মার্ক 3
3
শুগুনো-আঢ্বলা মানুচ্চো গম্ অলঅ
(মথি ১২:৯-১৪; লূক ৬:৬-১১)
1-2ইয়েনর্ পরেদি যীশু আরঅ সমাজ-ঘরত্ ফিরি গেলঅ, যিয়েনত্ এক্কো মানুচ্ এলঅ যিবের্ এক্কান আঢ্ অবস্ এলঅ। কয়েক্কো মানুচ্ সিয়েনত্ এলাক্ যিগুনে যীশুরে ভান্ন্যেই কাম গরের্ বিলিনে দুষ্ দেদন, জিরেবার দিনোত্ যীশু মানুচ্চোরে গম্ গরে কিনা সিয়েন্ চেবাত্তে তারা তা উগুরে গমেডালে চোগ্ রাগা ধুরিলাক্। 3যীশু সেই শুগুনো-আঢ্বলা মানুচ্চোরে কলঅ, “বেক্কুনো মুজুঙোত্ এইনে থিয়্যে।”
4সে পরেদি তে মানুচ্চুনোরে পুযোর্ গুরিলো, “জিরেবার দিনোত্ কিজু গরানা আমা সুদোমে কি কয়? সিয়েন কি সাহায্য না কি ক্ষতি? জিংকানিগান রোক্ষ্যে গরানা উচিত, না ভস্ত গরানা উচিত?”
মাত্তর্ তারা কনঅ কিজু ন-কলাক্। 5সেক্কে যীশু বিরক্ত ওইনে তারা ইন্দি রিনি চেলঅ আর তারার্ মনানি দরঅ বিলিনে অমকদ দুঘে সেই মানুচ্চুনোরে কলঅ, “তঅ আঢ্তান্ বাবেই দে।”
মানুচ্চো আঢ্তান বাবেই দেনার্ পরেদি তা আঢ্তান এক্কুবারে গম্ ওই গেলঅ। 6সেক্কে ফরীশীগুনে বারেদি সমাজ-ঘরত গেলাক্ আর কিবাবোত্যেগুরি যীশুরে মারে ফেলা যায় সে পৌইদ্যেনে রাজা হেরোদ দল মানুচ্চুনো লগে সল্লা গরা ধুরিলাক্।
প্রভু যীশুর পিজে পিজে মানুচ্চুন্
7-8ইয়েনর পরেদি যীশু তা শিচ্চ্যগুনো সমারে সাগর পারত্ গেলঅ। গালীল রেজ্যর্ বোউত্ মানুচ্ তা পিজে পিজে যাহ্ ধুরিলাক্। যীশু যেদক্কানি কাম গোজ্যে সিয়েনির্ কধা শুনিনে যিহূদিয়াত্তুন, যিরূশালেমত্তুন, ইদোম চাগালাত্তুন্, যর্দন গাঙর্ উপারত্তুন আর সোর আহ্ সীদোন শঅরর্ চেরোকিত্তেত্তুন্ বোউত্ মানুচ্ তাইধু এলাক্। 9যীশু নিজোত্তে এক্কান্ চিগোন নৌকো তা শিচ্চ্যগুনোরে ঠিগ্ গুরি রাগেবাত্তে কলঅ যেন ভিড়োর্ কারনে মান্জ্যে চাবাচাবি গুরিনে তা উগুরে ন-পড়ন্। 10তে বোউত্ মান্জ্যরে গম্ গোজ্যে বিলি পীড়েল্যেগুনে তারে ধুরিবাত্তে ঠেলাঠিলি গত্তন্।
11ভান্ন্যেই আত্মাগুনে যেক্কে তারে দেগিদাক্ সেক্কে তা মুজুঙোত্ মাদিত্ পড়িনে রঅ ছাড়িনে কদাক্, “তুয়ই গোজেনর্ পুয়ো।” 12যীশু খুব কড়াগুরি ভান্ন্যেই আত্মাগুনোরে উগুম দিলো যেন তারা কাররে ন-কন্ তে কন্না।
বারজন শিচ্চ্যরে প্রচারক ইজেবে পদবী দেনা
(মথি ১০:১-৪; লূক ৬:১২-১৬)
13-15ইয়েনর্ পরেদি যীশু মুড়ো উগুরে উদিলো আর নিজোর আওজ্ মজিম্ কিজু মান্জ্যরে তাইধু ডাগি নেযেল। তারা যীশু ইধু এযানার্ পরেদি তে বারজনরে অভিষেক্ গুরিনে নেযেল যেন তারা তা সমারে সমারে থান্ আর ভুদ্ ধাবেবার্ ক্ষেমতালোই তে তারারে প্রচার-কামত্ পাধেই পারে। 16যে বারজনরে তে নেযেয়্যে তারা অলাক্ শিমোন, যিবের নাঙান্ তে দিলো পিতর; 17সিবদিয়র দিবে পুয়ো যাকোব আর যোহন (ইগুনোর নাঙানি তে দিলো বোয়ানের্গিস, অত্তাৎ দেবাপেরাগর্ পুয়োগুন); 18আন্দ্রিয়, ফিলিপ, বর্থলময়, মথি, থোমা, আলফেয়র পুয়ো যাকোব, থদ্দেয়, একবুচ্চ্যে শিমোন, 19আর যিহূদা ইষ্কারিয়োৎ, যে যীশুরে শত্রুগুনো আঢত্ ধুরি দিয়্যে।
প্রভু যীশু আর ভুদ্তুনোর্ রাজা
(মথি ১২:২২-৩২,৪৬-৫০; লূক 8:১৯-২১; ১১:১৪-২৩; ১২:১০)
20যীশু ঘরত্ এযানার্ পরেদি আরঅ এদক্ মানুচ্ তা মুজুঙোত্ তুবেলাক্ যে, তে আর তা শিচ্চ্যগুনে কিজু হেবাত্তেয়ো ন-পেলাক্। 21যীশুর নিজো মানুচ্চুনে এ হবরান্ শুনিনে তারে নিগিলেই নিবাত্তে এলাক্। তারা কলাক্, “তে পাগল ওই যেইয়্যে।”
22যিরূশালেমত্তুন্ কয়েক্কো ধর্ম মাষ্টরে এইনে কলাক্, “তা ভিদিরে বেল্সবূলে আঘে। ইবেয়ই সেই ভুদ্তুনোর নেতা যিবে ভুদ্তুনোরে ধাবেবার খেমতা দিয়্যে।”
23যীশু সেই ধর্ম-মাষ্টরুনোরে ডাগিলো আর শিক্ষ্যে দিবাত্তে কলঅ, শদানে কিবাবোত্যেগুরি শদানরে ধাবেই দি পারে? 24কনঅ রেজ্য নিজো ভিদিরে দলে দলে যুদ্ধো বাঁজিনে ভাগ্ ওই গেলে সেই রেজ্যগান্ ঠিগি ন-পারে। 25আরঅ কনঅ পরিবার যুনি ভাগ্ ওই যায় সালে সেই পরিবার্অ ঠিগি ন-পারে। 26সেনত্যে যুনি শদান রেজ্যত্অ দলত্ ভাগ অন্, সিবে ন-টিগিবো, মাত্তর্ ফারগ্ ওই যেবঅ আর সিয়েনত্ তার থুম্ অবঅ। 27“বোলী মান্জ্যর ঘর কেঅ ভাঙি ন-পারে আর পত্তমে বোলী মানুচ্চোরে বানি ন-রাগেলে কনজনে কি তা ঘরত্ সোমেইনে পযাপিরা লুদেই পারে? বানিলে পরেদি তে সিয়েনি গুরি পারিবো। 28মুই তমারে ঘেচ্চেকগুরি কঙর্, মান্জ্যর্ বেক পাপ্পানি আর গোজেনর্ বিরুদ্ধে অগমানর্ কধানি খেমা গরা অবঅ, 29মাত্তর্ পবিত্র আত্মার্ বিরুদ্ধে অগমানর্ কধানি কনদিন্অ খেমা গরা ন-অবঅ। সে মানুচ্চোর্ পাপ্পানি উমরত্তে থেবঅ।”
30ধর্ম-মাষ্টরুনে যে কোইয়োন্দে, “তারে ভান্ন্যেই আত্মায় পেইয়্যে,” তারার্ সেই কধানিত্তেই যীশু ইয়েনি কলঅ।
31ইয়েনর্ পরেদি যীশুর মাবো আর ভেইয়ুনে সিয়েনত্ এলাক্ আর বারেদি থিয়্যেই থেইনে যীশুরে ডাগিবাত্তে হবর্ পাদেলাক্। 32যীশুর চেরোকিত্তে সেক্কে বোউত্ মানুচ্ বুয়োই এলাক্ আর তারা যীশুরে কলাক্, “তঅ মাবো, ভেইয়ুনে আর বোনুনে বারেদি আগন্, আর তারা তরে চাদন্।”
33যীশু কলঅ, “কন্না মর্ মা, আর কুগুন্ মর্ ভেই?”
34যিগুনে তারে ঘিরিনে বুয়োই এলাক্ তে তারা ইন্দি রিনি চেইনে কলঅ, “এইয়্যে দঅ মর্ মা আর ভেইয়ুন! 35গোজেনর্ আয়োচ্ যিগুনে পালান্ সিগুনোই মর্ ভেই, বোন আর মা।”
Currently Selected:
মার্ক 3: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society