JOB 40
40
1Cun Bawipa nih Job cu a thawh i:
2“Minung nih Lianngan Bik
he bia an i al tikah hin
lungṭhawng in um awk a si maw?
Pathian he bia aa almi nih hin
a leh ṭhan awk
a si hnga maw?” a ti.
3Cun Job nih Bawipa cu a leh i:
4“Zei rel awktlak a si lomi kei nih hin
nangmah cu zeitindah
ka leh khawh lai?
Ka kut in ka ka kaa huh ah
a ṭha deuh lai.
5Voi khat ka chim cang i
ka chim ti lai lo;
Voi hnih ka chim cang i
cu bantukin
ka chim ṭhan ti lai lo,” a ti.
Pathian Ṭhawnnak A Langhnak
6Cun Bawipa nih Job cu phuchim chungin a leh i:
7“Na tai i sawmh law pa bantukin
dir tuah;
Bia kan hal lai i na ka leh lai.
8Nangmah cu na ding lo na ka ti ngam
lai maw?
Asiloah, nangmah cu na din nakhnga
keimah cu na palh na ka ti lai maw?
9Pathian kut bantuk kut na ngei maw?
Amah aw bantukin khuarit in
na ri kho maw?
10“Lianhngannak le hmaizahnak in
i fam law
Sunparnak le rumra in i thuam tuah.
11Na thinhunnak cu chuahter law
aa porhlawmi paoh cu zoh hna law
ṭhum hna.
12Aa porhlawmi paoh cu zoh hna law
tangah ṭhum ko hna;
Cun miṭhalo hna cu an dirnak ah khan
lam hna.
13Leidip lakah khan hmunkhat ah
thup dih hna;
Hngalh lomi thlan ah khan
thup men hna.
14Khi tikah nangmah cu, nangmah
orhlei kut lila nih an khamh khawh
ti kha kan hngalhpi lai.
15“Tisartlam, saram vialte bawi khi
ruat hmanh,
Saṭil cu ram bantukin a ei hna.
16A tai i a thazang le a paw tit i
a ṭhawnnak khi zoh hna hmanh.
17A mei cu sidar thing bantukin
a ṭhom i
A phei thahri cu a phiar in
an i phiar.
18A ruh hna cu dar peng an si,
a kutke hna cu thir tluan an si.
19“Amah cu Pathian sermi thil hna
lakah pakhatnak a si;
Amah tluk a simi kha a uk hna.
20Tlang cung i a tlongmi saṭil kha
a rawl ah a seh hna i
Ramlak saram vialte cu
a khai dih hna.
21Tumpu bur tangah a bawk,
phaikung tang le cerh ah aa thup.
22Tumpu bur nih thladem a demh i
tivate inhliam kung nih an kulh.
23Tiva cu a hung lenh zongah
a thin a phang lo;
Jordan Tiva nih a ka tiang
phan hmanh seh law a duh in
aa chawk ko.
24Aho tal nih sio in an sio kho maw?
A hnar ah rap hri in
an thil kho maw?
Currently Selected:
JOB 40: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006