মার্ক 2
2
বেসৎ-পীড়েল্যে গম্ অলঅ
(মথি ৯:১-৮; লূক ৫:১৭-২৬)
1কয়েকদিন পরেদি যীশু আরঅ কফরনাহূমত্ গেলঅ। মানুচ্চুনে শুনিলাক্ তে ঘরত্ আঘে। 2সেক্কে এদক্ মানুচ্ সিয়েনত্ এগত্তর্ অলাক্ যে, ঘর্ দঅ দূরো কধা, দোরান বারেদিয়ো আর জাগা ন-রলঅ। যীশু মানুচ্চুনো ইধু গোজেনর্ কধা ফগদাং গুরিলো। 3এমন্ সময়োত্ কয়েক্কো মানুচ্ এক্কো বেসৎ-পীড়েল্যেরে তাইধু আনিলাক্। চের্জন মান্জ্যে তারে বুয়োই আনিলাক্, 4মাত্তর্ ভিড়োত্তে তারা তারে যীশু ইধু নেযেই ন-পারিলাক্। ইয়েনত্তে যীশু যিয়েনত্ এলঅ ঠিগ্ তা উগুরে ঘর ছালর্ কিজু ভাগ্ তারা সোরেই ফেলেলাক্। সে পরেদি সেই খুলো জাগানদি পাদি সুদ্ধো সেই বেসৎ-পীড়েল্যেবোরে তলেদি লামেই দিলাক্। 5যীশু তারার্ বিশ্বেজ্ দেগিনে সেই বেসৎ-পীড়েল্যেবোরে কলঅ, “ও গাবুজ্যে, তঅ পাপ্পানি খেমা গরা অলঅ।”
6সিয়েনত্ কয়েক্কো ধর্ম-মাষ্টর্ বুয়োই এলাক্। তারা মনে মনে ভাবদন্, 7“মানুচ্চো এবাবোত্যে কধা কর্ কিত্ত্যে? তে দঅ গোজেনরে অগমান্ গরের্। বানা এক্কো গোজেন বাদে কন্না পাপ খেমা গুরি পারে?”
8তারা যেদক্কানি ভাবদন্ সিয়েনি যীশু নিজোর্ মনত্ সেক্কেনে বুঝি পারিলো। ইয়েনত্তে তে তারারে কলঅ, “তুমি কিত্ত্যে মনে মনে সিয়েনি ভাবর্? 9এই বেসৎ-পীড়েল্যেবোরে কুবোন্ কনা সোজা- ‘তর্ পাপ্পানি খেমা গরা অলঅ,’ না, ‘উঠ্, তঅ পাদিবো তুলিনে আঢি বেড়া’? 10মাত্তর্ তুমি যেন হবর্ পঅ পিত্থিমীত্ পাপ খেমা গুরিবার্ খেমতা মান্জ্য পুয়োবোর্ আঘে”-ইয়েন সং কোইনে তে সেই বেসৎ-পীড়েল্যেবোরে কলঅ, 11“মুই তরে কঙর্, উঠ্, তঅ পাদিবো তুলিনে ঘরত্ যাহ্।”
12সেক্কেনে সেই মানুচ্চো উদিনে তা পাদিবো তুলিলো আর বেক্কুনো মুজুঙেদি বারেদি গেলঅ। ইয়েন্দোই বেক্কুনে আমক্ ওইনে গোজেনরে বাঈনী গুরি কলাক্, “আমি কনদিন্অ এবাবোত্যে ন-দেগিই।”
প্রভু যীশু লেবিরে ডাগিলো
(মথি ৯:৯-১৩; লূক ৫:২৭-৩২)
13পরেদি যীশু আরঅ গালীল সাগর পারত্ গেলঅ। সেক্কে বোউত্ মানুচ্ তাইধু এলাক্, আর তে তারারে শিক্ষ্যে দিয়্যে ধুরিলো। 14ইয়েনর্ পরেদি তে পধেদি যাদে যাদে দেগিলোদে আল্ফেয়র পুয়ো লেবি খাজানা তুলেদে ঘরত্ বুয়োই এলঅ। যীশু তারে কলঅ, “আয়, মঅ শিচ্চ্য অগি।” সেক্কে লেবি উদিনে যীশু লগে গেলঅ।
15পরেদি যীশু লেবি ঘরত্ হেবাত্তে বুজিলো। সেক্কে বোউত্ খাজানা-তুলিয়্যে আর বজং মানুচ্চুনেয়ো যীশু আর তা শিচ্চ্যগুনো লগে হেবাত্তে বলাক্, কিয়া বোউত্ মানুচ্ যীশু লগে লগে যাদন্। 16ফরীশী দলর্ ধর্ম-মাষ্টরুনে যেক্কে দেগিলাক্ যীশু খাজানা-তুলিয়্যে আর বজং মানুচ্চুনো সমারে হার্ সেক্কে তারা তা শিচ্চ্যগুনোরে কলাক্, “তে খাজানা-তুলিয়্যে আর বজং মানুচ্চুনো সমারে হানা-দানা গরের্ কিত্ত্যে?”
17এ কধাগান্ শুনিনে যীশু সেই ধর্ম-মাষ্টরুনোরে কলঅ, “গম্ মানুচ্চুনোত্তে ডাক্তরর্ দরকার নেই বরং পীড়েল্যেগুনোত্তে দরকার্ আঘে। মুই ধার্মিক্কুনোরে ডাগিবাত্তে ন-এজং বরং পাপীগুনোরে ডাগিবাত্তে এচ্চ্যং।”
উবোস্ থানা পৌইদ্যেনে শিক্ষ্যে
(মথি ৯:১৪-১৭; লূক ৫:৩৩-৩৯)
18একবার বাপ্তিস্মদিয়্যে যোহন শিচ্চ্যগুনে আর ফরীশীগুনে উবোস্ পালাদন্। সিয়েন দেগিনে কয়েক্কো মানুচ্ যীশু ইধু এইনে কলাক্, “যোহন শিচ্চ্যগুনে আর ফরীশীগুনোর্ শিচ্চ্যগুনে উবোস্ পালাদন, মাত্তর্ তঅ শিচ্চ্যগুনে উবোস্ ন-থান্ কিত্ত্যে?”
19যীশু তারারে কলঅ, জামেই সমারে থাগদে কি জামেয় সমারে মানুচ্চুনে উবোস্ থেই পারন্? যেদক্দিন জামেবো সমারে থায় সেদক্দিন তারা উবোস্ থেই ন-পারন্। 20মাত্তর্ সময় এজের্ যেক্কে তারাত্তুন্ জামেয়রে কারি নেযা অবঅ, আর সেই অক্তত্ তারা উবোস্ থেবাক্।
21“কেঅ পুরোন্ সিলুমোত্ নূয়ো কাবড় তালি ন-দুয়োন। যুনি দুয়োন্ সালে সেই পুরোন্ কাবড়ত্তুন্ নূয়ো তালিগান্ ফাদি এজে। 22পুরোন্ চামাড়া থৈল্যেত্ কেঅ তচ্-তাজা আংগুর-রস ন-থন্। যুনি থন্ সালে তচ্-তাজা রসত্তে থৈল্যেবো ফাদি যেইনে রস আর থৈল্যে দ্বিবেই বর্বাদ্ অয়। তচ্-তাজা রস নূয়ো থৈল্যেত্ থুয়ো অয়।”
জিরেবার দিন্নো পৌইদ্যেনে শিক্ষ্যে
(মথি ১২:১-৮; লূক ৬:১-৫)
23এক জিরেবার্ দিনোত্ যীশু শোজ্যখেদ ভিদিরেদি যার্। তা শিচ্চ্যগুনে যাদে যাদে শিজে ছিনে ধুরিলাক্। 24সেক্কে ফরীশীগুনে যীশুরে কলাক্, “ধর্মর সুদোম্ মজিম্ জিরেবার দিনোত্ যিয়েন্ গরানা উচিত্ নয় সিয়েন তারা কিত্ত্যে গত্তন্?”
25-26যীশু জোব্ দিলো, “অবিয়াথরে যেক্কে দাঙর্ ধর্মগুরু এলঅ সেই অক্তত্ দায়ূদ আর তা সমাজ্যেগুনোর একপল্লা পেট পুজ্যে, মাত্তর্ তারা সমারে কনঅ হানা ন-এলঅ। সেক্কে দায়ূদে যিয়েন গোজ্যে সিয়েন কি তুমি কনদিনঅ ন-পড়অ? তে দঅ গোজেনর্ ঘরত্ সুমিনে মুজুঙো-রুটি খেইয়্যে আর ধর্মগুরুগুনে বাদে কারর্ কনঅ হানার্ সুদোম ন-এলঅ।”
27যীশু তারারে আরঅ কলঅ, “মান্জ্যত্তে জিরেবার্ দিন্নো গরা ওইয়্যে, মাত্তর্ জিরেবার দিন্নোত্তে মান্জ্যরে বানা ন-অয়। 28সেনত্তে মান্জ্য পুয়োবো জিরেবার দিন্নোর্ গিরোজ্।”
Currently Selected:
মার্ক 2: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society