1 SIANGPAHRANG 6
6
Solomon Nih Bawipa Inn A Sak
(2Cha 3.1-14)
1Israel mi Izipt ram in an chuah hnu kum za li le kum sawm riatnak kum, Solomon nih Israel mi a uk hna kum linak kum, thla hnihnak thla a simi Ziv thla chungah khan Bawipa inn sak hram cu a thawk. 2Siangpahrang Solomon nih Bawipa ca i a sakmi inn cu a sau dong sawm ruk, a kauh dong kul le a san dong sawm thum a si. 3Cun cu inn ṭuangpi hmailei i innleng cu a inn vang can in dong kul a sau i inn hmaiah cun dong hra a kau. 4Cun inn thlalangawng cu thing kharvar in a ser hna. 5Cun inn vampang hrul cun inn pakhat a sak fawn i cu nih cun inn vampang cu a kulh dih; ṭuangpi le chungchin hmunthiang zong kha a kulh chih hna; cun a velchum in dal tete a ser hna.a 6A tangnung bik dal cu dong nga a kau, a lailak dal cu dong ruk a kau i a pathumnak cu dong sarih a kau; a dohtu kaan hna cu vampang chungah hluh an si nakhnga lo, inn velchum vampang a lenglei ah khan a fonghlei a ser hna.
7Inn kha an sak tikah lung khoihnak hmun i remh ciami lung in a si, cucaah sobul thawng siseh, hreitlung thawng siseh, thir hriamhrei thawng siseh, an sak lioah khan, zei thawng hmanh biakinn chungah cun a leng lo.
8Dot tangnung bik i luhnak cu inn i a thlanglei kamah a si i dot lailak ah cun hlei in hung kai a si i dot lailak cun dot thumnak ah cun kai chin a si. 9Cuticun inn cu a sak i a lim; cun cu inn siling cu sidar thing tlang le thing per in a ser. 10Biakinn a velchum i an sermi a dot hna cu a san dong nga cio a si i sidar thing in a fonghlei hna khan innpi ah cun a tlaihter hna.
11Cun Bawipa bia cu Solomon sinah a ra i, 12“Hi inn na sak liomi kongah hin, ka nawlbia kha na ngaih hna i ka phunglam kha na zulh hna i ka phungbia kha na tuah hna i na zulh hna ahcun, na pa David sinah ka rak chimmi ka bia kha nangmah sinah ka fehter lai. 13Cun Israel mi hna sinah khan ka um lai i ka mi Israel mi kha ka hlawt hna lai lo,” tiah a ti.
14Cucaah Solomon nih cun inn kha a sak i a lim. 15Cun inn vampang cu a chunglei in sidar thing a benh; zelṭuang in siling inntling tiang, a chunglei cu thing a benh hna i a ṭuang ah cun saipres zel a hman. 16Cun inn hnulei dong kul cu zelṭuang in inntling tiang sidar thing in a ser i mah hihi a chungah, chungchin hmunthiang, a thiang bik hmun caah khan a ser. #Exo 26.33-34 17Cun innpi, cucu chungchin hmunthiang in hmailei i a ummi ṭuangpi kha, mah kha kha dong sawm li a sau. 18Cun innchung i sidar thing hna cu umruang le pangpar mui in an ṭial hna; a dihlak in sidar thing lawngte a si dih, lung cu pakhat hmanh a lang lo. 19Bawipa biakamnak kuang chiahnak caah khan inn chung i a chung bik hmun ah chungchin hmunthiang kha a timh. 20Chungchin hmunthiang cu dong kul a sau, dong kul a kau i dong kul a sang i sui thiang in a hut dih. Cun sidar thing biakṭheng zong a ser. 21Cun inn cu Solomon nih a chunglei kha sui thiang in a hut i chungchin hmunthiang hmaiah khan sui hri a zam hna i sui in a hut. 22Cun inn cu a dih cikcek hlantiang, inn cu a ning piin sui in a hut. Chungchin hmunthiang i a ummi biakṭheng zong kha a ning piin sui in a hut. #Exo 30.1-3
23Chungchin hmunthiang chungah khan cherubim pahnih oliv thing in a ser hna i dong hra veve an sang. #Exo 25.18-20 24Cherub thla pakhat cu dong nga a sau i cherub thla a dang pakhat cu dong nga a sau; cucaah a thla khattelei par in a thla dang khattelei par tiang dong hra a si. 25Cun cherub a dang pakhat zong kha dong hra a si ve; cherub cu an pahnih in an hmetngan le an muisam aa khat. 26Cherub pakhat cu dong hra a sang, cu bantukin a dang pakhat zong cu a si ve. 27Cherubim hna cu inn chung bik hmun ah khan a chiah hna; cherubim thla hna cu pakhat thla nih vampang pakhat, a dang pakhat thla nih khattelei vampang kha a tawng dingin a chiah hna i a dang an thla kha inn laifang ah cun an i tawng. 28Cun cherubim cu sui in a hut hna.
29Inn vampang vialte cu a velchum in cherubim muisam le tumkung le pangpar mui in a chunglei khaan he a lenglei khaan he a ṭial dih hna. 30Inn cu a chunglei dal he a lenglei dal he a zelṭuang kha sui in a hut hna.
31Chungchin hmunthiang i va luhnak ah innka oliv thing in a ser hna; innka cung le innka tung hna nih innka cu kil nga ngei an siter hna. 32Oliv thing in sermi innka pahnih hna cu cherubim le tumkung le pangpar mui in a suai hna i sui in a hut hna i cherubim le tumkung cu sui in a nalh hna.
33Cu bantuk ṭhiamṭhiam in ṭuangpi vung luhnak innka tung hna zong kha oliv thing in, tungvangpalh in a ser hna i, 34saipres thing in sermi innka pahnih zong a ser hna; innka pakhat i a khar pahnih hna cu bil khawh an si i a dang innka pakhat i a khar pahnih hna zong cu bil khawh an si ve. 35Cun an cungah cherubim le tumkung le pangpar muisam kha a ker hna; cun cu kermi muisam hna cu sui in nal tein a hut hna. 36Cun a chung deuh tual cu remhmi lung thap thum le sidar thingphel thap khat in a ser.
37A kum linak, Ziv thla ah Bawipa inn hram cu bunh a si. 38Cun a kum hleikhatnak, thla riatnak thla a simi Bul thla ah inn cu a dihlak in le rak tuakning te khan, lim a si. Kum sarih chung a saknak ah a rau.
Currently Selected:
1 SIANGPAHRANG 6: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006