JOB 41
41
1“Leviathan cu nga sio in
na hnuk kho hnga maw?
Asiloah, hrihrual in a lei
na khit hnga maw? #Slm 74.14; 104.26; Isa 27.1
2A hnar cu hri in na thil kho
hnga maw?
A kha chungah sio na banh kho
hnga maw?
3Ka zaangfah ko tiah an nawl
hnga maw?
Bianem in, ka nunnak cu ka zuah ko,
tiah an lem hnga maw?
4Zungzal in na sal a si nakhnga
dingah,
nangmah he biakamnak a tuah
lai maw?
5Vate bantukin lente naa celhpi khawh
lai maw?
Asiloah, hlasak thiammi vate
bantukin,
na nu hna caah na khih khawh
lai maw?
6Chawlettu hna nih amah cu
an i cuh lai maw?
Chawdawr pawl hna nih
an i ṭhenphaw lai maw?
7A cuar cu fei in na chun kho
lai maw?
A lu cu nga tlaihnak fei in nan chun
kho lai maw?
8Amah cu na tlaih sual a si ahcun,
nan i sual len ding kha ruat hmanh;
Mah cucu na tuah ṭhan duh ti bal ding a si lo.
9“Amah tlaih timh cu hnabei dong
a si,
pathian hna hmanh nih an hmuh ah
an khuaruah a har lo maw?
10A thawh cang ahcun, zeitluk in dah
ṭihnung a si,
Ahodah a dir-onh ngam lai?
11Amah a dotu paoh cu, ahodah
hmapu loin a um hna?
Van kaupi tangah hin pakhat hmanh
an um lo.
12“A kutke kong si seh, a ṭhawngmi
a thazang kong siseh,
a tungtai dawhnak kong siseh,
ka chim rih tuah lai.
13Aho nih dah a puan a leng thuah kha
a hawh khawh lai?
A thir angki thuah hnih cu
aho nih dah
a chunh i a hlanh khawh lai?
14Aho nih dah a hmai innka cu
a hun khawh lai?
A ha tian cu ṭihnung a si.
15A keng cu a thuah in aa thuahmi
phaw bantuk a si,
Ṭeklung vampang in kulhmi bantuk
a si.
16Pakhat le pakhat cu an i naih tuk caah
an karlak ah khan thli a lut kho lo.
17Pakhat le pakhat kha an i peh dih,
an i tlai dih i ṭhen khawh an si lo.
18A hachiau tikah ceunak an choi
ukmak i
A mit hna cu zinglei ceu bantuk khi
an si.
19A kaa chungin aa hliau duakmakmi
mei-alh an chuak i meici
an pet lulhmalh.
20A tlok hluahmahmi um chung
bantuk le
a kang hluahmahmi phaiphawk
bantukin,
A hnar chungin meikhu a chuak.
21A thaw nih cun lung meihol kha
a alhter khawh i
a kaa chungin meizik a chuak.
22A hngawng ah khan ṭhawnnak a um i
a hmai ah khan ṭihnak a laam.
23A paw cuar cu a chah i zeihmanh nih
a khoihverh kho lo.
24A lung cu lung bantukin a hak,
Fangrialnak lung a tanglei u
bantukin a hak.
25A hung thawh tikah miṭhawng hna
kha an thin a phang,
A mei a hun vuak tikah, a umtu awk
an hngal lo.
26Vainam nih a phan nain zeihmanh
a ṭhahnem lo,
Fei zong nih, thal zong nih,
feipi zong nih,
a zei an poih hlei lo.
27Thir cu capawl tluk ah a rel i
dar cu thing mot tluk ah a rel.
28Cantiang nih a tei lo,
Lungherh chehnak lung hna cu
a caah favai tluk men an si.
29Anih caah cun tanbo cu
phaikung men a si i
Feipi a awnh vungmang cu
a nih men ko.
30A paw cuar cu peipahau kuai haar
bantuk a si,
Rawl velhnak sobulpi bantukin
nawncek lakah cun a lawn.
31Ti thuk cu um bantukin a tlawhter,
Tibual cu kheng chung zihmui
hngerh bantukin a hngerh.
32A kal tikah hin a hnulei in ti a lehmi
cu a ceu pah thluahmah i
Ti thuk cungah khin, tuuhmul raang
vuan lulh hna seh law
cu ko cu a lo.
33Ṭihnak zeihmanh ngei loin
ser a si caah vawlei cungah hin
amah tluk zeihmanh an um lo.
34Sermi thil vialte, a sang bikbik hna
hmanh kha a zawmhtaih hna,
Aa porhlaw vemi saram vialte lakah
amah cu siangpahrang a si.
Currently Selected:
JOB 41: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006