েনি নেযায়। 16শীলো ভূইয়োত্ পোজ্যে বীজিগুনো মাধ্যমে তারা পৌইদ্যেনে কুয়ো ওইয়্যে যিগুনে সে কধানি শুনোন্ সেক্কে হুজিয়ে সিয়েনি গুজি লন্, 17মাত্তর্ তারা ইধু শিঙোরানি গমেডালে ন-বজে বিলিনে বানা কয়েক দিনোত্তে তারা থির্ থান্। যেরেদি কধানত্তে যেক্কে দুঘ্ আর অত্যেচার্ এজে সেক্কে তারা পিজেদি যান্। 18আরঅ কাদা ঝুবো ভিদিরে ফেল্যে বীজিগুনো মাধ্যমে তারা পৌইদ্যেনে কুয়ো ওইয়্যে যিগুনে সে কধানি শুনোন্, 19মাত্তর্ সংসারর্ চিন্তে-ভাবনা, ধন-সোম্বোত্তির্ মেয়্যে আর অন্য জিনিজোর্ লুভ্ এইনে সেই কধানিরে চাপি রাগায়; 20সেনত্তে সিয়েনত্ কনঅ ফল ন-অয়। আর গম্ ভূইয়োত্ ফেলেয়্যে বীজিগুনো মাধ্যমে তারা পৌইদ্যেনে কুয়ো ওইয়্যে যিগুনে সেই কধানি শুনিনে সিয়েনি মানি লন্ আর ফল দুয়োন্। কেঅ দে ত্রিশগুন্, কেঅ দে ষায়েট গুন্ আরঅ কেঅ দে একশগুন্।”
21যীশু আরঅ কলঅ, “কনজনে কি চেরাগ লোইনে কাল্লোং বা চুগি তলে থন্? তে কি সিবে চেরাগ থগ উগুরে ন-থয়? 22কনঅ জিনিস যুনি লুগেয়্যে থায় সালে সিয়েন ফগদাং অবাত্তে লুগেয়্যে থায়; আরঅ কনঅ জিনিস যুনি ঢাক্যে থায় সালে সিবে খুলিবাত্তে ঢাক্যে থায়। 23যিবের্ শুনিবার্ কান্ আঘে তে শুনোক্।”
24ইয়েনর্ পরেদি যীশু কলঅ, “তুমি যিয়েনি শুন্ন্য সে পৌইদ্যেনে মনযোগ্ দুয়ো। তুমি যেবাবোত্যেগুরি মাবি দুয়ো তমাত্তে সেবাবোত্যেগুরি মাবা অবঅ; এমন্ কি, বেশ্ গুরি মাবা অবঅ। 25যিবের্ আঘে তারে আরঅ দিয়্যে অবঅ, মাত্তর্ যিবের্ নেই তার যিগুন্ আঘন্ সিগুন্অ তাত্তুন্ নেযা অবঅ।”
ফসলর্ হিত্ত্য
26যীশু আরঅ কলঅ, “গোজেনর্ রেজ্যগান্ এবাবোত্যে: এক্কো মান্জ্যে ভূইয়োত্ বীজ্ ফেলেল। 27পরেদি তে রেদোত্ ঘুমেইনে আর দিনোত্ জাগি থেইনে সময় কাদেল। এ ভিদিরে সেই বীজিগুনোত্তুন্ চারা গেজেইনে দাঙর্ অলাক্, মাত্তর্ কিবাবোত্যেগুরি অলঅ সিয়েন তে হবর্ ন-পেলঅ। 28ভূইয়ানে নিজে নিজে ফল জোর্মেল-পত্তমে চারা, পরেদি শীজে আর শীজেগুনোর্ মাদাত্ ভর্পুনোং শোজ্য দানা। 29দানাগুন্ পাগিলে পরেদি তে চারি বাজেল, কিয়া ফসল কাবিবার্ সময় ওইয়্যে।”
সোজ্য-দানার্ হিত্ত্য
(মথি ১৩:৩১-৩৫; লূক ১৩:১৮,১৯)
30সে পরেদি যীশু কলঅ, “কা সমারে আমি গোজেন রেজ্যর্ তুলনা গুরিবোং? কন্ হিত্ত্যবোর্ মাধ্যমে সিয়েন বুঝেবং? 31সেই রেজ্যগান্ এক্কান সোজ্য-বীজি ধোক্ক্যেন। ভূইয়োত্ ফেলেবার অক্তত্ দেগা যায় যে, সিবে বেক্ বীজিগুনো ভিদিরে বেগত্তুন্ চিগোন্। 32মাত্তর্ লাগেবার পরেদি যেক্কে গাজ্ বাড়ি উদোন্ সেক্কে বেক্ শাক্-পাদ ভিদিরে সিবে বেগত্তুন্ দাঙর্ অয়, আর এমন্ দাঙর্ দাঙর্ ডেলা নিগিলোন্, পেগ্কুনেয়ো সিবের্ আন্দলে বাহ্ বানন্।”
33এবাবোত্যে আরঅ বোউত্ হিত্ত্যর্ মাধ্যমে যীশু গোজেনর্ কধা মানুচ্চুনো ইধু কদঅ। তারা যেত্তমান্ বুঝি পারিদাক্ সেত্তমান্ তে তারা ইধু কদঅ। 34হিত্ত্য বাদে তে তারারে শিক্ষ্যে ন-দিদো, মাত্তর্ শিচ্চ্যগুনে যেক্কে তা সমারে গায় গায় থেদাক্ সেক্কে তে বেক্কানি তারারে বুঝেই দিদো।
ঝড়্ থামানা
(মথি ৮:২৩-২৭; লূক ৮:২২-২৫)
35সেদিন্যে সাজোন্যে অক্তত্ যীশু তা শিচ্চ্যগুনোরে কলঅ, “আঢঅ, আমি সাগর উইপারত্ যেই।”
36সেক্কে শিচ্চ্যগুনে মানুচ্চুনোরে ফেলেইনে যীশু যে নগানত্ এলঅ সে নগানত্ গুরি তারে নেযেলাক্। অবুচ্চ্যই সিয়েনত্ আরঅ অন্য নৌকোয়ো এলঅ। 37নৌকোগান্ যেক্কে চলের্ সেক্কে আদিক্ক্যেগুরি এক্কান্ দর্গরেপারা বজমান্ বৈয়্যের্ উদিলো আর তুবোলুন্ নৌকো উগুরে এমন্ গুরিনে আযার্ হেই পড়িলাক্, নৌকোগান্ পানিলোই ভুরি যাহ্ ধুরিলো। 38মাত্তর্ যীশু নৌকো পিজেদি এক্কো বালোজ উগুরে মাঢাবো রাগেনে ঘুম যার্। শিচ্চ্যগুনে তারে জাগেইনে কলাক্, “গুরু, আমি যে মুরি যের্ সিন্দি কি তর্ খিয়েল্ নেই?”
39যীশু উদিনে বোইয়্যেরানরে ধমক্ দিলো আর সাগরানরে কলঅ, “থাম্, জুরঅ অ।” সেক্কে বৌইয়্যেরান্ থামেল আর বেক্কানি জদবদে জুরঅ ওই গেলঅ।
40তে শিচ্চ্যগুনোরে কলঅ, “তুমি দরর্ কিত্তে? এজঅ কি তমার্ বিশ্বেজ্ ন-অয়?”
41ইয়েন্দোই শিচ্চ্যগুনে অমকদ দোরেলাক্ আর নিজো ভিদিরে কুয়ো কি গরা ধুরিলাক্, “ইবে কন্না যে, বৌইয়্যের্ আর সাগরান্অ তা কধা শুনে?”
Currently Selected:
মার্ক 4: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society