1 SIANGPAHRANG 12
12
Israel Mi An Tho
(2Cha 10.1—11.14)
1Rehoboam cu Shekhem ah a kal, zeitintiah amah cu siangpahrang i ser awkah Israel mi vialte cu Shekhem ah an ra. 2Cun Nebat fapa Jeroboam nih a theih tikah (amah cu Siangpahrang Solomon sinin a zamnak khan Izipt ram ah a um ko rih), Jeroboam cu Izipt ram cun a hung kir. 3Cun amah cu an hei cah i an kawh; cun Jeroboam le Israel mi aa pummi vialte nih cun Rehoboam sinah cun an ra i, 4“Na pa nih kan seihnam cu a rihter ko. Cucaah nang nih cun na pa nih kan cungah rian har le seihnam rit a kan khinhmi cu zanter law na rian kan ṭuan lai,” tiah an ti. 5Cun anih nih a thawh hna i, “Ni thum in va kal rih u law, cun ka sinah ra ṭhan te u,” tiah a ti. Cucaah mi cu an kal.
6Cun Siangpahrang Rehoboam nih cun, a pa Solomon a nun lio i a hmai i a rak dirmi tar hna kha ruahnak a hal hna i, “Hi mi hna hi zeitin va let hna ti ah dah nan ka ti?” tiah a ti. 7Cun annih nih an thawh i, “Hi mi hna sal ah hin nihin cu naa can i an rian na ṭuanpiak hna i, na leh hna tikah bia ṭha in na chawnh hna ahcun annih cu a zungzal in na sal an si lai,” tiah an ti. 8Sihmanhsehlaw upa hna nih fim an chimhmi kha a hlawt i amah ṭhirual a hmaiah a um tawnmi tlangval hna kha ruahnak cheuh a hal hna. 9Annih cu a thawh hna i, “ ‘Na pa nih kan cungah a kan khinhmi seihnam rit hi zanter tuah,’ tiah a ka timi hna hi zeitindah ka leh hna lai, zei ruahnak dah nan ka cheuh lai,” tiah a ti. 10Cun amah ṭhirual tlangval hna nih khan amah cu, “Na pa nih cun kan seihnam kha a rihter ko, sihmanhsehlaw nang nih cun kan zanterpiak ko,’ tiah na sinah a titu, hi mi hna sinah cun hi bangin na chim lai; hi bangin annih sinah, ‘Ka hngete cu ka pa tai nakin a chah deuh. 11Cucaah atu cu ka pa nih nan cung i a ritmi seihnam a chiahmi ah khan kan chap chin hna lai. Ka pa nih fungfek in an chimhhrin hna, sihmanhsehlaw kei nih cun tlangngaikuang in kan chimhhrin hna lai, na ti lai,” tiah an ti.
12Cucaah siangpahrang nih, “Ni thumnak ni ah ka sinah ra te u,” tiah a ti bang khan, Jeroboam le mi vialte cu Rehoboam sinah ni thumnak ni ah an ra. 13Cun siangpahrang nih cun, upa nih fim an chimhnak kha hlaw in mi cu hrang piin a rak leh hna, 14tlangval pawl nih lungthin an cheuhning khan annih cu a rak ti hna i, “Ka pa nih nan seihnam cu a rak rihter ko, sihmanhsehlaw nan seihnam cu ka rihter chin lai; ka pa nih fungfek in an chimhhrin hna, sihmanhsehlaw kei nih cun tlangngaikuang in kan chimhhrin hna lai,” tiah a ti. 15Cucaah siangpahrang nih mi cu an bia a ngai hna lo; zeitintiah Bawipa nih Shilon mi Ahijah kha hmang in Nebat fapa Jeroboam sinah bia a chimmi kha tlinter awk caah Bawipa nih mah ti hin thil kha a mersan.
16Cun Israel mi vialte nih, siangpahrang nih kan bia a ngai lo ti kha an hmuh tikah, mi zapi nih cun siangpahrang cu an leh i,
“David chungah zei covo dah
kan ngeih?
Jesse fapa chungah ro kan ngei lo.
Maw Israel, nan thlam ah kal dih u!
David, nangmahte nih
na inn chungkhar cu
i zohkhenh ko,” an ti.
Cucaah Israel mi cu an thlam cio ah an tlung. #2Sam 20.1 17Sihmanhsehlaw Judah ram khua chung i a ummi Israel mi kha cu, Rehoboam nih a uk hna. 18Cun hnekmi rian zohkhenhtu a simi bawi Adoram kha Rehoboam Siangpahrang nih a hei thlah i Israel mi vialte nih thi lak in lung in an rak cheh. Cun Siangpahrang Rehoboam cu Jerusalem i zam awkah khulrang in a rangleng kha aa cit. 19Cucaah Israel mi nih cun David innchungkhar hna cu nihin tiangin an doh hna. 20Cun Israel mi vialte nih Jeroboam kha a kir ṭhan cang, tiah an theih tikah, an i pumhnak ah khan an hei cah i an kawh i Israel mi vialte cung siangpahrang ah an ser. Judah phun lawnglawng dah ti lo cu, David innchungkhar a zulmi cu ahohmanh an um lo.
21Rehoboam cu Jerusalem ah a rat tikah, Judah innchungkhar vialte le Benjamin phun kha, ralkap thim ciammammi sing khat le sang riat kha Israel mi innchungkhar kha doh i Solomon fapa Rehoboam ram kha lak ṭhan awkah, a pumh hna. 22Sihmanhsehlaw Pathian mi Shemaiah sinah khan Pathian bia a ra i, 23“Judah siangpahrang Rehoboam, Solomon fapa le Judah le Benjamin innchungkhar vialte le a dangmi vialte sinah khan, 24hi bangin Bawipa nih, ‘Nan hung kal awk a si lai lo i nan unau Israel mi cu a doh zong nan hung do hna lai lo. Hi thil cu keimah sinin a rami a si caah nan inn cio ah kir dih u,’ a ti, tiah va chim,” tiah a ti. Cucaah Bawipa bia cu an ngaih i Bawipa bia bangin an inn cio ah an kir ṭhan.
Jeroboam Nih Israel Mi Sualnak Ah A Luhpi Hna
25Cun Jeroboam nih Efraim tlangram ah Shekhem kha a sak i khika ah a um; cun khika in a chuak i Penuel kha a sak. 26Cun Jeroboam nih a lung chungin, “Atu cu pennak hi David innchungkhar sinah a kir ṭhan ko lai, 27hi mi hna nih hin Jerusalem khua chung i Bawipa inn ah raithawinak pekchanh awkah an hung kal ahcun, khi tikah hi mi hna lung hi an bawipa, Judah siangpahrang Rehoboam sinah khan a kir lai i kei cu an ka thah lai i Judah siangpahrang Rehoboam sinah khan an kir ṭhan lai,” tiah a ti. 28Cucaah siangpahrang nih ruahnak a hal hna i sui cawfa pahnih a ser. Cun mizapi kha a thawh hna i, “Jerusalem i nan hung kal lengmang hi a za cang. Maw Israel mi hna, Izipt ram in a hun in chuahpitu hna nan pathian hi zoh tuah hna u,” tiah a ti. #Exo 32.4 29Cun pakhat cu Bethel ah a chiah i a dang pakhat cu Dan ah a chiah. 30Cun mah thil hi sualnak ah a cang, zeitintiah mi nih Bethel i a ummi sinah khan le a dang Dan i a ummi tiang khan an kalhnawh hna. 31Khuahrum bo hna ah khan inn a sak hna i mi hna chung khan, Levi miphun a si lomi kha tlangbawi ah a chiah hna. 32Cun Jeroboam nih thla riatnak thla a ni hleinga ni ah khan, Judah ram chung i a ummi puai bantuk puai pakhat ngeih awk a si lai, a ti i biakṭheng cungah raithawinak kha a pekchanh hna; cu bangin Bethel khua ah cun a tuah, amah nih a sermi cawfa hna kha raithawinak a pekchanh hna. Cun khuahrum bo a sermi ca i tlangbawi hna cu Bethel ah a chiah hna. #Lev 23.33-34 33Bethel khua chung i a ummi, amah nih a sermi biakṭheng ah cun, amah nih amah lung chung tein a tuaktanmi thla, thla riatnak thla, a ni hleinga ni ah cun a hung kal i Israel mi caah puai pakhat kha a fehter i zihmui khangh awkah biakṭheng ah khan a hung kal.
Currently Selected:
1 SIANGPAHRANG 12: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006