1 SIANGPAHRANG 5
5
Solomon Nih Biakinn Sak A Timh
(2Cha 2.1-10)
1Tair siangpahrang Hiram nih Solomon cu a pa hmun ah siangpahrang ah an ser cang ti kha a theih tikah, a sinah sinum kha a hei thlah hna; zeitintiah Hiram nih David cu a rak dawt zungzal. 2Cun Solomon nih Hiram cu bia a hei cah i, 3“Bawipa nih a keza tangah a chiah hna hlantiang a ral hna nih a kenkip in an dum caah, ka pa David nih Bawipa a Pathian min caah inn a sa kho lo ti kha na hngalh. 4Sihmanhsehlaw atu cu Bawipa ka Pathian nih a kenkip ah daihnak a ka pek i ral siseh, vanchiatnak siseh a um lo. 5Cucaah Bawipa nih ka pa David sinah, ‘Nangmah hmun ah, na bawi ṭhutdan cungah ka chiah laimi na fapa nih ka min caah inn cu a sak te lai,’ tiin a rak ti bang khan, Bawipa ka Pathian min caah inn ka sa lai, tiah kaa tim. #2Sam 7.12-13; 1Cha 17.11-12 6Cucaah Lebanon tlang i sidar thing cu an ka haupiak nakhnga nawl pe hna; cun ka sinum hna nih na sinum hna kha an bawmh hna lai i nangmah nih na khiahning bantukin na sinum hna cu ṭuan man ka pek hna lai; zeitintiah Sidon mi tlukin thing saih a thiammi kan lakah an um lo ti kha na hngalh,” tiah a ti.
7Hiram nih Solomon bia kha a theih tikah a lung aa lawm ngaingai i, “Hi a nganmi miphun cung i a um dingah David kha a fimmi fapa a petu Bawipa cu nihin ah hin thangṭhat si ko seh,” tiah a ti. 8Cun Hiram nih Solomon sinah cun mi a hei thlah hna i, “Bia na ka cahmi kha ka rak theih; sidar thing le saipres thing kong ah na duhmi paoh tuahpiak awkah kaa tim ko. 9Ka sinum hna nih Lebanon tlang in rili ah an vun kalpi lai; cun na ka tinhmi hmun i rili in kalpi awkah puum ah ka ser hna lai i khika ah cun ka phoihter hna lai i nang nih na rak lak hna lai; cun ka duhnak cu ka innchungkhar cu rawl na rin hna lai,” tiah a ti. 10Cucaah Hiram nih Solomon cu sidar thing le saipres thing a duhmi vialte kha a pek, 11cun Solomon nih Hiram cu, a innchungkhar hna ca rawl ah changvut phorh thong kul le chiti phorh thong kul a pek. Solomon nih mah hihi kum khat hnu kum khat a pek lengmang. 12Cun Bawipa nih Solomon cu bia a kam bang khan fimnak a pek; cun Hiram le Solomon karlak ah remnak a um i annih pahnih nih hnatlaknak an ser.
13Cun Solomon Siangpahrang nih khan Israel mi vialte chungin rian ṭuan awk i hnekmi bu a ser i cu hnekmi bu cu mi thong sawm thum an si. 14Cun thla khat ah thong hra lengmang in, aa chang lengmang dingin, Lebanon ah a kuat hna; Lebanon ah thla khat, cun inn ah thla hnih lengmang an um; cu hnekmi bu a uktu ah cun Adoniram a si. #1Sia 12.18 15Cun Solomon nih cun thil phortu sang sarih le tlangram i lung ceektu sang riat zong a ngeih hna, 16cu hna hleiah cun Solomon nih rian a ṭuantu mi a zohtu hna bawi ngan deuh pawl thong thum le za thum zong a ngeih fawn hna. 17Siangpahrang nih nawl a pek hna bantukin, inn hram cu remhmi lung in ser awkah, a nganmi le a man a sungmi lung kha an khoih hna. 18Cuticun inn satu pawl, Solomon mi hna le Hiram mi hna le Gebal mi hna nih, innsaknak caah cun lung kha an remh hna i thing kha an timh hna.
Currently Selected:
1 SIANGPAHRANG 5: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006